Read idege 1 ITIMOTI 2 Bible Online

1 ITIMOTI 2 - idege bible

1 ITIMOTI 2

¹Ọhụ ojuju nyam nya ọgbanyẹ-ọgbanyẹ ri yẹkẹẹ, anụ juwa kpa ọbaba nya angịnyị wuu kịla Ohe Oluhye ẹ-ẹpwụ nya abwọ ọrịrị bala ọbịlẹ-bịlẹ nyanụ, kanụ juwa ji Ohe Oluhye obe chajị nyaa ịnyịnyị ụka wuu mẹ.

²Anụ juwa raabwọ ha Ohe Oluhye chajị nya ịdịrịhụ bala angịkịla ịlẹ wuu ká ọngịrị nya eji ogbegbe juwa ẹ-ẹpwụtụbwọ nyaa mẹ. Chajị kaahị wuu ka jẹ́-ẹ hụ la o-kem ẹ-ẹpwụ nya ọhịhị nya okpunyi bala ọngịnyị nya Ohe Oluhye oriri nyahị la ụgbẹyị myị́ ụgbẹyị ọlẹ wuu kọ ka la ihi mẹ.

³Ọọwa a ri ang ọlẹ kọ chịla-chịla ị-ịlahị nya Ohe Oluhye Ọngọchịda nyahị lẹ.

⁴Chajị, ọ ri irya nya Ohe Oluhye ayịdang ká angịnyị ehe wuu ka chịda bala ọ-ka ri angị jẹ́ ẹla nya ịlẹhị nya Ohe Oluhye yẹẹyẹẹ ịnyịnyị.

⁵Chajị Ohe Oluhye ookpokpo a juwa lẹ. Ọngọ ookpokpo, Ohe Oluhye a tị chụ kọ ka godayị rịrị apewa nya angịnyị ehe bala Ohe Oluhye, juwa kọ ẹla bala ọ-myị ẹrụ ha angịnyị bala Ohe Oluhye kem lẹ. Ọngọọwa a ri iJisọsị ịKịrayịsị lẹ.

⁶IJisọsị ịKịrayịsị ọọwa a hu ọhịhị nyamwụ kịla iya wọnụ nya angịnyị wuu ju chajị ká Ohe Oluhye ka bwula ịKịrayịsị chaa da lẹ. Ịnyị lẹ, ụka ká ụka ọlẹ ká Ohe Oluhye hunọ pwụ lẹ. Igu nya ịKịrayịsị ọọwa a ri ibeenu yẹkẹẹ, Ohe Oluhye tịtọ kọ ka chị angịnyị wuu da ịnyịlẹhị lẹlẹ.

⁷Ịnyị a du ká Ohe Oluhye chụm kam ka ri ọngọ ya ẹla nyamwụ pyẹ bala ọngọ myị ẹrụ ọnyịịla nyamwụ lẹ. Ẹla nya ịlẹhị, m wẹẹ ya la ẹnyị nya ịKịrayịsị lẹ. Ḿ me ọnọọkịla ka. Ohe Oluhye chụm kam ka ri ọngọ mẹ ẹla nya ọmyịmyị ọlala bala ẹla nya ịlẹhị nyamwụ jẹ ala iJentayịlị.

⁸M tịtọ ká angị igogo nya Ohe Oluhye wuu ẹ-ẹga myị́ ẹga ka tụụbwọ hi agbama ojuju bala ịwẹẹ ọdada beji, kị ka nịra abwọ nyaa kpaa ka uhye, juwa raabwọ ha Ohe Oluhye ẹ-ẹpwụ nya ọmyịmyị ọlala nyaa.

⁹M tịtọ ká anyang ịlẹ kị ri angịnyị nya Ohe Oluhye ka juwa kpa ẹla ọjẹ́jẹ ọlala kụrụ ịwụrụ ịlẹ kị pwoku la ụgbẹyị ọlẹ kọ la ihi. Ịyang ọhọhọ nyaa, á ri ịnya inyi ọgụgụ nwurwo-nwurwo kem ka lee ịwụrụ ịlẹ kị la ịnya lụmẹ ọrara ka lee ogbe bala ang ịlẹ kị kpa okpoko ịgọm họ kem ọrara kpong-kpong ka.

¹⁰Ọkọkọ nya ọọwa lẹ, ị cheri ká ịyang ọhọhọ nyaa a ri ịnya ụkụrwọ ọnyịịla ọhọhọ, jaabwọ kọ chịla ká anyang ịlẹ kị ri angịnyị nya Ohe Oluhye ka họ mẹ.

¹¹Ká anyang a hụhụ kem, juwa jẹ́ ang ọlẹ kị juwa mẹjẹ ẹ-ẹpwụ nya o-juwa kpa ịlaa weji mẹ.

¹²Ḿ tịtọ ká anyang a ka ri angịmẹjẹ nyanụ ka. Lee, ịwa ọ-ka ri alegbeju nya alẹng ka. Ma, ọ chịla kịịwa ka hụhụ la o-kem e-ekpeleji nya alẹng.

¹³Chajị Adam a ri ọngọlẹ ká Ohe Oluhye họ kpá ene kọọ họ Iivu lẹ.

¹⁴Adam ayịdang kpangga, Ohe Onyobyi a tị pịrị ju jene-jene ka. Ma, Iivu ọnyang nya ọgbanyẹ a ri ọngọlẹ ká ilo pịrị ju ka ẹpwụ nya ọhọbịrị ọhọhọ jene lẹ.

¹⁵Ma, Ohe Oluhye ka gba anyang kpehe bwu ẹpwụ nya ọnyị ọmama, ó ri kị juwa kịlahị ẹ-ẹpwụ nya ọmyịmyị ọlala bala ọháha ọlala nya Ohe Oluhye bala igogo ọlala bala o-juwa kpa uhi nya Ohe Oluhye ojuju wu ịlaa kpa ẹ-ẹpwụ nya ang myị́ ang wuu.