Read idege IJOCHUWA 7 Bible Online

IJOCHUWA 7 - idege bible

IJOCHUWA 7

¹Amkpaa lẹẹ da ehile neeji ene ya ọngọngọhẹ nyị hu ịngịngịhyẹ kpa rụ bwu iJeriko ụka kịị nyị ka tọọ ayịreji ka. Ma, ala Isirẹlụ bịrị ehile ọọwa. Ọlẹng ọhẹ ọlẹ ká ẹnyị nyamwụ ri Ekan kpangga à bịrị ehile ọwẹ du ká Amkpaa wụ ẹjẹ ta ala Isirẹlụ lẹ. Ẹnyị nya adamwụ ri ịKami ọnyị nya ịSabụdi ologang nya ịSẹra i-imwawụ nya iJuda.

²IJochuwa du alẹng ịhyẹ bwu iJeriko kele ka Ayị. Epweji nya Ayị ju ịBẹtavịn chwẹẹ koye nya ọmwẹnụ-ụtụrụ nya ịBẹtẹlụ. IJochuwa byi alẹng ịịwa yẹkẹẹ, “Anụ kele ka wụla epweji nya Ayị yẹ mẹ.” Ọọwa, ị kele kaka wụla ụwa yẹ lẹlẹ.

³Ụka kị nya bwu ụwa lẹ, ị byi iJochuwa yẹkẹẹ, “Ọ́ baba ká ka du angịnyị wuu kaka mwẹla ta epweji nya Ayị ene ka. Du angị ụnọ imiiye (2,000) lee ụnọ ịta (3,000) kem mẹ, chajị Ayị ri epweji ochiche.”

⁴Ọọwa, ị chụ angịdẹwụ lala angị ụnọ ịta kele ka mwẹla ta ala Ayị lẹlẹ. Ala Ayị tị kụrụ ala Isirẹlụ chẹẹchẹẹ.

⁵Ala Ayị ku ala Isirẹlụ tịrẹkpẹ bwu ogirigba nya Ayị hireji bwu ikiti lalaala ka ju ka ẹga o-be ajwọ. Ị nwụ ala Isirẹlụ lala angị iwo ịta kụrụ ịrwọnyẹ ụ-ụgbẹyị. Ọọwa, ala Isirẹlụ à ju uhi ọtụka-ọtụka lẹ, ọkịlẹtụ à kpaa enyi lẹlẹ.

⁶Ọọwa, iJochuwa bala alegbeju nya ala Isirẹlụ à gu ịwụrụ nyaa ene bala o-go ịpyị wụ egbeju ọọ-lajị nya ọjụjụ lẹlẹ. Lẹ, ị kele ka hị nọnọ yahị kụrụ eji ị-ịlahị nya Akpa nya Iro nya Amkpaa gbee da ka alobyi nya ẹnẹwẹ lẹlẹ.

⁷Ụka ọọwa lẹ, iJochuwa-à yẹkẹẹ, “Chaahoho! Ọngọlahị Amkpaa ee! Ịyẹ tị́ du ká kpahị kpoye nya Ihu ịJọdan warị kpong-kpong ene-è? Ajị nyọka yahị ju ala Amọ ụ-ụbwọ kị ka tahị ayịreji ịnyị-ị́? Áhị kụ oye ọlaanyị nya ịJọdan kụ lẹẹ ịnọ, ọọwa kà haahị hagụ ọlẹ lẹ.

⁸Ọngọlahị ẹẹ, ọnụ him pyee lẹ. Yẹ wẹẹ! Ala Isirẹlụ mwụ ata bịmwụ hi aluji nyaa lẹ!

⁹Ala iKenan bala angịkịla ịlọpyị ọlẹ wuu ka wo ẹlẹwẹ. Ị ka họ wirim jahị dahị lẹ, ị ka tahị ayịreji gbanggbang lẹlẹ. Ee lẹ, ányị ā tị́ ka họ ka ihi ọlala ọtụka nyang á ka gbu enyi ka?”

¹⁰Ọọwa, Amkpaa-à byi iJochuwa yẹkẹẹ, “Bà la ọnọnọ yahị kụrụ eji, ká wuleji mẹ.

¹¹Ala Isirẹlụ họ ang onyobyi! Ị bịrị iro nyam. Ị go ịhyẹ nya ang ịlẹ kam daa ehile kị ka taa ayịreji. Ị gyaa yi oyi. Ị kpaa ka kpịbaa ẹ-ẹpwụ nya ang nya ịlaa. Ị tị pwarwarụ.

¹²Ang odudu ká ala Isirẹlụ-ụ́ ka bá ẹla ta aluji nyaa myị ka à wẹ lẹlẹ. Ị rụnyẹ mwụ ata bịmwụ hi aluji nyaa, chajị eje nya ayịreji ọtata waa lẹ. Ḿ ka juwa tanụ kịlahị kaka, kẹnẹ-kẹnẹ ánụ ta ang ịlẹ kam pwa ānụ go ka-à wẹ ayịreji lẹ mẹ ịnyị.”

¹³Amkpaa myịmyị byi iJochuwa yẹkẹẹ, “Kele ká chị ịgọgọ ju angịnyị ká nwụlaa nọ nyọka tọm-m̀ tọ ijuju mẹ. Am Amkpaa Ohe Oluhye nya ala Isirẹlụ yẹkẹẹ, ‘Anụ ala Isirẹlụ ee, anụ tị́ kpa ang ịlẹ kam pwa ānụ go ka wẹ ụ-ụwa wẹẹ̀. Lẹẹlẹ, ánụ ka jẹ-ẹ bá ẹla ta aluji nyanụ myị kaka gbee kanụ ka pẹhi ang ịịwa gbanggbang.’

¹⁴Alụtụrụ ijuju, anụ ka warị imwawụ-imwawụ. Alimwawụ ọlẹ kam chụ ka warị ogang-ogang. Alogang ọlẹ kam chụ ka warị ugbiyegu-ugbiyegu. Alugbiyegu ọlẹ kam chụ alẹng ịlụwa ka warị ọngọhẹ-ọngọhẹ.

¹⁵Ọngọlẹ ká Amkpaa-á bwuru, kị yọọ la ang ịlẹ kam pwa anụ go ka aalẹ, ị ka jwọọ ila bala alugbiyegu nyamwụ tụ ang ịlẹ wuu kọ la, chajị ọ kpa oyoyi wẹ ala Isirẹlụ bala ọ-bịrị ehile nyam lẹ.”

¹⁶Lụtụrụ gbegbegbe nya ahị ọpyẹpyẹ ọọnamwụ ká iJochuwa kpa ala Isirẹlụ wẹ ịlahị imwawụ-imwawụ lẹ, ẹla à wu imwawụ nya iJuda lẹlẹ.

¹⁷Ọ kpa imwawụ nya iJuda wẹ ịlahị ogang-ogang. Ẹla wu ogang nya ịSẹra. Ọọwa, ị kpa alogang nya ịSẹra wẹ ịlahị ugbiyegu-ugbiyegu lẹ, ẹla à wu ugbiyegu nya ịSabudi bẹẹ lẹlẹ.

¹⁸Ọọwa, ọ kpa alugbiyegu nya ịSabudi wẹ ịlahị ọlẹng-ọlẹng lẹ, ẹla à wu Ekan bẹẹ ịnyịnyị lẹlẹ. Ekan ri ọnyị-nya ịKami. Adịda ọgbahị nya Ekan à ri ịSabudi ọnyị nya ịSẹra lẹ.

¹⁹Ọọwa, iJochuwa a byi Ekan yẹkẹẹ, “Ọnyị nyam ee, ya ẹla nya ịlẹhị ị-ịlahị nya Amkpaa Ohe Oluhye nya ala Isirẹlụ mẹ. À họ ịnyị ịlẹhị-ị́? Ya jem ang ọlẹ ka họ mẹ. A ya kpụ ịbaaa him kaka.”

²⁰Ọọwa, Ekan à wẹ byi iJochuwa yẹkẹẹ, “Ee, ịnyịlẹhị ịnyị. M̀họ ang onyobyi ba Amkpaa Ohe Oluhye nya ala Isirẹlụ lẹ. Jaabwọ kọ la à lẹẹ lẹ:

²¹Ụka kahị juwa i-iJeriko, m yẹ awụrụ ọnyịịla-ọnyịịla ọhẹ ọlẹ kị họ bwu ịBabịlọn ẹ-ẹpwụ nya ang-ẹwụ ịlẹ kahị nu. M yẹ okpoko onyoowuru ohu imiiye (200) bala ugbile nya okpoko ịgọm ọnmẹẹ ọhẹ. Ang ịwẹ kọm ẹhị lụmẹ lẹ, m̀ gyaa kpa nyà. M chị ụjẹ ya ang ịwẹ kpịbaa ẹ-ẹpwang nya ọdụ nyam. Okpoko onyoowuru à ji ekpeleji pẹtẹẹ lẹ.”

²²Ọọwa, iJochuwa à du alẹng ịhyẹ kele lẹlẹ. Ị kele lụnyẹ-lụnyẹ ka pwụ ụwa lẹ, ị yẹ ang ịwẹ ịnyịlẹhị lokpoko onyoowuru e-ekpeleji nyaa pẹtẹẹ lẹlẹ.

²³Ị gbaa kpehe bwu ẹpwang, ị kpa kịla iJochuwa bala ala Isirẹlụ wuu lẹ, ị yaa guru ị-ịlahị nya Amkpaa lẹlẹ.

²⁴IJochuwa bala ala Isirẹlụ wuu wu Ekan pyẹẹ lẹ, ị kpọọ bala okpoko onyoowuru bala awụrụ bala ugbile nya okpoko ịgọm ịịwa kele ka Ọkpọọ nya Akama lẹlẹ. Ị kpa anyị nyamwụ tụ ịna bala ibyiyó bala ịkpịlọ bala ẹpwang nya ọdụ nyamwụ bala ang myị ang ịlẹ kọ la wuu ka ụwa ịnyịnyị.

²⁵Ọọwa, iJochuwa à byi Ekan yẹkẹẹ, “Ahụ à yahị ju ka ẹpwụ nya akama lẹẹ lẹ. Amkpaa tịtị ka yẹng akama kwiwa alẹ!” Ọọwa, ala Isirẹlụ wuu à da ajwọ nwụ Ekan lẹlẹ. Ị da ajwọ nwụ alugbiyegu nyamwụ wuu ịnyịnyị lẹ, ị chaa ila lawụlẹ-awụlẹ tụ ang myị ang ịlẹ kọ la wuu lẹlẹ.

²⁶Ị go ajwọ gurwoo u-uhye gbudum. Ajwọ ịịwa juwa pyịyọọ wẹẹ. Ịnyị à du kị wụrụ ẹgẹwẹ Ọkpọọ nya Akama[4] pyịyọọ daalẹ lẹ. Ọọwa, agbama nya Amkpaa-à kpụba lẹlẹ.