Read idege 2 ITIMOTI 1 Bible Online

2 ITIMOTI 1 - idege bible

2 ITIMOTI 1

¹Ụpwụ ọlẹ bwu ẹga nyam am ịPọlụ, ọngọ myị ẹrụ ọnyịịla nya ịKịrayịsị iJisọsị, bwula irya nya Ohe Oluhye, jaabwọ ká ọnụ ọmyịmyị nya ọhịhị ọmyịmyị-ka nyamwụ la ẹ-ẹpwụ nya ịKịrayịsị iJisọsị.

²M jam da ụpwụ ọlẹ du wang ahụ iTimoti ọnyị nyam ẹ-ẹpwụ nya ịKịrayịsị ọlẹ ká hám lụmẹ. Ọnahị bala ahyẹẹrwẹrwa bala okpunyi nya Ohe Oluhye Adịda bala ịnya ịKịrayịsị iJisọsị Ọngọlahị a juwa tang.

³ITimoti, wo mẹ! M kaa kpịtịya nyang ẹ-ẹpwụ nya abwọ ọrịrị ha Ohe Oluhye lodu bala alẹnụ, ụka wuu, juwa ji Ohe Oluhye obe chajị nyang. Chajị, Ọwa a ri Ohe Oluhye ọlẹ kam lẹẹ myị ẹrụ ha ẹ-ẹpwụ nya ịgba ọgbagba họọ ẹ-ẹpwụ nya eje owuwu nya ọkịlẹtụ ọhẹ-lọhẹ kpong-kpong ka, jaabwọ ká adahị igogo anyị họ lẹ.

⁴Ụka kam kpịtịya nya egbejida nyang, ọ kaa mam ma ụka wuu kam ka yẹng ẹ-ẹhị, chajị kam ka jẹ́-ẹ chị ọkẹkẹnị okpori-kpori.

⁵Ụka kam kpịtịya nya ọmyịmyị ọlala ọgbagbịla nyang lẹ, m jẹ́ ịnyịlẹhị yẹkẹẹ, ụma nya ọmyịmyị ọlala ọlẹ ká iLoyisi ịnang ọgbahị la, hi tọ iYunisi, ịnang ochiche a wẹ ká la kpangga ịnyịnyị lẹ.

⁶Ịnyị a du kam lẹẹ kpụng ịtịya ká ka chị ọngịrị nya ọhaha ọ-kpa họ ụkụrwọ ọlẹ ká Ohe Oluhye ya hang, lụka ọlẹ kam yụbwọ nịrọng raabwọ jung, ahị-une ẹ-ẹpwụ nyang lẹlẹ.

⁷Chajị Olegu ọlẹ ká Ohe Oluhye ya hahị ahị angị myịmyị lẹ, ó ri olegu nya uhi ojuju ka. Ma, olegu nya ọngịrị nya ẹla o-ya myị́ bala ịnya ọháha ọlala bala olegu nya irya ọkpẹẹkpẹẹ ọlala ịnyị!

⁸Lẹ, iTimoti, a ju oyi nya ibeenu nya Ọngọlahị la oriri ka. Lee, o-juwa lang oyoyi chajị nyam am ayịdang, nyọlẹ kị jum agba lẹẹ o-oluhye nya Ọngọlahị la ka. Ma, ọkọkọ nya ọọwa lẹ, aa juwa yẹ akama o-oluhye nya ẹrụ ọnyịịla ọlẹ, jaabwọ ká Ohe Oluhye ka ya ọngịrị hang kaka ba mẹ.

⁹Ọlẹ ká Ohe Oluhye chịhị da bala o-be ẹkọ wụrụụhị wẹ iwe-ahụrụ ọlịgọgọ nyamwụ ọlẹ lẹ, ọ́ họ ịnyị, chajị nya ụkụrwọ ọhẹ-lọhẹ ọlẹ kahị họ ka. Ma, ọ wụrụụhị ịnyị, bwula ọnahị nyamwụ ọlẹpwụ nya ịKịrayịsị iJisọsị, jaabwọ ká obyi omeme nya Ohe Oluhye la ene kọọ họ odehe ọlẹ.

¹⁰Ma, lẹẹlẹẹ lẹ, obyi omeme nya Ohe Oluhye ọọwa chị ehe hahị, bwula ọwẹwẹ nya Ọngọlahị ịKịrayịsị iJisọsị, ọngọlẹ kọ kụrụ igu lẹ. Ọwa kpa ọhịhị ọmyịmyị-ka bala igu ogbugbu myị́ kaka nya Ohe Oluhye, warị kaka chị ehe a-ahịgboo hahị bwula ẹrụ ọnyịịla nyamwụ ọlẹ lẹẹ lẹlẹ.

¹¹Ẹrụ nyamwụ ọọwa, Ohe Oluhye a chụm lẹẹ, kam ka ri ọngọ myị ẹrụ ọnyịịla nyamwụ bala ọngọ ya ẹla nya Ohe Oluhye bala ọngọ mẹ ẹla ọọwa jẹ ha ala iJentayịlị lẹlẹ.

¹²Chajị nyọlẹ kam jam họ ụkụrwọ ọọwa a du kam lẹẹ yẹ ụma nya akama ịlẹ wuu lẹ. Ma, ọ́ tị lam oyoyi chajị nya ọọwa kpong-kpong ka. Chajị, m jẹ́ Ohe Oluhye ọlẹ kam myị la yẹẹyẹẹ. M jẹ́ myịmyị yẹkẹẹ, Ohe Oluhye ọọwa la ọngịrị ka kpẹhị rịrị ang myị́ ang ọlẹ kam tụụbwọ hi jwoo ụ-ụbwọ, ham myị́, gbee pwụ ẹnụtụrụ nya eje nya ịKịrayịsị

¹³Ẹla nya ịlẹhị nya Ohe Oluhye ọlẹ wuu kam mẹjẹng kọ ka ri ang ọ-yẹ kpa họ nyang lẹ, aa yụbwọ chọọ kpa ụ-ụwa gogo mẹ. Ká juwa kpa họ ụkụrwọ ẹ-ẹpwụ nya ọmyịmyị ọlala bala ọháha nya Ohe Oluhye ọlẹ ká la wẹ bwula iJisọsị ịKịrayịsị mẹ.

¹⁴Ẹla nya ịlẹhị nya Ohe Oluhye ọlẹ kọ ya jung ụ-ụbwọ ká ka kpa ya pyẹ bwula ọngịrị nya Olegu Ịgọgọ ọlẹ ká Ohe Oluhye ya kụ ẹ-ẹpwụ nyahị ahị angị myịmyị lẹ, aa yụbwọ chọọ kpa ụ-ụwa gogo ịnyịnyị mẹ.

¹⁵Ahụ ayịdang tị jẹ́ yẹkẹẹ, ọng myị́ ọng wuu ọlọpyị nya Echiya ji ẹkpẹ nyamwụ dam lẹ. IFigelosi bala ịHamọgẹnẹsị juwa ẹ-ẹpwụ nyaa ịnyịnyị!

¹⁶Ọngọlahị a yẹ alọdọdẹpwa nya Ọnẹsịfọrọsị ahyẹẹrwẹrwa mẹ. Chajị ọhọhọ nyamwụ kaa kpụ́m ẹjẹ ịnyịnyịịnyị. Ọlẹ kam lẹẹ u-ube nya agba lẹ, ḿ la Ọnẹsịfọrọsị oyoyi chajị nya ọọwa kpong-kpong ka.

¹⁷Ọkọkọ nya ọọwa lẹ, ụka kọ pwụ epweji nya iRom lẹ, ọ tịtọ nyam nya ịlẹhị-ịlẹhị gbee kọ kaka yẹm ẹ-ẹga ọlẹ kam ji.

¹⁸Ọngọlahị, a da Ọnẹsịfọrọsị ọwẹ ụbwọ, chajị kọ ka wu ahyẹẹrwẹrwa nya Ọngọlahị ọyị la ẹnụtụrụ nya eje ohyẹẹkpẹ mẹ. A myịmyị jẹ́ yẹẹyẹẹ jaabwọ ká Ọnẹsịfọrọsị ọwẹ myị ẹrụ ham hiigu-hiigu e-epweji nya Efesọsị ịnyịnyị.