Read idege IFILIMỌN 1 Bible Online

IFILIMỌN 1 - idege bible

IFILIMỌN 1

¹Ụpwụ ọlẹ bwu ẹga nyam am ịPọlụ ọlagba nya ịKịrayịsị iJisọsị bala ẹga nya iTimoti ọnyadahị ẹ-ẹpwụ nya ịKịrayịsị. Ahị jam da ụpwụ ọlẹ du wang ahụ iFilimọn oligu nyahị bala ọngọ họ ụkụrwọ nya Ohe Oluhye ọlẹ tahị.

²Ahị jam dọọ du tọ Afiya ọnyadahị ọnyang ẹ-ẹpwụ nya ịKịrayịsị bala Aakipọsị ọlẹ kọ ri ịsọja nya ịKịrayịsị tahị bala ọ-dọọ du tọ ala ịchọọchị ịlẹ kị kaa la ọjịra-jịra nyaa ẹ-ẹpwa nyang ịnyịnyị.

³Ọnahị bala okpunyi nya Ohe Oluhye Adịda bala ịnya Ọngọlahị iJisọsị ịKịrayịsị a juwa tanụ mẹ.

⁴IFilimọn, ụka myị́ ụka kam ka raabwọ ha Ohe Oluhye nyam, m kaa kpịtịya nyang ẹ-ẹpwụ nya abwọ ọrịrị bala ọ-kaa ji Ohe Oluhye obe chajị nyang.

⁵Chajị, m wo oja nya ọháha ọlala lụmẹ nyang ẹ-ẹga nya angịnyị nya Ohe Oluhye ịkịla wuu bala ọmyịmyị ọlala lụmẹ nyang ọlẹ ká la ẹ-ẹga nya iJisọsị Ọngọlahị.

⁶Abwọ ọlẹ kam kaa rị chajị nyang ri yẹkẹẹ, ọnahị ọlẹ ká wẹẹ họ ha angịkịla bwula ọmyịmyị nyang lẹ, ká ọọwa a họ ká angịnyị wuu a jẹ́ ụma nya ụdụ ọkpụkpụ nya ang ọnyịịla ọnyị myị ọnyị ọhọhọ ọlẹ ká ịKịrayịsị ya hahị ahị angị myị lọọ mẹ.

⁷IFilimọn, ọnyadam ọlẹ ká hám lụmẹ ẹ-ẹpwụ nya ịKịrayịsị, wo mẹ. Ọháha ọlala lụmẹ nyang ọọwa họ kam la ọkẹkẹnị ọtụka-ọtụka bala ẹjẹ ọkpụ́kpụ lẹ! Chajị ọhọhọ nyang ọọwa wu angịnyị nya Ohe Oluhye ịkịla wuu ẹpwụ lụmẹ kaka kpoye.

⁸IFilimọn, chajị nya ọhọhọ ọnyịịla nyang ọọwa a du lẹ. Ó ri ịnyị ka, ịnọ, m la ọnụ ọ-pwọọ bwula ịKịrayịsị nyọka dang ehile ká ka họ ang ọlẹ kọ chịla myị́.

⁹Ma, ọkọkọ nya ọọwa lẹ, m jam kpa ẹnyị nya ọháha ọlala nya ịlẹhị-ịlẹhị bịlẹng lẹ. Ịnọ, am ịPọlụ ọngọ ku ọmwakpa nya ịKịrayịsị bala o-ri ọlagba nya ịKịrayịsị iJisọsị a wẹẹ ya ẹla lẹ.

¹⁰M jam bịlẹng lẹẹlẹẹ u-uhye nya Ọnẹsịmọsị ọnyị nyam ọlẹ kam mama, ám u-ube nya agba ọlẹ bwula o-ya ẹla nya Ohe Oluhye jwoo gbee kọ ri ọngịnyị nya ịKịrayịsị.

¹¹Ụka ká Ọnẹsịmọsị á jẹ́ ịKịrayịsị lẹka lẹ, ó ju apyobwuna ọhẹ-lọhẹ hang kpong-kpong ka. Ma, lẹẹlẹẹ lẹ, ọ tị ju apyobwuna hang bala am lẹ.

¹²M jam du Ọnẹsịmọsị tịrẹkpẹ nya wẹ ẹpwa nyang lẹ! Aa yoo yẹẹyẹẹ jaabwọ ịnọ ká ka yem am ayịdang mẹ. Chajị olegu nyam juwa kpọọ chị nya.

¹³Ịnọ, ọ hám kam ka wu Ọnẹsịmọsị hụ ta ịlọm ku ọmwakpa nyang ahụ ayịdang, chajị kọ ka myị ẹrụ ham ẹ-ẹpwụ nya ube nya agba ọlẹ kị yam ju lẹẹ, chajị nya ẹrụ ọnyịịla ọlẹ.

¹⁴Ma, jaabwọ ká ọnahị ọhọhọ chịla kọ ka bwu ẹpwụ nya ọlọnahị ọọwa ayịdang la ịlọmwụ tii lẹ, ḿ tịtọ kam ka họ ẹla ọlẹ ẹ-ẹkpẹ-ẹkpẹ nyang lala am nyaa wẹẹ tụng tutu ẹ-ẹpwụ nyamwụ kpong-kpong ka.

¹⁵Ọhẹka, Ọnẹsịmọsị rụ hi ẹpwa nyang lụka o-kpii, chajị ụka kọ tịrẹkpẹ nya ugbẹnyị lẹ, kọ ka hụwa tang pyịyọọ lẹ.

¹⁶Chajị, Ọnẹsịmọsị á ri ọnyọhị nyang ọlam-ọlam kem ugbẹnyị kaka. Ọ gụ ọnyọhị ọlam-ọlam lẹ. Ọnyị nya adịda ẹ-ẹpwụ nya ịKịrayịsị, ọ ri lẹlẹ. Jaabwọ ká Ọnẹsịmọsị hám lụmẹ nya ịlẹhị-ịlẹhị lẹ, m jẹ́ kọ dọmwụ ka háng ahụ ayịdang lụmẹ gụ pyii lala ọnyọhị nyang olodehe ọlẹ bala ọnyadang ẹ-ẹpwụ nya Ọngọlahị la lẹ.

¹⁷Lẹ, iFilimọn, ó ri ká hum lala oligu nyang nya ịlẹhị-ịlẹhị ẹ-ẹpwụ nya ịKịrayịsị lẹ aalẹ, aa ye Ọnẹsịmọsị yẹẹyẹẹ, jaabwọ ịnọ, ká ka yem am ayịdang mẹ.

¹⁸Wo mẹ. M jam ye ụbwọ nya Ọnẹsịmọsị ị-ịlahị nyang lẹ! Ó ri kọ họng ịngịngịhyẹ onyobyi lee ọ-kpang uri ọhẹ juwa lẹ aalẹ, a dọọ ju ham mẹ.

¹⁹Am ịPọlụ a lẹẹ kpa ụbwọ nya ịlọm da ụpwụ ọlẹ kpehe lẹ. M yẹkẹẹ, m ka nwụng uri nya ang ọọwa wuu chị ọnụ. Ḿ dọmwụ ka kpụng ịtịya nyori yẹkẹẹ, ịnọ, ahụ ayịdang kpam uri nya ọhịhị nya ịlọng lẹpwụ-lẹpwụ kpong-kpong kaka.

²⁰Lẹ, iFilimọn, ọnyadam ẹ-ẹpwụ nya ịKịrayịsị, chuchuu kpa ẹnyị nya Ọngọlahị la họm ọnahị ọwẹ mẹ. Chajị ká ọhọhọ nyang ọọwa ka hu ịnyọ ọmwụmwụ ha ọkịlẹtụ nyam ẹ-ẹpwụ nya ịKịrayịsị mẹ.

²¹Jaabwọ kam dahịhile ihi ojuju lụmẹ nyang ene, kam lẹẹ da ụpwụ ọlẹ du wang lẹ, m jẹ́ yẹkẹẹ, a dọmwụ ka họ hiigu mwụ aba ba ọbịlẹ-bịlẹ nyam ọlẹ lẹ.

²²Ẹla ọkịla ri yẹkẹẹ, aa nwụla ẹpwụ nya ube nya angga nyang nọ gbem mẹ. Chajị, m la ẹhị ọrịrịị-rịrị yẹkẹẹ, Ohe Oluhye ka wẹ alẹ, aa ye Ọnẹsịmọsị yẹẹyẹẹ, jaabwọ ọrịrị nyanụ, chajị kam ka tịrẹkpẹ warị wẹ ẹga nyanụ.

²³Epafụrasị ọlẹ kọ ri ọlagba nya ịKịrayịsị iJisọsị tam ịnyịnyị ya, am nyị da ọnụ chịng ha ọwa mẹ.

²⁴ỊMakị bala Arisitakọsị bala iDimasị bala iLuku ịlẹ kị ri alụkụrwọ nya ẹla nya Ohe Oluhye ọlẹ tam ịnyịnyị ya, nyị da ọnụ chịng ha ịwa mẹ.

²⁵Ọnahị nya Ọngọlahị iJisọsị ịKịrayịsị a juwa ta olegu nyanụ wuu mẹ. Amẹn.