Read idege 2 ALA ỊTẸSALONIKA 1 Bible Online

2 ALA ỊTẸSALONIKA 1 - idege bible

2 ALA ỊTẸSALONIKA 1

¹Ụpwụ ọlẹ jam bwu ẹga nyam am ịPọlụ bala iSilivanọsị bala iTimoti warị wẹ ẹga nyanụ anụ ala ịchọọchị ịlẹ kanụ juwa ọ-ọpyị nya ịTẹsalonika, ịlẹ kanụ ri angịnyị nya Ohe Oluhye Adahị bala angịnyị nya Ọngọlahị iJisọsị ịKịrayịsị.

²Ká ọnahị bala okpunyi nya Ohe Oluhye Adịda bala ịnya Ọngọlahị iJisọsị ịKịrayịsị a juwa tanụ mẹ.

³Ọ ri eje ọchịchị nyahị nyọka juwa ji Ohe Oluhye obe ụka wuu chajị nyanụ anụ anyadahị ẹ-ẹpwụ nya ịKịrayịsị. Chajị, ịnyị, ọ chịla kahị ka họ pyii lẹ. Ang odudu nya ọọwa ri, chajị nya ọ myịmyị ọlala nyanụ ọlẹ kọ juwa nwa kele ka ịlahị-ịlahị bala ọlẹ ká ọng myị́ ọng nyanụ wẹẹ la ọháha nya ịlẹhị-ịlẹhị ẹ-ẹga nya awụlẹ gụ olene-ene ẹ-ẹpwarịrị nyanụ ịnyịnyị.

⁴Chajị nya ọọwa a du kahị jam kpanụ chị ogu ya je ala ịchọọchị nya Ohe Oluhye ịlẹgẹlẹ jaabwọ kanụ juwa godayị kpakpakpa ẹ-ẹpwụ nya Ọngọlahị la bala ọlẹ kanụ juwa kpa ugbodu ojuju bala ọmyịmyị ọlala godayị ẹ-ẹpwụ nya akama ọyẹyẹ bala ị-tụ pyịpyị ịlẹ kị juwa wẹ chịnụ ọgụ wuu ịnyịnyị lẹ.

⁵Ogodayị kpakpakpa nyanụ ẹ-ẹpwụ nya akama ọlịnyị a ka jẹ́-ẹ chị eje ọkpẹẹkpẹẹ ọlala nya Ohe Oluhye ehe gede-gede ẹ-ẹga nyanụ, bwula ọlẹ kaanụ ayịdang ka ri angị chịla nyọka jụ ka ịpyị Adịrahụ nya Ohe Oluhye ọlẹ kanụ wẹẹ yẹ akama chajị nyamwụ lẹlẹ.

⁶Chajị, Ohe Oluhye la ịlọmwụ tịtị hunọ kọ ka họ ang ọlẹ kọ pwoku ẹ-ẹga nya angịlẹ wuu kị wẹẹ tụụnụ pyịpyị bwula ọ-ka yaa yẹ akama kwiwa nya akama ọlẹ kị yẹnụ pyii lẹ.

⁷Ọọwa lẹ, Ohe Oluhye la ịlọmwụ a ka hu ọmwịịnyọ nyamwụ hanụ anụ angịlẹ wuu kanụ wẹẹ yẹ akama bala ahị ayịdang lụka ọlẹ ká Ọngọlahị iJisọsị ka hi ehe bwu epwoohe hireji warị la ọngịrị ọtụka nyamwụ bala alegu-ẹrụ ịnyịịngịrị nyamwụ,

⁸ẹ-ẹpwụ nya owuruu wuru nya ẹlẹlẹ ila lẹlẹ. Ọọwa lẹ, ọ ka hu akama ha angịlẹ wuu kị jẹ́ Ohe Oluhye ka, tụ angịlẹ wuu kị myị ju ihi nya ẹrụ ọnyịịla nya Ọngọlahị iJisọsị ịKịrayịsị ọlẹ kaka, kwiwa nya ọọwa ịnyịnyị lẹlẹ.

⁹Akama ọyẹyẹ nya angịịwa wuu ka ri ayịreji ọtata o-gbe oyi myị́ oyi bala ebwo ọchịchị hi ijata nya Ọngọlahị ayịdang bala ẹbyẹbyị nya ọngịrị ọtụka nyamwụ ịnyịnyị.

¹⁰Ịnyị, ọ ka la ẹnụtụrụ ọlẹ ká Ọngọlahị ka warị kaka chị ẹbyẹbyị nya ogbo nyamwụ ehe u-uhye nya angị ịgọgọ nyamwụ wuu, ọlẹ kọ ka la angịnyị wuu ẹbyẹbyị lụmẹ kaka kpoye u-uhye nya angịlẹ wuu kị myị lọọ tụụnụ anụ ayịdang lẹlẹ. Chajị nyọlẹ kanụ myị ibeenu oriri nyahị junu chajị nya Ọngọlahị la lẹlẹ.

¹¹U-uhye nya ọlịnyị kpangga, a du kahị kaa raabwọ chajị nyanụ ụka wuu yẹkẹẹ, Ohe Oluhye nyahị a họ kanụ ka ri angị chịla-chịla pwoku, ẹ-ẹpwụ nya ẹkọ obebe nya Ohe Oluhye ọlẹ kọ be wụrụụnụ kaka ri angịnyị nyamwụ mẹ lẹlẹ. Ahị kaa raabwọ ha Ohe Oluhye chajị nyanụ, kọ ka ya ọngịrị nyamwụ hanụ, chajị ká eje ọlẹ kanụ chị u-uhye nya ang ọnyịịla ọhọhọ wuu ka jẹ́-ẹ họ jịra myị́ bala ọ-họ kanụ ka jẹ́-ẹ kpa ọmyịmyị ọlala nyanụ ọọwa họ ụkụrwọ pwụ ọbaba ịnyịnyị myị́.

¹²Chajị ká ogbo nya ẹbyẹbyị nya ẹnyị nya Ọngọlahị iJisọsị ịKịrayịsị ka jẹ́-ẹ chị ehe bwulanụ mẹ. Ká ogbo ẹbyẹbyị nya Ohe Oluhye tịtị ka jẹ́-ẹ chị ehe u-uhye nyanụ bwula ịKịrayịsị ịnyịnyị, jaabwọ ká ọnahị nya Ohe Oluhye nyahị bala ịnya Ọngọlahị iJisọsị ịKịrayịsị la mẹ.