Read idege ALA IHIBURU 13 Bible Online

ALA IHIBURU 13 - idege bible

ALA IHIBURU 13

¹Anụ cheri kanụ juwa la ọháha ọgẹnẹ-gẹnẹ nya anyadịda ẹ-ẹpwụ nya ịKịrayịsị kele kịlahị-ịlahị pyịyọọ mẹ.

²Anụ juwa yẹhị da ẹhị ọ-kpa rịrị angga yẹẹyẹẹ ẹ-ẹpwụ nyanụ bwee kpong-kpong ka. Chajị, angịnyị nya Ohe Oluhye ịlụka onyogo ịhyẹ họ ịnyị gbee, kị dọmwụ họ alegu-ẹrụ nya Ohe Oluhye ụga lụka ọlẹ kịịwa ayịdang á jáa jẹ́ datị kpong-kpong ka.

³Anụ cheri kanụ juwa kpa ọháha ọlala kpịtịya nya angịlẹ kị juwa ẹ-ẹpwụ nya ube nya agba lala anụ ayịdang kpangga nyaa ju agba wẹ lẹlẹ, mẹ. Angịlẹ ká angịnyị tị juwa yaa ụhị wuu lẹ, anụ́-ụ kpịtịya nyaa ịnyịnyị mẹ. Chajị, anụ tịtị kpa ugbinyịrọ ụ-ụwa ịnyịnyị, lala ịwa-ịwa!

⁴Anụ́-ụ juwa kpa ihi ju ahụ oyeye bala ọrụ ọrwọrwọ ọlẹpwarịrị nyanụ yẹẹyẹẹ mẹ. Ọrụ-ahụ bala ahụ ọnyị myị ọnyị lẹpwarịrị nyanụ a myị kanụ juwa chị ịbẹẹdị ọnọnọ nyanụ ịrị bwula ụya ọhọhọ kaka. Chajị, eje owuwu nya Ohe Oluhye á ka dayi la o-juwa ji ha angịlẹ wuu kị juwa họ ụya lee o-juwa da ẹla ahụ pyii kaka.

⁵Anụ cheri kanụ juwa gba ụbwọ nyanụ kpehe hi ẹpwụ nya ẹhị nyanya nya okpoko ọchịchị wuu mẹ. Kanụ myị ká ang myị́ ang ọlẹ kanụ la juwa lẹ, a nwanụ ba ụ-ụwa mẹ. Chajị, Ohe Oluhye ya ẹ-ẹgẹlẹ yẹkẹẹ, “Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹnẹhẹ kaka.”

⁶Chajị nya ọọwa lẹ, ahị angịnyị nya Ohe Oluhye ka la ọnụ o-ya ẹla pwọọ myị́ yẹkẹẹ, “Ọngọlahị Ohe Oluhye a ri Ọngọ da ụbwọ nyam lẹ. Chajị nya ọọwa lẹ, ḿ ka juwa juhi kpong-kpong kaka. Ịịyẹ ọngịnyị ehe a tị́ tụtụm ka jụm họ myị́ wẹẹ?”

⁷Anụ cheri kanụ juwa kpịtịya nya alegbeju ịkpẹhị rịrịịnụ ịla ịchọọchị ịlẹ kị wẹẹ ya ẹla nya Ohe Oluhye junu mẹ. Kanụ juwa me irya ju o-ya dodehe nya ụma nya ọhịhị ọlẹ kịịwa ayịdang wẹẹ la, kanụ juwa gbịla ọmyịmyị ọlala nyaa ẹ-ẹpwụ nya ọhịhị nyanụ wuu ịnyịnyị mẹ.

⁸Chajị, jaabwọ ká iJisọsị ịKịrayịsị la ịnịyẹ, ịnyịnyị ọ la alẹ lẹ. Ịnyịnyị, ọ tị ka jẹ́-ẹ juwa la pyịyọọ gbe oyi myị́ oyi lẹlẹ.

⁹Anụ myị kị hụnụ ahị kpong-kpong bwula ang ịmẹjẹ inyeewe ị-hụ angịnyị ahị la datị-datị ịlẹ kị ka juwa kpa warị wẹ ẹga nyanụ ka. Chajị, ọ ri ang ọnyịịla ká ọngịrị ọgahị ọnahị nya Ohe Oluhye kem, a ka ri ang ọ-ka juwa wu ọkịlẹtụ nyahị ahị angịnyị nya Ohe Oluhye kpa yẹẹyẹẹ ẹ-ẹpwụ nya ẹla nyamwụ. Chajị, e-ehile nya ụma nya ang oriri ọchịla-chịla a kaa wu ọkịlẹtụ nyahị kpa ka. Ehile ịịwa á dọmwụ da angịlẹ kị juwa kaa baa jẹ ụbwọ myị́ ẹnẹnẹhẹ kpong-kpong lẹka.

¹⁰Ogidi ọlịgọgọ ọkịla iya ha Ohe Oluhye nya Olegu ọlẹ kaahị angịnyị nya Ohe Oluhye la lẹ, angịkiliya ha Ohe Oluhye ịlụka onyogo á ka la ọngịrị ri ang oriri ụ-ụwa tahị myị́ ka, jaabwọ kị kaa ri ang ogidi ọkịla iya nyaa ịwa ala iJuu lụka ọọwa ka ene-ene.

¹¹Chajị, iyo ịlẹ ká olegbeju ọgbahị nya angịkiliya nya Ohe Oluhye kaa kpa ịwọ nyaa kaka kịla iya wọnụ nya ọhọbịrị nya angịnyị ehe ju lẹ, ị kaa kpa ugbinyịrọ nya iyo ịịwa kaka ju ila hụrụ u-ugumẹ ẹpwa.

¹²Ịnyịnyị, iJisọsị ayịdang a tịtị hu ọhịhị nyamwụ kpa kaka kịla iya u-uhye nya okoji u-ugumẹ ẹpwa nya epweji kọ ka kpa ịwọ nyamwụ ọọwa hụ́ụhị cheri-cheri bwu ẹpwụ nya ịhọbịrị ịhọhọ nyahị wuu lẹlẹ.

¹³Chajị nya ọọwa lẹ, anụ kẹwẹ kahị ba iJisọsị kpehe kele ka ugumẹ ẹpwa ọọwa kaka kpa olo nya oyoyi ọlẹ kị chị jwoo wuu ụ-ụwa tọọ ịnyịnyị mẹ.

¹⁴Chajị, epweji ọhẹ-lọhẹ ọlẹ kọ ka juwa pyịyọọ á jam hahị ẹ-ẹpwụ nya odehe ọlẹ kpong-kpong ka. Ma, epweji ọkịla ọlẹ kọ ka ri ehe pyịyọọ ká Ohe Oluhye juwa ka kpa warị wahị ị-ịlahị, a ri ang ọlẹ kahị lẹẹ tịtọ lẹlẹ.

¹⁵Lẹ, anụ kẹwẹ, kahị tị tị bwula ịKịrayịsị ọọwa, juwa kpa ọhaha nya iya ọkịlaakịla nyahị kele ka ẹga nya Ohe Oluhye bwula ogbo o-juwa gwogwo ha Ohe Oluhye nyahị ịnyịnyịịnyị mẹ. Chajị, o-juwa hu ẹnyị nya Ohe Oluhye hwaa kele ka uhye ẹ-ẹpwụ nya obe o-joo ji ọlịnyị kpangga a tọchị ri ugbe ọnyịịla ọnwụnwụ nya ugbọnụ nyahị ị-ịlahị nya Ohe Oluhye lẹlẹ.

¹⁶Anụ juwa yẹhị da ụkụrwọ ọnyịịla ọhọhọ bwee kpong-kpong ka. Lee, o-juwa deeri nyọka juwa da angịkịla ụbwọ yẹẹyẹẹ ka, ịnyịnyị. Chajị, abwẹla ọnyịịla ọhọhọ ịlịịwẹ wuu a ri ụma nya iya ọkịlaakịla ọlẹ kọ kaa kpụ Ohe Oluhye ịpyọ lụmẹ lẹ!

¹⁷Anụ́-ụ juwa ju ihi nya alegbeju nyanụ ịla ịchọọchị kanụ juwa kpa ịlọnụ keji hiigu-hiigu haa ịnyịnyị mẹ. Chajị, ịwa ayịdang juwa kpẹhị rịrị ugbodu okpukpuru nyanụ yẹẹyẹẹ, chajị, ị jẹ́ yẹkẹẹ, ịwa nyị juwa ka kpa ọnụ nya ịlịịwa ya, ụma nya ụkụrwọ ọlẹ kị wẹẹ họ dodehe je Ohe Oluhye ị-ịlahị pyii wẹẹ. Lẹ, anụ́-ụ juwa la ọhịhị ọlẹ kọ ka họ kị ka juwa kpa ọkẹkẹnị ọchịchị nya ịlẹhị-ịlẹhị myị ẹrụ ọọwa ị-ịlahị nyanụ, ọkọkọ nyọka juwa kpa ayiiji ọbwọbwọ, myịnụ ẹrụ ọọwa mẹ. Chajị ayiiji ọbwọbwọ nyaa ọlịnyị á ka ju apyobwuna hanụ kpong-kpong ka.

¹⁸Anụ́-ụ juwa kpịtịya nyahị ẹ-ẹpwụ nya abwọ ọrịrị ha Ohe Oluhye kele kịlahị-ịlahị mẹ. Chajị, ahị ayịdang lẹ, ahị jẹ́ yẹkẹẹ, irya ọ-la ọngịnyị eje ọlẹpwụ ọkịlẹtụ nyahị á ya eje wuhi ẹ-ẹpwụ nya ịngịngịhyẹ ọhọhọ nyahị kpong-kpong ka. Chajị, ahị jam tịtọ nyọka họ ang myị̀ ang wuu nyahị la ụgbẹyị ọlẹ kọ ka la ihi-i hi ụka wuu.

¹⁹M jam bịlẹnụ nya ịlẹhị-ịlẹhị kanụ ka juwa raabwọ ha Ohe Oluhye ọgwọgụ, chajị kọ ka jẹ́-ẹ chịkpẹẹ ham kam ka warị wẹ ẹga nyanụ myị́ ahyaahị mẹ.

²⁰Lẹẹlẹẹ, Ohe Oluhye Adịda nya okpunyi a ri Ọngọlẹ kọ wule Ọngọlahị iJisọsị eji bwula igu lẹ. IJisọsị ọọwa a ri olegbeju o-gbe ịkpịlọ ọtụka nya ịkpịlọ nya Ohe Oluhye, bwula ịwọ nyamwụ ọlẹ kọ ya yẹ hụrụ o-oluhye nya iro ọnwanwa o-gbe oyi myị́ oyi nya Ohe Oluhye lẹ.

²¹Ká Ohe Oluhye ọọwa ayịdang a hu ang myị́ ang ọnyịịla nyamwụ wuu hanụ jịra, chajị kanụ ka jẹ́-ẹ juwa kpa ọngịrị nya Ohe Oluhye họ irya nyamwụ jịra myị́ mẹ. Ká Ohe Oluhye ọọwa a myịmyị juwa họ ụma nya ang ịlẹ kị kaa kpọọ ịpyọ kem ẹ-ẹpwụ nya ọhịhị nyanụ, bwula iJisọsị ịKịrayịsị ọngọlẹ ká ogbo wuu ka juwa ha gbe oyi myị́ oyi mẹ. Amẹn.

²²Anụ anyadam ẹ-ẹpwụ nya ịKịrayịsị, m jam bịlẹnụ nya ịlẹhị-ịlẹhị yẹkẹẹ, anụ́-ụ cheri kanụ juwa kpa ugbodu ojuju ke ụrụ pịlẹẹ, la ẹla nya ụbwọ ogbile ụ-ụrụ nyam ịlẹ wuu kam ya jenu wẹ mẹ. Chajị, ileta okpinggidi a lẹẹ kam lẹẹ da du wanụ lẹ.

²³Ọlẹ ri o-ya jenu yẹkẹẹ, iTimoti ọnyadahị ẹ-ẹpwụ nya ịKịrayịsị lẹ, ị gbọọ kpehe bwu ube nya agba lẹ. Ó ri kọ warị wẹ ẹga nyam hyaa aalẹ, am bala ọwa a ka bajẹ warị lụka kam ka warị kaka yẹnụ lẹlẹ.

²⁴Anụ́-ụ da ọnụ chị alegbeju ịla ịchọọchị nyanụ wuu bala angị ịgọgọ ịlịnyanụ wuu ham mẹ. Angịnyị nya Ohe Oluhye ịlẹ kị bwu ọpyị nya Itili ya, nyị da ọnụ chịnụ wuu ha ịwa mẹ.

²⁵Ká ọnahị nya Ohe Oluhye a juwa tanụ wuu mẹ. Amẹn [Ị da ụpwụ ọlẹ bwu ọpyị nya Itili bwu ụbwọ nya iTimoti du kịla ala iHiburu.]