Read idege 1 ITIMOTI 1 Bible Online

1 ITIMOTI 1 - idege bible

1 ITIMOTI 1

¹Am ịPọlụ ọngọ ri ọlẹrụ ọnyịịla nya iJisọsị ịKịrayịsị bwula ehile nya Ohe Oluhye Ọngọchịda nyahị bala iJisọsị ịKịrayịsị ọlẹ kọ ri ẹhị ọrịrịị-rịrị nyahị, a lẹẹ da ụpwụ ọlẹ lẹ.

²Am jam da ụpwụ ọlẹ du wang ahụ iTimoti ọnyị nyam nya ịlẹhị-ịlẹhị ẹ-ẹpwụ nya ọmyịmyị ọlala nya Ohe Oluhye. Ọnahị nya Ohe Oluhye Adịda bala ịnya iJisọsị ịKịrayịsị Ọngọlahị bala ahyẹẹrwẹrwa bala okpunyi nyaa a juwa tang.

³Jaabwọ kam bying ụka ọlẹ kam juwa jẹ rụ ka ọpyị nya ịMẹsịdoniya yẹkẹẹ, aa hi hụwa e-epweji nya Efesọsị mẹ lẹ, m jam ma ẹla ọọwa ya lẹẹlẹẹ. Angịlẹ kị wẹẹ me ọnọọkịla je angịnyị hi ẹla nya ịlẹhị nya Ohe Oluhye deeji ụ-ụwa lẹ, aa gbilaa ụbwọ ụ-ụrụ ọgwọgụ mẹ.

⁴Aa byi angịịwa kị tụụbwọ hi ujwo ojwojwo ịlẹ ká angịnyị kaa kpa da ọmwụ ọdada nya ang ịlẹ ká Ohe Oluhye họ wụlẹ, deeji bala ẹnyị nya adịda igogo ịlẹ kị ma alụpwọma la datị-datị ịnyịnyị mẹ. Chajị ejwo ijwojwo ịlịnyị, a kaa kpa ịwẹẹ ọdada ka ẹpwụ nya angịnyị ehe ọkọkọ nya ọmyịmyị ọlala ọlẹ kọ kaa kpa ọngịnyị kaka jẹ́ obyi omeme nya Ohe Oluhye lẹ.

⁵Chajị, Ohe Oluhye tịtọ ká ọháha ọlẹ kaahị angịnyị ehe ka la ẹ-ẹga nyamwụ ka ri ọháha ọlẹ kọ ka bwu ẹpwụ nya ọkịlẹtụ onyoowuru nyahị wuu bala ẹpwụ nya irya ọgbagbịla nyahị wuu bala ọháha ọlẹ kọ bwula ọmyịmyị ọlala nya ịlẹhị-ịlẹhị ịnyịnyị.

⁶Ma, angịhyẹ tị juwa kị hwahị hi ụgbẹyị ọnyịịla ọọwa, kị mwọọgịlẹ juwa ya alala i-hi deeji kem.

⁷I juwa hu ịlaa nya angịmẹjẹ nya ehile nya Ohe Oluhye, ụka ọlẹ kịịwa ayịdang á tị jẹ́ ehile ịịwa myịmyị ka lee ọdọmwụ jẹ́ etu nya ala ịlẹ kị juwa ya la ọngịrị ọngịrị bwu ọnụ nya ịlaa datị kpong-kpong ka.

⁸Ahị jẹ́ yẹkẹẹ, ịnọ, ehile nya Ohe Oluhye hiigu, ó ri ká ọngịnyị á kpa ehile ọọwa họ ụkụrwọ jaabwọ ká Ohe Oluhye ayịdang tịtọ.

⁹Ahị jẹ́ ịnyịnyị yẹkẹẹ, aajị nya alabwẹla ọnyịịla a du ká Ohe Oluhye da ehile nyamwụ ka. Ma, Ohe Oluhye da ehile nyamwụ chajị nya angịlẹ kị kaa bịrị ehile bala angịlẹ kị kaa ju ihi kpong-kpong ka. Ehile ọọwa juwa ha angịlẹ kị kaa ju ihi nya Ohe Oluhye ka bala o-juwa ha alọhọbịrị. Ehile ọọwa juwa ha angịlẹ ká ọhịhị nyaa, á la igogo ị-ịlahị nya Ohe Oluhye ka bala angịlẹ kị kaa ju Ohe Oluhye ẹpẹ. Ehile ọọwa juwa ha angịlẹ kị kaa nwụ adịda nyaa lee ịnịna ọ-maa ma lee angịlẹ kị kaa nwụ angịnyị ehe ịkịla ịnyịnyị.

¹⁰Ehile ọọwa juwa ha angịlẹ kị kaa họ ụya lee alẹng ịlẹ kị kaa họ ụya ta alẹng ịkịla aanaa ịnyịnyị. Ehile ọọwa juwa ha angịlẹ kị kaa wu angịnyị ehe yoyi bala angịlẹ kị kaa me ịnịịkịla. Ehile ọọwa juwa ha angịlẹ kị kaa nwa iro ọnọọkịla bala angịlẹ kị kaa họ ang ịkịla ịlẹ kị tụ ọmẹjẹ ọnyịịla nya ẹla nya Ohe Oluhye ọhọhọ pyịpyị.

¹¹Ọmẹjẹ ọnyịịla ọọwa juwa ẹ-ẹpwụ nya ẹrụ ọnyịịla ọlẹbyẹbyị nya Ohe Oluhye ọlẹ kọ ri ọngịnyị nya ahị ọwawa. Ẹrụ ọnyịịla ọọwa, Ohe Oluhye a hu jum ụ-ụbwọ lẹẹ, kam ka ri ọngọ kpa ya pyẹ je angịkịla lẹ.

¹²M jam ji ịKịrayịsị iJisọsị Ọngọlahị obe ọhọhọ, chajị nyọlẹ kọ ya ọngịrị ọ-kpa họ ụkụrwọ nyamwụ ọlẹ ham bala ọlẹ kọ hum lala ọngọ chịla o-hu ọkịlẹtụ ha ị-ịlahị nyamwụ, du kọ chụm nya ọngọ ya ẹrụ ọnyịịla họọ.

¹³Ọ ri nya ịlẹhị, ịnọ, am ayịdang ya ẹla pyị ịKịrayịsị bala ọ-tụ ẹnyị nyamwụ pyịpyị bala ọ-chị oyoyi ju ẹnyị nyamwụ ịnyịnyị ẹnẹhẹ lẹ. Ma, ịKịrayịsị tị yẹm ahyẹẹrwẹrwa, chajị nyọlẹ kam họ ang ịtịpyọ ịịwa wuu ẹ-ẹpwụ nya ọjẹ́jẹ-ka bala ọmyịmyị ọlala ka nyam.

¹⁴Ọọwa lẹ, Ọngọlahị a họ ká ọnahị ọtụka nyamwụ chị ehe ẹ-ẹga nyam lẹ, ọ hu ọmyịmyị ọlala bala ọháha nya ịlẹhị-ịlẹhị ọlẹ kọ da emyo bwu ẹpwụ nya ịKịrayịsị ham lẹẹ lẹlẹ.

¹⁵Ẹla ọlẹ ri ẹla nya ịlẹhị ọlẹ kọ chịla ká ọng myị́ ọng ka ye ẹla ọọwa kpa họ ụkụrwọ bala ọ-myị jwoo yẹẹyẹẹ. Ẹla ọọwa ri yẹkẹẹ, ịKịrayịsị iJisọsị warị wẹ odehe ọlẹ kaka chị alọhọbịrị da. Am ịPọlụ ọlẹ ayịdang a dọmwụ ri olegbeju nya alọhọbịrị ịịwa lẹlẹ.

¹⁶Ahyẹẹrwẹrwa ọọwa juwa ham ịnyị chajị ká ugbodu ojuju ọtụka nya ịKịrayịsị ọlẹ kọ la ẹ-ẹga nyam, am olegbeju nya alọhọbịrị wuu, ka ri ang o-ju ẹjẹẹ ha alọhọbịrị ịkịla wuu, chajị kị ka myị la iJisọsị ịKịrayịsị lẹ, kị ka la ọhịhị ọmyịmyị-ka ịnyịnyị.

¹⁷Bwula ọọwa, ihi bala ogbo ka juwa ha Adịrahụ o-gbe oyi myị́ oyi nyahị ọlẹ kọ ri Ohe Oluhye. Ọwa ayịdang a ri Ọngọlẹ kọ ka jẹ́-ẹ gbu kaka, lẹlẹ. Lee, Ọngọlẹ ká ọngịnyị ehe á ka jẹ́-ẹ kpẹhị nya ịlọmwụ yọọ myị́ kaka ịnyịnyị lẹlẹ. Ọwa ụbwọọmwụ kem a ri Ohe Oluhye lẹ. Ihi bala ogbo ka juwa họọ pwụ ụka myị́ ụka. Amẹn.

¹⁸ITimoti ọnyị nyam ẹ-ẹpwụ nya ịKịrayịsị, m jam gbileng ụbwọ ụ-ụrụ nya ịlẹhị-ịlẹhị u-uhye nya ehile nya ụkụrwọ nya Ohe Oluhye ọlẹ kị ya dodehe jeng bwula ọmwụ ọyẹyẹ. Aa myị ká ẹla ọọwa a hu ila ọchịchị hang ẹ-ẹpwụ nya uya ọmama nya abwẹla ọnyịịla nya Ohe Oluhye ọlẹ ká-a wẹẹ ma ụka wuu mẹ.

¹⁹Aa yụbwọ chị ọmyịmyị ọlala nyang kpa ụ-ụwa gogo mẹ. Ká ri ọngọ ju ihi, ọlẹ ká irya ọ-la ọngịnyị eje ọlẹpwụ ọkịlẹtụ nyang ka ya eje rụng ụka wuu ịnyịnyị mẹ. Angịhyẹ juwa, kị myị kaa ke ụrụ la omyi nya irya ọ-la ọngịnyị eje ọlẹpwụ ọkịlẹtụ nyaa ịwa ka, gbee ká ọmyịmyị ọlala nyaa gwaa ta ayịreji lẹ.

²⁰Ụma nya angịnyị ịlịnyị, iHimẹnịyọsị bala Alẹkịsanda a ri lẹ. Ịnyị a du kam tụụbwọ hyaa ju Ohe Onyobyi ụ-ụbwọ, chajị kị ka byị ẹjẹ-ẹ ya pyị Ohe Oluhye myịmyị gụ ọọwa kaka lẹlẹ.