Read idege ỊTAYỊTỌSỊ 3 Bible Online

ỊTAYỊTỌSỊ 3 - idege bible

ỊTAYỊTỌSỊ 3

¹ỊTayịtọsị, aa kpụ angịnyị nyang ịtịya, kị kpa ịlaa keji ha ịdịrịhụ wuu bala angịkịla ịlẹ kị ya ọngịrị nya eji ogbegbe ju ụ-ụbwọ mẹ. Kị myịmyị ri angị ju ihi nya ehile hiigu-hiigu bala ọnwụla nọ kị ka juwa họ ụkụrwọ ọnyịịla ọnyị myị ọnyị ọlẹ kị ka byaa ya, nyị họ mẹ.

²Aa byaa kị ya ẹla onyobyi rụ́ ọngọngọhẹ ka lee o-juwa rwarụ ta angịnyị ka. Ma, kị ri angị la olegu ọdụmwọ ẹ-ẹga nya angịkịla yẹẹyẹẹ bala o-ri angị juwa me irya ju angị ịkịla nya ịlẹhị-ịlẹhị ẹ-ẹpwụ nya ang myị́ ang nyaa wuu ịnyịnyịịnyị mẹ.

³Chajị lụka ọlẹ kahị jẹ́ Ohe Oluhye lẹka lẹ, ahị ayịdang ri aluchi. Ahị la egbeju-ọngịrị. Ahị hwahị hi ụgbẹyị nya Ohe Oluhye. Ahị ri anyịhị nya imyi nya ịnyịrọ olodehe ọlẹ bala ang ịkpịpyọ ịlẹpwụ nyamwụ la datị-datị wuu ịnyịnyị. Ụka ọọwa, ahị la ọhịhị nya ọkwọ ọlala bala ịnya imajẹ ọlala. Ang inyibyi ịhọhọ nyahị kaa wụ angịnyị ẹjẹ. Ahị ayịdang tị kaa wụ awụlẹ ẹjẹ lụmẹ ụka ọọwa ịnyịnyị.

⁴Ma, ụka ká Ohe Oluhye Ọngọchịda nyahị chị ahyẹẹrwẹrwa bala ọháha ọnahị nyamwụ ehe lẹ,

⁵ọ chịhị da bwu ẹpwụ nyaa wuu lẹlẹ. Ma, ọchịda ọọwa á ri ịnyahị, chajị nya ịngịngịhyẹ ọlẹ kahị kpa abwẹla ọnyịịla nya ịlọhị họ ene kpong-kpong ka. Ma, ahyẹẹrwẹrwa nya Ohe Oluhye kem, ọ kpa chịhị da lẹ. Ahị la ọchịda ọọwa lụka ọlẹ ká Olegu Ịgọgọ nya Ohe Oluhye hụ́ụhị cheri-cheri bwula ọ-ya ọ-nwụ ma onyeewe bala ọhịhị onyeewe nya Ohe Oluhye hahị.

⁶Ohe Oluhye ya Olegu Ịgọgọ nyamwụ ọọwa hahị mwụ aba ba bwula iJisọsị ịKịrayịsị Ọngọchịda nyahị.

⁷Chajị ká Ohe Oluhye ka bwula ọọwa huuhi lala alabwẹla ọnyịịla ị-ịlahị nyamwụ bwula ọnahị nyamwụ kahị ka ri ugu nya ọhịhị ọmyịmyị-ka ọlẹ kahị lẹẹ la ẹhị ọrịrịị-rịrị gbe.

⁸Ala ịlẹ wuu kam ya wẹ lẹ, ị ri ẹla nya ịlẹhị. Lẹ, m tịtọ ká ka juwa kpa ala ịịwa wuu ma ya je angịnyị nyang la ọngịrị-ọngịrị ịnyịnyịịnyị. Chajị ká angịlẹ wuu kị myị la Ohe Oluhye lẹ, ka jẹ́-ẹ kpa ọhịhị nyaa wuu họ ụkụrwọ ọnyịịla bwula ọọwa mẹ. Chajị ala ịmẹjẹ ịwẹ ri ala ịnyịịla bala ala i-ju apyobwuna ha ọhịhị nya angịnyị ehe lụmẹ.

⁹ỊTayịtọsị, aa cheri ká cheji ba ịwẹẹ ọdada nya akpachuu nya aluchi ịwẹ, ká cheji ba ego ogbegbe nya ẹnyị nya adịda igogo anyị ịnyịnyị mẹ. Aa cheji ba ẹla ọmwọmwọ bala arụ ọrụrụ u-uhye nya ehile nya Ohe Oluhye mẹ. Chajị ala ịlịnyị ri ala i-hi deeji bala ala i-ju apyobwuna kpong-kpong ka.

¹⁰Ó ri ká da ọngọlẹ kọ juwa kpa ebwo ọchịchị wẹ ẹpwụ nya ịchọọchị ọna, ugbabwọ ookpokpo lee ụka imiiye, ká ọngọọwa á wo kaka lẹ aalẹ, aa gba ọngọọwa ugu gbanggbang mẹ.

¹¹Aalẹ, aa jẹ́ mẹ. Ọngọ ọlịnyị ji ẹkpẹ nyamwụ da ụgbẹyị nya abwẹla ọnyịịla ọhọhọ lẹ. Ọngọhọbịrị, ọ ri lẹlẹ. Ịhọbịrị ịhọhọ nyamwụ tị ya eje woo mẹnẹ mẹnẹ ịnyịnyị lẹ.

¹²Ụka kam du Aatemasị lee iTikikọsị warị wẹ ẹga nyang bwaaa lẹ aalẹ, aa maga ká warị wẹ ẹga nyam ahyaahị wẹ epweji nya iNikopolisi mẹ. Chajị, ụ-ụwa, m tịtọ kam ka hụ lụka nya alogo ọtụka-ọtụka ọlẹ kị wụrụ “iwinta” ọlẹ kọ wẹẹ warị lẹ.

¹³ỊTayịtọsị, aa da ịSẹnasị ọlẹ kọ ri iloya ọ-la eje bala Apolosi ụbwọ yẹẹyẹẹ ẹ-ẹpwụ nya ọnwụla nọ nya ẹdịyẹ nyaa ahyaahị bwula ahụ ọ-myị ká ịngịngịhyẹ ka gaa amwụ kaka mẹ.

¹⁴ỊTayịtọsị, aa byi angịnyị nyahị kị jẹ́ jaabwọ kị ka juwa kpa ọhịhị nyaa wuu, họ ụkụrwọ ọnyịịla, chajị kị ka jẹ́-ẹ da angịkịla ụbwọ ẹ-ẹpwụ nya ọbaba nyaa olijata myị́ mẹ. Chajị kị ka ri angị nwụ́ ugbe o-ju apyobwuna kaka lẹ ka mẹ.

¹⁵Angịlẹ kị jam tam wuu ya, am nyị da ọnụ chịng ha ịwa mẹ. ỊTayịtọsị, aa da ọnụ chị alụwa wuu, ịlẹ kahị há ẹ-ẹpwụ nya ọmyịmyị ọlala nya Ohe Oluhye ọlẹ hahị ịnyịnyị mẹ. Ọnahị nya Ohe Oluhye a juwa tanụ wuu mẹ. Amẹn. [Ị da ụpwụ ọlẹ du tọ ịTayịtọsị bwu epweji nya iNikopolisi ọ-ọpyị nya ịMẹsịdoniya. ỊTayịtọsị ọwẹ a ri olegbeju ọgbahị nya angịgbikpịlọ ịlọpyị nya iKiriti wuu bwula ọlẹ kị yụbwọ nịrọọ e-egbeju chajị nya ọọwa lẹ.]