Read idege IJOCHUWA 23 Bible Online

IJOCHUWA 23 - idege bible

IJOCHUWA 23

¹Ẹka lụmẹ-lụmẹ kam nyọlẹ ká Amkpaa ya ala Isirẹlụ kụ ẹpwa lokpunyi hi aluji nyaa ịlẹ kị kụ dagaga jwaa. Ụka ọwẹ, iJochuwa chị okwirichi lẹ.

²Ọọwa, ọ wụrụ ala Isirẹlụ wuu tụ ịgabwọ bala alegbeju bala angịleje bala angị kpẹhị rịrị kaka jịra lẹ, ọ byaa yẹkẹẹ, “M̀ chị okwirichi kụnyẹ-kụnyẹ lẹẹlẹẹ lẹ.

³Anụ ayịdang tị́ kpẹhị nya ịlọnụ yẹ ang myị ang ịlẹ ká Amkpaa Ohe Oluhye nyanụ họ ẹ-ẹga nya alụma ịwẹ wuu chajị nyanụ-ụ̀ wẹ lẹ̀. Amkpaa Ohe Oluhye nyanụ à ma uya hanụ-ụ̀ wẹ lẹ.

⁴Anụ yẹ mẹ, m̀ ya ịpyị nya alụma ịlẹ kị hi kahị kụrụ lẹka tụ ịnya alụma ịlẹ kam kpanụ dẹwụ kụrụ bwu Ihu ịJọdan ọ-ọmwẹnụ-ụtụrụ lalaala ka ju ka Ihu nya iMeditareniya ọ-ọmwẹnụ-obyi hanụ nya ịpyị ịlẹ ká imwawụ ịla Isirẹlụ ka la nya ịpyị nya ịlaa lẹ.

⁵Amkpaa Ohe Oluhye nyanụ lịlọmwụ ka tịraa ẹkpẹ hiinu. Ọ ka kwaa hi ẹga da hanụ jaabwọ kanụ juwa jẹ kịlahị-ịlahị. Anụ ka ye ọpyị nyaa la jaabwọ ká Amkpaa Ohe Oluhye nyanụ myị ọnụ hanụ ene.

⁶“Lẹẹlẹ, ánụ-ụ̀ kpẹhị chịng kanụ họ ang myị ang ịlẹ ká iMosisi da ụ-ụpwụ nya ehile mẹ. Anụ tụụbwọ hi ọhẹ-lọhẹ nyaa deeji la ọkpakpa kokoo.

⁷Ọọwa lẹ, ánụ tụtụm ka yẹjula alụma ihihi ịlẹpwụ nyanụ lee o-yẹla wụrụ ẹnyị nya ihye nyaa lee ọ-nwa iro lẹnyị nyaa kaka. Ánụ ka myị ẹrụ lee ọ-gbịgba ha ihye nyaa ka ịnyịnyị.

⁸Anụ tụ́tụ họ kpẹẹkpẹẹ ẹ-ẹga nya Amkpaa jaabwọ kanụ họ-ọ̀ wẹ gbee daalẹ mẹ.

⁹“Ụka kanụ lẹẹ jẹ kịlahị Amkpaa ku alụma ịtụka bala ịlọngịrị rụ hi ẹga da hanụ. Ebwo nya aluji ọhẹ-lọhẹ á kụrụụnụ myị ụka ọhẹ lẹka gbee daalẹ.

¹⁰Ọngọ ookpokpo nyanụ ka ku aluji angị ụnọ rụ myị, chajị Amkpaa Ohe Oluhye nyanụ juwa ma uya hanụ jaabwọ kọ myị ọnụ.

¹¹Ánụ-ụ̀ kpẹhị chịng chajị nyọka la ọháha ẹ-ẹga nya Amkpaa Ohe Oluhye nyanụ mẹ.

¹²“Ó-ri kanụ nyẹẹkpẹ da Ohe Oluhye kanụ juwa yẹ julawụlẹ bala alụma ịlẹ kị hi kụ ẹ-ẹpwụ nyanụ kanụ juwa ye awụlẹ aalẹ,

¹³anụ jẹ myịmyị mẹ, Amkpaa Ohe Oluhye nyanụ-ụ́ ka tụtụm ku alụma ịwẹ hi iwe da hanụ kaka. Ị ka mwọọgịlẹ ri eri owuwu hanụ bala ụtụjẹ ịlẹ kanụ ka chabwọ kpụ. Ị ka jụụnụ lala ugboji ọ-waanụ abẹkpẹ lee ujwo o-gunu ẹ-ẹhị. Ịịwẹ ọ tị ka lanụ gbee ká ọng myị ọng nyanụ ka ta ayịreji hi ọpyị ọnyịịla ọlẹ ká Amkpaa Ohe Oluhye nyanụ ya hanụ-ụ̀ wẹ lẹlẹ.

¹⁴“Ọlẹẹlẹẹ lẹ, ụtụrụ nya ọhịhị nyam hi kpii lẹ. Anụ wuu tị jẹ bwu ẹpwụ nya ọkịlẹtụ nyanụ wuu nyori Amkpaa Ohe Oluhye nyanụ họ ang ịnyịịla ịlẹ wuu kọ myị ọnụ hanụ. Ọ họ ọnụ ọmyịmyị nyamwụ ọnyị myị ọnyị jịra. Ọhẹ-lọhẹ nyaa-á hi kọ họ jịra ka lẹ ka.

¹⁵Jaabwọ kọ họ ọnụ ọmyịmyị nyamwụ ọnyị myị ọnyị jịra hanụ, ịnyịnyị-ịnyịnyị ọ ka yẹnụ akama ọlẹ kọ hwàhwa nyọka yẹnụ ó-ri kanụ jwoo ihi ka gbee kọ ka tanụ ayịreji hi ọpyị ọnyịịla ọlẹ kọọwa Amkpaa Ohe Oluhye nyanụ.

¹⁶Ó-ri kanụ kpa ehile nya iro ọnwanwa ọlẹ ká Amkpaa Ohe Oluhye nyanụ ya danụ e-eji ka, kanụ juwa myị ẹrụ bala ọ-gbịgba ha ihye ịkịla aalẹ, agbama nyamwụ ka wuru jahị danụ. Ọ ka yẹnụ akama gbee ká ọng myị ọng nyanụ ka ta ayịreji hi ọpyị ọnyịịla ọlẹ kọ ya hanụ.”