Read idege 1 ITIMOTI 4 Bible Online

1 ITIMOTI 4 - idege bible

1 ITIMOTI 4

¹Olegu Igogo ya dodehe gede-gede yẹkẹẹ, ụka nyị juwa warị ị-ịlahị ká angịhyẹ nyị ka tụụbwọ hi ụgbẹyị nya ọmyịmyị ọlala u-uhye nya ẹla nya Ohe Oluhye ọlẹ deeji, mwọọgịlẹ juwa ju ihi nya olegu nya ọnọọkịla omeme bala ọmẹjẹ ụhwahị nya alegu inyibyi.

²Ọmẹjẹ ọlịnyị ri ịnịịkịla i-bwu ọnụ nya alahị imiiye jaabwọ ká irya ọ-la angịnyị eje ọlẹpwụ ọkịlẹtụ nyaa ịwa ayịdang gbu gbanggbang lala ang ọlẹ ká ila nya oje ọlẹ kị ya ju ila kaa rụ ila kurwokurwo lẹ.

³Angị ịlịnyị a kaa da angịnyị ehile ẹ-ẹpwụ nya ang ọmẹjẹ nyaa yẹkẹẹ, nyị ye ahụ ọhẹ-lọhẹ ka lẹ. Lee, o-ri ụma nya ang iriri ịhyẹ ka ịnyịnyị lẹ. Ma, Ohe Oluhye ayịdang tị họ ang oriri, chajị ká angịlẹ kị ri angị jẹ́ ẹla nya ịlẹhị nya Ohe Oluhye bala ọ-myị la Ohe Oluhye, ka ri ang oriri ịịwa, ụka kị raabwọ nya obe ojiji ha Ohe Oluhye jwaa kpá.

⁴Chajị ang myị́ ang ọlẹ ká Ohe Oluhye họ ri ang ọnyịịla. Lẹ, ó pwoku ká angịnyị ehe ka pwa, o-ri ang ịịwa ka. Ma, ụka kị raabwọ ji Ohe Oluhye obe u-uhye nyaa kpá lẹ aalẹ, ọ chịla kị ka ye ang ọọwa ri lẹ.

⁵Chajị, ị kpa ẹla nya Ohe Oluhye bala abwọ ọrịrị ha Ohe Oluhye họ ọ-pyẹẹ kụrụ ang oriri ọọwa kpá ụka ọọwa lẹ.

⁶ITimoti, ó ri ká juwa mẹ ẹla nya Ohe Oluhye ọlịịwẹ jẹ anyadang ẹ-ẹpwụ nya ịKịrayịsị lẹ aalẹ, a ka ri ọnchẹ ọnyịịla ọ-myị ẹrụ nya ịKịrayịsị iJisọsị bala o-ri ọng ọ juwa nwa kịlahị-ịlahị bwula ihi ojuju nya ẹrụ ọnyịịla nya ọmyịmyị ọlala bala o-juwa ba ọmẹjẹ nya ịlẹhị nya Ohe Oluhye jẹ ịnyịnyịịnyị lẹ.

⁷Kpahị ju ịlọng ọgwọgụ ẹ-ẹga nya ejwo ijwojwo i-hi deeji ịlẹ ká angịnyị kaa jwo nya ọ-kpa da, ọmwụ ọdada nya ang ịlẹ ká Ohe Oluhye họ wụlẹ. Ká juwa mẹ ụgbẹyị nya ọngịnyị nya Ohe Oluhye oriri jẹ ịlọng ọgwọgụ mẹ.

⁸Ọ ri nya ịlẹhị, ayịlọ ọkọkọ lala ụnyẹ ọrụrụ kaa da ugbinyịrọ nya ọngịnyị ehe ụbwọ myị́. Ma, ụkụrwọ nya ẹla nya ọngịnyị nya Ohe Oluhye oriri ọhọhọ a kaa ju apyobwuna ha ọngịnyị ehe ụ-ụgbẹyị myị́ ụgbẹyị wuu myị́ lẹ. Chajị ẹla nya Ohe Oluhye ụbwọọmwụ a myị ọnụ nya ọhịhị olijata bala ọhịhị ọlịlahị ha angị myịmyị lẹlẹ.

⁹Ẹlẹwẹ ri ẹla nya ịlẹhị. Lẹ, ọ pwoku ká ọng myị́ ọng ka ye ẹla ọọwa wuu kpa họ ụkụrwọ.

¹⁰Ọlịnyị a du kaahị angịnyị nya Ohe Oluhye jam nwụ ịlọhị la ụkụrwọ bala o-juwa yẹ akama lẹ. Chajị ẹhị ọrịrịị-rịrị nyahị juwa ẹ-ẹga nya Ohe Oluhye ọlẹ kọ juwa hịhị bala o-ri Ọngọchịda nya angịnyị ehe wuu. Ọgụgụ wuu ri ẹ-ẹga nya angịlẹ kị myị la Ohe Oluhye.

¹¹ITimoti, aa mẹ ala ịwẹ jẹ angịnyị nyang, ká daa ehile kị kpa ala ịịwa họ ụkụrwọ mẹ.

¹²A myị ká ọngọngọhẹ a yẹhị da onjwo oriri nyang bwee ka. Ma, cheri ká ọhịhị nyang a ri ang o-ju ẹjẹẹ ha angị myị la Ohe Oluhye ịkịla ẹ-ẹpwụ nya ẹla oyaya bala abwẹla ọhọhọ nyang, ẹ-ẹpwụ nya ọháha bala ọmyịmyị ọlala nyang bala ẹ-ẹpwụ nya ọ cheri-cheri ọlala ẹ-ẹpwụ nya abwẹla nyang ịnyịnyị mẹ.

¹³Aa cheri ká juwa kpa ụka nyang bala ọngịrị nyang wuu họ ụkụrwọ nya Ụpwụ Igogo ọwawa je angịnyị bala o-juwa kpa ẹla nya Ohe Oluhye gbile angịnyị ụbwọ ụ-ụrụ bala o-juwa mẹ ẹla nya Ohe Oluhye jẹ angịnyị ịnyịnyịịnyị gbee pwụ ụka ọlẹ kaam ayịdang ka warị wẹ ẹga nyang mẹ.

¹⁴Ọhaha nya ọngịrị ọ-kpa họ ụkụrwọ ọlẹ ká Olegu Igogo nya Ohe Oluhye hu hang lụka ọlẹ ká alegbeju ịgbahị nya angịgbikpịlọ nya Ohe Oluhye yụbwọ nyaa nịrọng e-egbeju, raabwọ chajị nyang bala ọyẹ ọmwụ dodehe u-uhye nya ọọwa lẹ, a yẹhị da ọngịrị ọọwa bwee kpong-kpong koo.

¹⁵Aa cheri ká juwa kpa irya nyang wuu lẹpwụ-lẹpwụ họ ụkụrwọ nya ẹla nya Ohe Oluhye ọwẹ jaabwọ kam ya jeng wuu ịnyịnyịịnyị mẹ. Chajị ká angịnyị wuu ka yẹ ịlahị ọkaka nyang ẹ-ẹpwụ nyamwụ mẹ.

¹⁶Aa cheri ká kpahị ju ọgụ-ẹpẹtẹ nya ịlọng, ká juwa kpahị ju ụma nya ang ọlẹ ká juwa mẹjẹ angịnyị chajị nya Ohe Oluhye ịnyịnyị mẹ. Aa cheri ká juwa họ ịnyị kịlahị-ịlahị mẹ. Chajị, o-bwula ụgbẹyị ọlịịwẹ, ahụ ayịdang bala angịlẹ ká juwa mẹ ẹla nya Ohe Oluhye jẹ, a ka bwu wu ọchịda nya Ohe Oluhye ọyị myị́ lẹlẹ.