Read idege ALA IHIBURU 11 Bible Online

ALA IHIBURU 11 - idege bible

ALA IHIBURU 11

¹Etu nya ọmyịmyị ọlala ri ọ-jẹ́ myịmyị ọlala yẹkẹẹ, ang ịlẹ wuu kahị juwa ya ẹhị rịrị gbe lẹ, ị juwa hahị ịnyịlẹhị lẹ. Ọmyịmyị ọlala ri ọ-jẹ́ myịmyị ọkpangga yẹkẹẹ, ang ịlẹ ká ẹhị nyahị á yẹyẹ lẹka wẹ lẹ, ị juwa hahị ịnyịlẹhị jaabwọ ká ọnụ ọmyịmyị o-oluhye nyaa ya lẹ.

²Ụma nya ọmyịmyị ọlala ọlịịwẹ kpangga, angị ịgọgọ inyogo nya Ohe Oluhye a la ẹ-ẹga nyamwụ, du ká Ohe Oluhye tịtị ya ọ-họ hiigu nya angịịwa dodehe la ịlọmwụ lẹ.

³Ụma nya ọmyịmyị ọlala ọlịịwẹ kpangga, a du kahị jẹ́ ịnyịnyị yẹkẹẹ, ẹla ọlọnụ oyaya dodehe kem, Ohe Oluhye a kpa họ ká odehe ọlẹ ji lụka nya ọgbanyẹ-ọgbanyẹ lẹ. Ọọwa ri yẹkẹẹ, ang ịlẹ wuu ká ẹhị nyahị wẹẹ yẹyẹ lẹ, a-ang ịlẹ ká ẹhị kaa yẹyẹ ene-ene, Ohe Oluhye a kpa haa kpong-kpong ka.

⁴Ọmyịmyị ọlala ọlịnyị nya Ebẹlụ a la, du kọ hu ang ohiigu há kpa kaka kịla iya ha Ohe Oluhye gụ iya ọkịlaakịla nya iKeen lẹ. Bwula iya ọkịlaakịla nya Ebẹlụ ọọwa, a du ká Ohe Oluhye kpa wọọ nya ọlabwẹla ọnyịịla lẹ. Ohe Oluhye ri ibeenu nya Ebẹlụ u-uhye nya ọọwa bwula ọlẹ ká Ohe Oluhye ye ọhaha nya iya ọkịlaakịla nyamwụ. Bwula ọmyịmyị ọlala nya Ebẹlụ a du ká abwẹla ọnyịịla nyamwụ jam yoo dodehe pyịyọọ daalẹ lẹ, ọ ri nya ịlẹhị, ịnọ, ọwa ayịdang gbugbu kpá ene-ene lẹ.

⁵Bwula ọmyịmyị ọlala nya Ịnọkụ, a du ká Ịnọkụ á kpa igu ogbugbu ka ọnụ nyamwụ ene kọọ rụ hi odehe ọlẹ ka epwoohe ka lẹ. Chajị bwula ọlẹ ká Ohe Oluhye kpọọ rụ kele ka epwoohe lahị-lahị lẹlẹ, ọngọngọhẹ á yẹ Ịnọkụ odehe ọlẹ kaka. Ene ká Ohe Oluhye tị ka kpa Ịnọkụ rụ lahị-lahị ịnyị lẹ, Ụpwụ Ịgọgọ họ kahị jẹ́ yẹkẹẹ, Ịnọkụ nyị juwa họ ẹla ọ-kpụ Ohe Oluhye ayịdang ịpyọ lụmẹ lụka nya ọhịhị nyamwụ nyaa du lẹ.

⁶Ma, ọ tị ka ri ang olujwo lụmẹ kaka kpoye ha ọngịnyị ehe nyọka jẹ́-ẹ họ ẹla ọ-kpụ Ohe Oluhye ịpyọ myị́, kẹnẹ-kẹnẹ, ó ri ká ọngọọwa á la ọmyịmyị ẹ-ẹga nya Ohe Oluhye ene lẹ mẹ ịnyị. Chajị, ọng myị́ ọng ọlẹ kọ tịtọ nyọka tụ ju Ohe Oluhye chwẹẹ nya ịlẹhị-ịlẹhị lẹ, ọngọọwa ka myị pyii yẹkẹẹ, Ohe Oluhye ayịdang nyị juwa ịnyịlẹhị bala ọ-jẹ́ myịmyị yẹkẹẹ, angịlẹ wuu kị juwa kpa ọkịlẹtụ nyaa lẹpwụ-lẹpwụ tịtọ nya Ohe Oluhye, Ohe Oluhye a kaa wahị kụrụ kwiwa nya ọọwa ịnyịnyị lẹ.

⁷Bwula ọmyịmyị ọlala nya iNuwa, a du ká ụka ọlẹ ká Ohe Oluhye gbiloo ụbwọ ụ-ụrụ chajị nya ang ịlịlahị ịlẹ kị juwa ka họ lụka ọlẹ ká ẹhị nyamwụ á tị yaa yẹ lẹka lẹ, ká iNuwa ke ụrụ la ọna ọdada nya Ohe Oluhye ọọwa lẹ, kọ kọ ụgbọ nya enyi lẹlẹ. Ịnyị, iNuwa bala alọdọdẹpwa nyamwụ a be bwula ọọwa lẹlẹ. Bwula ọhọhọ nya iNuwa ọọwa lẹ, iNuwa a chị eje owuwu nya alodehe ihihi ịkịla wuu ehe lẹlẹ. Ịnyị, iNuwa ayịdang a ri ugu nya abwẹla ọnyịịla ọhọhọ nya Ohe Oluhye ọlẹ ká ọmyịmyị ọlala kem, ị jẹ́-ẹ kpa wu ọọwa ọyị lẹlẹ.

⁸Bwula ọmyịmyị ọlala nya Ebiraham, a du kọọwa ayịdang ju ihi nya omyi nya Ohe Oluhye lụka ọlẹ ká Ohe Oluhye be ẹkọ wụrwọọ, rụ hi ẹpwa nya adamwụ yẹkẹẹ, nyị rụ ka ẹga ọkịla kaka ye ọ-họ jịra nya ugu nya ahị ọwawa nya Ohe Oluhye lẹ. Ọọwa lẹ, Ebiraham a rụ kele ịnyịlẹhị, la ọ-jẹ́ ẹga ọlẹ kọ juwa jẹ ka datị kaka lẹlẹ.

⁹Bwula ọmyịmyị ọlala nya Ebiraham, a du kọọwa ayịdang kụ ọpyị ọlẹ ká Ohe Oluhye myị ọnụ họọ lala ọngga ẹ-ẹpwụ nya ube nya ọdụ kem lẹ. Ịnyịnyị, Ayịsiki ọnyị nyamwụ a tịtị kụ ube nya ọdụ ọ-ọpyị ọọwa lala ọngga hi tọ iJekọbụ jaabwọ kịịwa anyị a ri angị ka ri ugu nya ọpyị ọọwa ta Ebiraham lẹlẹ.

¹⁰Chajị, Ebiraham ayịdang juwa la ẹhị ọrịrịị-rịrị gbe epweji ọlẹ ká itiwe nyamwụ ka godayị rịrị pyịyọọ gbe oyi myị́ oyi. Chajị, Ohe Oluhye la ịlọmwụ a ri Ọngọ kpa ụbwọ nyamwụ me epweji ọọwa bala ọ-nwọ́ọ nwụ́ la ịlọmwụ lẹ.

¹¹Ọmyịmyị ọlala a du kọ chịkpẹẹ ha iSera ayịdang nya ọjẹnyị jẹ lụka ọlẹ ká iSera chị okwirichi kpoye nya ọnyị ọmama myị́ lẹlẹ. Chajị, iSera la ịlọmwụ myị jẹ́ yẹkẹẹ, Ohe Oluhye Ọngọlẹ kịị nyị myị ọnụ nya ọnyị ọmama ha ọwa lẹ, nyị chịla o-hu ọkịlẹtụ ha lụmẹ kaka kpoye. Ịnyị a du kọ la ọmyịmyị lẹ.

¹²Ịnọ, ọ ri nya ịlẹhị, okwirichi ọchịchị nwụ ugbinyịrọ nya Ebiraham kpoye nya ọnyị ọ-ka mama myị́, jaabwọ ká ẹhị nya ọngịnyị ehe yẹ kaka ba lẹ. Ma, ọwa ayịdang kpangga, Ohe Oluhye a tị mwọọgịlẹ họ kọ ri adịda ọ-ma ọnyị myị́ du ká anyị ịtụma nyamwụ ju iru lụmẹ kpanggbaa lala ịdịchụ iluhye-ọgba nya epwoohe bala, ọ-lụmẹ ẹ-ẹpwụ nya iru ojuju lala ugburuja ọlọnụụka nya ihu ọtụka-ọtụka ịnyịnyị lẹlẹ.

¹³Iru nya angịwẹ wuu gbu ẹ-ẹpwụ nya ọmyịmyị ọlala nyaa lụka ọlẹ kị ye ọ-họ jịra nya ọnụ ọmyịmyị ịịwa ene ka. Ma, ịwa ayịdang tị juwa kpa ugbẹhị nya ọmyịmyị ọlala ọlẹpwụ nyaa yẹ ọ-họ jịra nya ọnụ ọmyịmyị ọlẹ kọ jiji lụrụ ị-ịlahị wẹẹ. Ịnyị, bwula ọhọhọ nyaa ọọwa, ị mẹjẹ gede-gede yẹkẹẹ, angga bala angị kuku rụ hi ẹpwa kem, ịwa nyaa ri odehe ọlẹ lẹ.

¹⁴Chajị, angịlẹ kị ya ụma nya ẹla ọlịịwẹ dodehe họ kọ la gbadaa yẹkẹẹ, ịwa ayịdang lẹ, ị juwa tịtọ nya ọpyị ọlẹ kọ ri ẹpwa nya adaa gụ odehe ọlẹ.

¹⁵Ịnọ, ó ri kịịwa ayịdang á la ẹhị ọ-chị pyẹẹ u-uhye nya epweji ọlẹ kị gba kpehe hi ẹpwụ nya odehe ọlẹ, ịnọ, ọ ka ri ang ọchịkpẹẹ haa nyọka tịrẹkpẹ rụ kele ka epweji ọọwa myị́.

¹⁶Ma, ọkọkọ nya ọọwa lẹ, ịwa ayịdang juwa wu iwoo nya ọpyị ọlẹ kọ hiigu gụ odehe ọlẹ lẹ. Epwoohe kpangga a ri ọpyị ọọwa ọlẹ kị juwa tịtọ lẹ. Chajị nya ọọwa, a tịtị du kọ la Ohe Oluhye oyoyi nyọka juwa wụrụ ịlọmwụ yẹkẹẹ, ọwa nyị ri Ohe Oluhye nyaa lẹ, kpong-kpong kaka lẹlẹ. Chajị, Ohe Oluhye la ịlọmwụ nwụla epweji olepwoohe ọọwa nọ gbaa kpá ene-ene lẹ.

¹⁷Bwula ọmyịmyị ọlala nya Ebiraham, a du kọọwa ayịdang byẹjẹ hu Ayịsiki ọnyị nyamwụ kpa kele nyọka ya kịla iya ha Ohe Oluhye lụka ọlẹ ká Ohe Oluhye mọọ yẹ u-uhye nya ọọwa lẹ. Ịnyị, lụka ọlẹ ká Ebiraham ye ọ-họ jịra nya ọnụ ọmyịmyị nya ọnyị ọmama kpá lẹ, ká ọnyị olookpokpo nyamwụ ọọwa, á kọọ ẹhị la o-hu ha Ohe Oluhye kpong-kpong kaka lẹlẹ.

¹⁸Ịnọ, Ohe Oluhye tị byi Ebiraham yẹkẹẹ, “Bwu ẹga nya Ayịsiki ọnyị nyang, anyị ịtụma nyang ịlẹ kị ka wo ẹnyị-ehe nyang ahụ Ebiraham wuu, a ka bwu kpehe pyii lẹlẹ.”

¹⁹Ebiraham wọnụ ju yẹkẹẹ, Ohe Oluhye ayịdang nyị la ọngịrị ka wule Ayịsiki ọnyị nya ọọwa ọọwa eji bwula igu myị́. Ịnyịlẹhị tị ịnyị, ụgbẹyị ọlẹ ká Ohe Oluhye bwu kpa tịrị ọhịhị nya Ayịsiki ẹkpẹ ha Ebiraham lẹ, ọ lala eji owule Ayịsiki wule bwula igu ịnyịlẹhị.

²⁰Bwula ọmyịmyị ọlala, a du ká Ayịsiki kpa ọnụ ọmyịmyị nya ahị ọwawa ọlịlahị họ ọpyẹẹ kụrụ iJekọbụ bala Ịsọ anyị nyamwụ ugbeene ịnyị lẹ.

²¹Bwula ọmyịmyị ọlala nya iJekọbụ, a du ká ụka ọlẹ kọọwa ayịdang juwa ka gbu lẹ, kọ wahị kụrụ anyị alẹng imiiye nya iJosẹfụ bala o-juwa gbịgba ha Ohe Oluhye ụka ọlẹ ká iJekọbụ juwa kpụ nịrọ ọkụta ocheji nyamwụ ịnyịnyị ene kọọ gbu lẹ.

²²Bwula ọmyịmyị ọlala nya iJosẹfụ, a du ká ụka ọlẹ kọọwa ayịdang juwa ka gbu lẹ, kọ ya ẹla rụ́ ọrụrụ tịrẹkpẹ bwu ọpyị nya Ijipiti kele ka iKenan nya anyị nya ala Isirẹlụ wuu bala ọ-daa ehile jaabwọ kị ka bwu kpa ekpinegu nyamwụ rụ ba ịlaa kele ka ọpyị nya iKenan ụka ọọwa pyii ịnyịnyị lẹlẹ.

²³Bwula ọmyịmyị ọlala, a du ká ụka ọlẹ kị ma iMosisi bwaaa, ká adamwụ bala ịnamwụ hwoo kpịbaa lala ịya ịta gbẹgbịlẹgbẹ lẹ. Chajị, iMosisi ri ọnyị ọlẹ kọ há ụhị lụmẹ. Adamwụ anyị á tị juhi nya ehile ọlẹ ká iFero Adịrahụ da chajị nya ọ-nwụ anyị alẹng ịlụka ọọwa nwụ kpong-kpong ka.

²⁴Bwula ọmyịmyị ọlala nya iMosisi, a du ká ụka ọlẹ kọọwa ayịdang nwa ọngịnyị lẹ, kọ pwa ọ-ka ri ọnyị ọlata nya ọnyị ọnyang nya iFero Adịrahụ lẹ.

²⁵Chajị, iMosisi ayịdang tọchị-tọchị chụ akama ọ-ka yẹyẹ ta angịnyị nya Ohe Oluhye gụ, ọ-ka juwa la ọhịhị nya ịpyọ ọkpụkpụ ọlụka o-kpii nya ọhọbịrị ọhọhọ lẹ.

²⁶Chajị, ọwa ayịdang jẹ́ myịmyị yẹkẹẹ, akama ọ-ka juwa yẹyẹ ta ịKịrayịsị nyị ri ang o-ju apyobwuna ha ọwa mwụ aba ba gụ ụdụ ịlẹ kị juwa ọ-ọpyị nya Ijipiti. Chajị, iMosisi juwa la ẹhị ọrịrịị-rịrị gbe ahị ọwawa ọlẹ ká Ohe Oluhye ka wa kụrwọọ kwiwa nya ọmyịmyị ọlala nyamwụ ọọwa ị-ịlahị.

²⁷Bwula ọmyịmyị ọlala nya iMosisi, a du kọọwa ayịdang rụnyẹ rụ bwu ọpyị nya Ijipiti lẹ. Chajị, iMosisi á juhi nya agbama ọlẹ ká iFero Adịrahụ juwa ju jahị dọọ kpong-kpong ka. Ma, ọkọkọ nya ọọwa lẹ, iMosisi la ẹjẹ ọbyịbyị ọnyọọngịrị lala ọngọlẹ kọ juwa kpẹhị nya olegu nyamwụ yẹ Ohe Oluhye ọlẹ kị jẹ́-ẹ yẹ lẹhị ọlam-ọlam ọlẹ kaka.

²⁸Bwula ọmyịmyị ọlala nya iMosisi, a du kọọwa ayịdang kpa da ala Isirẹlụ wuu ehile ya, nyị nwụ ọkpịlọ kịị nyị ya ịwọ nyamwụ tudu ọnụ nya ukpileku nya ebe nyaa wuu, chajị ká olegu-ẹrụ ọ-nwụ anyị alẹng ịgbahị ịlọdọdẹpwa ọnyị myị ọnyị wuu ka jẹ́-ẹ chị anyị nya ala Isirẹlụ wuu da kaka nwụ ịnya ala Ijipiti lodu ọọwa lẹlẹ.

²⁹Bwula ọmyịmyị ọlala, a du ká ala Isirẹlụ wuu jẹ́ jẹdịyẹ ọ-ọpyị ọchọrụ kpoye nya ihu Oletungkohyo myị́ lẹ. Ma, ụka ká ala Ijipiti tịtị juwa tịtọ kị ka kpoye ịnyịnyị lẹ, ịwa wuu a byi-enyi wuu ẹ-ẹpwụ nya ihu ọọwa pyịyọọ lẹlẹ.

³⁰Bwula ọmyịmyị ọlala nya ala Isirẹlụ, a du ká ụka ọlẹ kịịwa ayịdang dọgịlẹ ju ugulọ nya iJeriko ịnyịnyịịnyị jịra ụtụrụ irwiye gbẹgbịlẹgbẹ lẹ, ká ugulọ ọọwa kpụ ju eji pyịyọọ lẹ.

³¹Bwula ọmyịmyị ọlala nya iRehabụ ọlẹ kọ ri ọlakpara, a du kọọwa ayịdang á ta ayịreji bala angị ju ihi nya Ohe Oluhye-ka, ịlọpyị nya iJeriko wuu kpong-kpong kaka lẹlẹ. Chajị, ala Isirẹlụ ịlẹ kị du ẹrụ kele kaka wụla ọpyị nya iJeriko yẹ lẹ, iRehabụ ọọwa kpangga, a ri ọnyang ọlẹ kọ myị ye angịịwa kpa kele ka ẹpwa nyamwụ bala ọkpẹhị rịraa yẹẹyẹẹ lụka ọọwa lẹ.

³²Ẹla ịyẹ, m tị́ ka myịmyị-ị̀ ya wẹẹ? Chajị, ụka á ji ham, m ka jẹ́-ẹ ya ẹla rụ́ ọmyịmyị ọlala nya iGidiyọn bala ịnya ịBarakị bala ịnya ịSamsịn bala ịnya iJefuta lee ịnya iDevidi bala ịnya ịSamwẹlụ lee ịnya alọmwụ nya Ohe Oluhye inyogo ịkịla wuu myị́ kpong-kpong kaka.

³³Chajị bwula ọmyịmyị ọlala, a du ká angịhyẹ lẹpwụ nya angịwẹ kpa kụrụ ịpyị Adịrahụ nya angịkịla ịlẹ dẹwụ tụ pyịpyị myị́ lẹ. Ọmyịmyị ọlala, a tị du ká angịkịla nyaa kpa abwẹla ọnyịịla ọhọhọ gbeji lala ịdịrịhụ lẹ. Angị ịkịla nyaa kpa ọmyịmyị ọlala, ye ọ-họ jịra nya ọnụ ọmyịmyị bwu ẹga nya Ohe Oluhye. Angị ịkịla nyaa kpa ọmyịmyị ọlala, tụ ịnụ nya egabẹ ku, du ká egabẹ ịịwa a haa abwọhẹ myị́ ka lẹ.

³⁴Angị ịkịla nyaa kpa ọmyịmyị ọlala, myịrị ila hi ịlaa dẹyị-dẹyị. Angị ịkịla nyaa, be hi ẹma nya ẹwụ o-ryaa ri bwula ọmyịmyị ọlala. Angị ịkịla nyaa, ye ọngịrị bwu ẹga nya Ohe Oluhye ọlẹ kị kpa kụrụ ọdẹwụ-dẹwụ nya ịlaa bwula ọmyịmyị ọlala. Angị ịkịla nyaa, ri alọgẹwụ ịtụka-ịtụka nya ẹwụ ọdada bwula ọmyịmyị ọlala, gbee kị ku angị dẹwụ nya aluji nyaa wuu rụ hwahị hi ịlaa.

³⁵Ohe Oluhye wule anyị nya anyang ịhyẹ nyaa, eji bwula igu haa lahị-lahị bwula ọmyịmyị ọlala nyaa. Angị ịkịla nyaa, bwula ọmyịmyị ọlala pwa ụgbẹyị nyọka bebe, du kị godayị rịrị ẹ-ẹpwụ nya o-ji oye nya Ohe Oluhye gbee, kị yaa akama nya ang ọjụjụ ọ-pwụ igu. I godayị ịnyị, chajị kịịwa ayịdang ka jẹ́-ẹ ye owuleji bwula igu ọlẹ kọ hagụ ị-ịlahị.

³⁶Bwula ọmyịmyị ọlala nya angịhyẹ nyaa, a du kị ju ka ẹpwụ nya ọmayẹ nya ọ-kpaa kpa họ ọtụka-ọtụka bala enyiri onyinyi la egbiji lẹ. Angịhyẹ nyaa dọmwụ yẹ akama bwula agba ojuju ịnyịnyị.

³⁷Bwula ọmyịmyị ọlala nya angịhyẹ nyaa, a du kị mịlaa ajwọ gbee kị gbu lẹ. Ị kpa ẹma gu angịkịla nyaa ene imiiye chajị nya ọmyịmyị ọlala nyaa. [Iru nya ịmayẹ wẹ chị angịkịla nyaa ọgụ chajị nya ọmyịmyị ọlala.] Ị kpa oge hya angị ịkịla nyaa eku imiiye chajị nya ọmyịmyị ọlala nyaa. Angịhyẹ nyaa juwa kụrụ egba nya ịkpịlọ bala egba nya ịmwụ nya ịwụrụ nyaa bwula ọmyịmyị ọlala. Angị ịkịla nyaa juwa ẹ-ẹpwụ nya ẹbyahị nya ịngịngịhyẹ ọlala ka. Angị ịkịla nyaa yẹ akama ịtụka-ịtụka. Angị ịkịla nyaa la ọ-kpa họ la datị-datị bwula ọmyịmyị ọlala nyaa ịnyịnyị.

³⁸Ị haa ịnyị, chajị, ọhịhị nya angịnyị nya Ohe Oluhye ịịwa bala ụma nya ọhịhị nya alodehe ọlẹ á pwoku awụlẹ kpong-kpong ka. Bwula ọmyịmyị ọlala nya angịịwa, ị juwa mwụ ẹpwa nyaa tụ ugbileji nya ọpyị ọchọrụ da bala uhye nya ịgbọdọ bala o-juwa nọ ẹpwa ẹ-ẹpwụ nya ajẹ ikpori-kpori bala agbụ ịlịpyị ịnyịnyịịnyị.

³⁹Angịnyị nya Ohe Oluhye inyogo ịwẹ wuu la o-ya dodehe ọnyịịla o-oluhye nya ọmyịmyị ọlala lụmẹ nyaa ẹ-ẹga nya Ohe Oluhye lẹ. Ma, ịwa ayịdang á tị ye ọ-họ jịra nya ọnụ ọmyịmyị nya Ohe Oluhye tọ ịlaa a-ahị kpong-kpong ka.

⁴⁰Ang odudu nya ọọwa ri, jaabwọ ká Ohe Oluhye la ịlọmwụ kpa obyi omeme nya ang ịnyịịla ọhagụ ọlẹ kọ nwụlanọ gbehi ahị aloyi ọlẹ ẹ-ẹpwụ. Chajị ká ọ-họ jịra nya ahị ọwawa nyahị ahị ọọwa a tịtị ka ri ang ọ-họ chị eju gbanggbang nya ọnụ ọmyịmyị nya angị inyogo ịịwa ịnyịnyị lẹlẹ.