Read idege ỊTAYỊTỌSỊ 2 Bible Online

ỊTAYỊTỌSỊ 2 - idege bible

ỊTAYỊTỌSỊ 2

¹Ma, ahụ ịTayịtọsị lẹ, ẹla nya Ohe Oluhye ọlẹ kọ pwoku irya nya Ohe Oluhye kem a ka mẹjẹ angịnyị nyang lẹ.

²Aa byi angịgbahị ịlẹpwụ nya ịchọọchị nyang wuu kị ka ri angị kpẹhị chịng nya ẹla bala o-ri angị la kpịra-kpịra a-abwẹla olihi-ihi ọhọhọ bala o-ri angị kpa ẹla ọjẹ́jẹ họ abwẹla mẹ. Aa byaa kị ri angị la kpịra-kpịra ẹ-ẹpwụ nya ọmyịmyị ọlala nyaa bala ọháha ọlala nyaa bala o-ri angị la ọhụ ọbaba ẹ-ẹpwụ nya ang myị́ ang wuu ịnyịnyị mẹ.

³Aa byi anyang ịgbahị ịlụwa ịnyịnyị, kị ri angị kpa uhi nya Ohe Oluhye họ abwẹla nyaa wuu ẹ-ẹpwụ nya ịgọgọ ọlala mẹ. I ri angị kpa angịnyị kụ ka lee angị ri anyịhị nya ere ọnwanwa juwa ya kokoo. Aa byaa kị juwa mẹ ang ọnyịịla jẹ anyang aanaa ịnyịnyị mẹ.

⁴Chajị kị ka bwula ọọwa jẹ́-ẹ mẹ ang jẹ ịhụ anjwo yẹẹyẹẹ jaabwọ ká ịhụ ịịwa ka bwula ọháha ẹ-ẹga nya ọrụ nyaa bala anyị nyaa mẹ.

⁵Chajị ká anyang ịhụ ịlịnyị ka ri angị kpa ẹla ọjẹ́jẹ họ abwẹla bala angị chị la o-hu ọkịlẹtụ ha ị-ịlahị nya ọrwaa bala angị jẹ́ kpẹhị rịrị ẹpwa nyaa hiigu-hiigu bala angị họ ọnahị bala angị juwa ju ọrwaa ihi hiigu-hiigu ịnyịnyị mẹ. Chajị kị ka họ ịngịngịhyẹ onyobyi ọlẹ kọ ka họ ká angịnyị ka ya ẹla ọtịpyọ rụ́ ẹrụ ọnyịịla nya Ohe Oluhye ọlẹ kaka mẹ.

⁶Aa byi ikolobya ịla ịchọọchị nyang kị ri angị kpa ẹla ọjẹ́jẹ họ abwẹla ẹ-ẹpwụ nya ang myị́ ang wuu ịnyịnyị mẹ.

⁷ỊTayịtọsị, ahụ lẹ, ẹ-ẹpwụ nya ang myị́ ang wuu, aa cheri ká ụkụrwọ ọnyịịla ọhọhọ nyang ahụ ayịdang, a ri ẹjẹẹ ha angịnyị nyang mẹ. Aa myị ká ẹla ọmẹjẹ nyang a la kpịra-kpịra bala o-ri ẹla nya ịlẹhị ọlẹ kọ bwu ẹpwụ nyang kpehe ịnyịlẹhị mẹ.

⁸Aa juwa ya ẹla ọọwa la ụgbẹyị ọlẹ kọ la kpakpa, kọ ju ịwẹẹ ọdada kaka ịnyịnyị mẹ. Chajị ká oyoyi ka jẹ́-ẹ ju angị yẹhị rịrịng ẹ-ẹla, lụka ọlẹ kị ka ye ịngịngịhyẹ onyobyi ya rụ́ụhị ahị angịnyị nya Ohe Oluhye kaka mẹ.

⁹ỊTayịtọsị, aa byi anchẹ ịlẹ kị ri angịnyị nya Ohe Oluhye ịlụwa, kị juwa ju ayịbaba nyaa ihi yẹẹyẹẹ bala ọ-họ ẹla ọlẹ kọ ka kpụ ayịbaa ịpyọ ẹ-ẹpwụ nya ang myị́ ang wuu ịnyịnyị mẹ. I hu ọnụ da ayịbaba nyaa kpong-kpong kokoo.

¹⁰Aa byaa mẹ, jaabwọ myị́ abwọ ká ịngịngịhyẹ nya ayịbaa á ri ochiche kaka ba, ị hwoo yoyi kokoo. Ọkọkọ nya ọọwa lẹ, kị ri angị la kpẹẹkpẹẹ ẹ-ẹpwụ nya abwẹla ọhọhọ bala angị chị la o-hu ọkịlẹtụ ha nya ịlẹhị-ịlẹhị mẹ. Chajị ká ọhọhọ nyaa ọọwa ka jẹ́-ẹ chị o-ya dodehe ọnyịịla nya ọmẹjẹ nya ẹrụ ọnyịịla nya Ohe Oluhye Ọngọchịda nyahị ehe mẹ.

¹¹Chajị Ohe Oluhye chị ọnahị nyamwụ ehe ha angịnyị ehe, chajị kị ka bwu lọọ, la ọchịda nyamwụ lẹ.

¹²Ọnahị nya Ohe Oluhye ọọwa a kaa mẹjẹẹhị jaabwọ kahị ka bwu tụụbwọ hi ụgbẹyị nya ọngịnyị nya Ohe Oluhye oriri-ka wuu, beji bala imyi nya ịnyịrọ olodehe ọlẹ wuu ịnyịnyị lẹ. Ọọwa lẹ, ahị kaa jẹ́-ẹ kpa ẹla ọjẹ́jẹ họ abwẹla ẹ-ẹpwụ nya ang myị́ ang nyahị wuu bala ọhịhị nya abwẹla ọnyịịla ọhọhọ bala ịnya ọngịnyị nya Ohe Oluhye oriri kpẹẹkpẹẹ ẹ-ẹpwụ nya odehe ọlẹ myị́ lẹlẹ.

¹³Chajị, ahị jam kpa ang ịwẹ wuu họ ụkụrwọ ẹ-ẹpwụ nya ọhịhị nyahị ọlẹ lụka ọlẹ kahị jam godayị gbe ẹnụtụrụ nya ahị ọwawa nya Ọngọlahị, ọlẹ kahị lẹẹ la ẹhị ọrịrịị rịrị gbe lẹ. Ẹnụtụrụ ọọwa kpangga, ẹbyẹbyị nya Ohe Oluhye ọtụka nyahị ọlẹ kọ ri ịKịrayịsị iJisọsị Ọngọchịda, a ka chị ehe a-ahịgboo lẹlẹ.

¹⁴ỊKịrayịsị ọọwa a hu ọhịhị nyamwụ kịla iya wọnụ nyahị ju, chajị kọ ka gbahị kpehe bwu ẹpwụ nya ang inyibyi ịhọhọ nyahị wuu bala ọ-hụ́ ọhịhị nyahị cheri-cheri chajị kahị ka jẹ́-ẹ ri angịnyị nyamwụ ụbwọọmwụ kem bala ọ-ka ri angị juwa kpa ọngịrị nyahị wuu họ ụkụrwọ ọnyịịla kem ịnyịnyị lẹlẹ.

¹⁵ỊTayịtọsị, aa juwa mẹ ala ịwẹ jẹ angịnyị nyang, ká juwa kpa ẹla ọọwa jwaa ọhụ ịnyịnyị bala ọ-kpa ẹla ọọwa bwuru ang onyobyi ọhọhọ nyaa dodehe jaa bwula ọngịrị nya olegbeju oriri nyang wuu mẹ. A myị ká ọngọngọhẹ a yẹhị dang bwee kpong-kpong koo.