Read idege IJOCHUWA 21 Bible Online

IJOCHUWA 21 - idege bible

IJOCHUWA 21

¹Ụka ọọwa, alegbeju nya ogang datị-datị ilimwawụ nya iLivayị kele ka ẹga nya Eliyesa ọngọkiliya bala iJochuwa ọnyị nya iNun bala alegbeju nya ogang datị-datị ilimwawụ ọnyị myị ọnyị nya Isirẹlụ.

²Ọọwa, ị byaa e-epweji nya iChilo ọ-ọpyị nya iKenan yẹkẹẹ, “Amkpaa da iMosisi ehile ya anụ nyị ya epweji ịlẹ kahị ka kụ hahị bala ịpyị ịdagaga jwaa ẹga kahị ka kpa iyo ileji nyahị ri.”

³Ọọwa, ala Isirẹlụ à họ jaabwọ ká Amkpaa da ehile neeji lẹ, ị ya epweji nyaa ịhyẹ bala ịpyị ị-kpa iyo ileji ri ha ala iLivayị nya ịpyị nya ụbwọ nya ịlaa lẹlẹ.

⁴Iwo nya ọgbanyẹ ọlẹ kị da chụ ugbiyegu ilogang nya iKohatị. Ị ga epweji iwo kụrụ ịta bwu ẹpwụ nya ọpyị nya imwawụ nya iJuda bala iSimyọn bala iBenjamịn ha ala iLivayị ịlẹ kị ri anyị ịtụma nya Erọn ọngọkiliya.

⁵Angị ihihi nya alogang nya iKohatị lẹ, Ị gaa epweji iwo bwu ẹpwụ nya ọpyị nya imwawụ nya Ifurem bala ịDan bala ịManasẹ ọlọmwẹnụ-obyi.

⁶Ị ga epweji iwo kụrụ ịta ha alogang nya ịGẹẹchọn. Ị gba epweji ịịwa hi bwu ọpyị nya Isakaa bala Achẹẹ bala ịNafụtali bala ịManasẹ ọlọmwẹnụ-ụtụrụ.

⁷Ị ga epweji iwo kụrụ imiiye ha ugbiyegu ilogang nya iMerarị. Ị gba epweji ịịwa hi bwu ọpyị nya imwawụ nya iRubẹn bala ịGadị bala iSebulọn.

⁸Bwula iwo ọdada, ala Isirẹlụ à ga epweji ịwẹ bala ịpyị ị-kpa iyo ileji ri ịlụwa ha ala iLivayị jaabwọ ká Amkpaa da iMosisi ehile lẹ.

⁹Ẹnyị nya epweji i-bwu ịpyị nya iJuda bala iSimyọn ịlẹ kị ga à lẹẹ lẹ.

¹⁰Ị ya epweji ịlẹ ha anyị ịtụma nya Erọn ịlẹ kị bwu ogang nya iKohatị olimwawụ nya iLivayị. Ịwa à ri angịlẹ kị ga epweji ha nya ọgbanyẹ-ọgbanyẹ lẹ.

¹¹Ị ya epweji nya Aaba haa. Ị ya ẹnyị nya epweji ọwẹ wụrụ Aaba ọlẹ kọ ri adịda nya Anakị. Ẹnyị ọkịla nyamwụ ri iHebirọn. Epweji ọwẹ ji ikiti ịlọpyị nya iJuda. Ọwa bala ịpyị ịdagaga jwoo ị-kpa iyo ileji ri ị ya ha alogang nya iKohatị lẹ.

¹²Ma, ị tị lẹẹ ya ịpyị ị-ba epweji ọwẹ ba bala epweji ichiche ịlụwa ha ịKalẹbụ ọnyị nya iJefune nya ọpyị nya ụbwọ nya ịlọmwụ ene-ene lẹ.

¹³Ị ya epweji ịtụka ịkịla ha anyị ịtụma nya Erọn ọngọkiliya dala iHebirọn bala ịpyị ị-kpa iyo ileji ri. IHebirọn ayịdang ri epweji ọhẹ ẹ-ẹpwụ nya ịlẹ kị ri nya ịbaa ọkpụkpụ. Epweji ịlẹ kị ya haa ri iLibina bala

¹⁴ịJatii bala Ẹchịtemowa bala

¹⁵iHolọn bala ịDebii bala

¹⁶Ayin bala iJuta bala ịBẹtị-ịchẹmẹchị tụ ịpyị ị-kpa iyo ileji ri nya alụwa. Ị la epweji ihikichu bwu imwawụ nya iJuda bala iSimyọn.

¹⁷Ị ya epweji ịtụka ine haa bwu ọpyị nya iBenjamịn. Epweji ịịwa ri iGibyọn bala ịGẹba bala

¹⁸Anatotu bala Alimọn bala ịpyị ị-kpa iyo ileji nyaa ri.

¹⁹Epweji ịtụka ịwẹ wuu la iwo kụrụ ịta tụ ịpyị ị-kpa iyo ileji ri nyaa kị ya ha angịkiliya anyị nya Erọn.

²⁰Ị ya epweji ịtụka ịkịla bwu ọpyị nya ala Ifurem ha alugbiyegu ihihi nya ogang nya iKohatị.

²¹Ị ya epweji ịtụka ine haa. Ọhẹ nyaa ri iChekem tụ ịpyị ị-kpa iyo ileji ri nya alụwa. IChekem ayịdang ri ọhẹ lẹpwụ nya epweji nya ịbaa ọkpụkpụ ọlẹ kọ kụ i-ikiti ịlọpyị nya Ifurem. Epweji ịkịla ịlẹ kị ya haa ri ịGẹsẹẹ bala

²²iKibisayim bala ịBẹtị-ịhọrọn tụ ịpyị ị-kpa iyo ileji ri nya alụwa.

²³Ị ya epweji ịtụka ine haa bwu ọpyị nya ịDan. Ẹnyị nyaa ri Ẹlịteke bala iGibetọn bala

²⁴Ayịjalọn bala ịGaatị-irimọn tụ ịpyị ị-kpa iyo ileji ri nya alụwa.

²⁵Epweji imiiye ịlẹ kị ya haa bwu nya ịManasẹ ọlọmwẹnụ: obyi ri ịTaanakị bala ịGaatị-irimọn tụ ịpyị ị-kpa iyo ileji ri nya alụwa.

²⁶Epweji ịlẹ wuu ká ugbiyegu ilogang nya iKohatị ye la iwo chiriri tụ ịpyị ị-kpa ilyo ileji ri nya alụwa.

²⁷Ebwo ọkịla nya ala iLivayị ịlẹ kị bwu ogang nya ịGẹẹchọn ye epweji imiiye bwu ọpyị nya ịManasẹ ọlọmwẹnụ-ụtụrụ. Epweji ịịwa ri iGolan ọla ịBachan ọlẹ kọ ri ọhẹ nya epweji nya ịbaa ọkpụkpụ bala iBiyẹchịtẹra tụ ịpyị ị-kpa iyo ileji ri nya alụwa.

²⁸Epweji ịlẹ kị ya haa bwu ọpyị nya Isakaa wuu la ine. Ẹnyị nyaa ri iratị bala

²⁹ịJamutu bala Ẹngganim tụ ịpyị ị-kpa iyo ileji ri nya alụwa.

³⁰Epweji ịlẹ kị ya haa bwu ọpyị nya Achẹẹ la ine. Ẹnyị nyaa ri iMichalụ bala Abụdọn bala

³¹ịHẹlkatị bala iRehọbụ tụ ịpyị ị-kpa iyo ileji ri nya alụwa.

³²Epweji ịlẹ kị ya haa bwu ọpyị nya ịNfụtali la ịta. Ẹnyị nyaa ri ịKadẹchị ọla ịGalili ọlẹ kọ ri epweji ọhẹ nya ịbaa ọkpụkpụ bala ịHamotudọọ bala ịKaatan tụ ịpyị ị-kpa iyo ileji ri nya alụwa.

³³Epweji ịlẹ kị ya ha ugbiyegu datị-datị ịlogang nya ịGẹẹchẹn tụ julawụlẹ wuu ri iwo kụrụ ịta tụ ịpyị ị-kpa iyo ileji ri nya alụwa.

³⁴Ala iLivayị ihihi ịlẹ kị bwu ogang nya iMerarị lẹ, ị ya epweji ine bwu ọpyị nya iSebulọn haa. Ẹnyị nya epweji ịịwa ri iJokineyam bala ịKaata bala

³⁵iDimna bala ịNahalalụ tụ ịpyị ị-kpa iyo ileji ri nya alụwa.

³⁶Epweji ịlẹ kị ya haa bwu ọpyị nya iRubẹn la ine. Ẹnyị nyaa ri ịBẹsẹẹ bala ịJahasị bala

³⁷iKedemotu bala iMefaatị tụ ịpyị ị-kpa iyo ileji ri nya alụwa.

³⁸Epweji ịlẹ kị ya haa bwu imwawụ nya ịGadị la ine. Ẹnyị nyaa ri ịRamotu ọla iGiliyadị ọlẹ kọ ri ọhẹ nya epweji nya ịbaa ọkpụkpụ bala ịMahanayim bala

³⁹ịHẹchịbọn bala ịJasẹẹ tụ ịpyị ị-kpa iyo ileji ri nya alụwa.

⁴⁰Bwula ọgaga ọwẹ, epweji ịlẹ kị ya ha alogang nya iMerarị wuu tụ julawụlẹ ri epweji iwo kụrụ imiiye gbẹgbịlẹ.

⁴¹Ọpyị ọlẹ ka ala Isirẹlụ la, epweji iwo ine kụrụ ineku tu ọpyị iwo ri ọlẹ kị ya ha ala iLivayị.

⁴³Ọọwa lẹ Amkpaa a ha Isirẹlụ ọpyị ọlẹ wuu kọ myọọnụ ha adaa lẹlẹ. Ụka ọlẹ kị ye ọpyị ọwẹ lẹ, ọ kụ ụwa lẹlẹ.

⁴⁴Amkpaa ye ọkpunyi ha ọpyị ọwẹ wuu, jaabwọ ọlẹ kọ myọọnụ ha adaa. Ọngọngọhẹ nyaa aluji nyaa a godayị taa pyịpyị mika chajị Amkpaa yẹ ọkụrụ-kụrụ ha ala Isirẹlụ uhye nya aluji nyaa.

⁴⁵Amkpaa kpa ọnụ ọmyịmyị ọnyị myị ọnyị ọlẹ kọ myị ha ala Isirẹlụ.