Read idege IJOCHUWA 4 Bible Online

IJOCHUWA 4 - idege bible

IJOCHUWA 4

¹Ụka ká ala Isirẹlụ wuu kpoye nya Ihu ịJọdan lẹ, Amkpaa-à byi iJochuwa yẹkẹẹ,

²“Chụ alẹng angị iwo kụrụ imiiye mẹ. Hu ọngọ ookpokpo bwụ imwawụ ọnyọnyọọnyị nya ala Isirẹlụ.

³Aa daa ehile kị go ajwọ iwo kụrụ imiiye bwu ẹpwarịrị nya Ihu ẹ-ẹga ká angịkiliya godayị rịrị kpangga mẹ. Byaa kị kpa ajwọ ịwẹ dịrẹ ịlaa kaka guru e-eji ẹ-ẹga kanụ ka chịkụ alẹ lodu mẹ.”

⁴Ọọwa, iJochuwa à wụrụ angị iwo kụrụ imiiye ịlẹ kọ chụ lẹlẹ.

⁵Ọọwa, ọ byaa yẹkẹẹ, “Anụ kele ka ẹpwụ nya ọ̀bá nya ịJọdan jịlahị nya Akpa nya Iro nya Amkpaa Ohe Oluhye nyanụ mẹ. Ọngọngọọng nyanụ ā hu ẹjwọ nọ ụmwụchwọ nya ịlọmwụ ku ọmwakpa nya imwawụ nyamwụ.

⁶Ajwọ ịlẹ ri ọ-ka kpụ angịnyị ịtịya nya ang ọlẹ ka Ohe Oluhye họ. Ụka ká anyị nyanụ-ụ́ tọnụ wo ị-ịlahị chajị nya etu nya ajwọ ịlẹ lẹ,

⁷ánụ-ụ ya jaa yẹkẹẹ, ‘Ihu ịJọdan cheku lụka kị juwa kpa Akpa nya Iro nya Amkpaa kpoye nyamwụ.’ Ajwọ ịlẹ ka ri ang ọ-kpụ ala Isirẹlụ ịtịya nya ẹlẹwẹ pyịyọọ.”

⁸Alẹng ịịwa họ jaabwọ ká iJochuwa byaa. Ị go ajwọ iwo kụrụ imiiye bwu ẹpwarịrị nya Ihu ịJọdan jaabwọ ká Amkpaa da iJochuwa ehile. Ẹjwọ ookpokpo ku ọmwakpa nya imwawụ ọnyọnyọọnyị nya ala Isirẹlụ. Ị kpa ba ịlaa jẹ pwụ ẹga kị chịkụ lẹ, ị ya guru ụ-ụwa lẹlẹ.

⁹IJochuwa ya ajwọ iwo kụrụ imiiye yeji ịnyịnyị ẹ-ẹpwarịrị nya ọ̀bá nya ịJọdan ẹ-ẹga ká angịkiliya godayị la Akpa nya Iro. Ajwọ ịịwa ri ọ-kpa kpịtịya daalẹ wẹẹ.

¹⁰Angịkiliya ịlẹ kị kpa Akpa nya Iro godayị ẹpwarịrị nya ọ̀bá nya ịJọdan gbee kị họ ang myị ang ọlẹ ká Amkpaa da iJochuwa ehile ya angịnyị-ị̀ nyị họ. Ịịwẹ iMosisi à byi iJochuwa lẹ. Ụka ọọwa angịnyị jẹ lagaga kpoye nya Ihu ịJọdan.

¹¹Ụka kị kpoye koye ọkịla kpá lẹ, angịkiliya ịlẹ kị kpa Akpa nya Iro nya Amkpaa-à kpaa jịlahị nyaa lẹlẹ.

¹²Alẹng i-bwu imwawụ nya iRubẹn bala ịGadị bala ẹhya nya imwawụ nya ịManasẹ ịlẹ kị nwụlanọ nya ẹwụ kpoye jịlahị nya angịkịla jaabwọ ká iMosisi byaa.

¹³Angịdẹwụ lala angị ụnọ iwo ine (40,000) ịlẹ kị nwụlanọ nya ẹwụ bwu imwawụ imiiye ba ẹhya ịwẹ kpoye i-ijata nya Amkpaa kele ka ụteeji nya iJeriko.

¹⁴Ẹnụ ọọwa, Amkpaa họ ala Isirẹlụ wuu yẹ iJochuwa nya ọngịnyị ọtụka. Ị jwoo ihi lụka nya ọhịhị nyamwụ wuu jaabwọ kị ju iMosisi ịnyịnyị.

¹⁵Ọọwa, Amkpaa-à byi iJochuwa yẹkẹẹ,

¹⁶“Byi angịkiliya ịlẹ kị kpa Akpa nya Iro kị gba kpehe bwu Ihu nya ịJọdan mẹ.”

¹⁷Ọọwa, iJochuwa à họ ịnyị lẹlẹ.

¹⁸Ụka ká angịkiliya ịwẹ kpehe pwụ ụ̄ka, enyi dọmwụ nyọka mwụmwụ lẹ, ihu à myị chụpwụ-chụmẹ lala olene lẹlẹ.

¹⁹Ẹnụtụrụ iwo nya ọya ọhọhẹ ala Isirẹlụ à kpoye nya Ihu ịJọdan lẹ. Ọọwa, ị chịkụ i-iGiligalụ ọ-ọmwẹnụ-ụtụrụ ba iJeriko ba lẹlẹ.

²⁰Ọọwa, iJochuwa à ya ajwọ iwo kụrụ imiiye ịlẹ kị go bwu Ihu ịJọdan yeji ụ-ụwa lẹlẹ.

²¹Ọ byi ala Isirẹlụ yẹkẹẹ, “Ị-ịlahị, anjwo nyanụ ka tọnụ wo yẹkẹẹ, ‘Etu nya ajwọ ịlẹ bẹẹ?’

²²Ụka ọọwa, ánụ-ụ ya jaa jaabwọ ká ala Isirẹlụ kpoye nya Ihu ịJọdan u-uhye nya ọpyị ọchọrụ mẹ.

²³Ánụ-ụ̀ ya jaa jaabwọ ká Amkpaa Ohe Oluhye nyanụ chị Ihu ịJọdan ọhụ kịra-kịra hanụ gbee kanụ kpoye wuu jaabwọ kọ chị Ihu Oletungkohyo ọhụ hahị ugbeene.

²⁴Anụ ya ala ịlẹ wuu jaa chajị ká alodehe wuu ka jẹ jaabwọ ka ọngịrị nya Amkpaa lụmẹ ka ba, kaanụ ayịdang ka ju ihi nya Amkpaa Ohe Oluhye nyanụ gbe oyi myị oyi mẹ.”