Read idege 1 ITIMOTI 3 Bible Online

1 ITIMOTI 3 - idege bible

1 ITIMOTI 3

¹Ẹla ọlẹ ri ẹla nya ịlẹhị. Ó ri ká ọngịnyị á juwa tịtọ nya iwe-ahụrụ nya ọngọgbikpịlọ ọlẹpwụ nya ịchọọchị aalẹ, ụkụrwọ ọnyịịla-ọnyịịla a wẹ kọ wẹẹ tịtọ lẹ.

²Ọngọlẹ kọ ka ri ọngọgbikpịlọ nya Ohe Oluhye ọlịnyị, á ka ri ọngọlẹ ká ọhịhị nyamwụ ka ju abyị kpong-kpong ka. Ọ ka ri ọngọ ye ahụ ookpokpo kem. Ọ ka ri ọngọ kpẹhị chịng nya ẹla. Ọ ka ri ọngọ kpa ẹla ọjẹ́jẹ họ abwẹla. Ọ ka ri ọngọ họ abwẹla ọnyịịla. Ọ ka ri ọngọ kpahị ju angga yẹẹyẹẹ. Ọ ka ri ọngọ jẹ́-ẹ mẹ ang jẹ angịkịla yẹẹyẹẹ ịnyịnyị.

³Olegbeju ọlịnyị á ka ri ọngọ nwa ere ya ka. Ó ka ri ọngọ ma uya ta angịnyị ka. Ma, ọ ka ri ọngọ kpa ọdụmwọ họ okpunyi ẹ-ẹga nya angịkịla. Ọngọọwa á ka ri ọngọ rwarụ ta angịnyị ka. Ó ka ri ọngọ chẹhị nyanya ẹ-ẹga nya okpoko ọlala ka ịnyịnyị.

⁴Ọngọgbikpịlọ nya Ohe Oluhye ọlịnyị ka ri ọngọlẹ kọ ka jẹ́-ẹ kpẹhị rịrị alọdọdẹpwa nyamwụ yẹẹyẹẹ, ọlẹ kọ ka họ ká anyị nyamwụ wuu ka ri angị ju ihi hiigu-hiigu pyii.

⁵Chajị, ó ri ká ọngịnyị á jẹ́ kpa ọdọdẹpwa nya ịlọmwụ yẹẹyẹẹ ka, anyị, ọ tị́ ka jẹ́-ẹ kpẹhị rịrị ịchọọchị nya Ohe Oluhye myị́?

⁶Ọngọlẹ kọ ka ri ọngọgbikpịlọ nya Ohe Oluhye, á ka ri ọngọ onyeewe ẹ-ẹpwụ nya ẹla nya Ohe Oluhye ka. Ó ri ịnyị ka aalẹ, ọ ka kpa ịlọmwụ ka uhye ngana-ngana ẹ-ẹpwụ nya ọbọọchẹ ohihi jaabwọ ká Ohe Onyobyi họ, du ká eje owuwu nya Ohe Oluhye wẹ uhye nyamwụ.

⁷Ang ọkịla ri yẹkẹẹ, olegbeju o-ya ẹla nya Ohe Oluhye ọlịnyị ka ri ọngọ ọnyịịla ị-ịlahị nya angịlẹ kị jẹ́ Ohe Oluhye lẹka. Ó ri ịnyị ka aalẹ, ọ ka kpa oyoyi wẹ ẹpwụ nya ịchọọchị nya Ohe Oluhye bala o-ju ka ẹpwụ nya ori owuwu nya Ohe Onyobyi.

⁸Ịnyịnyị, ọ chịla ká angịlẹ kị ka ri alegbeju ị-da ọngọgbikpịlọ ụbwọ ị-ịchọọchị ka ri angị la kpịra-kpịra ẹ-ẹpwụ nya ụkụrwọ ọhọhọ pyii lẹlẹ. Angịịwa á ka ri angị la ẹlẹlẹ imiiye ẹ-ẹpwụ nya ẹla oyaya kpong-kpong ka. Ị́ ka ri angị nwa ere ya ka. Ị́ ka ri angị chẹhị nyanya ẹ-ẹpwụ nya okpoko ọlala ka ịnyịnyị.

⁹Ẹla nya ịlẹhị nya ọchịda ọlẹ ká Ohe Oluhye ya chị ehe a-ahịgboo wuu lẹ, angịịwa ka ri angịlẹ kị ka juwa yụbwọ chị ẹla ọọwa gogo, chajị ká irya ọ-la ọngịnyị eje ọlẹpwụ ọkịlẹtụ nyaa á ka ya eje waa kpong-kpong ka.

¹⁰Ụka kanụ yẹ ká ịmayẹ la datị-datị á da ọmyịmyị ọlala nya angị ịlịnyị uya kpá, kịịwa ayịdang á la ọkụrụ-kụrụ bwu ẹpwụ nya ịmayẹ ịịwa la abyị ọlala kaka lẹ aalẹ, ị ka jẹ́-ẹ ri alegbeju ịlịnyị ẹ-ẹpwụ nya ịchọọchị, juwa da angịgbikpịlọ ụbwọ myị́ wẹẹ lẹ.

¹¹Ọ chịla ká ịhụ nya angị ịlịnyị ka ri angị la kpịra-kpịra a-abwẹla olihi-ihi ọhọhọ. Ịhụ nyaa á ka ri angị kpa angịnyị kụ ka. Ị ka ri angị kpẹhị chịng nya ẹla. Ịhụ nyaa ka chịla o-hu ọkịlẹtụ ha ẹ-ẹpwụ nya ang myị́ ang wuu ịnyịnyị.

¹²Angịlẹ kị ka ri alegbeju ị-da ọngọgbikpịlọ ụbwọ ị-ịchọọchị ka ri angị ye ahụ ookpokpo. Ị ka ri angịlẹ kị jẹ́ juwa kpa anyị nya ịlaa yẹẹyẹẹ bala alọdọdẹpwa nyaa hiigu-hiigu ịnyịnyị.

¹³Chajị, angị da angịgbikpịlọ ụbwọ ẹ-ẹpwụ nya ịchọọchị ịlịnyị, ịlẹ kị juwa họ ụkụrwọ nyaa yẹẹyẹẹ, a kaa pwụ iwe-ahụrụ nya ihi ọlala myị́ lẹ. Ịwa a tị ri angịlẹ kị ka la ọnụ o-ya ẹla myị́ ị-ịlahị nya angịkịla, chajị nya ọmyịmyị ọlala nyaa ọlẹpwụ nya iJisọsị ịKịrayịsị ịnyịnyị myị́ lẹ.

¹⁴M jam la ẹhị ọrịrịị-rịrị kam ka warị wẹ ẹga nyang ahyaahị. Ma, m tị jam da ala ịlẹ wuu ju ụpwụ du wang jene lẹ.

¹⁵Chajị, ó riri kam warị wẹ hyaa myị́ ka, ká ala ịịwa ka mẹjẹng jaabwọ ká ka bwu kpa ịlọng yẹẹyẹẹ ẹ-ẹpwụ nya ọdọdẹpwa nya Ohe Oluhye mẹ. Ọdọdẹpwa ọọwa a ri ịchọọchị nya Ohe Oluhye Ọngọ juwa hịhị lẹlẹ. Ịchọọchị ọọwa kpangga a ri itiwe bala ojẹkpa o-wu ẹla nya ịlẹhị nya ẹrụ ọnyịịla ọlẹ kpa gogo ịnyịnyị lẹ.

¹⁶Ụmụmẹ ọkpịbaa nya ẹrụ ọnyịịla nya ọngịnyị nya Ohe Oluhye oriri, ọlẹ kahị myị la jaabwọ ká Ohe Oluhye bwu chọọ ehe mẹjẹẹhị, á ju ịwẹẹ ọdada kpong-kpong ka. Olegbeju nya ẹrụ ọnyịịla ọọwa ju abwụma nya ọngịnyị ehe lụka kọ chị ịlọmwụ ehe. Olegu Igogo chị ọkụrụ-kụrụ nyamwụ ehe mẹjẹẹhị ahị angịnyị ehe. Alegu ẹrụ nya Ohe Oluhye kpẹhị nya ịlaa yẹ ẹbyẹbyị nyamwụ. Angịnyị nyamwụ kpa ẹrụ ọnyịịla nyamwụ kaka ya pyẹ ka epwoja myị́ epwoja wuu. Alepwoja la datị-datị myị la ẹnyị nyamwụ odehe ọlẹ. Ohe Oluhye kpọọ rụ ka epwoohe lahị-lahị.