Read idege 2 ALA ỊTẸSALONIKA 3 Bible Online

2 ALA ỊTẸSALONIKA 3 - idege bible

2 ALA ỊTẸSALONIKA 3

¹Ẹla ohyẹẹkpẹ-ẹkpẹ nyam ri yẹkẹẹ, anụ anyadahị ẹ-ẹpwụ nya ịKịrayịsị, anụ chuchuu kanụ juwa raabwọ ha Ohe Oluhye chajị nyahị, chajị kahị ka juwa kpa ẹla nya Ọngọlahị ọlẹ ya pyẹ kele kịlahị-ịlahị lụnyẹ-lụnyẹ la ọgụ ọlẹ kọ ka ya ogbo ha Ohe Oluhye, jaabwọ kọ la ẹ-ẹpwarịrị nyanụ anụ ịnyịnyị mẹ.

²Anụ raabwọ bịlẹ Ohe Oluhye ịnyịnyị, chajị kọ ka gbahị kpehe bwu ẹpwụtụbwọ nya angịnyị inyibyi ịlẹ kị ri alọkwọ mẹ! Chajị, aangịnyị wuu a ri angị la ọmyịmyị u-uhye nya ẹrụ ọnyịịla ọlẹ ka.

³Ma, Ọngọlahị la ayịdang ri Ọngọ chịla o-hu ọkịlẹtụ ha lụmẹ lẹ, ọ ka wunu kpa gogo ẹ-ẹpwụ nya ẹla nyamwụ bala ọ-ka juwa gbanụ kpehe hi ẹpwụ nya ang onyobyi ọhọhọ wuu ịnyịnyị.

⁴Ahị tị la ẹhị ọ-da hile ọnyịịla ẹ-ẹga nyanụ bwula Ọngọlahị la yẹkẹẹ, jaabwọ kaanụ ayịdang wẹẹ họ ang ịlẹ kahị danụ ehile wuu lẹ, anụ ka juwa kpaa họ ụkụrwọ ịnyịnyị kịlahị-ịlahị pyii lẹ.

⁵Ká Ọngọlahị ayịdang la ịlọmwụ a ri Ọngọ juwa kpanụ ụgbẹyị ẹ-ẹpwụ nya irya omeme ọlọkịlẹtụ nyanụ wuu mẹ. Chajị kanụ ka jẹ́-ẹ, juwa me irya u-uhye nya ọháha ọlala ẹ-ẹga nya Ohe Oluhye ụbwọọmwụ kem bala ogodayị kpakpakpa ẹ-ẹpwụ nya ịKịrayịsị ayịdang ụbwọọmwụ kem ịnyịnyị mẹ.

⁶Lẹẹlẹẹ, anụ anyadahị ẹ-ẹpwụ nya ịKịrayịsị, ahị jam kpa ẹnyị nya Ọngọlahị iJisọsị ịKịrayịsị danụ ehile yẹkẹẹ, anụ́-ụ juwa chị ịlọnụ ebwo hi ọnyadanụ ẹ-ẹpwụ nya ịKịrayịsị ọnyị myị ọnyị ọlẹ kọ juwa la ọhịhị nya ụbwọ ọtata bala ọ-myị juwa hịhị ba ọmẹjẹ nya ẹrụ ọnyịịla ọlẹ kanụ wo bwu ẹga nyahị wuu jẹ kpong-kpong kaka lẹ ka ịnyịnyị mẹ.

⁷Chajị, anụ la ịlọnụ dọmwụ jẹ́ kọ ri ang ọchịla-chịla kanụ ka juwa gbịlahị ahị ayịdang ẹ-ẹpwụ nya ang ọhọhọ nyahị wuu. Chajị, ụka ọlẹ kahị juwa tanụ lẹ, ahị́ la ọhịhị nya ụbwọ ọtata kpong-kpong ka.

⁸Chajị, ụka ọọwa lẹ, ahị́ tị myị kaa ye ịngịngịhyẹ bwu ụbwọ nya ọngọngọhẹ nyanụ kpong-kpong ka, tụ ịkaa oriri ọlam-ọlam ọlẹ. Kẹnẹ-kẹnẹ, ó ri kahị nwụnụ uri nyamwụ kpá ene lẹ, mẹ ịnyị. Ma, ọkọkọ nya ọọwa lẹ, ahị juwa kaa nwụ ịlọhị la ụkụrwọ ọhọhọ nya ịlẹhị-ịlẹhị lodu bala alẹnụ, chajị kahị ka yẹ ri olo ha ọngọngọhẹ lẹpwụ nyanụ kpong-kpong ka.

⁹Aajị nyori yẹkẹẹ, ahị ayịdang, ịnọ, á la ọngịrị nyọka kpụ nịrọ ụbwọ ọdada nyanụ anụ myị́ ka, a tị du ka. Ma, ahị tọchị-tọchị họ ịnyị, chajị kahị ka jẹ́-ẹ ri ang o-ju ẹjẹẹ hanụ wuu bwula ọọwa, ịnyị a du lẹ.

¹⁰Chajị, ụka ọlẹ kahị dọmwụ juwa tanụ wẹẹ lẹ, ahị danụ ehile ọlẹ yẹkẹẹ, “Ọng myị́ ọng ọlẹ kọ myị họ ụkụrwọ ka, tụbwọ aalẹ, ọngọọwa a tịtị ri ang oriri kpong-kpong kaka ịnyịnyị.”

¹¹Ang odudu kahị wẹẹ ya ẹla ọlẹ lẹẹlẹẹ tanụ ri yẹkẹẹ, ahị wo oja yẹkẹẹ, angịhyẹ lẹpwụ nyanụ nyị juwa la ọhịhị nya ụbwọ ọtata lụmẹ lẹ. Ahị wo ịnyịnyị yẹkẹẹ, ụkụrwọ nya angịịwa ọlẹ kịị nyị wẹẹ họ wuu nyị ri o-juwa gba ju ka ẹpwụ nya ẹla nya angịnyị angịkịla kpobolo kem.

¹²Ahị jam kpa ẹnyị nya Ọngọlahị iJisọsị ịKịrayịsị da angị ịlịnyị wuu ehile bala o-juwa gbilaa ụbwọ ụ-ụrụ nya ịlẹhị-ịlẹhị yẹkẹẹ, angị ịlịnyị a cheri kị juwa kpa ụbwọ nya ịlaa họ ụkụrwọ yẹẹyẹẹ ẹ-ẹpwụ nya ọkẹm-kẹm nya abwẹla, chajị kị ka jẹ́-ẹ juwa ye ang ọ-kpa da ọhịhị nya ịlaa ụbwọ hiigu-hiigu mẹ.

¹³Anụ anyadahị ẹ-ẹpwụ nya ịKịrayịsị, anụ chuchuu ká ụbwọ a chị́ịnụ pyẹpyẹ ẹ-ẹpwụ nya ang ọnyịịla ọhọhọ kpong-kpong kokoo!

¹⁴Anụ wo mẹ, ó ri ká ọng myị́ ọng lẹpwụ nyanụ á pwa o-ju ihi nya ẹla ọlẹ kahị wẹẹ ya jenu ẹ-ẹpwụ nya ileta ọlẹ lẹ aalẹ, anụ́-ụ ju ọngọọwa ẹjẹẹ datị, kanụ cheji ba ọngọọwa gbanggbang, chajị ká oyoyi ka jẹ́-ẹ jwoo mẹ.

¹⁵Anụ hu ọngọ ọlịnyị lala oluji nyanụ tị koo. Ma, anụ́-ụ juwa da ọngọọwa ọna yẹẹyẹẹ lala ọnyadanụ ẹ-ẹpwụ nya ịKịrayịsị mẹ.

¹⁶Lẹẹlẹẹ, ká Ohe Oluhye Ọngọlahị ayịdang ọlẹ kọ ri Adịda nya okpunyi la ịlọmwụ a hu okpunyi nyamwụ ọọwa hanụ ụka wuu ẹ-ẹpwụ nya ụgbẹyị myị́ ụgbẹyị nyanụ wuu mẹ. Ká Ohe Oluhye Ọngọlahị a juwa tanụ wuu mẹ.

¹⁷Am ịPọlụ ayịdang a lẹẹ kpa ụbwọ nya ịlọm da ọnụ ọdachị ọlẹ du wanụ lẹ. Ọlẹ a tị ri ụgbẹyị ọlẹ kam kaa bwu kpa yụbwọ ju ileta ọnyị myị ọnyị ọlẹ kam kaa da ẹ-ẹpwụ du kịla angịnyị nyam wuu lẹlẹ.

¹⁸Ká ọnahị nya Ọngọlahị iJisọsị ịKịrayịsị a juwa tanụ wuu mẹ. [Ị da ileta oheeye ọlẹ du kịla ala ịTẹsalonika bwu ọpyị nya ala Atẹnsị.]