Read idege ALA IHIBURU 12 Bible Online

ALA IHIBURU 12 - idege bible

ALA IHIBURU 12

¹Chajị nya ọọwa lẹ, jaabwọ kaahị angịnyị nya Ohe Oluhye ịlụka ọlẹ la iru nya angị ịgọgọ inyogo ịlẹ kị ri ibeenu nya ọmyịmyị ọlala hahị dọgịlẹ ju wuu ịnyị lẹlẹ, anụ cheri kahị tụụbwọ hi ang myị́ ang ọlẹ wuu kọ juwa kpahị ata gbileji ẹ-ẹpwụ nya ọhịhị nya angịnyị nya Ohe Oluhye oriri nyahị ọlẹ beji bala ọ-tụụbwọ hi ọhọbịrị myị́ ọhọbịrị ọlẹ kọ juwa wuhi kpanya-kpanya ịnyịnyị mẹ. Kahị cheri kahị juwa kpa ugbodu ojuju onyudiyo rụnyẹ nya ọmyịmyị ọlala ọlẹ ká Ohe Oluhye hunọ hahị lẹẹ gbee kahị ka kpọọ chị eju myị́ mẹ.

²Kahị juwa kpa ugbẹhị nya olegu nyahị yẹ iJisọsị ụbwọọmwụ kem bwula ọmyịmyị ọlala nyahị mẹ. Chajị, iJisọsị ọọwa a ri ọngọ da itiwe nya ọmyịmyị ọlala nyahị bala ọngọ ka kpa ọmyịmyị ọlala ọọwa kaka pwụ achinege nyamwụ hahị lẹ. Ọwa myịmyị ri ọngọlẹ ká ọ-chajị nya ọkẹkẹnị ọtụka ọlẹ ká Ohe Oluhye hunọ ị-ịlahị gboo, kpa ugbodu ojuju ya ẹhị da oyoyi nya igu ogbugbu oluhye nya okoji chajị nyahị bwee lẹ. Ọọwa lẹ, ọ rụ tịrẹkpẹ kele kaka hụhụ u-upwuriri nya ẹchị Adịrahụ nya Ohe Oluhye lalẹ lẹlẹ.

³Anụ me irya ju jaabwọ ká iJisọsị ọọwa bwu kpa ugbodu ojuju onyudiyo hu ujiji ẹ-ẹga nya alọhọbịrị ịlẹ wuu kị họọ ẹla ọjụjụ ododu wuu wẹẹ! Chajị ká ụbwọ, á tụtụm ka juwa chị́ịnụ pyẹpyẹ ẹ-ẹpwụ nya ọmyịmyị ọlala lee ọ-ka juwa kpụ ịbwọ ẹ-ẹpwụ nya ọkịlẹtụ nyanụ kaka.

⁴Chajị, ẹ-ẹpwụ nya uya ọmama tụ ọhọbịrị pyịpyị ọlẹ kanụ wẹẹ ma bwula ọmyịmyị ọlala nyanụ wuu lẹ, ánụ ma uya ọọwa pwụ iwe-ahụrụ nya ịwọ nya ịlọnụ ọchịchị bwula igu ogbugbu myị́ kpong-kpong lẹka.

⁵Lee, anụ tị́ deeri nya ụbwọ ogbile ụ-ụrụ ọlẹ ká Ohe Oluhye ya tanụ lala anyị nya ịlọmwụ lẹẹ! Ọ yẹkẹẹ, “Ahụ ọnyị nyam, a yẹhị da akama nya ọ-nwụ rịrị ọlẹ ká Ọngọlahị Ohe Oluhye juwa yẹng bwee kpong-kpong ka. Lee, ọ-myị ká ọkịlẹtụ a juwa kpụng enyi chajị nya akama nya alibyi oyaya lang nyam Am Ohe Oluhye kpong-kpong ka ịnyịnyị.

⁶Chajị, ọngọlẹ kọ há Ọngọlahị Ohe Oluhye lụmẹ, ọngọọwa, Ohe Oluhye a kaa hu akama nya ọ-nwụ rịrị ha lẹ. Ọnyị nya Ohe Oluhye ọlẹ kọ tị họ́ọ lụmẹ, kpụ kọ ka yoo ye wẹ ẹpwa nyamwụ, ọngọọwa, Ohe Oluhye a tị kaa yalibyi la ịnyịnyị lẹ.”

⁷Chajị nya ọọwa lẹ, ọ chịla kanụ ka ri angị juwa la ugbodu ojuju ẹ-ẹpwụ nya akama nya ọ-nwụ rịrị o-bwu ẹga nya Ohe Oluhye. Ohe Oluhye ayịdang juwa kpanụ lala anyị nya ụbwọ nya ịlọmwụ kpangga. Chajị, ọnyị o-wo ẹla-ka oyina kpá, a tị́ ka juwa, ọlẹ ká adamwụ á ka hu akama nya ọ-nwụ rịrị ọhẹ-lọhẹ họọ lụka ọhẹ-lọhẹ kpong-kpong ka?

⁸Chajị, ó ri ká Ohe Oluhye ayịdang, á juwa beenu anụ deeji ẹ-ẹpwụ nya akama nya ọ-nwụ rịrị ọlẹ kọ wẹẹ hu ha anyị nyamwụ ịkịla wuu lẹ, ịnọ, ọọwa ka mẹjẹ yẹkẹẹ, anụ lẹ, anyị nya Ohe Oluhye, ẹ-ẹnyị kem, anụ tị tị ri lẹlẹ. Chajị, ịnọ, ánụ ka ri anyị nya Ohe Oluhye ịlam-ịlam tịtị lala angịkịla kaka.

⁹Ang o-ju ẹjẹẹ ọkịla ri yẹkẹẹ, ahị dọmwụ la adịda ịlẹ kị mahị warị wẹ odehe ọlẹ, kị kaa hu akama nya ọ-nwụ rịrị ọlịnyị hahị. Ahị tị kaa juwa ju adịda ilodehe ịịwa ihi yẹẹyẹẹ ẹ-ẹpwụ nya ọọwa myị́. Lẹ, ánụ jẹ́ yẹkẹẹ, nyị ri ang ọchịla-chịla mwụ aba ba hahị kahị ka juwa kpa ịlọhị ka ekpeleji nya Ohe Oluhye Ọngọlẹ kọ ri Adịda nya olegu ọnyị myị ọnyị wuu, jaabwọ kahị kaa họ ẹ-ẹga nya adahị olodehe ọlẹ, chajị kahị ka jẹ́-ẹ bwula ọọwa la ọhịhị nya Ohe Oluhye ka?

¹⁰Adahị ị-mahị ma ilodehe ọlẹ kaa hu akama nya ọ-nwụ rịrị hahị lụka o-kpii jaabwọ kọ ka kpaa ịwa ayịdang ịpyọ kem. Ma, akama nya ọ-nwụ rịrị ọlẹ ká Ohe Oluhye kaa hu hahị wuu tị ri chajị nya ọháha nyahị, chajị kahị ka jẹ́-ẹ la kpakpa ị-ịlahị nyamwụ kpụ, kahị ka bá ịgọgọ nyamwụ bá la tọọ ị-ịlahị.

¹¹Lụka olijata ọlẹ lẹ, ụma nya alibyi oyaya lahị ọnyị myị ọnyị wuu kaa ri ang ọ-kaa hu ayiiji ọbwọbwọ hahị. Ọ́ kaa kpụhị ịpyọ ka. Ma, o-ya dodehe nyamwụ tị kaa ri okpunyi ọlala bala ugbe nya abwẹla ọnyịịla nya Ohe Oluhye ọnwụnwụ, ẹ-ẹga nya angịlẹ wuu kị kaa myị-ị nwụ rịrị bwu ẹpwụ nya ọ-jẹ́ họ-ka nyaa ịịwa wuu lụka ohyẹẹkpẹ.

¹²Chajị nya ọọwa lẹ, anụ angịlẹ wuu ká abwọ nyanụ juwa nya kaka ta ata meme bala ata o-juwa chị́ịnụ pyẹpyẹ ẹ-ẹpwụ nya ẹla nya Ohe Oluhye ọhọhọ kpẹẹkpẹẹ lẹ, anụ cheri kanụ juwa nịra abwọ nyanụ ịịwa kpaa ka uhye bala o-juwa ngịrị ata nyanụ ịịwa ọngịrị gogo ẹ-ẹpwụ nya ọmyịmyị ọlala nyanụ mẹ.

¹³Kanụ cheri kanụ juwa nwụ ọhịhị nyanụ rịrị yẹẹyẹẹ, chajị ká ọgụ-ẹpẹtẹ nyanụ ka jẹ́-ẹ juwa jẹdịyẹ kpụrụrụ dịrẹ ụgbẹyị nya Ọngọlahị la hiigu-hiigu mẹ. Chajị ká angịlẹ kị chị okuku ẹ-ẹpwụ nya ọmyịmyị ọlala nyaa wuu tụtụm ka mwụ kịla-kịla dụwa ọ-ọka nya ụgbẹyị kaka mẹ. Ma, ọkọkọ nya ọọwa lẹ, ká ọ-họ hiigu nyanụ ka kpa ogogo ọlala bwu ẹpwụ nya ẹdụrụ nya ọdẹwụ-dẹwụ ọlala kịla angị ịlịnyị wuu mẹ.

¹⁴Anụ cheri nya ịlẹhị-ịlẹhị, kanụ juwa hụ la okpunyi ta angịnyị ehe wuu bala o-juwa maga ju ọhịhị nya ịgọgọ ọlala nya ịlẹhị-ịlẹhị mẹ. Chajị, ọngọlẹ kọ la ịgọgọ ị-ịlahị nya Ohe Oluhye kaka lẹ aalẹ, ọngọọwa á ka jẹ́-ẹ yẹ Ọngọlahị la ẹ-ẹhị myị́ kpong-kpong kaka.

¹⁵Anụ cheri kanụ myị ká ọngọngọhẹ lẹpwụ nyanụ a ri ọngọ hi ịbẹ ẹ-ẹpwụ nyọka ye ọgahị ọnahị nya Ohe Oluhye kpong-kpong kaka mẹ. Lee, anụ ọ-ka myị ká ọngọngọhẹ lẹpwụ nyanụ ka ri ọngọlẹ ká olegu onyuujujwo ọhẹ-lọhẹ ka da emyo kpehe bwu ẹpwụ nyamwụ kpong-kpong ka. Chajị, ọọwa ka kpa akama wẹ ẹpwarịrị nyanụ, du ká iru nya angịnyị nyanụ ka ri angị chịrị ị-ịlahị nya Ohe Oluhye.

¹⁶Lee, anụ ọ-ka myị ká ọngọngọhẹ nyanụ ka ri ọngọ họ ụya bala ọngọ yẹhị da ịgọgọ ọlala ị-ịlahị nya Ohe Oluhye bwee kpong-kpong lala Ịsọ ka. Ịsọ ọọwa a ri ọngọlẹ kọ hu ọgbahị oriri nyamwụ rịra iJekọbụ chajị nya ang oriri ọlụka ookpokpo ọlam-ọlam ọlẹ lẹ.

¹⁷Chajị, anụ jẹ́ yẹkẹẹ, lụka ohyẹẹkpẹ ká Ịsọ ayịdang juwa charịnya nyọka ye ugu nya ahị ọwawa nya ọnyị ọgbahị oriri lẹ, ị gbọọ ọwa ayịdang ugu dọọka kpọkọlọ ugbeene. Chajị, ụgbẹyị nya irya ọyẹda tuku yẹ Ịsọ dada gbanggbang lụka ọọwa lẹlẹ, ó wu ọyẹda ọyị myị́ kaka. Ọ ri nya ịlẹhị, Ịsọ pịlahị nyamwụ la ugbejida ẹ-ẹhị. Ma, ọ tị ri ang otimajẹ họọ lẹ.

¹⁸Anụ wo mẹ. Ọmyịmyị ọlala nyanụ anụ angịnyị nya Ohe Oluhye lẹ, ó juwa ka kpanụ kele kaka godayị rịrị i-ijata nya ọgbọdọ ọlẹ kanụ ka jẹ́-ẹ yụbwọ gu myị́, jaabwọ kọ la lụka nya ala Isirẹlụ iloyi nya iMosisi kpong-kpong ka. Chajị, ịwa lẹ, ị yẹ Ọgbọdọ nya ịSayịnayị ọlẹ ká ila juwa wuru ụ-ụwa bala ukpowu ọtụka-ọtụka okpem-kpem ọchịchị ụ-ụwa bala igbachịwụ ọtụka-ọtụka ọlẹ kọ juwa tá lala ukpọchịrị ụ-ụwa ịnyịnyị,

¹⁹bala o-juwa kpa ụrụ nyaa wo anụ nya opyike bala omyi oluhi-uhi nya ẹla oyaya nya Ohe Oluhye ọlẹ kọ du kịịwa angị wowo wuu mwọọgịlẹ, juwa bịlẹ yẹkẹẹ, Ohe Oluhye nyị chuchuu kịị nyị ya ụma nya ẹla ọlịnyị ta ịwa myịmyị kpong-kpong kaka.

²⁰Ang odudu nya uhi ojuju nyaa ọọwa ri yẹkẹẹ, ị́ jụ ehile ọlẹ ká Ohe Oluhye da kpa myị́ kpong-kpong ka. Ehile ọọwa yẹkẹẹ, “Iyo ọnyị myị ọnyị ọlẹ kọ dọmwụ chị ụchụ kwẹnggẹ kele ka uhye nya Ọgbọdọ ịSayịnayị lẹ aalẹ, ị́ ka dayi la ọ-da ajwọ nwọọ pyii kaka.”

²¹Nya ịlẹhị ịnyị, ụma nya ang ọlẹ kị yẹ ụka ọọwa lẹ, ọ la uhi-uhi lụmẹ kaka kpoye gbee ká iMosisi ayịdang dọmwụ ya dodehe yẹkẹẹ, “Ọ lam am uhi-uhi gbee, kam juwa hụ́ kpákpakpa la uhi ojuju.”

²²Ma, ọkọkọ nya ụma nya ọgbọdọ ọlịnyị lẹ, anụ angịnyị nya Ohe Oluhye warị kaka godayị rịrị i-ijata nya Ọgbọdọ nya ịSayọn bala anụ ọ-warị wẹ iJerusalẹm nya epwoohe ọlẹ kọ ri epweji nya Ohe Oluhye Ọngọlẹ kọ juwa hịhị. Bala anụ ọ-ka ijata nya ọjịra-jịra nya ọkẹkẹnị ọtụka-ọtụka nya iru nya ụnọ ukuku nya alegu-ẹrụ nya Ohe Oluhye.

²³Bala anụ ogodayị rịrị ị-ịlahị nya ọjịra-jịra nya aluche nya angịlẹ kị ri anyị nya ọgbanyẹ nya Ohe Oluhye ẹ-ẹpwụ nya ịKịrayịsị ịlẹ wuu kị da ẹnyị nyaa juwa e-epwoohe. Bala anụ ogodayị rịrị i-ijata nya Ohe Oluhye Ọngọlẹ kọọwa a ri Agaba Agụgụ Oleje nya ọng myị́ ọng ọlẹ wuu kọ họhọ. Bala anụ ogodayị rịrị i-ijata nya ugbodu okpukpuru nya alabwẹla ọnyịịla ịlẹ ká Ohe Oluhye họ kị la kpẹẹkpẹẹ ị-ịlahị nya ịlọmwụ wuu lẹ.

²⁴Bala anụ ogodayị rịrị i-ijata nya iJisọsị ọngọlẹ kọọwa a ri ọngọ godayị apewa nya angịnyị ehe bala Ohe Oluhye u-uhye nya iro ọnwanwa onyeewe ọlẹ. Bala anụ ogodayị rịrị ị-ịlahị nya ịwọ nya iJisọsị ọlẹ ká Ohe Oluhye kpa hụ́ụhị bwu ẹpwụ nya ịhọbịrị ịhọhọ nyahị wuu, du kọ họ ang ọnyịịla ohiigu hahị gụ ịwọ nya Ebẹlụ onyogo.

²⁵Chajị nya ọọwa lẹ, anụ cheri kanụ ri angị ka juwa pwa Ohe Oluhye Ọngọlẹ kọ wẹẹ ya ẹla tanụ alẹ kaka. Chajị, ó ri ká angịlẹ ká angịnyị ehe aanaa a lẹẹ da ọna odehe ọlẹ, kị pwa ọ-ba ọna ọdada ọọwa jẹ, á kaa be bwu ẹpwụ nya akama ọyẹyẹ kwiwa nya ọọwa myị́ ka aalẹ, ọ tị tị ka ri ang olujwo ọtụka hahị gụ ịnyaa wẹẹ, nya ahị ọ-ka jẹ́-ẹ be hi akama nya Ohe Oluhye myị́, kọ ri kahị juwa pwa ọ-ba ọna ọdada nya Ohe Oluhye ọlẹ kọ wẹẹ wẹ chịhị ọgụ bwu epwoohe jẹ ịnyịnyị!

²⁶Lụka nya aloyi onyogo lẹ, omyi ẹla nya Ohe Oluhye hụ́ odehe ọlẹ wuu jigi-jigi lụmẹ. Ma, lẹẹlẹẹ lẹ, ọwa ayịdang tị myị ọnụ yẹkẹẹ, “Am Ohe Oluhye ka myịmyị-ị̀ hụ́ odehe ọlẹ jigi-jigi lẹ. Ma, ugbẹnyị lẹ, odehe ọlẹ ụbwọọmwụ kem kaka, m ka hụ uhye-ọgba nya epwoohe jigi-jigi ịnyịnyị kpịlọ lẹ.”

²⁷Ẹla ọlẹ ká Ohe Oluhye ya wẹ ẹ-ẹgẹwẹ yẹkẹẹ, “M ka myịmyị hụ́ lẹ” wẹẹ, ọọwa mẹjẹ gede-gede yẹkẹẹ, ang ilodehe ịlẹ wuu ká Ohe Oluhye họhọ kị kaa hụ́ jigi-jigi myị́ wuu wẹẹ, ọ ka tụ ang ịịwa kịnyaa, chajị ká ang ilepwoohe ịlẹ kị ka jẹ́-ẹ hụ́ jigi-jigi myị́ kaka, ụbwaa kem, a ka hi lẹ.

²⁸Chajị nya ọọwa lẹ, anụ cheri kahị juwa ji Ohe Oluhye obe ọgwọgụ chajị nyọlẹ kaahị wẹẹ ka jụ ka ẹpwụ nya ịpyị adịrahụ nyamwụ ọlẹ kọ ka jẹ́-ẹ hụ́ jigi-jigi kpong-kpong kaka mẹ. Anụ cheri kahị juwa gbịgba ha Ohe Oluhye la ọgụ ọlẹ ká Ohe Oluhye ka yehi ẹ-ẹpwụ nya uhi bala ihi ojuju ẹ-ẹga nya Ohe Oluhye yẹẹyẹẹ mẹ.

²⁹Chajị, Ohe Oluhye nyahị lẹ, ila ọ-rụ ọngịnyị kpobyi kpangga, ọ ri ha angịlẹ kị kaa myị-ị jwoo ihi yẹẹyẹẹ kpong-kpong ka lẹ.