Read idege IJOCHUWA 8 Bible Online

IJOCHUWA 8 - idege bible

IJOCHUWA 8

¹Amkpaa byi iJochuwa yẹkẹẹ, “Go angịdẹwụ nya ala Isirẹlụ wuu ba ịlọng kanụ kele ka Ayị mẹ. A ju uhi ka. Ọkịlẹtụ a tị kpụng enyi ka. M ka ya adịrahụ nya ala Ayị bala angịnyị nyamwụ tụ epweji bala ọpyị nyamwụ wuu jung ẹ-ẹpwụtụbwọ.

²Anụ-ụ̀ họ ala Ayị bala adịrahụ nyaa ang ọlẹ ká họ ala iJeriko bala adịrahụ nyaa. Ugbẹnyị tị lẹ, anụ ka kpa ang-ụdụ bala iyo ịlẹpwa nyaa nyà ha ịlọnụ. Anụ chụ ka kụ ịnyà u-ugumẹ nya epweji ọwẹ mẹ.”

³Ọọwa, iJochuwa à nwụlanọ nyọka kpa angịdẹwụ nyamwụ ka epweji nya Ayị lẹlẹ. Ọ chụ angịdẹwụ ịlahịchịng-ịlahịchịng angị ụnọ iwo ịta lẹ, ọ daa jịlahị lodu lẹlẹ.

⁴Ọ daa ehile yẹkẹẹ, “Anụ-ụ̀ kpịbaa ẹ-ẹkpẹ oloye ọlaanyị nya epweji bọọ ba mẹ. Anụ tị ka kụ giri-giri gbe ọ-ka dẹwụ ta epweji ọwẹ.

⁵Am bala alẹga nyam ka jẹ yahị da epweji lẹ. Ụka ká ala Ayị-ị́ wẹ nyọka mwẹla tahị lẹ, āhị ka jahị kpata rụnyẹ rụ lala ụka nya ọgbanyẹ lẹlẹ.

⁶Ị ka kuhi gbee kahị ka kpaa jẹ hwẹẹẹ hi epweji nyaa. Ị ka me irya kahị juwa rụnyẹ rụ hyaa lala olene.

⁷Ụka ọọwa lẹ, anụ-ụ̀ gba kpehe wirim bwu ẹga kanụ kpịbaa, kanụ ye epweji ọwẹ la mẹ. Amkpaa Ohe Oluhye nyanụ ka ye epweji ọwẹ hanụ.

⁸Ụka kanụ ye epweji ọwẹ kpa lẹ, anụ jwọọ ịla jaabwọ ká Amkpaa danụ ehile mẹ. Ehile ịlẹ kanụ ka kpa à wẹ lẹlẹ.”

⁹Ọọwa, iJochuwa à daa rụ ka ẹga kị ka kụ ịnyà lẹlẹ. Ẹga ọọwa ji ọmwẹnụ-obyi nya Ayị ụ-ụwa apewa nya Ayị bala ịBẹtẹlụ. IJochuwa ayịdang tị hyehe ị-ịkampụ nya ala Isirẹlụ lodu ọọwa.

¹⁰Lụtụrụ gbegbegbe, iJochuwa wuleji lẹ, ọ wụrụ angịdẹwụ tụguru lẹlẹ. Ọọwa, ọwa bala alegbeju nya ala Isirẹlụ à kpaa kele ka Ayị lẹlẹ.

¹¹Ọwa bala angịdẹwụ ịlẹga nyamwụ bajẹ yahị da epweji. Ị jẹ̀ kaka chịkụ ẹ-ẹtẹ nya Ayị. Ọkpọọ ọhẹ ji apewa nyaa bala ala Ayị.

¹²Ọ chụ angị ụno ịrụ (5,000) lẹ, ọ yaa kpịbaa koye nya ọmwẹnụ-obyị nya Ayị ụ-ụwa apewa nya Ayị bala ịBẹtẹlụ lẹlẹ.

¹³Angịdẹwụ wuu kụ giri-giri lẹ. Angịhyẹ nyaa kụ yi ịkampụ nyaa yi koye nya ẹtẹ nya epweji. Alebwo ọkịla tị kụ ịnyà koye nya ọmwẹnụ-obyi lẹ. IJochuwa ayịdang tị hyehe ọ-ọkpọọ ọwẹ lodu ọọwa.

¹⁴Ụka ká adịrahụ nya ala Ayị yẹ angịdẹwụ nya iJochuwa, ọ wuleji ahyaahị bala angịnyị nyamwụ. Ị yegiri yahị da ka ọkpọọ nya ịJọdan nyọka mwẹla ta ala Isirẹlụ ẹ-ẹga olene. Ị́ tị jẹ ala Isirẹlụ ịhyẹ nyị juwa ka baa ẹpwa bwu ẹkpẹ ka.

¹⁵Ụka ọọwa, iJochuwa bala angịdẹwụ nyamwụ juwa rụnyẹ nya ihwirihwa yahị da ka ugbileji lala aluji nyaa kụrwaa lẹ.

¹⁶Alegbeju nya ala Ayị wụrụ alepweji wuu kaka jịra kị ka ku iJochuwa anyị. Jaabwọ kị wẹẹ kwaa kịlahị-ịlahị, ịnyịnyị iJochuwa anyị à juwa kpaa jẹ hwẹẹẹ hi epweji ka ba lẹ.

¹⁷Ọng myị ọng nya ala Ayị[5] wuu kpehe ka ku ala Isirẹlụ. Ị rụ hi epweji dụwa hwóoo, la ọngọngọhẹ hi gbe ẹpwa ka.

¹⁸Ọọwa, Amkpaa-à byi iJochuwa yẹkẹẹ, “Jị ọkpachị nyang ahị da Ayị mẹ. M juwa ka ya epweji ọwẹ jung ẹ-ẹpwụtụbwọ lẹ.” IJochuwa họ jaabwọ ká Amkpaa byoo.

¹⁹Ahyaahị kọ hu ụbwọ hwaa lẹ, angịdẹwụ ịlẹ kị kụ ịnyà à gba kpehe bwu iwe-ịbaa nyaa lẹlẹ. Ị bene chị epweji lẹ, ị ye ju ụbwọ lẹlẹ. Ọọwa, ị chọọ ila lẹlẹ.

²⁰Ụka ká ala Ayị chẹhị kẹkpẹ, ị yẹ ịmwụ-ila kpúnaa e-epweji nyaa. Í ye ẹga ka bwu be kaka, chajị ala Isirẹlụ ịlẹ kị lẹẹ rụnyẹ yahị da ka ugbileji ene jahị mịlanya daa nyọka mwẹla taa lẹ.

²¹Ụka ká iJochuwa bala angịdẹwụ nyamwụ yẹ ka angịkịla nyaa ye epweji ọwẹ bala ọ-jwọọ ila lẹ, ị jahị kpata juwa nwụ ala Ayị lẹlẹ.

²²Ala Isirẹlụ ịlẹ kị juwa e-epweji kpehe warị kaka yụbwọ ju ẹwụ ọwẹ ọdada. Lẹẹlẹ, ala Ayị kpụ ẹpwụ ọnụ nya ẹwụ. Ala Isirẹlụ yaa dada bwu oyiye-oyiye. Ị nwaa gbee ká ọngọngọhẹ nya ala Ayị-ị́ be rụ lọhịhị nyamwụ bwu ọgbẹwụ ọwẹ ka

²³kẹnẹ-kẹnẹ adịrahụ nyaa ọlẹ kị wu lahị-lahị mẹ ịnyị. Ị woo kpa kịla iJochuwa.

²⁴Ala Isirẹlụ nwụ aluji nyaa wuu ịlẹ kị ku ka ugbileji. Ọọwa, ị tịrẹkpẹ ka epweji nya Ayị lẹ, ị nwụ angị ihihi ịlụwa wuu lẹlẹ.

²⁵Ị nwụ ala Ayị wuu gbanggbang ẹnụ ọọwa. Iru ojuju nya alụwa wuu la angị ụnọ iwo kụrụ imiiye (12,000).

²⁶Ụka ọwẹ wuu, iJochuwa ya ọkpachị nyamwụ me ka Ayị. Ọ́ pẹ hyoo neeji ka gbee kị nwụ ọng myị ọng ọlụwa wuu.

²⁷Ala Isirẹlụ ya iyo ịlẹpwa bala ang-ụdụ nya epweji ọwẹ guru ha ịlaa jaabwọ ká Amkpaa byi iJochuwa.

²⁸Ịịwẹ iJochuwa anyị à jụ Ayị ila lẹ, ị rụ hyoo dụwa kpụ egwawụ-egwawụ pyịyọọ lẹlẹ.

²⁹IJochuwa ju adịrahụ nya ala Ayị orinwa pịlẹ okoji ọhẹ gbee da ka alobyi. Ụka ká ẹnụ juwa ka yẹtẹ dụrụ ugba lẹ, ọ byi angịnyị nyamwụ yẹkẹẹ, “Anụ hiri ogu nyamwụ eji kpa ka dụwa ogirigba mẹ.” Ọọwa, ị hiroo eji kpa kaka da mileji ị-ịlahị nya ọnụ-ogirigba nya epweji lẹlẹ. Ị go iru nya ajwọ gurwoo u-uhye gbudum. Ogu nya ajwọ ịịwa juwa pyịyọọ wẹẹ.

³⁰Ụka kị jẹ pwụ Ọgbọdọ nya Ebalụ lẹ, iJochuwa à ya lẹ ị me ogidi ụ-ụwa ha Amkpaa Ohe Oluhye nya ala Isirẹlụ lẹlẹ.

³¹Ị moo kpẹẹkpẹẹ jaabwọ ka iMosisi ọnchẹ nya Amkpaa ya ụ-ụpwụ nya ehile yẹkẹẹ, “Ógidi ọọwa ka ri ọlẹ kị kpa ang oloje-oje be ajwọ nyamwụ ka.” Ọọwa, ị kịla iya ọ-rụ ila bala iya nya okpunyi ọhọhọ u-uhye nya ogidi ọọwa ha Amkpaa lẹlẹ.

³²Ọọwa, iJochuwa à da ehile nya iMosisi ba ajwọ ị-ịlahị nya ala Isirẹlụ wuu lẹlẹ.

³³Ụka ọọwa, ala Isirẹlụ bala alegbeju bala angịleje bala ịgabwọ nyaa wuu tụ angga ịlẹpwụ nyaa wuu godayị ịkịka oyiye-oyiye nya Akpa nya Iro jahị da angịkiliya ịlẹ kị kpọọ. Ẹhya nyaa godayị jẹkpẹ da Ọgbọdọ nyaa iGerisim. Ẹhya ọkịla nyaa godayị jẹkpẹ da Ọgbọdọ nya Ebalụ. Ị họ ịnyị chajị iMosisi ọnchẹ nya Amkpaa da ehile neeji ene ya nyị họ ịịwẹ ụka kị ka wahị kụrwaa lẹ.

³⁴Ọọwa, iJochuwa à wa dodehe jaa kpẹẹkpẹẹ ahị ọwawa bala ọlọ owuwu ịlẹ wuu kị da ụ-ụpwụ nya ehile lẹlẹ.

³⁵IJochuwa wa ehile ọnyị myị ọnyị ịlẹ ká iMosisi da je angịlẹ kị tụguru wuu. Anyang bala anjwo tụ angga ịlẹpwụ nya ala Isirẹlụ wuu wo ọwawa nya ehile ọọwa.