Read idege IJOCHUWA 2 Bible Online

IJOCHUWA 2 - idege bible

IJOCHUWA 2

¹Ọọwa, iJochuwa à du alịbaje angị imiiye ịhyẹ ịbaa-ịbaa bwu ịkampụ nyaa i-iChitim kele nyọka wụla ọpyị nya iKenan yẹ lẹlẹ. Ọ byaa yẹkẹẹ, “Anụ wụla ọpyị ọwẹ yẹ mẹ, ọgụgụ wuu ri epweji nya iJeriko.” Ọọwa, ị kele lẹ, ị ka ẹpwa nya ọlakpara ọlẹ ka ẹnyị nyamwụ ri iRehabụ kaka hyehe ụ-ụwa lẹlẹ.

²Ụka ọọwa, adịrahụ nya ala iJeriko wo oja ya angịhyẹ nya ala Isirẹlụ nyị wẹ juwa lodu ọọwa nyọka wụla ọpyị nyaa yẹ.

³Ọọwa, ọ du ẹrụ ka byi iRehabụ yẹkẹẹ, “Alẹng ịlẹ kị wẹ ẹpwa nyang wẹẹ wẹ̀ nyọka wụla ọpyị nyahị ọlẹ wuu yẹ! Gbaa kpehe warị!”

⁴IRehabụ wẹ byaa yẹkẹẹ, “Ịlẹhị lẹ, alẹng ịhyẹ wẹ ẹpwa nyam, ma ḿ tị jẹ ẹga kị bwu ka.” Ọwa ayịdang tị lẹẹ̀ tụ alẹng imiiye ịịwa kpịbaa ụka ọwẹ lẹ.

⁵IRehabụ myịmyị byaa yẹkẹẹ, “Ị rụ ene kịị tụ ogirigba ku lobyi. Ḿ tị jẹ ẹga kị yahị da ka koo. Anụ kwaa ahyaahị mẹ, aalẹ anụ ka waa myị wẹẹ̀.”

⁶Ọ tị ya alịbaje ịwẹ kpịbaa e-ekpeleji nya ìwú ịfụlakịsị ịlẹ kọ ya guru ẹ-ẹpwayịrẹtẹ nya ẹpwang nyamwụ.

⁷Ọọwa, alẹrụ nya adịrahụ à kpehe nyọka ku alịbaje ịịwa lẹ, ị tụ ogirigba ku lẹlẹ. Ị pịlahị nyaa lalaala ka ju ka ẹga o-bwu kpoye nya Ihu ịJọdan.

⁸Ene ká alịbaje ịwẹ ka nune, iRehabụ baa kele kà ẹpwayịrẹtẹ nya ẹpwang nyamwụ lẹ,

⁹ọ byaa yẹkẹẹ, “M jẹ ká Amkpaa ya ọpyị ọlẹ hanụ anụ ala Isirẹlụ lẹ. Ịnyị à du kaahị alọpyị ọlẹ wuu dapwụ hụ amẹ ọọ-lajị nyanụ lẹ.

¹⁰Ahị wo jaabwọ ká Amkpaa chị Ihu Oletungkohyo eku i-ijata nyanụ ụka kanụ juwa jẹ kpehe bwu Ijipiti. Ahị wo ịnyịnyị jaabwọ kanụ nwụ iSihọn bala Ọọgụ ịdịrịhụ imiiye nya ala Amọ ịlọmwẹnụ-ụtụrụ nya ịJọdan.

¹¹Ahyaahị kahị wo ẹla ọọwa, ahị ju uhi ọtụka-ọtụka. Ọhụ-ụ́ ba ọngọngọhẹ nyahị e-eji ka ọọ-lajị nyanụ. Amkpaa Ohe Oluhye nyanụ à ri Ohe Oluhye nya epwoohe bala odehe lẹ.

¹²Lẹẹlẹ, anụ nwa iro ham la ẹnyị nya Amkpaa nyọka họ alugbiyegu nyam ọnahị jaabwọ kam họnụ ọnahị-ị̀ wẹ ịnyịnyị mẹ. Anụ ya ang-ẹjẹẹ o-ju ọdahịhile ham

¹³kanụ chị adam bala ịnam bala anyịnam alẹng bala anyang tụ alugbiyegu nyaa wuu da bwu ẹpwụ nya igu mẹ.”

¹⁴Alẹng ịwẹ byoo yẹkẹẹ, “Ohe Oluhye ā ye ọhịhị nyahị ó-ri kahị họ jaabwọ kahị ya wẹ ka! Ó-ri ká hi ẹla nya ọwẹwẹ nyahị ọlẹ iwa je ọngọhẹ ka aalẹ, ahị ka chẹwụ keng ụka ká Amkpaa-á ka ya ọpyị ọlẹ hahị.”

¹⁵Ọọwa, iRehabụ à ya ori da bwu iwindo nya ube nyamwụ lẹ, angịwẹ à wụlọọ hireji bwu ụwa lẹlẹ. Ị nwụ ẹpwa nyamwụ ọọwa ju ugulọ ọdagaga ju epweji.

¹⁶Ọọwa, ọ byaa yẹkẹẹ, “Anụ rụ ka ọpyị olikiti mẹ, ká alẹrụ nya adịrahụ ā yẹnụ kaka. Ánụ-ụ̀ kpịbaa ụ-ụwa ẹnụtụrụ ịta gbẹgbịlẹ, ká angịịwa-ā nyà ene kanụ ka yegiri rụ mẹ.”

¹⁷Ọọwa lẹ, alẹng ịwẹ à byoo yẹkẹẹ, “Ahị ka họ ọnụ ọmyịmyị ọlẹ jịra.

¹⁸Ang ọlẹ ká ka họ à lẹẹ lẹ. Ene kahị ka pwụ eji nyọka mwẹla ta alọpyị nyanụ, aa ya ori ọnyọmịla ọlẹ do bwu iwindo nyang ọlẹ kahị hireji bwu. Aa tụ adang bala ịnang bala anyịnang alẹng bala anyang bala alugbiyegu nyanụ wuu guru ẹ-ẹpwa nyang ịnyịnyị mẹ.

¹⁹Ó-ri ká ọngọhẹ-ẹ́ kpehe bwụ ẹpwa nyang aalẹ, ịwọ nya ọngọọwa ji uhye egbeju nya ịlọmwụ. Ụbwọ bala ẹta nyahị á juwa kokoo. Ọ́ tị ri ká ụbwọ-ọ́ ba ọngọhẹ nya angị juwa ẹ-ẹpwang aalẹ, ịwọ nya ọngọọwa ka ji uhye egbeju nyahị.

²⁰Tị yẹ mẹ, ó-ri ká hi ẹla nya ọwẹwẹ nyahị ọlẹ iwa ya je ọngọhẹ aalẹ, ahị gbocho bwu ẹpwụ nya iro ọlẹ kahị nwa tang lẹ.”

²¹Ọ myị ọnụ ju ẹla nyaa ọọwa lẹ, ọ pẹ hyaa rụ lẹlẹ. Ụka kị rụ kpa lẹ, ọ ya ori ọnyọmịla ọọwa do bwọ odehe nya iwindo nyamwụ lẹlẹ.

²²Alịbaje ịwẹ rụ ka ọpyị olikiti kaka kpụ ịbaa. Alẹrụ nya adịrahụ pịlahị nyaa jịra ẹnụtụrụ ịta gbẹgbịlẹ, ị́ tị yaa ka. Ọọwa, ị nyà wẹ iJeriko lẹlẹ.

²³Ọọwa, alịbaje angị imiiye ịịwa à hireji bwu ikiti lẹ, ị kpoye nya Ihu ịJọdan tịrẹkpẹ kele kaka tọ iJochuwa lẹlẹ. Ị tịrọnụ joo kpẹẹkpẹẹ ang myị ang ọlẹ kọ họ taa ẹ-ẹpwụ nya ẹdịyẹ nyaa ọọwa.

²⁴Ọọwa, ị byi iJochuwa ịnyịnyị yẹkẹẹ, “Ahị jẹ myịmyị ya Amkpaa ya ọpyị ọwẹ wuu hahị lẹ. Alụwa wuu ju uhi dapwụ hụ amẹ chajị nyahị.”