Read idege ALA IHIBURU 1 Bible Online

ALA IHIBURU 1 - idege bible

ALA IHIBURU 1

¹Lụka onyogo-onyogo lẹ, Ohe Oluhye kaa kpa alọmwụ nyamwụ ya ẹla ta adịda igogo nyahị ahị ala iJuu la ụgbẹyị la datị-datị, lụka la datị-datị ịnyịnyịịnyị.

²Ma, lụka ohyẹẹkpẹ-ẹkpẹ ọlẹẹlẹẹ lẹ, Ohe Oluhye ya ẹla ta angịnyị ehe bwu ọnụ nya Ọnyẹwẹ nyamwụ lẹ. Ọnyẹwẹ ọọwa kpangga, Ohe Oluhye a chụ kọ ka ri ọngọ ri ugu nya ang myị́ ang ịlẹ wuu ká Ohe Oluhye họhọ lẹlẹ. Bwula Ọnyẹwẹ ọọwa ayịdang, Ohe Oluhye a tị họ odehe ọlẹ ịnyịnyị lẹ.

³Ọnyẹwẹ nya Ohe Oluhye ọọwa a ri ọngọlẹ kọ kpa ahịgboo ọlẹbyẹbyị nya Ohe Oluhye kaka wuru chị ehe ha angịnyị ehe lẹ. Ẹ-ẹpwụ nya Ọnyẹwẹ nya Ohe Oluhye ọọwa kpangga, abwẹla ọnyị myị ọnyị nya Ohe Oluhye ayịdang a tị nube, ene ká Ọnyẹwẹ ọọwa kpa warị kaka chị ehe ha angịnyị ehe ịnyịnyị lẹ. Ọnyẹwẹ nya Ohe Oluhye ọọwa a tị lẹẹ kpa ẹla ọnyọọngịrị nya ịlọmwụ wu odehe ọlẹ wuu bala ang myị́ ang ịlẹpwụ nyamwụ kpa, du kị jam myị́ pyịyọọ ịnyịnyị lẹ. Ụka ká Ọnyẹwẹ ọọwa warị kaka hụ́ ịhọbịrị nyahị ahị angịnyị ehe kpá wuu lẹ, ọ rụ tịrẹkpẹ kele ka epwoohe kaka hụhụ u-upwuriri nya Ohe Oluhye Adịda Ọngọlẹ kọọwa ayịdang a ri Adịrahụ Ọtụka ọlẹ ká ọngịrị myị́ ọngịrị wuu ji ẹpwụtụbwọ nyamwụ lẹlẹ.

⁴Ọnyẹwẹ nya Ohe Oluhye ọọwa a ji iwe-ahụrụ oluhye gidogbo gụ iwe-ahụrụ nya alegu-ẹrụ nya Ohe Oluhye wuu lẹ! Ịnyị, a tịtị du ká Ohe Oluhye ayịdang ya ẹnyị ọlẹ kọ hiigu gụ ẹnyị nya alegu-ẹrụ nyamwụ wuu ju Ọnyẹwẹ nyamwụ ọọwa ịnyịnyị lẹ.

⁵Chajị, olegu-ẹrụ nya Ohe Oluhye oyina kpangga, Ohe Oluhye a tị́ byi yẹkẹẹ, “Ahụ a ri Ọnyẹwẹ nyam lẹ, alẹ, oleeri ọlẹ, m mang lẹlẹ!” Jaabwọ ká Ohe Oluhye byi Ọnyẹwẹ nyamwụ ayịdang kpong-kpong ẹnẹhẹ lẹ? Lee, olegu-ẹrụ oyina kpangga, Ohe Oluhye a tị́ myịmyị byi yẹkẹẹ, “Am Ohe Oluhye ka ri Adang. Ahụ ayịdang tị ka ri Ọnyẹwẹ nyam!” Jaabwọ ká Ohe Oluhye byi Ọnyẹwẹ nyamwụ ọọwa ayịdang kpong-kpong ịnyịnyị?

⁶Lụka ọlẹ ká Ohe Oluhye du Ọnyẹwẹ nyamwụ warị wẹ odehe ọlẹ lẹ, ọ yẹkẹẹ, “Anụ alegu-ẹrụ nya Ohe Oluhye wuu, anụ́-ụ gbịgba ha Ọnyẹwẹ nyam mẹ.”

⁷Ẹla ọlẹ ká Ohe Oluhye ya rụ́ alegu-ẹrụ nyamwụ wuu a lẹẹ lẹ: “Ohe Oluhye ayịdang a kaa họ ká alegu-ẹrụ nyamwụ kaa la kpịra-kpịra lala igbachịwụ myị́ lẹ. Ohe Oluhye a tị kaa họ ká anchẹ ị-myị ẹrụ nyamwụ kaa la ịmịla myị́ lala ẹlẹlẹ nya ila ịnyịnyị lẹ.”

⁸Ma, ẹla ọlẹ ká Ohe Oluhye tị ya rụ́ Ọnyẹwẹ nyamwụ a lẹẹ lẹ: “Ẹchị adịrahụ nyang ka juwa pyịyọọ gbe oyi myị́ oyi, oo, Ahụ Ohe Oluhye lẹ, ọkụta nya abwẹla ọnyịịla ayịdang kpangga, a ri ọkụta nya ịpyị adịrahụ nyang lẹ.

⁹Jaabwọ ká abwẹla ọnyịịla ọhọhọ kem a ri ang ọ-háng há lụmẹ, ká ang onyobyi ọhọhọ ọnyị myị ọnyị wuu wụng ẹjẹ lẹlẹ, ịnyị a du ká Ohe Oluhye ọlẹ kọ ri Ohe Oluhye nyang tịtị ya ida nya ọkẹkẹnị okpori-kpori ọchịchị nyamwụ wụng mwụ aba ba gụ aanang ịkịla wuu ịnyịnyị lẹlẹ.”

¹⁰Ọ myịmyị ya ẹla rụ́ Ọnyẹwẹ nyamwụ ọọwa yẹkẹẹ, “Ahụ Ọngọlahị la ayịdang a ri Ọngọlẹ ká họ odehe ọlẹ bwu ọmwụ ọdada lẹ. Epwoohe bala uhye-ọgba ayịdang tị ri ụkụrwọ nya ụbwọ nyang ịnyịnyị.

¹¹Uhye-ọgba nya epwoohe bala odehe ọlẹ ịịwa ayịdang ka ta ayịreji myị́. Ma, Ahụ lẹ, a tị ka juwa pyịyọọ gbe oyi myị́ oyi. Ang ịịwa ịlẹ ká họhọ lẹ, ị ka hogo myị́ lala ịwụrụ-ịkụrụ-kụrụ nya angịnyị ehe.

¹²Ahụ ayịdang tị ka kpa ụbwọ nyang mwụ ang-abwọ ịịwa ịlẹ ká họhọ wẹ wuu aba mẹnẹ-mẹnẹ, jaabwọ kị kaa mwụ apwụ. Ị tị ka jẹ́-ẹ nyẹ ang-abwọ ịịwa ịlẹ ká họhọ myị́. Ma, Ahụ ayịdang tị ka juwa jaabwọ ká la pyịyọọ. Chajị, ẹka nya ehe oriri nyang Ahụ lẹ, ọ́ ka jẹ́-ẹ la ọbaba kpá myị́ ẹnẹnẹhẹ kaka.”

¹³Olegu-ẹrụ nya Ohe Oluhye oyina kpangga, Ohe Oluhye a tị́ byi ẹnẹnẹhẹ yẹkẹẹ, “Kẹwẹ, kaka hụhụ lẹẹ, u-upwuriri nyam gbee pwụ ụka ọlẹ kam ka họ ká ka kụrụ aluji nyang wuu chẹẹchẹẹ, ka juwa ya ẹta rịraa u-uhye.” Jaabwọ kọ byi Ọnyẹwẹ nyamwụ ọọwa kpong-kpong?

¹⁴Lee, ánụ tị́ jẹ́ yẹkẹẹ, Ohe Oluhye ayịdang họ alegu-ẹrụ nyamwụ ịwẹ wuu, chajị kị ka ri alegu ị-myị ẹrụ nyamwụ, ịlẹ ká Ohe Oluhye kaa du ẹrụ warị kaka myị ẹrụ hahị ahị angịnyị nya Ohe Oluhye ịlẹ kị juwa ka ye ugu nya ọchịda nya Ohe Oluhye ka?