Read idege IJOCHUWA 9 Bible Online

IJOCHUWA 9 - idege bible

IJOCHUWA 9

¹Ụka ọọwa, ịdịrịhụ ịlẹ kị ji ọmwẹnụ-obyi nya ịJọdan wo oja jaabwọ ká ala Isirẹlụ kụrụ aluji nyaa. Ị wo ẹla ọọwa pwụ ịpyị ilikiti bala ịlụteeji lalaala ka ju ka ịpyị ịlọnụ nya Ihu iMeditareniya yahị da koye nya iLibanọn. Ịdịrịhụ ịhyẹ nyaa ri ala iHiiti bala ala Amọ bala ala iKenan bala ala iPerisi bala ala iHivi bala ala iJebusi.

²Ọọwa, angịwẹ wuu à dụgba wule awụlẹ kị ka mwẹla ta iJochuwa bala Isirẹlụ lẹlẹ.

³Ala iGibyọn wo ang ọlẹ ká iJochuwa họ ala iJeriko bala ala Ayị ịnyịnyị.

⁴Ọọwa, ị cheje nyọka kpa ijẹẹhị da iJochuwa anyị lụgbaa lẹlẹ. Angịhyẹ nyaa ju olo nya ang oriri ị-ịbang bala egba nya ere igwene-gwene ịlẹ kị ga. Ị ya olo ịịwa chụ ibyiyó nyaa.

⁵Ị go áchị nya ịwụrụ kụrụ bala egbatẹ ihogo-hogo ịlẹ kị ga ju. Ịkaa ọlẹ kị kpa bịlaa nwọnwụ kọnggbọọ bala ọ-da ebwubwu.

⁶Ọọwa, ị hu ang ka ẹga nya iJochuwa ị-ikampụ ọla iGiligalụ lẹ, ị byoo bala ala Isirẹlụ yẹkẹẹ, “Ahị bwu ẹga ọlụrụ. Ahị wẹ kaka bịlẹng ká ka nwa iro tahị.”

⁷Ọọwa, ala Isirẹlụ à wẹ byaa yẹkẹẹ, “Eheehe! Áhị ka jẹẹ nwa iro tanụ koo. À ya kanụ ri angị kụ ọnụ-ọnụ nya ẹgẹlẹ ka-á?”

⁸Ọọwa, ala iGibyọn à byi iJochuwa yẹkẹẹ, “Àhị anchẹ nyang ịnyị.” Ma, iJochuwa taa wo yẹkẹẹ, “Oowo anyị anụ tị́ ri? Ale anụ tị́ bwụ ene-è?”

⁹Ị byoo yẹkẹẹ, “Ahị bwu ọpyị ọlụrụ. Ahị wẹ chajị ahị wo ohi nya ụmụmẹ nya Amkpaa Ohe Oluhye nyang. Ahị wo ang ịlẹ kọ họ ụ-ụwa Ijipiti.

¹⁰Ahị wo oja ịnyịnyị chajị nya ang ọlẹ kọ họ adịrahụ nya ala ịHẹchịbọn ọlẹ ká ẹnyị nyamwụ ri ịSịhon bala adịrahụ nya ala ịBachan ọlẹ kị wụrụ Ọọgụ ịlẹ kị kụ Achịtarọtụ ọ-ọmwẹnụ ụtụrụ nya Ihu ịJọdan.

¹¹Alegbeju bala alụma nyahị wuu byihi yẹkẹẹ, ‘Anụ nwụla ang oriri nya ẹdịyẹ nọ kanụ kele kaka tọ iJochuwa anyị mẹ. Anụ-ụ̀ byaa mẹ, àhị ri anchẹ nyaa. Lẹẹlẹ, ị nwa iro tahị mẹ.’

¹²Yẹ ịkaa nyahị lẹẹ. Ọ chila ẹnụ kahị hu ang bwu ẹpwa. Tị yẹ mẹ, ọ nwọnwụ kọnggbọọ bala ọ-da ebwubwu wuu lẹ.

¹³Egba nya ere nyahị ịlẹ ri inyeewe ụka kahị yere juwa. Tị yẹ mẹ, ị gwene wuu lẹ. Ẹ-ẹpwụ nya ẹdịyẹ ọlụrụ ọlẹ ịwụrụ bala egbatẹ nyahị a bịrị jẹgụ-jẹgụ juhi ị-ịnyịrọ lẹẹ lẹ.”

¹⁴Ọọwa, ala Isirẹlụ a myị lẹ, ị ye ang nya ala iGibyọn ịwẹ ri lẹlẹ. Ị́ tọ Amkpaa wo ene ka.

¹⁵IJochuwa họ okpunyi taa. Ọ myị haa ká ala Isirẹlụ-ụ́ ka nwaa kaka. Alegbeju nya ala Isirẹlụ wuu nwa iro kị ka họ ọnụ ọmyịmyị ọwẹ jịra.

¹⁶Ụka kị nwa iro ọwẹ kpá lẹ, ala Isirẹlụ a wuleji ẹdịyẹ myịmyị lẹlẹ. Ẹnụtụrụ ọhata nya ẹnẹwẹ, ị jẹ kaka pwụ ẹga ká epweji nya iGibyọn bala iChefira bala iBiyerotu bala iKiriyatị-ịJarim kụ. Ọọwa, ị jẹ ká ala iGibyọn kụ jwaa chwẹẹ lẹlẹ.

¹⁸Ala Isirẹlụ-ụ́ tị nwaa ka ọọ-la ajị nyọlẹ ká alegbeju nya ala Isirẹlụ nwa iro inyi ene lẹnyị nya Amkpaa Ohe Oluhye. Ụka ká alụma wuu mwẹla ya ba alegbeju u-uhye nya ọọwa,

¹⁹alegbeju wẹ byaa yẹkẹẹ, “Ahị nwa iro taa lẹnyị nya Amkpaa Ohe Oluhye nyahị ahị ala Isirẹlụ lẹ. Lẹẹlẹ, áhị ka yụbwọ gwaa kaka.

²⁰Áhị ka nwaa ka chajị nya iro ọlẹ kahị nwa. Ó-ri ịnyị ka aalẹ, Ohe Oluhye ka yẹhị akama.

²¹Anụ bahyaa mẹ. Ịwa à tị ka ri anyịhị i-be ịwụ bala angị ka ogo hahị wuu lẹlẹ.”

²²IJochuwa wụrụ ala iGibyọn ịwẹ lẹ, ọ taa wo yẹkẹẹ, “Ịyẹ tị́ du kanụ dahị lụgbaa mẹ? Anụ byihi ịwa nyị bwu ẹga ọlụrụ, anụ tị kụ am ẹgẹlẹ-ẹgẹlẹ.

²³Ọọ-la ajị nya ọọwa lẹ, m ya ọnụ deeji hanụ lẹ. Bwu ọlẹẹlẹẹ kịlahị, anụ ka ri anyịhị, kanụ ka juwa be ịwụ bala ọ-ka ogo kpa wẹ ube ịgọgọ nya Ohe Oluhye nya ala Isirẹlụ.”

²⁴Ọọwa, ị wẹ byi iJochuwa yẹkẹẹ, “Ahị họ ịnyị chajị ahị ju uhi nyang. Ahị wo myịmyịịmyị ya Amkpaa Ohe Oluhye nyang da iMosisi ọnchẹ nyamwụ ehile kọ ka ya ọpyị ọlẹ wuu hang, ká ka nwụ angị kụ am wuu jaabwọ kanụ wẹẹ jẹ kịlahị-ịlahị.

²⁵Lẹẹlẹ, ahị jam ụ-ụbwọ nyang lẹ. Họhị jaabwọ kọ chịla i-irya nyang mẹ.”

²⁶Ọọwa, iJochuwa a ya ẹga da ha ala Isirẹlụ ị nwụ ala iGibyọn ịwẹ kaka lẹlẹ.

²⁷Ma, ọ họ kị ri angị be ịwụ bala angị ka ogo ha ala Isirẹlụ bala ọ-kpa wẹ ogidi okiliya nya Amkpaa. Ị kịnyaa lụkụrwọ ọwẹ bwu ẹnẹwẹ pyịyọọ ẹ-ẹga myị ẹga ká Amkpaa chụ kị ka me ogidi rịrị.