Read idege IJOCHUWA 3 Bible Online

IJOCHUWA 3 - idege bible

IJOCHUWA 3

¹Lụtụrụ gbegbegbe nya ahị ọpyẹpyẹ ọọnamwụ, iJochuwa bala ala Isirẹlụ wuu yegiri bwụ ịkampụ nyaa i-iChitim kele ka Ihu ịJọdan lẹ, ị chịkụ ụ-ụwa gbe ụka kị ka kpoye nya Ihu lẹlẹ.

²Ẹnụtụrụ ọhata nya ẹnẹwẹ lẹ, alegbeju à ga tụ ịkampụ da

³byi ala Isirẹlụ yẹkẹẹ, “Ụka kanụ yẹ angịkiliya kị juwa kpa Akpa nya Iro nya Amkpaa Ohe Oluhye nyanụ jẹ kaam lẹ, anụ-ụ yegiri bwụ ẹga myị ẹga kanụ ji, kanụ baa jẹ mẹ.

⁴Anụ ayịdang jẹ ẹgẹlẹ ẹnẹhẹ ene lẹka lẹ, ịwa-à ka mẹ ụgbẹyị jẹẹnụ lẹ. Ma, ānụ tị jẹ ju Akpa nya Iro chwẹẹ ka. Ánụ chị iwe da hyoo hwẹẹẹ lala ẹhya nya ịmayịlị.”

⁵IJochuwa byi angịnyị yẹkẹẹ, “Anụ chị ịgọgọ jụ ịlọnụ mẹ, chajị Amkpaa juwa ka họ ụkụrwọ ịlẹbyẹbyị ẹ-ẹpwarịrị nyanụ ijuju oleeri ọle.”

⁶Ọọwa lẹ, ọ byi angịkiliya yẹkẹẹ, “Anụ hu Akpa nya Iro kpa kịnyaa jịlahị nya aluche mẹ.” Ọọwa, ị họ ịnyị lẹlẹ.

⁷Amkpaa byi iJochuwa yẹkẹẹ, “Bwu alẹ ọlẹ kịlahị, m̀ ka họ ká ala Isirẹlụ wuu ka jung ihi ọtụka-ọtụka. Ị ka jẹ kam juwa tang ịnyịnyị jaabwọ kam juwa ta iMosisi.

⁸Byi angịkiliya ịlẹ kị kpa Akpa nya Iro ya ụka kị pwụ ẹpwụ nya ihu, ị ka godayị ju ọnụụka chwẹẹ.”

⁹Ọọwa lẹ, iJochuwa à byi ala Isirẹlụ yẹkẹẹ, “Anụ kẹwẹ kaka wo ẹla oyaya nya Amkpaa Ohe Oluhye nyanụ wẹẹ.

¹⁰Jaabwọ kanụ juwa jẹ kịlahị-ịlahị, ọ ka juwa ku ala iKenan bala ala iHiiti bala ala iHivi bala ala ịPẹrisi bala ala ịGẹgachị bala ala Amọ bala ala iJebusi anyị wuu hi iwe da hanụ. À ka jẹ ya Ohe Oluhye ọlẹ kọ juwa hịhị juwa ẹpwarịrị nyanụ. Ọọwa, anụ ká jẹ ká Ohe Oluhye ọlẹ kọ juwa hịhị juwa tanụ lẹlẹ.

¹¹Anụ yẹ mẹ, Akpa nya Iro nya Ayịbaba nya odehe ọlẹ wuu ka kpanụ jịlahị kpoye nya Ihu ịJọdan!

¹²Lẹẹlẹ, chụ alẹng angị iwo kụrụ imiiye mẹ. Hu ọngọ ookpokpo bwụ imwawụ ọnyọnyọọnyị nya ala Isirẹlụ.

¹³Ụka ká angịkiliya ịlẹ kị kpa Akpa nya Iro nya Amkpaa Ayịbaba nya odehe wuu-ú ya ẹta ju enyi, Ihu ịJọdan ka kpụba la ọmwụmwụ. Ọọwa, enyi ọlẹ kọ juwa bwu oye oluhye à ka tụchawụlẹ pyịyọ-pyịyọ ẹ-ẹga ookpokpo lẹlẹ.”

¹⁴Ọọwa, ala Isirẹlụ à yegiri nya ọrụrụ bwu ẹgẹwẹ kị ka kpoye nya Ihu ịJọdan lẹ, angịkiliya à kpa Akpa nya Iro jịlahị nyaa lẹlẹ.

¹⁵Ịnọ ụka ọwẹ ri alụhyọọ[1] du ká Ihu ịJọdan myị chụpwụ-chụmẹ ma, ụka ká angịkiliya ịlẹ kị kpa Akpa nya Iro ya ẹta ju enyi lẹ,

¹⁶enyi à kpụba la ọmwụmwụ lẹlẹ. Enyi ọọwa tụchawụlẹ pyịyọ-pyịyọ o-oye oluhye hwẹẹẹ e-epweji ọlẹ ká ẹnyị nyamwụ ri Adam ụ-ụwa ịkịka nya ịSarẹtan. Enyi oloye oleji ọlẹ kọọ mwụ ka ju Ihu Ọlịma-ịma cheku gbanggbang. Ọọwa, ala Isirẹlụ à jẹ kpoye koye ọkịla bwu ịkịka nya iJericho lẹlẹ.

¹⁷Ụka ọọwa, angịkiliya ịlẹ kị kpa Akpa nya Iro godayị rịrị ọ-ọpyị ọchọrụ ẹ-ẹpwarịrị nya ọ̀bá nya Ihu ịJọdan gbee ká ala Isirẹlụ wuu kpoye.