Read idege ALA IHIBURU 10 Bible Online

ALA IHIBURU 10 - idege bible

ALA IHIBURU 10

¹Ehile nya iMosisi ri ụrụrụ nya ang ịnyịịla ịlẹ kị juwa ka warị ị-ịlahị kem lẹ, ịịwa á tọchị ri ọ-họ jịra nya ang ịnyịịla ịịwa ayịdang kpangga ka. Lẹ, ịwọ nya iyo ịlẹ wuu ká angịnyị ehe juwa kpa kaka kịla iya ha Ohe Oluhye ẹka myị́ ẹka wuu lẹ, ọọwa á ka jẹ́-ẹ họ kịịwa angịlẹ kị ka ẹga nya Ohe Oluhye ka jẹ́-ẹ la abwẹla ọnyịịla nya Ohe Oluhye bwula iya ọkịlaakịla nyaa ọọwa myị́ kpong-kpong ka.

²Anụ ya kọ ri ká iya ọkịlaakịla bwula ịwọ nya iyo ịịwa á jẹ́ yịlẹ ibyi nya ịhọbịrị ịhọhọ nya angịlẹ kị juwa gbịgba ha Ohe Oluhye lụka ọọwa myị́ lẹ, ịnọ, kị ka myịmyị-ị̀ juwa ma họ ịnyịnyịịnyị tụtụm wẹẹ? Ó ri kọ lịnyị lẹ, ịnọ, ị́ tị tị ka la eje owuwu nya ọhọbịrị ọhọhọ myịmyị ẹ-ẹpwụ nya ọhịhị nyaa pyịyọọ jaabwọ kọ la ụka ọọwa ẹ-ẹga nyaa tụtụm kaka.

³Ma, bwula iya ọkịlaakịla nyaa ọọwa ọlẹ kị kaa họ ẹka ju ka ẹka lẹ, ọ ri ang o-juwa kpaa, ịtịya nya eje owuwu nya ịhọbịrị ịhọhọ nyaa ịnyịnyịịnyị pyịyọọ.

⁴Ang odudu nya ọọwa ri yẹkẹẹ, ó ri ang ọ-ka jẹ́-ẹ chịkpẹẹ, ká ịwọ nya ịna bala ịnya ịmwụ ka jẹ́-ẹ yịlẹ ibyi nya ịhọbịrị nya angịnyị ehe myị́ kpong-kpong kaka.

⁵O-oluhye nya ẹla ọọwa, a du ká ụka ọlẹ ká ịKịrayịsị warị wẹ odehe ọlẹ lẹ, kọ yẹkẹẹ, “Iya ọkịlaakịla bala ọhaha ịlẹ wuu ká angịnyị ehe kaa kpa warị wẹ ẹga nyang Ahụ Ohe Oluhye, á ri ang ọlẹ ká juwa tịtọ ka. Ma, Ahụ Ohe Oluhye hu ugbinyịrọ ọlẹ ká nwụlanọ jum lẹ.

⁶Iya ọkịlaakịla ọ-rụ ila okpobyi bala iya ọkịlaakịla nya ọhọbịrị ọlẹ ká angịnyị ehe kaa kpa wang Ahụ Ohe Oluhye wuu lẹ, ị́ ri ang ọ-kpụng ịpyọ ka.

⁷Ọọwa lẹ, m ya dodehe yẹkẹẹ, ‘Oo, Ahụ Ohe Oluhye yẹm lẹẹ mẹ. M warị wẹ odehe ọlẹ kam ka họ irya nyang kem jịra, jaabwọ kị da kpehe ẹ-ẹpwụ nya ẹkpa nya ụpwụ nya ehile nyang ene-ene chajị nyam lẹ.’ ”

⁸Ẹla ọlẹ kọ ya dodehe wẹ, u-uhye-ọgba ẹ-ẹgẹwẹ yẹkẹẹ, “Ahụ Ohe Oluhye lẹ, iya ọkịlaakịla wuu lee ọhaha ọ-kpa warị wẹ ata nyang lee iya ọkịlaakịla ọ-rụ ila ọ kpobyi lee iya ọkịlaakịla nya ọ-tụ ibyi nya ịhọbịrị ịhọhọ wuu ịlẹ ká angịnyị ehe kaa kpa wang lẹ, Á tịtọ nyaa ka. Ị́ tị kpụng ịpyọ la oyeye kpong-kpong ka ịnyịnyị.” Ịnọ, ọ ri nya ịlẹhị, alụka ọọwa gbịgba ha Ohe Oluhye jaabwọ ká ehile nya iMosisi chabwọ ya jaa, ene ká ịKịrayịsị ya ịnyị rụ́ ịgba ọgbagba ha Ohe Oluhye nyaa ọọwa.

⁹Ọ myịmyị ya dodehe yẹkẹẹ, “Yẹm lẹẹ mẹ! M warị wẹ odehe ọlẹ kam ka họ irya nyang Ahụ Ohe Oluhye lẹ.” Oyaya nyamwụ ọọwa mẹjẹ yẹkẹẹ, ọwa ayịdang warị kaka tụ ọhọhọ nya ehile onyogo biri, chajị kọ ka kpa iro ọnwanwa onyeewe kaka nyẹ ọọwa ugọyị lẹ.

¹⁰Ịnyị, bwula ọnụ ọmyịmyị nya iro ọnwanwa ọọwa lẹ, ahị angịnyị nya Ohe Oluhye a la cheri-cheri lẹẹ myị́ ị-ịlahị nya Ohe Oluhye bwula ọhaha nya iya ọkịlaakịla nya iJisọsị ịKịrayịsị ọngọlẹ kọ gbu lụka ookpokpo ọ-nwa ụga gbe oyi myị́ oyi wọnụ nyahị ahị aluche wuu juwa pyịyọọ lẹlẹ.

¹¹Lụka nya angịkiliya nya Ohe Oluhye inyogo lẹ, ọng myị́ ọng lẹpwarịrị nyaa kaa kele kaka godayị rịrị kọkọ ẹnụ myị́ ẹnụ wuu lụka ọlẹ kị juwa myị ẹrụ nya iya ọkịlaakịla ẹchẹ ookpokpo, ookpokpo ịnyịnyịịnyị ọlẹ ká iya ọkịlaakịla nyaa ọọwa á tị kaa la ọngịrị yịlẹ ibyi nya ịhọbịrị ịhọhọ nya angịnyị ehe hyaa myị́ kpong-kpong ka.

¹²Ma, ụka ọlẹ ká ịKịrayịsị tị warị kaka kpa ịwọ nya ịlọmwụ kaka kịla iya ọpyịyọọ lụka ookpokpo gbe oyi myị́ oyi wọnụ nya ịhọbịrị nyahị ahị angịnyị ehe wuu ju kpá lẹ, ọwa ayịdang rụ kele kaka hụhụ u-upwuriri nya Ohe Oluhye Adịda.

¹³Ụ-ụwa, ịKịrayịsị ayịdang a ka hụ, juwa kụ ọlọyị gbe, ụka ọlẹ ká Ohe Oluhye ka họ ká ịKịrayịsị ka kụrụ aluji nyamwụ chẹẹchẹẹ, ka juwa ya ẹta rịraa ẹ-egbeju lẹlẹ.

¹⁴Chajị, iya ọkịlaakịla ọlụka ookpokpo nya ịKịrayịsị ọọwa, ịKịrayịsị a kpa ra ihi nya ọkpẹẹkpẹẹ ọlala ị-ịlahị nya Ohe Oluhye neeji pyịyọọ gbe angịlẹ wuu kọ kpa ịwọ nya ịlọmwụ hụ́ ịhọbịrị nyaa wuu cheri-cheri hyaa lẹ.

¹⁵Olegu Ịgọgọ la ịlọmwụ ri ibeenu ya jehi ịnyịnyị. Chajị, ọ ya dodehe họhẹ họhẹ yẹkẹẹ,

¹⁶“Am juwa ka nwa iro onyeewe ha alụka nya ẹnụtụrụ ohyẹẹkpẹ nya odehe ọlẹ. Ịnyị, Ọngọlahị Ohe Oluhye a ya lẹ. Ụka ọọwa, Am Ohe Oluhye ka hu egbe nya ehile nyam kpa kaka nube ẹ-ẹpwụ nya ọkịlẹtụ nya angịnyị nyam ịlụka ọọwa. M ka da ịnaaba nya ehile ịịwa ba ẹ-ẹpwụ nya akpa nya irya omeme ọlẹpwụ nyaa lụka ọọwa ịnyịnyị.”

¹⁷Olegu Ịgọgọ myịmyị ya da ọọwa uhye yẹkẹẹ, “Ụka ọọwa lẹ, Am Ohe Oluhye á ka tụtụm ka kpịtịya nya ịhọbịrị nyaa wuu bala ang inyibyi nya ehile ọbịrịị-bịrị ịlẹ ká angịnyị nyam ịịwa họhọ wuu lụka ọọwa kpong-kpong kaka ịnyịnyị.”

¹⁸Jaabwọ ká Ohe Oluhye ayịdang hịnyọhi ọhọbịrị nya angịnyị ehe wuu bwula ịKịrayịsị ịịwẹ lẹlẹ, ọ́ tụtụm myịmyị baba kị ka juwa kịla iya ọkịla ọhẹ-lọhẹ wọnụ nya ọhịnyọhi ọhọbịrị ju ha Ohe Oluhye dala iya ọkịlaakịla nya ịKịrayịsị ọọwa kaka.

¹⁹Chajị nya ọọwa lẹ, anụ anyadam ẹ-ẹpwụ nya ịKịrayịsị, lẹẹlẹẹ, ahị la ọnụ o-ya ẹla pwọọ nyọka kpa jụ pyịị kele ka Ẹga Ịgọgọ Ọtụka Ọgụgụ nya Ohe Oluhye bwula ịwọ nya iJisọsị ọlẹ kọ ya yẹ hụrụ wọnụ nyahị ju lẹ.

²⁰Ụgbẹyị onyeewe nya ọhịhị nya Ohe Oluhye ọlala ọlẹ ká ịKịrayịsị wụrụ da dodo hahị bwula ọlẹ kọ gu apwụ okeke olube ịgọgọ nya Ohe Oluhye ene, bwula igu nya ugbinyịrọ nyamwụ ọlẹ kọ gbu wọnụ nyahị ju, a ri ụgbẹyị ọọwa ọlẹ kahị ka bwu pwụ ijata ịgọgọ nya Ohe Oluhye myị́ lẹlẹ.

²¹Lẹ, jaabwọ kahị la ịKịrayịsị ọngọ ri olegbeju ọtụka ọkpẹhị rịrị alegbeju ikịla iya nya Ohe Oluhye ịlọdọdẹpwa nyamwụ wuu lẹlẹ,

²²anụ kẹwẹ kahị kpa ịlọhị kele ka ijata nya Ohe Oluhye ẹ-ẹpwụ nya ẹla nya ịlẹhị nyahị wuu bala ọ-jẹ́ myịmyị nya ọmyịmyị ọlala nyahị wuu, la irya ọgbagbịla bwula ọlẹ ká ịKịrayịsị kpa ịwọ nya ịlọmwụ hụ́ irya ọ-la ọngịnyị eje ọlẹpwụ ọkịlẹtụ nyahị wuu cheri-cheri bwu ẹpwụ nya ang inyibyi ịhọhọ wuu bala ọlẹ kọ kpa enyi ịgọgọ nyamwụ hụ́ ugbinyịrọ nyahị wuu cheri-cheri ịnyịnyị lẹlẹ mẹ.

²³Lẹ, anụ cheri kahị juwa yụbwọ chị ọ-jẹ́ myịmyị nya o-ya dodehe nya ọmyịmyị ọlala nya ẹhị ọrịrịị-rịrị ọnyịịla nyahị ọlẹ kpa ụ-ụwa gogo, la ọ-pyị giri-giri ọhẹ-lọhẹ kpong-kpong kaka mẹ. Chajị, ahị jẹ́ yẹkẹẹ, Ohe Oluhye Ọngọlẹ kọ myị ọnụ nya ahị ọwawa nyamwụ hahị lẹ, Ọ ri Ọngọ chịla o-hu ọkịlẹtụ ha lụmẹ kaka kpoye.

²⁴Chajị nya ọọwa lẹ, anụ cheri ká irya omeme nyahị oluhye nya angịnyị aanahị ịkịla a ri ịnya ang ọnyịịla kem, kahị juwa du awụlẹ ju ọháha ọlala bala ụkụrwọ ọnyịịla ọhọhọ la ẹnyị nya Ohe Oluhye kem mẹ.

²⁵Anụ juwa yẹhị da ọjịra-jịra ọlala lawụlẹ nyanụ anụ angịnyị nya Ohe Oluhye bwee kpong-kpong ka, jaabwọ ká angịhyẹ ịlẹpwụ nyanụ kaa họ kokoo. Ma, ọkọkọ nya ọọwa lẹ, anụ́-ụ tụtụ juwa ju awụlẹ ọhụ kịlahị-ịlahị ịnyịnyịịnyị, chajị nyọlẹ kaanụ ayịdang wẹẹ yẹ, jaabwọ ká ẹnụtụrụ nya ọwẹwẹ nya Ọngọlahị la juwa ju chwẹẹ lụmẹ lẹ mẹ!

²⁶Chajị, ó ri kaahị angịlẹ kahị jẹ́ ang ọlẹ ká etu nya ẹla nya ịlẹhị nya ọchịda nya Ohe Oluhye ọlẹ ri kpá wuu, á mwọọgịlẹ tọchị-tọchị wuleji kele kaka họ ang onyobyi myịmyị lẹ aalẹ, iya ọkịlaakịla onyeewe ọkịla ọhẹ á ji ọlẹ kọ ka jẹ́-ẹ yịlẹ ibyi nya ịhọbịrị nyahị ọọwa hiihi myị́ ị-ịlahị nya Ohe Oluhye ugbẹnyị kaka.

²⁷Ma, ọkọkọ nya ọọwa lẹ, ang ọlẹ kọ ka hi hahị ụbwọọmwụ ụka ọlịnyị a ri iwe-ahụrụ oluhi-uhi ọtụka nya eje owuwu o-pyii nya Ohe Oluhye u-uhye nya ịhọbịrị nyahị ịịwa lụka ọlẹ ká ila nya agbama nyamwụ ka juwa wuru jahị da aluji nya Ohe Oluhye, chajị nya egbeju ọnyọọngịrị nyaa ọlẹ kị la tụ Ohe Oluhye pyịpyị lẹlẹ.

²⁸Lụka onyogo lẹ, ọng myị́ ọng ọlẹ ká eje nya ehile nya iMosisi ọbịrịị-bịrị á wu bwula ibeenu oriri nya angịnyị angị imiiye lee angị ịta ịlẹ kị ya ọngọọwa nyị họ ẹla ọọwa ịnyịlẹhị lẹ aalẹ, igu ogbugbu a kaa ri akama nya ọngọ ọlịnyị pyii lẹlẹ. Chajị, ahyẹẹrwẹrwa ọ-yẹ awụlẹ yẹ á juwa ẹ-ẹpwụ nya ọọwa kpong-kpong kaka.

²⁹Ee lẹ, jaabwọ ká akama nya angị la egbeju-ọngịrị ịlụka onyogo lụmẹ ịịwẹ lẹlẹ, ụma nya akama ọtụka ọlanyị, anụ tị́ me irya ká Ohe Oluhye tị tị ka hu hahị ahị alụka ọlẹ u-uhye nya egbeju ọnyọọngịrị nyahị? Angịlẹ wuu kị wẹẹ pwa Ọnyẹwẹ nya Ohe Oluhye ji ẹkpẹ dọọ, juwa hu ẹpẹpẹ ju ọngịrị ọlẹpwụ nya ịwọ nya iJisọsị ọlẹ kọ ya yẹ hụrụ lụka nya iro ọnwanwa onyeewe ọlẹ, chajị ká Ohe Oluhye ka bwula ọọwa hụ́ụhị cheri-cheri bwu ẹpwụ nya ịhọbịrị ịhọhọ nyahị wuu bala o-juwa chị oyoyi ju Olegu Ịgọgọ nya ọnahị nya Ohe Oluhye ọlẹ wuu wẹẹ, akama ọtụka onyobyi, ị ka yẹ kwiwa nya ọọwa pyii ịnyịnyị lẹlẹ.

³⁰Chajị, ahị ayịdang jẹ́ ụma nya Ọngọlẹ kọ ya ẹla ọlẹ dodehe yẹkẹẹ, “Anụ wo mẹ! Am Ohe Oluhye kpakpakpa, ọ-họ kwiwa a ji ẹpwụtụbwọ nyam lẹlẹ. Am a ka họ angịnyị ehe kwiwa nya ang inyibyi ịhọhọ nyaa wuu lẹlẹ.” Ịnyị, Ọngọlahị Ohe Oluhye a ya lẹ. Ọ myịmyị ya ẹ-ẹga ọkịla yẹkẹẹ, “Ọngọlahị Ohe Oluhye ka la angịnyị nyamwụ eje la ịlọmwụ.”

³¹Chajị nya ọọwa lẹ, anụ jẹ́ mẹ! Ọ ri ang oluhi-uhi ọtụka nya ọngịnyị ehe ọ-ka chabwọ kpụ ẹpwụ nya ụbwọ ọnyọọngịrị nya eje owuwu nya Ohe Oluhye ọlẹ kọ juwa hịhị!

³²Anụ dọmwụ kpịtịya nya ụka nya ọgbanyẹ-ọgbanyẹ ọlẹ kanụ ye ahịgboo nya ẹla ọchịda nya Ohe Oluhye ọlẹ kpá bwaaa kaanụ ayịdang kpa ugbodu ojuju onyudiyo ma uya ju ugbodu okpukpuru nyanụ lụka ọlẹ ká iru nya ị-tụ pyịpyị warị kaka danụ uya wẹẹ!

³³Chajị, ụka ọọwa lẹ, ụka ọhẹ juwa ọlẹ kị kaa juwa chị oyoyi junu ị-ịlahị nya aluche bwula ido o-doonu lee akama ọ-yẹnụ yẹ la datị-datị. Ụka ọkịla tị juwa ọlẹ kaanụ ayịdang kaa nwụlanọ nyọka kele kaka ji ẹpwụ nya ogu nya angịlẹ kị juwa kpaa họ ọlịnyịnyị, chajị nya ẹla nya Ohe Oluhye kpịlọ.

³⁴Chajị, ụka ọọwa lẹ, anụ juwa yẹ akama ta angịlẹ kị ri alagba chajị nya ẹrụ ọnyịịla ọlẹ ịnyịnyị. Ụka ọlẹ kị go ang-abwọ ịlẹ kanụ la kpa rụ la agbụrụ o-oluhye nya ọmyịmyị ọlala nyanụ lẹ, ó rinu ẹlẹlẹhẹ ka, anụ juwa chị ọkẹkẹnị. Chajị anụ jẹ́ yẹkẹẹ, ịwa nyị la ụdụ ọhẹ ọlẹ kịị nyị hiigu bala ọ-ka juwa pyịyọọ gụ ụdụ ilodehe ọlẹ.

³⁵Chajị nya ọọwa lẹ, ẹhị ọ-da hile ọtụka ọlẹ kanụ la ẹ-ẹga nya Ohe Oluhye lẹ, ánụ tụụbwọ hyoo deeji kpong-kpong kaka. Chajị, uri oyeye ọtụka nyamwụ juwa godayị gbenu ị-ịlahị.

³⁶Chajị, ụma nya ugbodu ojuju onyudiyo ọlịnyị a baba hanụ kanụ ka la, chajị, ụka kanụ họ irya nya Ohe Oluhye kpẹẹkpẹẹ jịra kpá wuu lẹ, kanụ ka jẹ́-ẹ ye ọ-họ jịra nya ọnụ ọmyịmyị ọlẹ ká Ohe Oluhye myị ha angịnyị nyamwụ wuu lẹlẹ.

³⁷Chajị, ị da kpehe ụ-Ụpwụ Ịgọgọ ẹ-ẹgẹlẹ yẹkẹẹ, “Ụka o-kpii ọlẹ ká Ohe Oluhye hunọ-ọ wẹ lẹ, ahyaahị ụka ká ụka ọọwa á pwụ bwaaa lẹ, aalẹ, Ọngọlahị ọlẹ kọ juwa ka warị, a ka pwụ eji ahyaahị la ọbịrị ụka kaka lẹlẹ.

³⁸Ma, angịlẹ kị ri alabwẹla ọnyịịla nyam Am Ohe Oluhye, ka kpa ọhịhị nyaa ọọwa ụ-ụwa gogo bwula ọmyịmyị ọlala. Ma, ọ́ tị ri ká ọngọngọhẹ lẹpwụ nyaa, á tị tịrẹkpẹ kẹkpẹ ẹ-ẹpwụ nya ọmyịmyị ọlala nyamwụ, aalẹ, ugbodu okpukpuru nyam Am Ohe Oluhye, á ka chị ọkẹkẹnị ju ọngọọwa kpong-kpong kaka.”

³⁹Ma, ahị angịnyị nya Ohe Oluhye ịlẹ kahị myị lọọ nya ịlẹhị-ịlẹhị tị lẹ, ahị́ ri ụma nya angịlẹ kị kaa tịrẹkpẹ kẹkpẹ ẹ-ẹpwụ nya ọmyịmyị ọlala nyahị, du ká ayịreji ọtata ka ri nyahị ka. Ma, ahị ri angịlẹ kahị kaa kpa ọmyịmyị ọlala nyahị pwụ ọbaba, chajị ká ugbodu okpukpuru nyahị ahị ka wu ọchịda nya Ohe Oluhye ọyị lụka ohyẹẹkpẹ myị́.