Read idege IJOCHUWA 5 Bible Online

IJOCHUWA 5 - idege bible

IJOCHUWA 5

¹Ịdịrịhụ nya ala Amọ ịlẹ wuu kị kụ ka ọmwẹnụ-obyi nya ịJọdan bala ịdịrịhụ nya ala iKenan ịlẹ kị kụ tọọnụ nya Ihu iMeditareniya da wo jaabwọ ká Amkpaa họ ká Ihu ịJọdan nwụ ká ala Isirẹlụ kpoye nyamwụ. Ụka ọọwa, ị ju uhi dapwụ hụ amẹ ọọ-la ajị nya ala Isirẹlụ.

²Ọọwa lẹ, Amkpaa-à byi iJochuwa yẹkẹẹ, “Kọ ajwọ ịhyẹ kị liri weri-weri chajị ká kpa da ala Isirẹlụ ụwụwụ mẹ.”

³Ọọwa, iJochuwa à họ jaabwọ ká Amkpaa byoo lẹ, ọ da alẹng nya ala Isirẹlụ ụwụwụ ụ-ụwa lẹlẹ. Ị wụrụ ẹgẹwẹ Ikiti nya Ụwụwụ[2] ọdada.

⁴Ang odudu ká iJochuwa daa ụwụwụ ri yẹkẹẹ, ị́ da alẹng nya ala Isirẹlụ ịlẹ kị ma wuu u-ugbileji nyọlẹ kị kpehe bwu Ijipiti kpá ụwụwụ lẹka. Alẹng ịlẹ kị da ụwụwụ ene nya ụka ọwẹ kẹnẹ-kẹnẹ ri angịlẹ kị la gbẹgbịlẹ nwa ẹwụ ọkaka ụka kị rụ bwu Ijipiti. Angịịwa wuu tị gbu ẹ-ẹpwụ nya ẹdịyẹ olugbileji nyaa lẹ.

⁶Ẹ-ẹpwụ nya ẹka iwo ine ịlẹ kị bịrị ene kii kpoye nya ugbileji angịwẹ wuu à gbu lẹ. Ị gbu chajị ị ju ihi nya Amkpaa ka. Lẹẹlẹ, jaabwọ ká Amkpaa nwa iro lẹ, ọ́ myị haa ị jụ ka ọpyị o-ju eyo bala ọ-há ang ọlẹ kọ myị ọnụ ha adaa igogo anyị ka.

⁷Lẹẹlẹ, anyị ịlẹ ká alẹng ịwẹ ya hile ịlaa, kị tị da ụwụwụ ẹnẹhẹ lẹka, iJochuwa à da ụwụwụ lẹ.

⁸Ụka kị da ụwụwụ kpa lẹ, ala Isirẹlụ wuu à hụ ụwa ị-ịkampụ nyaa gbee ká ụwụwụ nya alẹng ịịwa myị̀ lẹlẹ.

⁹Ọọwa, Amkpaa-à byi iJochuwa yẹkẹẹ, “Alẹ ọlẹ m rị olo nya oyi nya ọnyọhị oriri Ijipiti tụkịnyaa hiinu lẹ.” Ịnyị à du ká ala Isirẹlụ wụrụ ẹnyị nya ẹgẹwẹ iGiligalụ[3] lẹ. Ẹnyị ọwẹ à tị ri ẹnyị nya ụwa pyịyọọ lẹlẹ.

¹⁰Ụka ká ala Isirẹlụ chịkụ i-iGiligalụ ụteeji ba iJeriko ba, ị ri ang oriri Ọchipwụrụ lobyi nya ẹnụtụrụ iwo kụrụ ine nya ọya ọọwa.

¹¹Ahị ọpyẹpyẹ ọọnamwụ kpangga ị dọmwụ nyọka ri ang ọlọpyị nya iKenan lẹ. Ị ri ịkaa ọmịrịị-mịrị-ka bala ajẹ nya ang ịlẹ kị hya a-agbila.

¹²Ọọwa, ịmána-à kpụba la o-do bwu uhye lẹlẹ. Ala Isirẹlụ-ụ́ tị ye imana ri kịlahị kaka. Bwu ụka ọwẹ ị juwa ri ang oriri ịlẹ kị wu ọ-ọpyị nya iKenan.

¹³Ụka ká iJochuwa jẹ ju iJeriko chwẹẹ, ọ yẹ ọlẹng ọhẹ lụka ọmwaaa kọ godayị jahị dọọ la oge ụ-ụbwọ. Ọọwa, iJochuwa à jẹ tụ bọọ lẹ, ọ tọ ọlẹng ọọwa wo yẹkẹẹ, “À ji oye nyahị lee à tị́ ri oluji nyahị?”

¹⁴Ọlẹng ọọwa wẹ byi iJochuwa yẹkẹẹ, “Ḿ ji ebwo ọhẹ nya ịwẹ ka. M̀ jam lala ọgẹwụ nya angịdẹwụ nya Amkpaa.” Ọọwa, iJochuwa à hị nọnọ yahị kụrụ eji juwa gbịgba lẹlẹ. Ọ byi ọlẹng ọọwa yẹkẹẹ, “Ọnchẹ nyang m̄ ri lẹ. Ịyẹ ahụ ayịbam à tị́ tịtọ kam ka họ?”

¹⁵Ọọwa, ọgẹwụ nya angịdẹwụ nya Amkpaa ọọwa-à byoo yẹkẹẹ, “Pwọ egbatẹ nyang mẹ, chajị à godayị ẹ-ẹga ọlịgọgọ.” Lẹ, iJochuwa à họ jaabwọ kị byoo lẹlẹ.