Read idege 2 ITIMOTI 2 Bible Online

2 ITIMOTI 2 - idege bible

2 ITIMOTI 2

¹Chajị nya ọọwa lẹ, ahụ iTimoti ọnyị nyam ẹ-ẹpwụ nya ịKịrayịsị aa cheri ká juwa la gogo kịlahị-ịlahị ẹ-ẹpwụ nya ọmyịmyị ọlala nyang bwula ọngịrị ọlẹ ká Ohe Oluhye ya hang ẹ-ẹpwụ nya ịKịrayịsị iJisọsị mẹ.

²Ẹla nya Ohe Oluhye ọlẹ ká kaa wo bwu ọnụ nyam ị-ịlahị nya iru nya alibeenu ịkịla lụmẹ-lụmẹ ịnyịnyịịnyị lẹ, aa kpa ẹla ọọwa kaka ya je angịkịla ịlẹ kị chị la o-hu ọkịlẹtụ ha mẹ. Chajị ká angịịwa tịtị ka jẹ́-ẹ kpa ẹla ọọwa kaka mẹjẹ angịkịla ịnyịnyị mẹ.

³ITimoti, aa cheri ká la ugbodu ojuju ẹ-ẹpwụ nya akama ọyẹyẹ, lala ọngọ dẹwụ ọchịla o-hu ọkịlẹtụ ha nya ịKịrayịsị iJisọsị lala ahị angị myịmyị ịkịla wuu mẹ.

⁴Alịsọja ọnyịịla ọhẹ-lọhẹ á kaa rụ hi ẹwụ ọdada ọ-ọgbẹwụ, juwa tịtọ nya ang ịkpịpyọ nya ọhịhị ọlẹ kpong-kpong ka. Chajị kọọwa ayịdang ka jẹ́-ẹ ju olegbeju ọgbahị nya alịsọja nyaa wuu ihi nya ehile ọlẹ kọ dọọ jịra yẹẹyẹẹ myị́.

⁵Ẹ-ẹpwụ nya angịlẹ kị kaa kọ ayịlọ nya ụnyẹ ọrụrụ lẹ, ọngọlẹ kọ rụnyẹ nyamwụ ba ehile nya ayịlọ ọkọkọ ọlịnyị jẹ kem, ị kaa hu nya ọngọ kụrụ-kụrụ bala ọ-kaa gọọ ahị lẹ!

⁶Ọngọ wu ẹrụ ọlẹ kọ tị kaa họ ụkụrwọ la ọngịrị, a chịla kọ ka ri ugbe o-bwu ẹrụ ọọwa jene nya angịkịla wuu ịnyịnyị lẹ.

⁷ITimoti, aa me irya ju ala ịwẹ kam wẹẹ ya jeng ọgwọgụ mẹ. Chajị Ọngọlahị ayịdang ka hu ọngịrị ọ-kpa jẹ́ ang myị́ ang wuu yẹẹyẹẹ nyamwụ hang.

⁸ITimoti, aa kpịtịya nya egbeju nya ẹla nya Ohe Oluhye nya ẹrụ ọnyịịla ọlẹ kam kaa ya dodehe ịnyịnyịịnyị mẹ! Ẹla ọọwa lẹẹ lẹ: iJisọsị ịKịrayịsị ọlẹ kọ bwu ụtẹ nya iDevidi kpehe, a ri ọngọlẹ kọ gbu, kọ wuleji bwula igu, juwa hịhị lẹ.

⁹Bwula ẹrụ ọnyịịla ọ-kpa ya pyẹ nyam ọọwa, a du kam lẹẹ yẹ akama alẹ bala o-jam u-ube nya agba lala am nyaa ri ọngọ họ ang onyobyi lẹ! Ma, ị́ tị ka jẹ́-ẹ ju ẹla nya Ohe Oluhye ayịdang agba kpá myị́ ẹnẹnẹhẹ kaka.

¹⁰Ịnyị a du kaam ayịdang jam ju ugbodu ẹ-ẹpwụ nya ang myị́ ang wuu, chajị nya angịlẹ ká Ohe Oluhye chụchụ ha ịlọmwụ lẹ. Chajị kị ka ye ọchịda nya Ohe Oluhye bwula ịKịrayịsị iJisọsị, chajị kị ka jẹ́-ẹ bá ogbo ọlẹbyẹbyị o-gbe oyi myị́ oyi nya Ohe Oluhye bá la tọọ ịnyịnyị lẹlẹ.

¹¹Ẹla ọlẹ ri ẹla nya ịlẹhị, “Chajị ó ri kahị gbu ta ịKịrayịsị aalẹ, ahị ka hịhị tọọ ịnyịnyị.

¹²Ó ri kahị juwa kpa ugbodu ojuju nya ịlẹhị-ịlẹhị nyahị ọlẹ ụ-ụwa gogo kịlahị-ịlahị ta ịKịrayịsị lẹ, aalẹ, ahị tịtị ka bá ri adịrahụ tọọ ịnyịnyị. Ọ́ tị ri kahị pwa ịKịrayịsị rwarụ, aalẹ, ọ tịtị ka pwahị rwarụ ịnyịnyị.

¹³Chajị, ó riri kahị myị ri angị chịla o-hu ọkịlẹtụ ha ẹ-ẹga nya ịKịrayịsị ka, aalẹ, jaabwọ kọọwa ayịdang ri ọngọ chịla o-hu ọkịlẹtụ ha ene lẹlẹ, ọ́ ka jẹ́-ẹ pwa ịlọmwụ ọwa ayịdang rwarụ kaka.”

¹⁴ITimoti, aa juwa kpụ angịnyị nyang ịtịya nya ẹla ọlẹ, ká juwa gbilaa ụbwọ ụ-ụrụ ị-ịlahị nya Ohe Oluhye ọgwọgụ, kị cheji ba arụ ọrụrụ ju ala ịlẹ kị ju apyobwuna kaka mẹ. Chajị, arụ ọrụrụ ọlịnyị kaa kpa ahị ọhụhụ ka ẹpwụ nya angịlẹ kị juwa wo ẹla ọọwa.

¹⁵ITimoti, aa maga nya ịlẹhị-ịlẹhị ká jẹ́ irya nya Ohe Oluhye ọgwọgụ, juwa kpa họ ụkụrwọ chajị ká Ohe Oluhye ka kpang ụbwọ u-uhye chajị nya ọọwa mẹ. Ọọwa lẹ, ọkọkọ nya ọlẹ, ká oyoyi ka jum ẹ-ẹpwụ nya ụkụrwọ nya Ohe Oluhye ọhọhọ lẹ, a ka ri ọngọ jẹ́ juwa gu ẹla nya ịlẹhị nya Ohe Oluhye ene cheechee, juwa mọọ jẹ angịnyị nyang hiigu-hiigu ịnyịnyịịnyị lẹlẹ.

¹⁶ITimoti, aa cheji ba ụma nya ala i-hi deeji i-ju apyobwuna ka, ịlẹ ká angị juhi nya Ohe Oluhye ka, kaa ya ododoodu mẹ. Chajị ala ịlịnyị kaa kpa angịnyị rụ lụrụ hwẹẹẹ hi ụgbẹyị nya Ohe Oluhye oriri!

¹⁷Chajị, ụma nya ang ọmẹjẹ onyobyi ọlịịwẹ kaa ma abwẹla ọnyịịla nya Ohe Oluhye ọlẹpwụ nya ala ịchọọchị ri jọng-jọng lala ẹbẹ ọgọja. Ụma nya angịmẹjẹ ụhwahị ọlịnyị, ịHayịmẹnịyọsị bala iFilẹtọsị, a ri lẹ.

¹⁸Ịwa ayịdang mileji hi ẹla nya ịlẹhị nya ẹrụ ọnyịịla nya Ohe Oluhye ọlẹ lẹ. Chajị ị juwa yẹkẹẹ, ụka nya owuleji bwula igu nyị chịpwụrụ lẹ. Ọọwa lẹ, ị wẹẹ hụ́ ọmyịmyị ọlala nya angịnyị nya Ohe Oluhye ịhyẹ jigi-jigi lẹlẹ.

¹⁹Ma, jaabwọ myị́ abwọ kọ la, itiwe nya ịchọọchị nya Ohe Oluhye ọlẹ kọ da la ịlọmwụ lẹ, ọ ka godayị rịrị pyịyọọ pyii lẹ. Ang o-ju ẹjẹẹ nya ọọwa ri ẹla ọlẹ kị ya dodehe yẹkẹẹ, “Ọngọlahị ayịdang jẹ́ angịlẹ kị ri nyamwụ yẹẹyẹẹ.” Ị myịmyị ya ọkịla yẹkẹẹ, “Ọng myị́ ọng ọlẹ kọ myị la ẹnyị nya Ọngọlahị iJisọsị ịKịrayịsị nya ịlẹhị-ịlẹhị lẹ aalẹ, ọ ka ri ọngọ cheji ba ang onyobyi ọhọhọ pyii lẹ.”

²⁰Ma, ó ri ká kele ka ọdọdẹpwa ọtụka, ẹja nya okpoko onyoowuru bala ịnya okpoko ịgọm kem á ka yẹ ụ-ụwa ka. A ka yẹ ang-abwọ i-ju ang oriri ịlẹ kị kpa okoji họ bala ịlẹ kị kpa ọpyị me ụ-ụwa ịnyịnyị. Ịja ịlụwa ịhyẹ kaa ri ịja ilihi-ihi. Ịkịla tị ka ri ịja ịdabwọ agịla ịnyịnyị.

²¹Ịnyịnyị, ọ la ẹ-ẹpwụ nya ịchọọchị ọlẹ kọ ri ọdọdẹpwa nya Ohe Oluhye lẹ. Chajị nya ọọwa lẹ, ọngịnyị nya Ohe Oluhye ọnyị myị ọnyị ọlẹ kọ myị kpa ịlọmwụ cheri-cheri ị-ịlahị nya Ohe Oluhye bwula ocheji ba ang inyibyi ịhọhọ wuu lẹ aalẹ, ọngọọwa, Ohe Oluhye a tịtị ka chị ịgọgọ ju ha ịlọmwụ kọ ka kpa họ ụkụrwọ olihi-ihi bala ọnwụla ọngọọwa nọ gbe ọ-kpa họ ụkụrwọ ọnyịịla ọnyị myị ọnyị ha ịlọmwụ ịnyịnyị lẹlẹ.

²²ITimoti, imyi nya ịnyịrọ ọlẹ ká ịwọ nya okolobya kaa kpa kịla ọngịnyị lẹ, aa cheji baa ọgwọgụ mẹ! Ká juwa maga nya ịlẹhị-ịlẹhị ẹ-ẹpwụ nya abwẹla ọnyịịla nya Ohe Oluhye ọhọhọ bala ọmyịmyị ọlala bala ọháha nya Ohe Oluhye ọlala bala okpunyi nyamwụ jaabwọ ká angịnyị nya Ohe Oluhye ịkịla ịlẹ wuu kị myị la ẹnyị nya Ọngọlahị bwu ẹpwụ nya ọkịlẹtụ ọgbagbịla nyaa wuu kaa họ ịnyịnyị mẹ.

²³Ma, aa cheji ba ịwẹẹ ọdada nya aluchi bala angị jẹ́ ịngịngịhyẹ ka mẹ. Chajị, ahụ ayịdang jẹ́ ká ụma nya ala ịlịnyị kaa kpa o-wo lawụlẹ-ka ka ẹpwarịrị nya angịnyị.

²⁴Ọ́ chịla ká ọnchẹ nya Ọngọlahị ka ri ọngọ rwarụ ta angịnyị ka. Ma, ọ chịla kọ ka ri ọngọ ya ẹla gẹnẹ-gẹnẹ ta ọng myị́ ọng bala o-ri ọngọmẹjẹ ọnyịịla. Ọ ka ri ọngọ la ugbodu ojuju tata ẹ-ẹga nya angịkịla,

²⁵bala o-ri ọngọ kpa irya ọdụmwọ nwụ angịlẹ kị juwa da ịwẹẹ tọọ rịrị la okpunyi. Chajị ọhẹka, Ohe Oluhye ka bwula ọọwa họ ká angịịwa ka yẹ irya da, kaka jẹ́ ẹla nya ịlẹhị nya Ohe Oluhye.

²⁶Chajị ká angịịwa ịlẹ kị ji ẹpwụ nya eri owuwu nya Ohe Onyobyi, ọngọ waa ju agba, juwa kpaa họ irya nya ịlọmwụ ene-ene kem, ka jẹ́-ẹ be bwu ẹpwụtụbwọ nyamwụ myị́ mẹ.