Read idege IJOCHUWA 6 Bible Online

IJOCHUWA 6 - idege bible

IJOCHUWA 6

¹Ụka ọọwa, ala iJeriko tụ ekpileku nya ogirigba nya epweji nyaa ku gbanggbang, juwa gbeji giri-giri chajị ị ju uhi nya ala Isirẹlụ. Ị́ myị ọngọngọhẹ jụ kele lee o-kpehe bwu ụwa ka.

²Ọọwa, Amkpaa-à byi iJochuwa yẹkẹẹ, “M̀ ya epweji nya iJeriko ọwẹ jung ụ-ụbwọ la adịrahụ-adịrahụ nya alụwa tụ angịdẹwụ nyamwụ wuu lẹ.

³Ahụ bala angịnyị nyang ka chẹwụ dọgịlẹ jwọọ ụka ookpokpo ẹnẹnẹẹnụ jịra ẹ-ẹnụtụrụ ịrwọnyẹ gbẹgbịlẹ.

⁴Angịkiliya irwiye ka jịlahị nya Akpa nya Iro. Ọngọngọọng nyaa ka kpa ẹkụrwẹ. Ẹnụtụrụ ọharwiye, anụ ka chẹwụ dọgịlẹ ju epweji ọwẹ jịra ugbabwọ irwiye. Ụka ọọwa, angịkiliya ka juwa chị ẹkụrwẹ nyaa.

⁵Ụka ká angịkiliya-á chị ẹkụrwẹ gboo gụ olene kanụ wo lẹ, ọng myị ọng nyanụ wuu à ya ụkwa ọtụka-ọtụka kpọnụ m̀mm mẹ. Ọọwa, ugulọ nya epweji ọwẹ à ka kpụ beji gbedem lẹ, angịdẹwụ à ka jẹ-ẹ́ jụ kele lẹlẹ.”

⁶Ọọwa, iJochuwa à wụrụ angịkiliya lẹ, ọ byaa yẹkẹẹ, “Anụ hu Akpa nya Iro kpa, ká ọngọngọọng nya angị irwiye lẹpwụ nyanụ à jịlahị nya Akpa nya Iro la ẹkụrwẹ mẹ.”

⁷Ọọwa, ọ byi angịnyị nyamwụ yẹkẹẹ, “Anụ dọmwụ nyọka chẹwụ dọgịlẹ ju epweji ọwẹ mẹ. Angịdẹwụ ā yegiri jịlahị nya Akpa nya Iro nya Amkpaa mẹ.”

⁸Ala Isirẹlụ họ jaabwọ ká iJochuwa daa ehile. Angịdẹwụ ịhyẹ jịlahị. Angịkiliya ịlẹ kị juwa chị ẹkụrwẹ báa ẹ-ẹkpẹ. Ọọwa, angịkiliya ị-kpa Akpa nya Iro à táa da lẹ, ebwo nya angịdẹwụ ịlẹkpẹ à dịraa lẹlẹ. Ụka ọwẹ wuu, angịkiliya juwa chị ẹkụrwẹ nyaa.

¹⁰Ma, iJochuwa da angịnyị nyamwụ ehile ene yẹkẹẹ, “Anụ chụkwa lee ọ-họ pyịm bwu bwu ọnụ ka gbee kam ka byinu anụ chụkwa mẹ.”

¹¹Ịnyị, ọ ya lẹ, ị kpa Akpa nya Iro nya Amkpaa jẹ dọgịlẹ ju iJeriko ụka ookpokpo ẹnụ ọọwa lẹlẹ. Ọọwa, ị nyà wẹ ịkampụ nyaa kaka hyehe lẹlẹ.

¹²Ọọwa, iJochuwa à wuleji lụtụrụ gbegbegbe lẹ, angịkiliya à hu Akpa nya nya Iro kpa lẹlẹ.

¹³Angịdẹwụ ịhyẹ jịlahị ene ká angịkiliya angị irwiye ịlẹ kị kpa ẹkụrwẹ yegiri báa jịlahị nya Akpa nya Iro nya Amkpaa. Ọọwa, angịkiliya ị-kpa Akpa nya Iro à táa da lẹ, angịdẹwụ ịlẹkpẹ à ji ẹkpẹ wuu lẹlẹ. Ụka ọwẹ wuu, angịkiliya juwa chị ẹkụrwẹ nyaa.

¹⁴Ẹnụtụrụ oheeye ị chẹwụ dọgịlẹ ju epweji ọwẹ ụka ookpokpo ịnyịnyị. Ọọwa, ị nyà tịrẹkpẹ wẹ ịkampụ nyaa lẹlẹ. Ịịwẹ ị họ gbee jịra ẹnụtụrụ ịrwọnyẹ lẹ.

¹⁵Ẹnụtụrụ ọharwịyẹ ị wuleji lụtụrụ gbegbegbe lẹ, ị chẹwụ dọgịlẹ ju epweji ọwẹ jaabwọ kịị họ ene-ene lẹlẹ. Ma, ẹnẹwẹ kpangga lẹ, ị chẹwụ dọgịlẹ ju epweji ugbabwọ irwiye.

¹⁶Ụka ọharwiye nya ẹwụ ọchịchị, ká angịkiliya chị ẹkụrwẹ lẹ, iJochuwa à da angịnyị ehile yẹkẹẹ, “Anụ chụkwa mẹ. Amkpaa ya epweji ọwẹ hanụ lẹ!

¹⁷Anụ ta epweji ọwẹ bala ang myị ang ịlẹpwụ nyamwụ wuu ayịreji. Ọwẹ ri ọ-ka mẹjẹ ya ị hwaa ha Amkpaa lẹ. IRehabụ ọlakpara bala alẹpwa nyamwụ kẹnẹ-kẹnẹ anụ ka ba hi lẹ, chajị ọ tụ alịbaje nyahị kpụ ịbaa.

¹⁸Ánụ ka hu ịngịngịhyẹ kpa rụ bwu ẹpwụ nya ang ịlẹ kị hunọ nyọka ta ayịreji ka. Ó-ri ịnyị ka aalẹ, anụ kpa akama bala ayịreji ọtata wẹ ịkampụ nyanụ anụ ala Isirẹlụ lẹ.

¹⁹Ang myị ang ọlẹ kị họ lokpoko onyoowuru lee okpoko ịgọm lee okpoko ọnyọmịla lee oje wuu ri nya Amkpaa. Ị ka kpa ka ju ẹ-ẹga ọ-ya okpoko ju nya Amkpaa.”

²⁰Ọọwa, angịkiliya à chị ẹkụrwẹ lẹ, angịnyị à ya ụkwa kpụ ọnụ ụka kị wo ẹkụrwẹ ọchịchị ọọwa lẹlẹ. Egwalọ kpụ beji kpalị-kpalị. Ọọwa, angịdẹwụ à wule ka ẹpwụ nya epweji nya iJeriko ọwẹ lẹ, ị ye la lẹlẹ.

²¹Ọọwa lẹ, ị ta ang myị ang ilepweji ọwẹ wuu ayịreji lẹlẹ. Ị nwụ alẹng bala anyang anjwo tụ angị gbahị. Ị nwụ ịna bala ịkpịlọ bala ibyiyó nyaa wuu.

²²IJochuwa byi alịbaje angị imiiye ịlẹ kị du ka wụlẹ ọpyị ọwẹ yẹ yẹkẹẹ, “Anụ jụ kele ka ẹpwa nya iRehabụ ọwẹ kanụ gbọọ kpehe bala alẹpwa nyamwụ wuu jaabwọ kanụ myị ọnụ họ ọ mẹ.”

²³Ọọwa, alịbaje ịịwa à jụ ka ẹpwa nya iRehabụ lẹ, ị gbọọ kpehe bala adamwụ bala ịnamwụ bala anyịnamwụ alẹng bala alugbiyegu nyamwụ ihihi lẹlẹ. Ọọwa lẹ, ị kpa alugbiyegu nyamwụ wuu kele kaka kụ ba ịkampụ nya ala Isirẹlụ ba lẹlẹ.

²⁴Ị jụ epweji ọwẹ wuu ila bala ang myị ang ịlẹpwụ nyamwụ. Ang ịlẹ kị hi kẹnẹ-kẹnẹ ri ịlẹ kị họ lokpoko onyoowuru bala okpoko ịgọm bala okpoko ọnyọmịla bala oje. Ị go ang ịwẹ wuu kpa ka ju ẹ-ẹga ọ-ya okpoko ju nya Amkpaa.

²⁵Lẹẹlẹ, iJochuwa chị iRehabụ bala aanamwụ wuu da chajị ọ tụ alịbaje ịlẹ kọ du ka wụla iJeriko yẹ kpụ ịbaa. Anyị ịtụma nya iRehabụ kụ am ta ala Isirẹlụ daalẹ wẹẹ.

²⁶Ụka ọọwa, iJochuwa ya ọnụ deeji yẹkẹẹ, “Ọngọngọhẹ kọ maga nyọka ma epweji nya iJeriko ọwẹ nwụ aalẹ, ọlọ nya Amkpaa ka woo. “Ọngọngọhẹ kọ ya itiwe nyamwụ yeji, ka gbu ọnyị ọlẹng ọgbahị. Ọngọ ma ogirigba nyamwụ nwụ́ ka gbu ọnyị ọlẹng ohyẹẹkpẹ.”

²⁷Ịịwẹ Amkpaa-à juwa ta iJochuwa lẹ, ẹnyị nyamwụ à ru ohi tụ ọpyị nya iKenan wuu da lẹlẹ.