Read idege IJOCHUWA 22 Bible Online

IJOCHUWA 22 - idege bible

IJOCHUWA 22

¹Ọọwa, iJochuwa à wụrụ alimwawụ nya iRubẹn bala ịGadị bala ịManasẹ ọlọmwẹnụ-ụtụrụ tu gụrụ ẹ-ẹga ookpokpo lẹlẹ.

²Ọ byaa yẹkẹẹ, “Anụ họ ang wuu ọlẹ ka ọnchẹ nya Amkpaa iMosisi byịnụ nyị họ, anụ tị ju ịhị nya ehile nyam lẹ.

³Ụka ọlẹ wuu ánụ tụụbwọ hi awụlẹ ka. Anụ kpẹhị tị kpẹhị ju ehile ju ihi nya Amkpaa Ohe Oluhye nyanụ.

⁴Jaabwọ kọ myị ọnụ lẹlẹ wẹẹ, Amkpaa Ohe Oluhye nyanụ yẹ okpunyi ha ala Isirẹlụ aananụ lẹ. Bwụla ọọwa lẹ anụ tịrẹkpẹ kaka ye ọpyị ọlịkịka nya ọmwẹnụ-ụtụrụ nya ịJọdan ọlẹ ká Amkpaa ya hanụ mẹ O-ri ịnyanụ lẹ.

⁵Anụ jẹ myịmyị nyọka kpa ehile ọlẹ ka iMosisi danụ: Amkpaa Ohe a hanụ, anụ họ irya nyamwụ, ju ehile nyamwụ ihi, chịla hu ọkịlẹtụ họọ bala ọ-myị ẹrụ họọ la ọkịlẹtụ bala ugbodu okpukpuru nyanụ wuu.”

⁶Ọọwa lẹ iJochuwa a wahị kụrwaa lẹ ọ daa rụ kẹpwa nya lẹlẹ.

⁷IMosisi yẹ ang-ugu ọhẹ ha ẹhya nya imwawụ nya ịManasẹ ụwa ịBachan. Ọ yẹ ọpyị ha ẹhya nya imwawụ ọkịla ụwa ịkịka nya ọmwẹnụ-obyi nya ịJọdan. Ụka ká iJochuwa byaa ịnyị rụ ka ẹpwa mẹ kọ wahị kụrwaa lẹ,

⁸ọ byaa ya, “Anụ rụ kẹpwa lụdụ nyanụ bala iyo nyanụ, lokpoko ịgọm bala okpoko onyoowuru bala oje ọnyọmịla bala iru nya ang ịkụrụ-kụrụ, anụ ga ang nya aluji ịlẹ kị bịrị bala alugbiyegu nyanụ.”

⁹Ọọwa lẹ anyị nya iRubẹn, ịGadị bala ẹhya nya imwawụ nya ịManasẹ a nya wẹpwa lẹ, ị chị ebwo hị ala Isirẹlụ ụwa iChilo ọ-ọpyị nya iKenan lẹ, kị ka rụ ka ọpyị nya ịlaa ọlẹ kọ ri ọpyị nya iGiliyadị lẹlẹ. I ye ọpyị ọwẹ jaabwọ ká Amkpaa daa ehile bwula iMosisi.

¹⁰Ụka ká imwawụ nya iRubẹn, ịGadị bala ọmwẹnụ-ụtụrụ nya ịManasẹ pweji ụwa ịGelilotu ọmwẹnụ-obyi nya ịJọdan, ị me ogidi ọnyịịla ọka nya Ihu nya ịJọdan.

¹¹Ala Isirẹlụ ịkịla wo ya anyị nya iRubẹn, ịGadị bala une nya imwawụ nya ịManasẹ ịnyị me ogidi ụ-ụwa ịGelilotu ịkịka nya Ihu nya ịJọdan oye ọlẹ ka ori nya ala Isirẹlụ ịkịla.

¹²Ụka ká ala Isirẹlụ ịịwa wo ẹlẹwẹ, ị tụ guru iChilo chajị kị ka dẹwụ taa lẹlẹ.

¹³Ala Isirẹlụ ịịwa du iFinẹhasị ọngọkiliya ọnyị nya Eliyesa ta anyị nya iRubẹn, ịGadị bala une nya imwawụ nya ịManasẹ ọpyị nya ịGilidi,

¹⁴bala ịdịrịhụ iwo, ọngọ ookpokpo bwu imwawụ ọnyọnyọọnyị nya ala Isirẹlụ.

¹⁵Ị wẹ ọpyị nya ịGilidi wẹ ẹga nya angịnyị nya iRubẹn, ịGadị bala ọmwẹnụ-ụtụrụ nya ịManasẹ.

¹⁶Ọọwa lẹ aluche nya Amkpaa a byaa yẹkẹẹ, “Ịyẹ a tị du kanụ họ ang ọnyọbị ịwẹ ba Ohe Oluhye nya ala Isirẹlụ? Anụ la egbeju ọnyọọngịrị ba Amkpaa chajị nyọlẹ kanụ me ubwọ hịlọnụ! Anụ bọọ jẹ kaka!

¹⁷Kpịtịya nya ọhọbịrị nyahị ụwa ị-ịPẹyọ, ká Amkpaa yẹ angịnyị nyamwụ akama la ẹdụrụ. Ahị jam yẹ akama ọọwa dalẹ wẹẹ. Ọhọbịrị ọwẹ nwa ka?

¹⁸Anụ ka pwa nya ọbọjẹ lẹlẹ lẹ? Ori kanụ ju ihi nya Amkpaa alẹ ka, ọ ka wụ ẹjẹ tọ ọng myị ọng nya ala Isirẹlụ ijuju.

¹⁹Ó-ri ká ọpyị nyanụ-ụ́ hiigu kpu ị ka gbịgba ụ-ụwa ka aalẹ, kẹwẹ wẹ oye ọlẹ nya ịJọdan wẹ ọpyị nya Amkpaa ẹga ká ẹpwa nyamwụ ji mẹ. Anụ ka ye ịpyị ịhyẹ ẹ-ẹpwarịrị nyahị. Ānụ tị la egbeju-ọngịrị ẹ-ẹga nya Amkpaa lee ọ-kpahị kaka la egbeju-ọngịrị bwula o-me ogidi ọkịla dala ọlẹ kọ ri nya Amkpaa Ohe Oluhye nyahị kokoo.

²⁰Kpịtịya jaabwọ ká Ekan ọnyị nya ịSera pwa ọ-ka ju ihi nya ehile ọlẹ kị da u-uhye nya ang ịlẹ kị ka taa ayịreji. Ị yẹ ala Isirẹlụ wuu akama u-uhye nya ọọwa. Ekan ụbwọọmwụ a gbu u-uhye nya ọhọbịrị nyamwụ ka.”

²¹Ọọwa, alimwawụ nya iRubẹn bala ịGadi bala ịManasẹ Ọlọmwẹnụ-ụtụrụ a wẹ ịtọ nya alegbeju nya imwawụ nya alọmwẹnụ-obyi yẹkẹẹ,

²²“Ọngọ lụmẹ-ụmẹ gụ wuu à ri Ohe Oluhye lẹ! Ọwa-à ri Amkpaa lẹ! Ọngọ lụmẹ-ụmẹ gụ wuu à ri Ohe Oluhye lẹ! Ọwa-à ri Amkpaa lẹ! Ọ jẹ ang odudu kahị họ ịnyị, ahị tị tịtọ kanụ ka jẹ ịnyịnyị! Ó-ri kahị la egbeju-ọngịrị kahị ju ihi nya Amkpaa ka aalẹ, anụ nwụhị wuu!

²³Ó-ri kahị la egbeju-ọngịrị ẹ-ẹga nya Amkpaa kahị me ogidi nya ịlọhị chajị nyọka kịla iya lee ọ-ya ọhaha nụwa, Amkpaa lịlọmwụ ā yẹhị akama.

²⁴“Eheehe! Ahị họ ịnyị chajị á hị ju uhi nya anyị ịtụma nyanụ kị ka byi ịnyahị ẹnẹhẹ ya ọngịrị oyina nyaa tị́ la kịị nyị ka gbịgba ha Amkpaa Ohe Oluhye nya ala Isirẹlụ-ụ̄ụ̀?

²⁵Amkpaa họ ịJọdan kọ ka ri oyi nyahị bala anụ ala iRubẹn bala ịGadị. Ánụ la ịngịhyẹ ka họ bala Amkpaa ka. Anyị ịtụma nyanụ ka hu anyị ịtụma nyahị abwọ la ọgbịgba ha Amkpaa.

²⁶“Ịnyị à du kahị me ogidi lẹ. Aajị nyọka kịla iya lee ọ-kpa ọhaha ka ụwa ka.

²⁷Ọkọkọ nya ọọwa lẹ, ọlẹ ri ang-ẹjẹẹ ha angịnyị nyahị bala ịnyanụ bala aloyi ịlịlahị nyori ahị kaa gbịgba ha Amkpaa ọ-Ọdụ nyamwụ bwula ọ-kpa ọhaha warị kaka kịla iya ọ-rụ ila bala iya nya ọhọlawụlẹ. Ọwẹ du ká anyị ịtụma nyanụ-ụ́ ka jẹ-ẹ̀ byi ịnyahị ya Amkpaa nyị́ ri nyaa kpịlọ ka lẹ ka.

²⁸“Irya nyahị ri, ó-ri kị ya ẹla ọlịịwẹ ị-ịlahị, anyị ịtụma nyahị ka jẹ-ẹ̀ byaa ya anụ nyị yẹ ogidi ọlala ịnya Amkpaa ọlẹ ká adịdịwa anyị nyị me nya ang-ẹjẹẹ hịwa bala anụ lẹẹ. Ogidi ọlẹ nyị́ ri nyọka kịla iya ju ila ụ-ụwa ka.

²⁹“Ị̄gọgọ ẹnẹnẹhẹ kahị ka ta Amkpaa lee ọ-hịnyọ la ọgbịgba họọ lẹẹlẹẹ bwula ọ-ka kele kaka me ogidi ọkịla ọlẹ kahị ka kịla iya ị-rụ ila bala iya lee iya nya ajẹ nya ang-ẹrụ lee iya ịkịla dala ogidi nya Amkpaa Ohe Oluhye nyahị ọlẹ kọọ wẹ ị-ịlahị nya Ọdụ nyamwụ.”

³⁰IFinẹhasị ọngọkiliya bala angị gbẹgbịlẹ alẹng iwo nya ala Isirẹlụ ịlẹ kị juwa tọọ tụ alegbeju i-bwu imwawụ ịlọmwẹnụ obyinya iRubẹn bala ịGadị bala ịManasẹ Ọlọmwụ-ụtụrụ wo lọ, ọ waa ẹpwụ lẹlẹ.

³¹Ọọwa, iFinẹhasị, ọnyị nya Eliyesa ọngọkiliya à byaa yẹkẹẹ, “Ẹhẹ́ẹ̀ẹ̀, ahị jẹ ugbẹnyị ya Amkpaa jam tahị lẹ, chajị ānụ la egbeju-ọngịrị ẹ-ẹga nyamwụ jaabwọ kahị me kaka. Anụ chị ala Isirẹlụ da bwu akama ọlẹ ịnọ ká Amkpaa ka yẹ angịnyị nyamwụ lẹ.”

³²Ọọwa, iFinẹhasị à yegiri hị angịnyị nya iRubẹn bala ịGadị ọ-ọpyị nya iGiliyadị lẹ, ị rụ tịrẹkpẹ ka iKenan kpa ẹlẹwẹ kaka ya je ala Isirẹlụ ịkịla lẹlẹ.

³³Ọ wu ala Isirẹlụ ẹpwụ kpu ị gwogbo ha Ohe Oluhye. Ị́ tụtụm ya ẹla nyọka kele ka dẹwụ ta ọpyị nya ala iRubẹn bala ịGadị anyị ayịreji kaka.

³⁴Ala iRubẹn bala ịGadị à yẹkẹẹ, “Ogidi ọlẹ ri ang-ibeenu hahị wuu nyori Amkpaa-à ri Ohe Oluhye lẹ.” Ọọwa, ị wụrụ ẹnyị nyamwụ “Ibeenu” lẹlẹ.