Read idege 2 ALA ỊTẸSALONIKA 2 Bible Online

2 ALA ỊTẸSALONIKA 2 - idege bible

2 ALA ỊTẸSALONIKA 2

¹Lẹẹlẹẹ, ẹla chajị nya ọ-mwọọgịlẹ warị wẹ nya Ọngọlahị iJisọsị ịKịrayịsị bala ọtụchawụlẹ nyahị bala ọwa lụka ọọwa lẹ, ahị jam bịlẹnụ nya ịlẹhị-ịlẹhị, anụ anyadahị ẹ-ẹpwụ nya ịKịrayịsị yẹkẹẹ,

²anụ myị ká ọkịlẹtụ nyanụ a juwa hụ́ jigi-jigi lee irya nyanụ, o-juwa chị uko yẹkẹẹ, ẹnụtụrụ nya ọwarị wẹ nya Ọngọlahị la kpangga pwụ eji lẹ, koo! Ó riri ká angị ya ẹla ọọwa, á kpa ọngịrị nya olegu ọhẹ-lọhẹ kpakpa yẹ ọmwụ ọọwa dodehe lee ẹla oyaya bwu ọnụ lee ileta ọdada, ọlẹ kị juwa yẹkẹẹ, ahị nyaa da lẹ aalẹ, anụ myị jwaa koo!

³Chajị nya ọọwa lẹ, anụ myị ká ọngọngọhẹ a hụnụ ahị la ụgbẹyị ọhẹ-lọhẹ kpong-kpong ka. Chajị, ene ká ẹnụtụrụ ọọwa ka pwụ eji, ang o-ju ẹjẹẹ nya angịnyị ehe o-ji ẹkpẹ da ẹrụ ọnyịịla nya ịKịrayịsị ọlẹ ka ji. Ịnyị lẹ, ọngịnyị onyobyi ọ-tụ ehile nya Ohe Oluhye pyịpyị, ọlẹ ká eje ọchịchị oluhye nyamwụ ọwa, ri ayịreji ọtata nya obwila, a ka chị ịlọmwụ ehe gede-gede lụka ọọwa ene ịnyịnyị lẹlẹ.

⁴Chajị, ọngịnyị onyobyi ọọwa ayịdang a ri ọngọlẹ kọ kaa tụ Ohe Oluhye pyịpyị, juwa yẹkẹẹ, ịngịngịhyẹ nyị́ ri Ohe Oluhye ọhẹ-lọhẹ juwa kpong-kpong kaka lẹlẹ, nyị́ chịla ká angịnyị ehe nyị ka gbịgba ha ohe ọkịla ọhẹ dala ọwa ịlọwa kaka. Ịnyị lẹ, ọngọ onyobyi ọọwa a ka juwa kpa ịlọmwụ ka uhye ngana-ngana, ka juwa kele kaka hụhụ u-ube ịgọgọ ọtụka nya Ohe Oluhye nya ala iJuu ka juwa ya ịlọmwụ dodehe yẹkẹẹ, ọwa kpakpakpa nyaa dọmwụ ri Ohe Oluhye lẹlẹ.

⁵Lee, anụ ayịdang á tị́ kpịtịya kaka? Ụka ọlẹ kam juwa tanụ wẹẹ lẹ, m tị́ ya ala ịwẹ wuu dodehe jenu?

⁶Anụ la ịlọnụ tị jẹ́ ụma nya ang ọlẹ kọ wẹẹ ku ọngọ onyobyi ọọwa iwe la ọ-chị ịlọmwụ ehe lẹẹlẹẹ ịnyịnyị. Ma, ụka ká ụka ọlẹ ká Ohe Oluhye hunọ á pwụ kpangga lẹ aalẹ, ọngọ onyobyi ọọwa a ka chị ịlọmwụ ehe gede-gede lẹlẹ.

⁷Chajị, ọ ri nya ịlẹhị yẹkẹẹ, ọngịrị ọkpịbaa nya ang onyobyi ọhọhọ nya ọngọ onyobyi ọọwa dọmwụ jam họ ụkụrwọ ị-ịbaa-ịbaa ẹ-ẹpwụ nya odehe ọlẹ lẹẹlẹẹ lẹ! Ma, ọngọlẹ kọ tị wẹẹ ku ọngọ onyobyi ọọwa iwe la ọ-ka chị ịlọmwụ ehe lẹẹlẹẹ lẹ, ọ ka juwa họ ịnyị gbee pwụ ụka ọlẹ ká ọngọ onyobyi ọọwa ka tụ kịnyaa kpá ene lẹlẹ.

⁸Ọọwa lẹ, ọngọ onyobyi ọọwa ayịdang a ka chị ịlọmwụ ehe gede-gede lẹlẹ. Ịnyị lẹ, Ọngọlahị iJisọsị a ka kpa ịhụ ọdada o-bwu ọnụ nya ịlọmwụ nwụ ọngọ onyobyi ọọwa lẹlẹ. IJisọsị ka tọọ ayịreji gbang gbang bwula ẹbyẹbyị nya ogbo nya ịlọmwụ lụka ọlẹ ká Ọngọlahị ayịdang ka mwọọgịlẹ warị myịmyị.

⁹Ọngịnyị onyobyi ọọwa ka chị ọwẹwẹ nya ịlọmwụ ehe bwula ọngịrị ọtụka-ọtụka nya Ohe Onyobyi ọ-kpa họ ụkụrwọ. Ọ ka juwa họ ụma nya ang i-ju ẹjẹẹ ịlẹbyẹbyị bala ụkụrwọ ẹbyẹbyị nya ọnọọkịla la datị-datị ịnyịnyị.

¹⁰Ọ ka kpa ụma nya ijẹẹhị nya ụhwahị nyamwụ la datị-datị, juwa hụ angịlẹ wuu kị juwa dịrẹ ụgbẹyị nya ayịreji ọtata, ahị. Chajị, ẹla nya ịlẹhị nya Ohe Oluhye ọlẹ, ịnọ, kọ ka kpa ọchịda nya Ohe Oluhye kịla angịịwa lẹ, jaabwọ ká ẹla ọọwa á háa kaka lẹlẹ, ị pwọọ lẹ.

¹¹Chajị nyọlẹ ká angịịwa pwa ẹla nya ịlẹhị nya Ohe Oluhye, ịnyị, a du ká Ohe Oluhye la ịlọmwụ tịtị wẹẹ ka tụụbwọ hyaa ẹ-ẹpwụ nya irya nya ụhwahị ọtụka-ọtụka nyaa, du kị wẹẹ ka myị la ọnọọkịla nya Ohe Onyobyi ọọwa dachichi lẹlẹ.

¹²Chajị ká eje owuwu nya Ohe Oluhye ka jẹ́-ẹ juwa u-uhye nya angịlẹ wuu kịịwa á myị, myị la ẹla nya ịlẹhị nyamwụ kaka, du kịịwa ayịdang mwọọgịlẹ juwa họ ịpyọ la abwẹla onyobyi ọhọhọ kem lẹlẹ.

¹³Ma, ẹ-ẹga nyanụ anụ anyadahị ẹ-ẹpwụ nya ịKịrayịsị, ịlẹ kanụ há Ọngọlahị la lụmẹ lẹ, eje ọchịchị nyahị ri yẹkẹẹ, ahị ka juwa ji Ohe Oluhye obe ụka myị́ ụka wuu chajị nyanụ pyii lẹ. Chajị, Ohe Oluhye chụnụ ha ịlọmwụ bwu ọmwụ ọdada nya odehe, chajị kọ ka chịnụ da bwula ọngịrị nya Olegu Ịgọgọ nyamwụ ọlẹ kọ hụụnụ cheri-cheri wẹ lẹ bala ọmyịmyị ọlala nyanụ u-uhye nya ẹla nya ịlẹhị nyamwụ.

¹⁴Ajị nya iwe-ahụrụ ọlịnyị kpangga a du ká Ohe Oluhye be ẹkọ wụrụụnụ ha ịlọmwụ bwula ẹrụ ọnyịịla o-ya pyẹ nyahị ọlẹ kahị kpa kaka ya jenu lẹ. Chajị ká iwe-ahụrụ ọọwa ka jẹ́-ẹ kpanụ kaka bá ẹbyẹbyị nya ogbo nya Ọngọlahị iJisọsị ịKịrayịsị bá la tọọ ịnyịnyị lẹlẹ.

¹⁵Chajị nya ọọwa lẹ, anụ anyadahị ẹ-ẹpwụ nya ịKịrayịsị, anụ cheri kanụ godayị kpakpakpa ẹ-ẹpwụ nya Ọngọlahị la, kanụ juwa yụbwọ chị ẹla nya ịlẹhị nya Ohe Oluhye ịlẹ wuu kahị mẹjẹẹnụ kpa ụ-ụwa gogo mẹ. Ala ịlẹ kahị yaya jenu bwu ọnụ nyahị ẹ-ẹpwụ nya ẹla nya Ohe Oluhye oyaya pyẹ nyahị lee ala ịlẹ kahị da kpehe ẹ-ẹpwụ nya ileta ya du wanụ wuu lẹ, anụ́-ụ kpaa ụ-ụwa ịnyịnyị mẹ.

¹⁶Lẹẹlẹẹ lẹ, ká Ọngọlahị iJisọsị ịKịrayịsị ayịdang bala Ohe Oluhye Adahị Ọngọlẹ kahị há lụmẹ bala Ọwa Ọngọlẹ kọ hu ẹjẹ ọkpụ́kpụ o-gbe oyi myị́ oyi nyamwụ hahị bala o-hu ẹhị ọrịrịị-rịrị ọnyịịla nyamwụ hahị wuu bwula ọnahị lẹ,

¹⁷ká Ohe Oluhye ọọwa a tịtị hu ẹjẹ ọkpụ́kpụ ha ọkịlẹtụ nyanụ wuu, kọ họ kanụ godayị kpakpakpa ẹ-ẹpwụ nya ụma nya ụkụrwọ ọnyịịla ọnyị myị ọnyị bala ẹla ọnyịịla ọnyị myị ọnyị ọhọhọ bala oyaya nyanụ wuu ịnyịnyị pyịyọọ mẹ.