Read idege 2 ITIMOTI 3 Bible Online

2 ITIMOTI 3 - idege bible

2 ITIMOTI 3

¹ITimoti, aa jẹ́ ọlẹ myịmyị mẹ! Ụka olujwo nya ịlẹhị-ịlẹhị ka ji lụka ohyẹẹkpẹ nya odehe ọlẹ.

²Ụka ọọwa, angịnyị ka ri angịlẹ ká ang nya ụbwọ nya ịlaa kem, a ka háa lụmẹ. Ị ka ri angị charịnya nya okpoko ọlala. Ị ka ri angị juwa kpa ịlaa ka uhye bala o-juwa hi ọbọọchẹ bala o-juwa do angịnyị ido ịnyịnyị. Ị ka la egbeju-ọngịrị ta adịda bala ịnịna ọ-maa ma. Ị́ ka la irya ọ-kpa ji angị haa ọnahị obe kpong-kpong ka. Ị́ ka myị-ị ri angị kaa myị-ị kpa ịlaa la ịgọgọ ị-ịlahị nya Ohe Oluhye kpong-kpong ka ịnyịnyị.

³Ụka ọọwa, angịnyị ka ri angị họ awụlẹ ọnahị kpong-kpong ka. Ị́ ka la olegu nya ahyẹẹrwẹrwa ẹ-ẹga nya awụlẹ kpong-kpong ka. Ị ka ri angị kpa angịnyị kụ. Ị ka ri angị họ awụlẹ ọkwọ bala angị họ angịnyị ang ọnyọọngịrị. Angịlẹ kị ri alabwẹla ọnyịịla ka wụ angịkịla ẹjẹ nya ịlẹhị-ịlẹhị ụka ọọwa ịnyịnyị.

⁴Ị ka ri angị pịrị angịnyị aanaa ha. Ị ka ri angị họ ẹla ịmịmẹ ụka wuu. Ị ka ri angị kpa ịlaa ka uhye ngana-ngana bwula ọbọọchẹ ohihi lụmẹ. Ị ka ri angịlẹ ká ang ịkpịpyọ nya odehe ọlẹ a ka háa lụmẹ gụ Ohe Oluhye ụka ọọwa ịnyịnyị.

⁵Ụka ohyẹẹkpẹ ọọwa, angịnyị ka kpa abwụma nya ọngịnyị nya Ohe Oluhye oriri. Ma, ị tị ka pwa ọngịrị nya Ohe Oluhye ọlẹ kọ kaa da angịnyị nya Ohe Oluhye oriri ọọwa ụbwọ rwarụ bwula ọhịhị onyobyi nyaa. ITimoti, aa cheji ba ụma nya angịnyị ịlịnyị wuu mẹ.

⁶Ụma nya alẹng inyibyi ịlịnyị a kaa jẹ kwiikwii ka ẹpwa nya anyang ịlẹ kị la dẹwụ-dẹwụ ẹ-ẹpwụ nya ọmyịmyị ọlala kaka kpa ụhwahị nyaa yẹ anyang ịịwa dada ụ-ụwa lẹlẹ. Anyang ịlịnyị ri angịlẹ ká irya nya ịhọbịrị ịhọhọ lụmẹ ẹ-ẹpwụ nyaa. Ị juwa họ ang myị́ ang ọlẹ ká imyi nya ịnyịrọ nyaa á byaa yẹkẹẹ, nyị họ mẹ.

⁷Ụma nya angị ịlịnyị kaa juwa jẹ́ ang inyeewe kịlahị-ịlahị. Ma, ị́ tị kaa jẹ́ ịngịngịhyẹ, chajị nya ẹla nya ịlẹhị nya Ohe Oluhye kpong-kpong kaka.

⁸Chajị jaabwọ ká ịJanesi bala ịJambirisi la egbeju ọnyọọngịrị tụ iMosisi pyịpyị lụka nyaa lẹ, ịnyịnyị-ịnyịnyị, alẹng ị-mẹ ang inyibyi ịlịnyị jẹ a kaa la egbeju ọnyọọngịrị tụ ẹla nya ịlẹhị nya Ohe Oluhye pyịpyị lẹlẹ. Chajị irya omeme ọlẹpwụ nya ọkịlẹtụ nyaa ri ang onyobyi-onyobyi kem. Ọmyịmyị ọlala nyaa tị ri abala nya ọmyịmyị ọlẹ kị gba ugu deeji ịnyịnyị lẹ.

⁹Ma, ị́ tị ka kpa ụgbẹyị onyobyi nyaa ọwẹ jẹ lụrụ myị́ ka. Chajị, uchi ọchịchị nyaa ọọwa ka chị ehe ahyaahị, jaabwọ ká ịnya ịJanesi bala ịJambirisi chị ehe lụka nyaa.

¹⁰ITimoti, a tị́ yẹhị ba jaabwọ kam kaa mẹ ẹla nya Ohe Oluhye jẹ wẹ wuu wẹ lẹ? A yẹ abwẹla nyam lẹ. A tị yẹ ang ọlẹ kam lẹẹ rụnyẹ nyamwụ ẹ-ẹpwụ nya ọhịhị ọlẹ. A yẹ ọmyịmyị ọlala nyam. A yẹ ugbodu ojuju nyam. A yẹ ọháha ọlala nyam. A yẹ ọhụ ọbaba ẹ-ẹpwụ nya ang myị́ ang nyam wuu.

¹¹A yẹ ị-tụ pyịpyị nyam wuu bala akama ọyẹyẹ nyam ịlẹ wuu kị wẹ chịm ọgụ, ụ-ụwa Antiyọkọ bala Ayịkoniyọm bala iLisitịra ịnyịnyị. A yẹ jaabwọ kam ju ugbodu ẹ-ẹpwụ nya ị-tụ pyịpyị ịtụka ịlẹ wuu kị wẹ chịm ọgụ ụka ọọwa ịnyịnyị. Ma, Ọngọlahị tị gbam kpehe bwu ẹpwụ nyaa wuu.

¹²Nya ịlẹhị ịnyị, angịlẹ wuu kị juwa tịtọ kị ka la ọhịhị nya ọngịnyị nya Ohe Oluhye oriri ọlẹ ẹ-ẹpwụ nya ịKịrayịsị iJisọsị lẹ aalẹ, ị ka la ọ-tụ pyịpyị pyii lẹ.

¹³Ma, angịnyị inyibyi ịlẹ kị ri angị hụ angịnyị ahị lẹ, ị ka juwa họ ang inyibyi ọ-kụ ọyọyị gụ olene-ene. Ị ka ri angị juwa pịrị angịnyị ju, angịkịla tịtị ka juwa pịraa ịwa ayịdang ju ịnyịnyị.

¹⁴Ma, ahụ iTimoti lẹ, aa juwa kịlahị-ịlahị ẹ-ẹpwụ nya ẹla nya ịlẹhị nya ẹrụ ọnyịịla ọlẹ ká jẹ́ ene, du ká myị la Ohe Oluhye yẹẹyẹẹ bwu ọmwụ ọdada mẹ. Chajị ahụ ayịdang jẹ́ ụma nya angịlẹ ká angịmẹjẹ nyang ịịwa ri yẹẹyẹẹ ene-ene.

¹⁵Chajị, bwu enjwo-enjwo nyang lẹ, ahụ ayịdang jẹ́ ẹla nya Ohe Oluhye ọlẹpwụ nya Ụpwụ Ịgọgọ, ọlẹ kọ kaa la ọngịrị mẹ ụgbẹyị nya ọchịda jẹ ọngịnyị ehe bwula ọmyịmyị ọlala ẹ-ẹpwụ nya ịKịrayịsị iJisọsị yẹẹyẹẹ lẹ.

¹⁶Ohe Oluhye a kpa angịnyị ehe bwula Olegu Ịgọgọ nyamwụ da ẹla myị́ ẹla ọlẹpwụ nya Ụpwụ Ịgọgọ lẹ. Ụpwụ Ịgọgọ ọọwa ju apyobwuna nya ọ-kpa mẹ ẹla jẹ ọngịnyị ehe bala ọ-kpa bwuru ọhọbịrị nyamwụ dodehe joo bala ọ-kpa nwụ ọngịnyị rịrị bala ọ-kpa mẹ ẹla jẹ ọngịnyị ẹ-ẹpwụ nya abwẹla ọnyịịla ọhọhọ nya Ohe Oluhye ịnyịnyị.

¹⁷Ọọwa ka du ká ọngịnyị nya Ohe Oluhye ka jẹ-ẹ̀ la kpẹẹkpẹẹ bala ọ-la ọngịrị nyọka họ ụma nya ụkụrwọ ọnyịịla ọnyị myị ọnyị myị.