Read idege 2 ITIMOTI 4 Bible Online

2 ITIMOTI 4 - idege bible

2 ITIMOTI 4

¹ITimoti, m jam dang ehile ị-ịlahị nya Ohe Oluhye bala ịlahị nya ịKịrayịsị iJisọsị Ọngọ ka la angịnyị ịhịhị bala angị gbugbu eje lụka ọlẹ kọ ka warị bala ịpyị adịrahụ nyamwụ.

²Ehile ọọwa ri, ká ka ya ẹrụ ọnyịịla nya Ohe Oluhye ọlẹ pyẹ. Aa juwa kpa ọngịrị nyang wuu ya ẹla ọọwa pyẹ lụka ọlẹ kọ pwoku bala ụka ọlẹ kọ pwopwoku-ka, ịnyịnyị mẹ. Da ẹrụ ọnyịịla ọọwa wụlẹ gede-gede je angịnyị, chajị kị ka myị jwoo mẹ. Kpa ẹla ọọwa yalibyi la angị họ tịpyọ, ká kpa ẹla ọọwa ju angịnyị ọhụ ịnyịnyị mẹ. A rịrị ẹ-ẹkpẹ ẹ-ẹpwụ nya ang ọmẹjẹ angịnyị nyang bala ugbodu ojuju onyudiyo ọlala kpong-kpong ka.

³Chajị ụka juwa warị ị-ịlahị ká angịnyị ka tịtọ nya o-wo ẹla nya Ohe Oluhye ọlẹ kọ ri ịnyịlẹhị kaka. Ma, ị ka juwa ba imyi nya ịnyịrọ nyaa jẹ kem ụka ọọwa. Ọọwa lẹ, angị ịlịnyị a ka be ẹkọ wụrụ ụma nya angịmẹjẹ ụhwahị ịlẹ kị ka myị-ị mẹ ang inyibyi kem jáa jaabwọ kị juwa tịtọ lẹlẹ.

⁴Ọọwa lẹ, ị ka tụ ụrụ nyaa ku hi ẹla nya ịlẹhị nya Ohe Oluhye owowo lẹ, ị ka juwa ke ụrụ la ejwo ijwojwo ịlẹ ká angịnyị kaa jwo nya ọ-kpa da ụkụrwọ ọhọhọ nya Ohe Oluhye wụlẹ kem lẹlẹ.

⁵ITimoti, ahụ lẹ, aa juwa kpahị ju ịlọng yẹẹyẹẹ ẹ-ẹpwụ nya ang myị́ ang ọhọhọ nyang wuu mẹ. La ugbodu ojuju ẹ-ẹpwụ nya akama. Juwa họ ụkụrwọ nya ọngọ ya ẹrụ ọnyịịla nya Ohe Oluhye pyẹ tụ ẹga myị́ ẹga da yẹẹyẹẹ mẹ. Ụkụrwọ ọlẹ ká Ohe Oluhye ya jung ụ-ụbwọ wẹ lẹ, aa họọ jịra kpẹẹkpẹẹ mẹ.

⁶ITimoti, wo mẹ! Am lẹ, ụka ọlẹ kam ka hu ọhịhị nyam kịla iya ha Ohe Oluhye pwụ lẹ. Chajị ụka ọlẹ kam ka rụ bwu odehe ọlẹ ju chwẹẹ lụmẹ lẹ.

⁷Ma, m tị ma uya ọnyịịla nya ụkụrwọ nya Ohe Oluhye ọlẹ kpá lẹ. M rụnyẹ nya ọhịhị nyam ọlẹ chị eju lẹ. M tị kpa ọmyịmyị ọlala nyam pwụ ọbaba ịnyịnyị lẹ.

⁸Ang ọlẹ kọ hi ham lẹẹlẹẹ a ri ọ-ka ye okpo ọkụrụ egbeju nya abwẹla ọnyịịla, ọlẹ ká Ọngọlahị Ọngọleje nya abwẹla ọnyịịla ka hu ham la ẹnụtụrụ ọọwa lẹlẹ. Ám ụbwọm kem, ọ tị ka ya okpo ọlịnyị ha ka. Ma, ọ ka ya ha angịlẹ wuu ká ọ-mwọọgịlẹ warị wẹ nya Ọngọlahị háa ịnyịnyị.

⁹ITimoti, aa maga ká warị wẹ ẹga nyam ahyaahị mẹ.

¹⁰Chajị, odehe ọlẹ há iDimasị lụmẹ lẹ, ọ tụụbwọ him rụ kele ka epweji nya ịTẹsalonika lẹ! IKirẹsẹnsị tị rụ ka epweji nya ịGaletiya ịnyịnyị lẹ. ỊTayịtọsị tị rụ ka epweji nya ịDalịmatiya lẹ.

¹¹ILuku ụbwọọmwụ kem a jam tam lẹlẹ. Aa wụrụ ịMakị, ká kpọọ ba ịlọng warị ịnyịnyị mẹ. Chajị ịMakị ju apyobwuna ham ẹ-ẹpwụ nya ẹrụ ọmyịmyị lụmẹ.

¹²M du iTikikọsị ẹrụ kele ka epweji nya Efesọsị lẹ.

¹³Ụka ká ka warị, aa hu awụrụ nya ikotu nyam ọlẹ kam deeri hi ẹ-ẹga nya ịKaaposi kpa wam bwu iTirowasị, ká go apwụ nyam ịlụwa kpa wam ịnyịnyị mẹ. Ọgụgụ wuu ri apwụ ịlẹ kị da u-uhye nya egba nya iyo.

¹⁴Alẹkịsanda ọlẹ kọ ri ọngọ kaa hya ụwa, họm ang ọtịpyọ lụmẹ kaka kpoye. Ọngọlahị ka nwọọ uri nya ang ọọwa kọ họ ẹ-ẹga nyam pyii.

¹⁵ITimoti, aa kpahị ju ịlọng ẹ-ẹga nya Alẹkịsanda ọwẹ yẹẹyẹẹ mẹ. Chajị, ọ tụ ẹrụ ọnyịịla ọlẹ kahị lẹẹ ya pyẹ, pyịpyị lụmẹ kaka kpoye ụka ọọwa.

¹⁶Ụka nya ọgbanyẹ-ọgbanyẹ ọlẹ kam juwa wẹ ịtọ nya ẹla oluhye nya eje nyam lẹ, m godayị ụbwọm gbẹng. Chajị, angịnyị nya Ohe Oluhye ịkịla ịlụwa wuu ji ẹkpẹ dam. Ma, Ohe Oluhye a tị yaa ahyẹẹrwẹrwa o-oluhye nya ọọwa!

¹⁷Ụka ọọwa, Ọngọlahị hụ tam bala ọ-ya ọngịrị nyamwụ ham. Ọọwa lẹ, m ya ẹrụ ọnyịịla ọọwa wuu dodehe jịra ụ-ụwa, chajị ká ala iJentayịlị ka jẹ́-ẹ wo ẹrụ ọnyịịla ọọwa myị́ lẹlẹ. Ọọwa lẹ, Ọngọlahị a gbam kpehe bwu ẹpwụ ọnụ nya ugẹbẹ ọwẹ lẹlẹ.

¹⁸Ọngọlahị ayịdang ka gbam kpehe bwu ẹpwụ nya ang onyobyi ọnyị myị ọnyị wuu. Ọ ka jum ịtọ ha ịlọmwụ, gbee pwụ ụka ọlẹ kam ka jụ ka ịpyị adịrahụ nyamwụ olepwoohe. Ogbo a juwa họọ pwụ ụka myị́ ụka! Amẹn.

¹⁹ITimoti, aa da ọnụ chị iPirisika bala Akwila ham bala alọdọdẹpwa nya Ọnẹsịfọrọsị mẹ.

²⁰Ẹrasịtọsị hụ ụ-ụwa e-epweji nya ịKọrịntị lẹ. M tị tụụbwọ hi iTirofimọsị e-epweji nya iMilẹtọsị, chajị nyọlẹ ká ẹdụrụ jwọọ ụ-ụwa.

²¹ITimoti, aa cheri ká warị jene nya ụka nya alogo ọtụka-ọtụka ọlẹ kị wụrụ “iwinta” mẹ. IYubulọsị bala iPudẹnsị bala ịLayịnusi bala iKilodiya bala anyadahị ịkịla ẹ-ẹpwụ nya ịKịrayịsị ịlẹgẹlẹ wuu ya, nyị da ọnụ chịng ha ịwa mẹ.

²²Ọngọlahị a hụ ta olegu nyang, kọ ya ọnahị nyamwụ hụ tang ịnyịnyị mẹ.