Read idege 1 ITIMOTI 6 Bible Online

1 ITIMOTI 6 - idege bible

1 ITIMOTI 6

¹Angịnyị nya Ohe Ọlụhyẹ ịlẹ wuu kị ri anchẹ e-ekpeleji nya angịnyị, a hu ayịbaba nyaa lala angị chịla-chịla bwula ihi o-jwaa ju mẹ. Chajị ká ọngọngọhẹ á ka ye ẹla onyobyi ya rụ́ ẹnyị nya Ohe Oluhye bala ẹrụ ọnyịịla nyamwụ ọlẹ kahị lẹẹ mẹjẹẹnụ kaka mẹ.

²Anchẹ ịlẹ ká ayịbaba nyaa á ri angịnyị nya Ohe Oluhye lala ịwa-ịwa, a yẹhị da ayịbaa ịịwa bwee, chajị nyọlẹ kị ri anyadịda nya awụlẹ ẹ-ẹpwụ nya ịKịrayịsị ka. Ọkọkọ nya ọọwa lẹ, ị juwa myị ẹrụ ha ayịbaa hiigu dọmwụ gụ olene mẹ. Chajị ayịbaba nyaa ịlẹ kị wẹẹ ri apyobwuna nya ẹrụ ọmyịmyị nya anchẹ ịịwa, ri angị myị la Ohe Oluhye bala angị wu ọháha nya Ohe Oluhye ọyị lẹ. ITimoti, aa juwa kpa ala ịwẹ mẹ ẹla je angịnyị nyang bala ọ-kpa gbilaa ụbwọ ụ-ụrụ ẹ-ẹpwụ nya ẹla nya Ohe Oluhye oyaya mẹ!

³Ó ri ká ọngọngọhẹ á juwa mẹ ang ọkịla jẹ angịnyị kọ ri ká ẹla ọọwa á pwoku ẹla nya ịlẹhị ọlẹ ká Ọngọlahị iJisọsị ịKịrayịsị ayịdang ya ka. Lee, opwoku ọmẹjẹ u-uhye nya ọngịnyị nya Ohe Oluhye oriri ọlẹ kahị wẹẹ mẹjẹẹnụ ka aalẹ,

⁴ọngọọwa ri ọngọ juwa kpa ịlọmwụ ka uhye ngana-ngana bwula ọbọọchẹ ohihi nyamwụ bala o-ri ọngọ jẹ́ ịngịngịhyẹ ka. Aalẹ, ẹdụrụ nya arụ ọrụrụ bala ịwẹẹ ọdada ohideeji ta angịkịla a juwa jụ ọngọọwa lẹ. Ịwẹẹ ọdada ọlịnyị a kaa kpa ijiiji nya awụlẹ ọyẹyẹ bala ẹla ọmwọmwọ ta awụlẹ bala awụlẹ ọ-kpa kụ bala ọyẹhị rịrị awụlẹ a-ang onyobyi ọhọhọ,

⁵bala arụ ọrụrụ ta awụlẹ warị wẹ ẹpwarịrị nya angịlẹ ká irya onyobyi omeme kem, a juwa ẹ-ẹpwụ ọkịlẹtụ nyaa lẹlẹ. Ẹla nya ịlẹhị nya Ohe Oluhye á tị hi juwa ẹ-ẹpwụ ọkịlẹtụ nyaa kpong-kpong kaka ịnyịnyị. Irya omeme nyaa wuu ri yẹkẹẹ, ọngịnyị nya Ohe Oluhye oriri nyị ri ang ọ-kpa ụdụ ọkpụkpụ kịla ọngịnyị odehe ọlẹ.

⁶Ma, ang ọlẹ ká ọngịnyị á la juwa lẹ, ọ-ka nwọọ nwa ba ụ-ụwa a ri apyobwuna ọtụka ọlẹ ká ọngịnyị nya Ohe Oluhye oriri kaa kpa kịla ọngịnyị lẹlẹ.

⁷Chajị, ahị ayịdang á kpa ịngịngịhyẹ ba ịlọhị warị wẹ odehe ọlẹ ụka kị mahị ka. Áhị́ tị ka kpa ịngịngịhyẹ ba ịlọhị rụ ba ịlọhị lụka nya igu ogbugbu nyahị ka ịnyịnyị.

⁸Chajị nya ọọwa lẹ, ó ri kahị la ang oriri juwa ri bala ọ-la ọkụrụ kụrụ lẹ aalẹ, ịịwa a nwahị ba ụ-ụwa kem mẹ.

⁹Ma, angịlẹ kị kaa charịnya nya ụdụ ọkpụkpụ a kaa chabwọ kpụ ẹpwụ nya ọmayẹ bala ọnya owuwu nya Ohe Onyobyi bala imyi nya ịnyịrọ ọlẹ kọ kaa kpaa kaka họ ang ohideeji ọlẹ kọ kaa kpa ang ọjụjụ kịlaa lẹlẹ. Ọlịnyị a kaa kpa iyabwọ bala ayịreji ọtata pyịyọọ kịla ọngịnyị lẹlẹ.

¹⁰Chajị okpoko ọ-há ọngịnyị há lụmẹ, a ri ụtẹ nya ang onyobyi ọhọhọ wuu lẹ. Ọháha ọlẹga nya okpoko ọlala ọlẹpwụ nya angịnyị nya Ohe Oluhye ịhyẹ lụmẹ a kaa họ ká angịịwa kaa hwahị hi ụgbẹyị nya ẹrụ ọnyịịla ọlẹ kị myị la lẹ. Ọọwa lẹ, ị juwa gu ịlaa oje ọkpachị nya ang ọjụjụ ẹ-ẹpwụ ọkịlẹtụ nyaa chọọchọọ lẹlẹ.

¹¹Ma, ahụ iTimoti ọngịnyị nya Ohe Oluhye lẹ, aa cheji ba ang inyibyi ịlịịwẹ wuu mẹ. Ká juwa maga ụ-ụgbẹyị nya abwẹla ọnyịịla nya Ohe Oluhye ọhọhọ bala ọngịnyị nya Ohe Oluhye oriri nya ịlẹhị-ịlẹhị bala ọmyịmyị ọlala bala ọháha nya Ohe Oluhye ọlala bala ugbodu ojuju bala ọ-la dụmwọ a-abwẹla ọhọhọ nyang mẹ.

¹²Ma uya ọnyịịla nya ọmyịmyị ọlala nyang, ká yụbwọ chị ọhịhị ọmyịmyị-ka ọlẹ ká Ohe Oluhye be ẹkọ wụrụng chajị nyamwụ, lụka ọlẹ kaahụ ayịdang kpa ọnụ nyang ya ibeenu nya ọmyịmyị ọlala nyang dodehe ị-ịlahị nya aluche wuu mẹ.

¹³ITimoti wo mẹ! M jam gbileng ụbwọ ụ-ụrụ ị-ịlahị nya Ohe Oluhye. Ọngọlẹ kọ hu ọhịhị ha angịnyị bala ang myị́ ang wuu. M jam ya ị-ịlahị nya ịKịrayịsị iJisọsị, ọngọlẹ kọọwa ayịdang ri ibeenu ọnyịịla ị-ịlahị nya ịPọntịyọsị ịPayịleti ịnyịnyị lẹ.

¹⁴Ká ka ju ihi nya ehile nya Ohe Oluhye kpẹẹkpẹẹ la abyị ọhẹ-lọhẹ ọlala ka, gbee pwụ ẹnụtụrụ ọlẹ ká Ọngọlahị iJisọsị ịKịrayịsị ka mwọọgịlẹ warị.

¹⁵Ọwẹwẹ nya ịKịrayịsị ọọwa ka họ jịra ụka ọlẹ ká Ohe Oluhye hunọ. ỊKịrayịsị ọọwa a ri ọngọlẹ kọ ri Agụgụ Ọtụka, Adịrahụ nya Alịdịrịhụ bala Ayịbaba nya Ayịbaba ịkịla wuu lẹ.

¹⁶Ọwa ụbwọọmwụ a ri ọngọlẹ ká igu á ka jẹ́-ẹ nwụ kaka lẹlẹ. Ọwa-à ri ọngọlẹ kọ juwa ẹ-ẹpwụ nya ahịgboo ọlẹ ká ọngịnyị ehe ọhẹ-lọhẹ á ka jẹ́-ẹ pwụ ẹga nyamwụ myị́ kaka lẹlẹ. Ọwa ayịdang a ri ọngọlẹ ká ọngọngọhẹ á yẹ ẹ-ẹhị ẹnẹnẹhẹ lẹka lẹ. Ká ọngọngọhẹ á tị ka jẹ́-ẹ yọọ ẹ-ẹhị myị́ kaka ịnyịnyị lẹlẹ. Ihi wuu bala ọngịrị o-gbe oyi myị́ oyi wuu a juwa họọ pwụ ụka myị́ ụka. Amẹn.

¹⁷ITimoti, aa gbile angịlẹ kị kpụ ụdụ ẹ-ẹpwụ nya odehe ọlẹ ụbwọ ụ-ụrụ nya ịlẹhị-ịlẹhị, kị kpa ịlaa ka uhye kpong-kpong ka. Lee, o-juwa hu ọkịlẹtụ nyaa wuu dahịhile ụdụ nya odehe ọlẹ kọ kaa juwa pyịyọọ ka lẹ ka. Ma, kị ka hu ọkịlẹtụ nyaa wuu dahịhile Ohe Oluhye ọlẹ kọ juwa hịhị mẹ. Ọwa-à ri Ọngọlẹ kọ kaa hu ang myị́ ang wuu hahị mwụ aba ba, chajị ká ang ịịwa ka hu ịpyọ ọkpụkpụ ha ọhịhị nyahị odehe ọlẹ lẹ.

¹⁸Aa da alụdụ ịlịnyị ehile kị juwa họ ụkụrwọ ọnyịịla nya ịlẹhị-ịlẹhị mẹ. Chajị kị ka jẹ́-ẹ kpụ ụdụ nya abwẹla ọnyịịla ọhọhọ ịnyịnyị mẹ. Aa byaa kị nwụlanọ, juwa pyẹ ụbwọ nyaa maa hu ha angịkịla bala ọ-ga angịnyị ahị ọgwọgụ ịnyịnyị mẹ.

¹⁹Chajị, ó ri kị họ ịnyị aalẹ, ị ka juwa nwụla ụdụ nya ịlẹhị-ịlẹhị nọ gbe ịlaa ị-ịlahị, ọlẹ kọ ka ri itiwe nya ọngịnyị nya Ohe Oluhye oriri, chajị kị ka jẹ́-ẹ bwula ọọwa yụbwọ chị ọhịhị ọmyịmyị-ka nyaa gogo pyịyọọ mẹ.

²⁰Oo! ITimoti, aa cheri ká wu ẹrụ ọnyịịla nya Ohe Oluhye ọlẹ kị ya jung ụ-ụbwọ kpa ụ-ụwa gogo mẹ. Ang ọlẹ kọ ri abala nya ang ọjẹ́jẹ ọlẹ ká angị juhi nya Ohe Oluhye-ka, wẹẹ ya ala i-hi deeji ju bala o-juwa da ịwẹẹ ododu u-uhye nyaa lẹ, aa cheji ba ala ịlịnyị mẹ.

²¹Chajị angịhyẹ ịlẹ kị kpụ nịrọ ụgbẹyị onyobyi ọlịnyị lẹ, ị hwahị hi ụgbẹyị nya ẹrụ ọnyịịla nya ọmyịmyị ọlala ọlẹ lẹ. Ọnahị nya Ohe Oluhye a juwa tang mẹ. [Ị da ụpwụ nya ọgbanyẹ ọlẹ tọ iTimoti bwu epweji nya ịLawodisiya ọlẹ kọọwa a ri epweji ọgụgụ wuu ọ-ọpyị nya iFurijiya ịPakatịyana.]