Read idege ỊTAYỊTỌSỊ 1 Bible Online

ỊTAYỊTỌSỊ 1 - idege bible

ỊTAYỊTỌSỊ 1

¹Ụpwụ ọlẹ bwu ẹga nyam am ịPọlụ ọnchẹ nya Ohe Oluhye bala ọlẹrụ ọnyịịla nya iJisọsị ịKịrayịsị. Ohe Oluhye chụm, dum ẹrụ kpehe kam ka da angịlẹ ká Ohe Oluhye chụ ha ịlọmwụ ụbwọ ẹ-ẹpwụ nya ọmyịmyị ọlala nyaa bala ọ-ka họ kị ka jẹ́ ẹla nya ịlẹhị ọlẹ kọ ji ẹpwụ nya ọhịhị nya ọngịnyị nya Ohe Oluhye oriri nyahị ọlẹ yẹẹyẹẹ.

²Chajị kị ka jẹ́-ẹ la ẹhị ọrịrịị-rịrị gbe ọhịhị ọ myịmyị-ka ọlẹ ká Ohe Oluhye Ọngọlẹ kọ kaa me ọnọọkịla kpong-kpong ka, myị ọnụ hahị ahị angị myịmyị ene-ene kọọ họ odehe ọlẹ.

³Ịnyị lẹ, Ohe Oluhye a chị ọnụ ọmyịmyị nyamwụ ọọwa ehe lẹẹ lụka nyamwụ bwula ẹla nya ẹrụ ọnyịịla o-ya pyẹ ọlẹ lẹlẹ. Ẹrụ ọnyịịla ọọwa, Ohe Oluhye Ọngọchịda nyahị a ya jum ụ-ụbwọ bwula ehile nyamwụ kam ka kpa kaka ya pyẹ je angịnyị ehe lẹẹ lẹlẹ.

⁴M jam da ụpwụ ọlẹ du wang ahụ ịTayịtọsị, ọnyị nyam nya ịlẹhị-ịlẹhị ẹ-ẹpwụ nya ọmyịmyị ọlala ọlẹ ká Ohe Oluhye ya hahị wuu la awụlẹ. Ọnahị bala okpunyi nya Ohe Oluhye Adịda bala ịnya ịKịrayịsị iJisọsị Ọngọchịda a juwa tang mẹ.

⁵ỊTayịtọsị, kpịtịya mẹ. Ang odudu kam tụụbwọ hing hụ ọ-ọpyị nya iKiriti ri chajị ká ka nwụ ang ịlẹ kị pwoku-ka, ịlụwa rịrị bala ọ-ka chụ alegbeju ịkpẹhị rịrị ịchọọchị nya Ohe Oluhye ha ala ịchọọchị ilepweji ọnyọnyọọnyị wuu jaabwọ kam ya jeng ene-ene.

⁶Angịlẹ ká ka chụ nya angịgbikpịlọ nya Ohe Oluhye ịlịnyị ka ri angịlẹ ká ọhịhị nyaa á ju abyị ọhẹ-lọhẹ ka. Ị ka ri angịlẹ kị ye ahụ ookpokpo kem. Angị ịlịnyị ka ri angịlẹ ká anyị nyaa á ka ru ohi ẹ-ẹpwụ nya ang onyobyi ọhọhọ ka lee ẹ-ẹpwụ nya egbeju ọnyọọngịrị ọlala ka ịnyịnyị. Ma, anyị nyaa ka ri angị myị la Ohe Oluhye hiigu-hiigu ịnyịnyị.

⁷Chajị jaabwọ ká ọngọgbikpịlọ nya Ohe Oluhye ri olegbeju ọlẹ ká Ohe Oluhye chụ, kọ ka kpẹhị rịrị ụkụrwọ nyamwụ yẹẹyẹẹ lẹ, ọngọ ọlịnyị á chịla kọ ka họ ẹla ọlabyị ọhẹ-lọhẹ kpong-kpong ka. Ọ́ ka ri ọngọlẹ ká irya nya ụbwọ nya ịlọmwụ kem a ka họ́ọ kpong-kpong ka. Ọ́ ka ri ọngọ wụ ẹjẹ gbegbe ka. Lee, o-ri ọngọ nwa ere juwa ya ka. Lee, o-ri ọngọ ma uya ta angịkịla kpong-kpong ka. Lee, o-ri ọngọ charịnya nya okpoko ọlala kpong-kpong ka.

⁸Ma, ọngọ ọlịnyị ka ri ọngọ kpahị ju angga ịlẹpwa nyamwụ yẹẹyẹẹ. Ang ọnyịịla ọhọhọ kem, a ka há ọngọọwa lẹ. Ọ ka ri ọngọ kpa ẹla ọjẹ́jẹ họ abwẹla. Ọ ka ri ọlabwẹla ọnyịịla. Ọ ka la ọhịhị ọlẹ kọ la ịgọgọ. Ọ ka ri ọngọ wu ịlọmwụ kpa myị́ ẹ-ẹpwụ nya ang myị́ ang nyamwụ wuu.

⁹Ọngọọwa ka ri ọngọ wu ịlẹhị nya ẹrụ ọnyịịla ọ-chị la o-hu ọkịlẹtụ ha ọlẹ kị mẹjọọ kpa ụ-ụwa gogo la ịlọmwụ yẹẹyẹẹ. Chajị kọ ka jẹ́-ẹ mẹ ẹrụ ọnyịịla ọlẹ kọ ri nya ịlẹhị jẹ angịnyị nyamwụ bala ọ-ka jẹ́-ẹ da ẹla ọọwa wụlẹ yẹẹyẹẹ ya je angịlẹ kị juwa tụ ẹrụ ọnyịịla ọọwa pyịpyị myị́ ịnyịnyị.

¹⁰Chajị angịmẹjẹ ịhyẹ lụmẹ-lụmẹ ịlẹ kị la egbeju-ọngịrị tụ ẹla nya ịlẹhị pyịpyị, juwa kpa ang ọmẹjẹ ohideeji nyaa ọọwa hụ angịnyị ahị. Angịmẹjẹ ụhwahị ọgụgụ wuu a ri angịlẹ kị kaa ji oye nya ụwụwụ ọdada kem lẹlẹ.

¹¹Lẹ, ọ chịla ká ka hu angị ịlịnyị abwọ la ang ọmẹjẹ onyobyi ọwẹ pyii lẹ. Chajị, ị juwa hụ alọdọdẹpwa ịhyẹ ahị bwula ọmẹjẹ ọlẹ kọ chịla kị ka mẹjẹ kpong-kpong ka. Imyi nya okpoko ọlala kem, a wẹẹ kpaa kaka họ ẹlẹwẹ lẹ.

¹²Ịnyị a du ká ọla iKiriti ọọnaa ọhẹ yẹ ọmwụ dodehe ene-ene lụka nyamwụ lẹẹ lẹ. Ọ yẹ ọmwụ ọọwa yẹkẹẹ, “Ala iKiriti ri angị kaa me ọnọọkịla bwu eji-eji. I ri angị kaa họ ẹla ọkwọ-ọkwọ, me irya ju ka, lala iyo ịlẹpwamẹ bala o-ri angị ta ụbwọ lụmẹ bala ọ-kaa ri ang oriri lụmẹ kaka kpoye lala okomba ịnyịnyị.”

¹³Ẹlẹwẹ ká ọngọọwa ya lẹ, ọ ri nya ịlẹhị. Chajị nya ọọwa lẹ, ịTayịtọsị, aa cheri ká yalibyi la angịnyị nya Ohe Oluhye ịla iKiriti ọgwọgụ mẹ. Chajị kị ka la ọmyịmyị ọlẹ kọ la gogo hiigu-hiigu mẹ.

¹⁴Aa myịmyị byaa kị cheji ba ọgwọgụ hi ejwo ijwojwo ịlẹ ká ala iJuu wẹẹ jwo, nya ọ-kpa da ụkụrwọ ọlẹ ká Ohe Oluhye họ wụlẹ mẹ. Ki juwa cheji ba ihi ojuju nya ehile ịlẹ kị ji ẹkpẹ da ẹla nya ịlẹhị nya Ohe Oluhye wuu ịnyịnyị mẹ.

¹⁵Chajị, ang myị́ ang ọlẹ wuu ká Ohe Oluhye họ lẹ, ọ ri ang ọ-la cheri-cheri ị-ịlahị nya angịlẹ ká ọhịhị nyaa ịwa ayịdang la cheri-cheri ị-ịlahị nya Ohe Oluhye! Ma, ẹ-ẹga nya angịlẹ kị chịrị a-abwẹla ọhọhọ bala ọ-la ọmyịmyị-ka lẹ, ang myị́ ang ọlẹ wuu kọ la kpakpa tị kaa ri ang ọ-chịrị kem ị-ịlahị nyaa ịwa. Chajị ọkịlẹtụ nyaa ayịdang bala irya ọ-kpa gu ẹla ene ọlụwa bịrị chịkẹ-chịkẹ ịnyịnyị lẹ.

¹⁶I juwa ya bwu ọnụ nyaa yẹkẹẹ, ịwa nyị jẹ́ Ohe Oluhye lẹ. Ma, abwẹla ọhọhọ nyaa wuu tị juwa pwa Ohe Oluhye ọọwa rwarụ. Ịnyị a du kị ri angị họ abwẹla onyobyi wụ Ohe Oluhye ẹjẹ bala o-ri angị la egbeju-ọngịrị tụ Ohe Oluhye pyịpyị, gbee ká ụgbẹyị nya ụkụrwọ ọnyịịla ọhọhọ nyaa wuu tuku hyaa gbanggbang pyịyọọ wẹ lẹlẹ.