Read idege IJOCHUWA 20 Bible Online

IJOCHUWA 20 - idege bible

IJOCHUWA 20

¹Ọọwa lẹ, Amkpaa-à byi iJochuwa yẹkẹẹ,

²“Byi ala Isirẹlụ kị chụ epweji ịhyẹ ịlẹ kị ka ri epweji nya ịbaa ọkpụkpụ jaabwọ kam du iMosisi kaka ya jenu ene mẹ.

³Ọngọlẹ kọ nwụ ọngịnyị nya ụbwọ-anịya ka rụnyẹ ka ụwa chajị kọ ka be hi ọngọlẹ kọ tịtọ kọ ka họọ kwiwa.

⁴Ọngọọwa ka rụnyẹ ka epweji ọhẹ ẹ-ẹpwụ nya ịwẹ. Ụka ọọwa, ọ ka kele ka ẹga oleje ọ-ọnụ ogirigba nya epweji kọ ka tịrọnụ nya ẹlẹwẹ je ịgabwọ. Ọọwa, ị́ pẹhyoo ka epweji lẹ, ị ka ya ẹga họọ kọ ka kụ ụ-ụwa taa lẹlẹ.

⁵Ó-ri ka ọngọlẹ kọ wẹẹ tịtọ nyọka họọ kwiwa á bọọ ba kele, alepweji ọwẹ-ẹ́ ka gbọọ dodehe họọ ka. Ị ka tọọ kpịbaa, chajị ọ́ mamachịng nwụ ọngọọwa ẹ-ẹpwụ nya agbama ka. Ụbwọ-anịya ọ ri lẹ.

⁶Ọ ka kụ e-epweji ọwẹ gbee kị ka lọọ eje u-ugbọdọda ene. Ọ ka hụ e-epweji ọwẹ ịnyịnyị gbee da ka ụka ká olegbeju okiliya ọlụka ọọwa ka gbu ene. Ọọwa, ọngọọwa à ka nyà tịrẹkpẹ ka ẹpwa ka e-epweji nyamwụ ẹga kọ rụnyẹ rụ bwu lẹlẹ.”

⁷Epweji ịlẹ kị chụ o-oye nya ọmwẹnụ-obyi nya ịJọdan ri ịKadẹchị ọla ịGalili bwu ọpyị olikiti nya ịNafụtali. Ị chụ iChekem bwu ikiti ịlọpyị nya Ifurem bala iHebirọn bwu ikiti ịlọpyị nya iJuda ịnyịnyị.

⁸Epweji ịlẹ kị chụ ọ-ọmwẹnụ-ụtụrụ nya ịJọdan ri ịBẹsẹẹ ọlẹ kọ kụ ugbileji ọpẹẹpẹẹ ọlọmẹnụ-ụtụrụ nya iJeriko i-imwawụ nya iRubẹn. Ịkịla ri ịRamotu ọla iGiladị olimwawụ nya ịGadị bala iGolan ọla ịBachan olimwawụ nya ịManasẹ.

⁹Ịwẹ à ri epweji ịlẹ kị chụ ha ala Isirẹlụ wuu bala angga ịlẹ kị kụ taa lẹlẹ. Ọngọngọhẹ nyaa kọ nwụ ọngịnyị nya ụbwọ-anịya ka rụnyẹ kaka kpịbaa ụ-ụwa hi ọngọlẹ kọ juwa tịtọ kọ ka byi uri nya igu nya ọngọ gbugbu myị. Ị́ ka nwọọ kaka, kẹnẹ-kẹnẹ ụka kị lọọ eje u-ugbọdọda ká eje-é woo ene lẹ mẹ ịnyị