Read idege IJOCHUWA 24 Bible Online

IJOCHUWA 24 - idege bible

IJOCHUWA 24

¹Ọọwa, iJochuwa à tụ imwawụ nya ala Isirẹlụ wuu guru i-iChekem lẹlẹ. Ọ wụrụ ịgabwọ bala alegbeju bala angịleje bala angị kpẹhị rịrị nya ala Isirẹlụ wuu lẹ, ị wẹ kaka jịra ị-ịlahị nya Ohe Oluhye lẹlẹ.

²Ọọwa, iJochuwa a byi angịnyị nyamwụ wuu yẹkẹẹ, “Ịịlẹ Amkpaa Ohe Oluhye nya ala Isirẹlụ a ya lẹ: ‘Lụka onyogo, adanụ igogo anyị kụ o-oye ọlaanyị nya Ihu iYufuretisi. Adanụ iTera ọlẹ kọ ma Ebiraham bala ịNahọ ri ọngọhẹ nyaa. Ịwa wuu kaa gbịgba ha ihye ịkịla.

³Ụka ọọwa, m̀ kpa Ebiraham adanụ rụ bwu ọpyị oloye ọlanyị nya Ihu iYufuretisi. M̀ kpọọ tụ ọpyị nya iKenan wuu da. M̀ ya ọnyị ọlẹng Ayịsiki họọ bala iru nya anyị ịtụma ịkịla.

⁴M̀ ya iJekọbụ bala Ịsọ ha Ayịsiki ma. M̀ ya ikiti nya Ẹdọm wuu ha Ịsọ nya ọpyị nya ịlọmwụ. IJekọbụ adanụ ogogo bala anyị nyamwụ tị rụ ka ọpyị nya Ijipiti.

⁵Ụka kọ nọ chẹẹ, m̀ du iMosisi bala Erọn anyị kele lẹ, m̄ yẹ ala Ijipiti akama lẹlẹ. M̀ tị gbanụ kpehe bwu ụwa kaka lịlọnụ.

⁶Ụka kam gba adanụ igogo kpehe bwu Ijipiti, ị jẹ gbee kaka pwụ Ihu Oletungkohyo. Ala Ijipiti kwaa kàta-kàta kaka pwụ ụwa la anyịrẹ bala ang ịrụnyẹ ịlẹ ka anyịrẹ kaa gbile.

⁷Ị chị eko wụrụm Amkpaa bịlẹ ụbwọ ọdada. Ọọwa, m̄ du ukpowu kaka ji apewa nya adanụ igogo anyị bala ala Ijipiti lẹlẹ. M̀ họ ká enyi nyà kaka biraa wurum du kị byi enyi. Anụ jẹ ang ịlẹ kam họ ala Ijipiti. “ ‘Anụ kụ u-gbileji lụka ọtata.

⁸Ọọwa, m̄ kpanụ warị kaka ju ka ọpyị nya ala Amọ ịlẹ kị kụ ọmwẹnụ-ụtụrụ nya ịJọdan lẹlẹ. Ị ma uya tanụ, ma m̀ ya ọkụrụ-kụrụ hanụ. Anụ ye ọpyị nyaa la. Ọọwa, m̄ taa ayịreji hi ẹga da hanụ lẹlẹ.

⁹ỊBalakị Adịrahụ nya ala iMowabụ ọnyị nya iSipọ kpẹla jahị danụ ụka ọọwa. Ọ du ẹrụ tọ ịBẹlam ọnyị nya iBeyọọ kọ ka wẹ kaka gọlọ junu.

¹⁰M tị myị ha ịBẹlam ọ gọlọ junu ka. Lẹẹlẹ, ọ wahị kụrụụnụ. Ịịwẹ m̄ bwu gbanụ kpehe hi ẹpwụtụbwọ nya ịBalakị lẹ.

¹¹“ ‘Ụka kanụ kpoye nya Ihu ịJọdan wẹ iJeriko, ala iJeriko mwẹla tanụ. Angịkịla ịlẹ kị mwẹla tanụ ịnyịnyị ri ala Amọ bala ala iPerisi bala ala iKenan bala ala iHiiti bala ala ịGẹgachị bala ala iHivi bala ala iJebusi. M̀ tị họ ānụ kụrwaa wuu.

¹²M̀ chuhi jwaa chajị ká ịdịrịhụ imiiye nya ala Amọ ka mwụ rụ hi ẹga hanụ. O-oge ịlẹ kanụ la bala eda nyanụ ānụ kpa kụrụ ka.

¹³Am kpakpakpa a ya ọpyị hanụ tụ epweji ịlụwa lẹ. Anụ kụ ụwa wẹẹ ri egbe nya alakọnụ bala egbe nya olivu ịlụwa lẹ. Aanụ a tị yẹ akama nya o-wu ẹrụ nya ekeji ịwẹ ene ka.’ ”

¹⁴Ọọwa, iJochuwa a kịnyaa la ẹla oyaya taa yẹkẹẹ, “Anụ ju ihi nya Amkpaa, kanụ myị ẹrụ họọ ẹ-ẹpwụ nya ịlẹhị bala ọkpẹẹkpẹẹ ọlala mẹ. Anụ pẹhi ihye ịlẹ ká adanụ igogo anyị kaa gbịgba ha i-iMesopotemiya bala Ijipiti mẹ. Anụ taa ayịreji, kanụ myị ẹrụ ha Amkpaa kem mẹ.

¹⁵Ọ́ tị ri kanụ myị ọnụ nyọka myị ẹrụ ha Amkpaa kaka lẹ, anụ tị̀ tị̄ cheje alẹ ọngọlẹ kanụ ka myị ẹrụ ha mẹ. Ijiga ịlẹ ká adanụ igogo anyị kpụ i-iMesopotemiya lee ijiga nya ala Amọ ịlẹ kanụ kụ ọ-ọpyị nyaa lẹẹlẹẹ wẹ à tị́ haanụ gụ? Am bala alẹpwa nyam lẹ, ahị ka myị ẹrụ ha Amkpaa.”

¹⁶Ọọwa, angịnyị a wẹ yẹkẹẹ, “Ị̄gọgọ ẹnẹnẹhẹ! Áhị ka rụ hi Amkpaa kele kaka myị ẹrụ ha ihye ịkịla ka!

¹⁷Amkpaa Ohe Oluhye nyahị à tị́ gba adahị igogo anyị tụụhị kpehe bwu ọpyị nya Ijipiti ẹga kahị ri anyịhị. Ahị kpẹhị nya ịlọhị yẹ ụkụrwọ ẹbyẹbyị lụmẹ-lụmẹ ịlẹ kọ họ. Ọwa-à gbehi ẹ-ẹpwụ nya ẹdịyẹ nyahị ọlẹ kahị jẹ ụka kahị chịpwụrụ bwu ẹpwụma datị-datị lẹẹ gbee kahị pwụ ẹgẹlẹ lẹ.

¹⁸Amkpaa-à ku alụma wuu tụ ala Amọ ịlẹ kị kụ ọ-ọpyị ọlẹ hi ẹga da hahị lẹ. Lẹẹlẹ, ahị ka myị ẹrụ ha Amkpaa ịnyịnyị, chajị ọwa kem a ri Ohe Oluhye nyahị lẹ.”

¹⁹Ma, iJochuwa byi angịnyị yẹkẹẹ, “Ánụ ka myị ẹrụ ha Amkpaa myị ka. Ọ ri Ohe Oluhye ọlịgọgọ. Ọ́ ka myị-ị̀ hịnyọhi ịhọbịrị nyanụ ka. Ọ ri Ohe Oluhye ọ jẹ ijiiji.

²⁰Ịnọ ọ họ ang ịnyịịla hanụ ene-ene, ọ́ tị ri kanụ nyẹẹkpẹ dọọ kaka myị ẹrụ ha ihye ịkịla, ọ ka jahị danụ kọ ka du akama chịnụ ọgụ. Ọọwa, ọ ka tanụ ayịreji gbanggbang lẹlẹ.”

²¹Ọọwa, angịnyị a wẹ byi iJochuwa yẹkẹẹ, “Eheehe! Ahị ka myị ẹrụ ha Amkpaa.”

²²IJochuwa byaa yẹkẹẹ, “Anụ ayịdang tị́ ri ibeenu nya ịlọnụ kanụ cheje nyọka myị ẹrụ ha Amkpaa wẹ lẹ.” Ọọwa, ị wẹ yẹkẹẹ, “Ee, ahị ri ibeenu lẹ.”

²³Ọọwa, iJochuwa a byaa yẹkẹẹ, “Ó-ri ịnyị lẹ, aalẹ anụ tụhi ihye ịkịla ịlẹ kanụ la kanụ myị ọnụ nyọka ju ihi nya Amkpaa Ohe Oluhye nya ala Isirẹlụ mẹ.”

²⁴Ọọwa, angịnyị a byi iJochuwa yẹkẹẹ, “Ahị ka myị ẹrụ ha Amkpaa Ohe Oluhye nyahị. Ahị ka ju ihi nya ehile nyamwụ lẹ.”

²⁵Ẹnụ ọọwa, i-iChekem, iJochuwa họ ala Isirẹlụ nwa iro ha[14] Amkpaa. Ọ ya ehile bala ọmẹjẹ datị-datị ịlẹ kị ka bajẹ haa.

²⁶IJochuwa da ehile ịwẹ ụ-ụpwụ nya ehile nya Ohe Oluhye. Ọọwa, ọ hu ẹjwọ ọtụka ọhẹ yeji rịrị kọkọ e-ekpeleji nya ùgboji nya ooku ba Ẹpwang Ọlịgọgọ nya Amkpaa ba lẹlẹ.

²⁷Ọọwa lẹ, ọ byi angịnyị wuu yẹkẹẹ, “Ẹjwọ ọlẹ a ka ri ibeenu nyahị lẹ. Ọ wo ẹla ọlẹ wuu ká Amkpaa ya tahị. Lẹẹlẹ, ọ ka họ ibeenu tụụnụ pyịpyị ó-ri kanụ họ ọnụ ọmyịmyị nyanụ ọwẹ jịra ka.”

²⁸Ọọwa, iJochuwa a byi angịnyị nyị rụ mẹ lẹ, ọng myị ọng nyaa a rụ ka ẹpwa ka ebwo nya ọpyị nya ịlọmwụ lẹlẹ.

²⁹Ụka ká ẹlẹwẹ chịpwụrụ kpá lẹ, iJochuwa ọnchẹ nya Amkpaa-à gbu lẹlẹ. Ọ gu ẹka ohu ookpokpo kụrụ iwo (110) ụka kọ gbu. INun à ri adịda nya iJochuwa lẹ.

³⁰Ị jwoo eji ọ-ọpyị nya ịlọmwụ i-iTiminatị-ịsẹra. Ẹgẹwẹ ji ikiti ịlọpyị nya Ifurem ẹ-ẹtẹ nya Ọgbọdọ nya ịGaachị.

³¹Ala Isirẹlụ myị ẹrụ ha Amkpaa lụka nya ọhịhị nya iJochuwa wuu. Ụka kọ gbugbu kpá lẹ, ị kịnyaa juwa myị ẹrụ ha Amkpaa ịnyịnyị lụka nya ọhịhị nya alegbeju ịlẹ kị kpẹhị nya ịlaa yẹ ang myị ang ịlẹ ká Amkpaa họ ha ala Isirẹlụ.

³²Ụka ọọwa, ala Isirẹlụ ya ogu nya iJosẹfụ ọlẹ kị kpa dịrẹ ịlaa ju eji ọ-ọpyị ọla iChekem ọlẹ ká iJekọbụ ra bwu ẹga nya anyị ịtụma nya ịHamọ adịda nya iChekem lokpoko onyoowuru ohu ookpokpo (100).

³³Ụka ká Eliyesa ọnyị nya Erọn gbu, ị jwoo eji e-epweji nya iGibiya ọlẹ kọ kụ i-ikiti ọhẹ ịlọpyị nya Ifurem. Ẹga ọọwa ri ọpyị ọlẹ kọ ri nya iFinihasị ọnyị nya Eliyesa.