Read idege 1 ITIMOTI 5 Bible Online

1 ITIMOTI 5 - idege bible

1 ITIMOTI 5

¹ITimoti, wo mẹ! A yalibyi ta alẹng ịgbahị ịlẹpwụ nya ịchọọchị nyang la ịkata-ịkata ka. Ma, aa jwaa ihi lala adang ọ-mang ma ẹ-ẹpwụ nya ụbwọ o-gbilaa ụ-ụrụ wuu mẹ. Ká kpa ikolobya ịlẹpwụ nya ịchọọchị nyang yẹẹyẹẹ lala anyadang i-bwu ẹpwụ ịnyịnyị mẹ.

²Aa juwa ju ihi nya anyang ịgbahị ịlẹpwụ nya ịchọọchị nyang lala ịnang ọ-mang ma ịnyịnyị mẹ. Ká kpa ịyẹẹnọ ịlẹpwụ nyaa ẹ-ẹpwụ nya ocheri-cheri nya abwẹla ọhọhọ nyang wuu lala anyịnang anyang i-bwu ẹpwụ mẹ.

³Ó ri ká anyang ịlịchọọchị nyang ịhyẹ á juwa ká ọrụ nyaa á gbu hyaa, kị la angị da ụbwọ ka ịnyịlẹhị aalẹ, aa kpẹhị rịraa la ụgbẹyị ọlẹ kọ la ihi ịnyịnyị mẹ.

⁴Ma, ọ́ tị ri ká ahụ-ogu ịlịnyị á ma anyị juwa lee anyị nya anyị nyaa á juwa aalẹ, anyị ịlịnyị a dọmwụ nya ụkụrwọ ọnahị ọhọhọ u-uhye nya alọdọdẹpwa nyaa ịlịnyị mẹ. Chajị, jaabwọ ká angị ma anyị ịịwa kpaa la enjwo nyaa lẹ, ọ chịla ká anyị tịtị ka daa ụbwọ la ọgbahị ịnyịnyị. Chajị, ọọwa a ri ang ọnyịịla opwoku ị-ịlahị nya Ohe Oluhye kị ka họ lẹ.

⁵Ma, ọnyang ọlẹ kọ ri ahụ-ogu okpehika, kọ la ọngọngọhẹ ọ-ka dọọ ụbwọ ka lẹ, ọ kaa hu ọkịlẹtụ nyamwụ wuu lẹpwụ-lẹpwụ dahịhile Ohe Oluhye. Ọ kaa kpa ọbaba nyamwụ wuu kịla Ohe Oluhye ẹ-ẹpwụ nya abwọ ọrịrị lodu bala alẹnụ ụka wuu.

⁶Ma, ahụ-ogu ọlẹ kọ tị juwa họ ịpyọ la ang ịkpịpyọ nya odehe ọlẹ aalẹ, ogu kụ lahị kpa ang ri, ọngọọwa a ri ẹ-ẹpwụ nya ẹla nya Ohe Oluhye lẹ.

⁷ITimoti, aa da angịnyị nya Ohe Oluhye ịla ịchọọchị nyang ehile chajị kị ka họ ẹla ọlabyị kaka mẹ.

⁸Chajị, ó ri ká ọngọngọhẹ á juwa kọ pwa ọkpẹhị rịrị aanamwụ, ọgụgụ wuu ri, alọdọdẹpwa nyamwụ mịlẹ-mịlẹ lẹ aalẹ, ẹrụ ọnyịịla nya ọmyịmyị ọlala ọlẹ ayịdang, ọngọọwa a pwa wẹ lẹlẹ. Aalẹ, ọhịhị nya ọngọọwa tịpyọ gụ ịnya ọngọ myị la Ohe Oluhye kaka lẹ!

⁹Ahụ-ogu ọlẹ kọ gu ẹka ohu ịta myị́ lẹ bala o-ri ọngọ rwọ ọrụ ookpokpo kem ụbwọọmwụ, a ka wa nya ahụ-ogu nya ịlẹhị-ịlẹhị lẹ.

¹⁰Ahụ-ogu ọlịnyị ka ri ọngọlẹ ká angịnyị wuu jọ́ọ lala ọngọ họ ụkụrwọ ọnyịịla lụmẹ. Ọ ka ri ọnyang ọlẹ kọ jẹ́-ẹ mẹ ang jẹ anyị nyamwụ yẹẹyẹẹ. Ọ ka ri ọngọlẹ kọ kaa kpa angga ịlẹpwa nyamwụ yẹẹyẹẹ bala ọngọlẹ kọ kaa chị́ enyi hụ́ angịnyị nya Ohe Oluhye ịlẹ kị jwoo ụga ata. Ọ ka ri ọngọlẹ kọ kaa da angịkịla ịlẹ kị ji ẹpwụ nya akama ụbwọ. Ọ ka ri ọngọlẹ kọ kaa hu ọhịhị nyamwụ lẹpwụ-lẹpwụ kpa họ ụkụrwọ ọnyịịla la datị-datị.

¹¹ITimoti wo mẹ! A wa anyang ahụ-ogu ịlẹ kị ri anjwo jula alogu nya ahụ-ogu ịgbahị ịwẹ ka. Chajị ụka ká imyi nya ịnyịrọ ọlẹpwụ nyaa á chị ila gụ ọnụ ọlẹ kị myị ha ịKịrayịsị lẹ aalẹ, ị ka rụ kaka rwọ ọrụ ọkịla lẹlẹ.

¹²Ọọwa lẹ, ị ka ji ẹpwụ nya eje owuwu, chajị nyọlẹ kị bịrị ọnụ ọmyịmyị nya ọgbanyẹ nyaa ọlẹ kị myị ha ịKịrayịsị lẹlẹ.

¹³Ang ọkịla ọlẹ kị kaa họ ụka ọlịnyị ri ụkụrwọ nya ọhụhụ chịng ẹ-ẹpwa, mwọọgịlẹ juwa ga agịlata tụ ẹpwa-ẹpwa nya angịnyị da. Ọlẹ kọ tịpyọ gụ ọọwa ri yẹkẹẹ, aangịnyị ịtụbwọ kem, ị ri ka. Ma, ị ri angị kpa angịnyị kụ, juwa gba ju ka ẹpwụ nya ẹla nya angịkịla wurum bala o-juwa ya ala ịlẹ kị pwokwaa la oyaya kpong-kpong ka ịnyịnyị.

¹⁴Chajị nya ọọwa lẹ, ọ hám ká anyang, anjwo ịlẹ ká ọrwaa gbu hyaa, ka rwọ ọrụ ọkịla kị ka juwa ma anyị bala o-juwa kpẹhị rịrị ọdọdẹpwa nyaa. Chajị ká oluji nyahị á ka ye ịngịngịhyẹ onyobyi me ụchụ ẹ-ẹga nya angịnyị nya Ohe Oluhye kpong-kpong kaka.

¹⁵Chajị ahụ-ogu ịhyẹ ji ẹkpẹ nyaa da ẹla nya Ohe Oluhye, juwa ba Ohe Onyobyi jẹ ene-ene lẹ.

¹⁶Ma, ó ri ká ala ịchọọchị anyang, [lee, alẹng] ịhyẹ á juwa ká ahụ-ogu á juwa ọdọdẹpwa nyaa aalẹ, angịịwa a maga kị kpẹhị rịrị ahụ-ogu ịlịnyị yẹẹyẹẹ, chajị ká olo nya angị ịlịnyị á ka chụ ịchọọchị myịmyị kaka. Chajị ká ịchọọchị ka jẹ́-ẹ kpẹhị rịrị ahụ-ogu ịkịla ịlẹ kị la angị daa ụbwọ kpong-kpong kaka kem mẹ.

¹⁷Alegbeju ịkpẹhị rịrị ịchọọchị nya Ohe Oluhye ịlẹ kị juwa kpa ala ịchọọchị nyaa yẹẹyẹẹ, chịla kanụ ka jwaa ihi hiigu-hiigu bala o-juwa nwaa uri yẹẹyẹẹ, Ọgụgụ wuu ri ẹ-ẹga nya angịlẹ kị juwa họ ụkụrwọ nya ịlẹhị-ịlẹhị ẹ-ẹpwụ nya ẹla nya Ohe Oluhye oyaya bala ẹla nya Ohe Oluhye ọmẹjẹ angịnyị nyaa hiigu-hiigu.

¹⁸Chajị, ị da ụ-Ụpwụ Igogo yẹkẹẹ, “A ya ori chị ẹna ọlẹ kọ juwa ru ịrayịsị ọ-ọnụ ka, chajị kọ ka jẹ́-ẹ ri ịrayịsị ọọwa mẹ.” Ị myịmyị da ẹ-ẹga ọkịla yẹkẹẹ, “Ọngọ họ ụkụrwọ, chịla kọ ka ye uri nya ụkụrwọ nyamwụ.”

¹⁹ITimoti wo mẹ! A ke ụrụ la eje ọwụrụ-wụrụ ọlẹ kị juwa wụrụ olegbeju ọkpẹhị rịrị ịchọọchị nya Ohe Oluhye ọhẹ-lọhẹ wẹ ẹga nyang ka. Kẹnẹ-kẹnẹ, ó ri ká eje ọwụrụ-wụrụ ọọwa á la ibeenu bwu ẹga nya angị imiiye lee angị ịta kpá ene lẹ mẹ ịnyị!

²⁰Aa yalibyi la alọhọbịrị ịla ịchọọchị ị-ịlahị nya aluche wuu, chajị ká angị ihihi ka juhi mẹ.

²¹M jam gbileng ụbwọ ụ-ụrụ ị-ịlahị nya Ohe Oluhye bala ịnya Ọngọlahị ịKịrayịsị iJisọsị bala alegu-ẹrụ igogo nya Ohe Oluhye wuu, ká ka kpa ala ịlẹ kam mẹjẹng wẹ wuu họ ụkụrwọ ẹ-ẹpwụ nya ọ-la ọháha ẹ-ẹga nya ọngọngọhẹ gụ ọngọkịla datị kpong-kpong kaka.

²²ITimoti wo mẹ! A chagaga ẹ-ẹpwụ nya o-hu ọngọngọhẹ olegbeju ọ-họ ụkụrwọ nya Ohe Oluhye bwula ọ-yụbwọ nyang nịrọọ e-egbeju gbegbe ka. A ri ọngọ ju ụbwọ ẹ-ẹpwụ nya ịhọbịrị ịhọhọ nya angịkịla ka. Aa cheri ká abwẹla ọhọhọ nyang á la charị-charị ị-ịlahị nya Ohe Oluhye ụka wuu mẹ.

²³ITimoti, a juwa nwa enyi kem kaka. Ma, aa ya ere dọọ pyịnyẹng, chajị nya ẹpwụ ọlẹ kọ kaa chịng ụka wuu mẹ.

²⁴Wo mẹ! Ịhọbịrị ịhọhọ nya angịhyẹ kaa chị ehe a-ahịgboo gbegbe gụ ịnya angịkịla. Eje owuwu nya ịhọbịrị nya angị ịlịnyị kaa jene nyaa kele kịlahị nya eje nya Ohe Oluhye. Ma, ịhọbịrị nya angịkịla kaa chị ehe ẹ-ẹkpẹ-ẹkpẹ.

²⁵Ịnyịnyị, abwẹla ọnyịịla ọhọhọ nya angịhyẹ a kaa kụ ehe gede-gede gụ ịnya angịkịla lẹ. Ma, angịlẹ ká abwẹla ọnyịịla nyaa ịwa á tị kụ ehe kụ ịnyị ka lẹ, abwẹla ọnyịịla ọhọhọ nyaa ọọwa á ka jẹ́-ẹ byi kpá ẹnẹnẹhẹ kaka.