Read idege ALA IHIBURU 2 Bible Online

ALA IHIBURU 2 - idege bible

ALA IHIBURU 2

¹Chajị nya ọọwa lẹ, ọ chịla kaahị angịnyị nya Ohe Oluhye ka juwa kpahị ju ẹla ịlẹhị nya ẹrụ ọnyịịla nya Ohe Oluhye ọọwa ọlẹ kahị juwa wo yẹẹyẹẹ. Chajị ká ịngịngịhyẹ ọkịla á ka jẹ́-ẹ mwụụhị rụ hi ọgụ-ẹpẹtẹ ọnyịịla nya Ohe Oluhye ba ọlẹ kahị lẹẹ jẹ kpong-kpong myị́ kaka mẹ.

²Chajị, ó ri ká angịnyị á jẹ́ ẹrụ ọlẹ ká Ohe Oluhye du alegu-ẹrụ kaka ya jaa nya o-ri ẹla nya ịlẹhị, du ká ọng myị́ ọng ọlẹ wuu kọ bịrị ehile nya Ohe Oluhye ọọwa lee ọ-myị ju ihi nyamwụ kpong-kpong kaka lẹ, kị kaa yẹ akama kwiwa nya ọọwa myị́,

³aalẹ, anyanyị, anụ tị́ me irya kahị ka jẹ́-ẹ bwu be myị́, kọ ri kahị juwa yẹhị da ọchịda ọtụka nya Ohe Oluhye ọlẹ bwee? Ọngọlahị ayịdang la ịlọmwụ a kpa ẹla nya ọchịda ọọwa kaka ya dodehe je angịnyị ehe nya ọgbanyẹ-ọgbanyẹ lẹ. Ọọwa lẹ, angịlẹ kị wo ẹla ọọwa bwu ọnụ nyamwụ, a tịtị ri ibeenu ya jehi yẹkẹẹ, ẹla ọọwa nyị ri nya ịlẹhị lẹlẹ.

⁴Ohe Oluhye la ịlọmwụ dọmwụ ri ibeenu nya angịịwa bwula ọ-kpa ọngịrị ọtụka nyamwụ họ ká angịịwa juwa họ iru nya ang i-ju ẹjẹẹ ịlẹbyẹbyị bala ụma nya ụkụrwọ ẹbyẹbyị ịkịla la datị-datị bala uda nya ẹdụrụ ọhọhọ lụka ọọwa ịnyịnyị bala ọlẹ ká Olegu Ịgọgọ nya Ohe Oluhye hu ọhaha ọ-kpa họ ụkụrwọ nya Ohe Oluhye la datị-datị ha ọng myị́ ọng lẹpwụ nyaa jaabwọ kọ ri irya nyamwụ kaka ba lụka ọọwa ịnyịnyị.

⁵Chajị, a-alegu ẹrụ nya Ohe Oluhye, a ri angịlẹ ká Ohe Oluhye tụụbwọ hi ang myị́ ang ilodehe ọlẹ wuu ju ụ-ụbwọ jaabwọ kaahị ayịdang wẹẹ ya jenu kpong-kpong ka.

⁶Ma, ọkọkọ nya ọọwa lẹ, ị da kpehe ẹ-ẹpwụ nya Ụpwụ Ịgọgọ ẹ-ẹgẹlẹ yẹkẹẹ, “Ịịyẹ ọngịnyị ehe a tị́ ri du ká Ahụ Ohe Oluhye juwa me irya jwoo lụmẹ ịnyị kpong-kpong? Lee, ịịyẹ Ọnyị nya ọngịnyị ehe a tị́ ri kpong-kpong, du kaahụ ayịdang juwa kpẹhị rịrọọ yẹẹyẹẹ ịnyị?

⁷Ahụ Ohe Oluhye a họ du kọ la iwe-ahụrụ ọbẹdẹẹ, gụ iwe-ahụrụ nya alegu-ẹrụ lụka o-kpii kem, chajị ká ka jẹ́-ẹ hwoo hwaa gidogbo kele ka iwe ahụrụ nya ẹbyẹbyị ọtụka bala ihi ọlala nya ịlọng lẹ. [Ọọwa lẹ, A hwoo olegbeju nya ang myị́ ang ịlẹ wuu ká họhọ lẹlẹ.]

⁸Ịnyị, Ahụ Ohe Oluhye a hu ang myị́ ang ịlẹ ká họhọ wuu kaka ji ekpeleji nya ọngịnyị ehe lẹ.” Jaabwọ ká Ohe Oluhye hu ọngịnyị ehe nya olegbeju nya ang myị́ ang wuu ịnyị lẹlẹ, ịngịngịhyẹ á tụtụm hi kọ ji ekpeleji nya ọngịnyị ehe kpong-kpong kaka lẹ ka. Ma, ọlẹẹlẹẹ tị lẹ, áhị́ jẹ́ kpẹhị nyahị yẹ ọ-họ jịra nya ọngịnyị ehe o-ri olegbeju nya ang myị́ ang ịịwa wuu kpong-kpong lẹka.

⁹Ma, ọkẹnẹ-kẹnẹ ri yẹkẹẹ, ahị angịnyị nya Ohe Oluhye wuu lẹ, ahị jẹ́ jam kpẹhị nya olegu nyahị yẹ iJisọsị, ọngọlẹ ká Ohe Oluhye họ lụka o-kpii kọ ka la iwe-ahụrụ ọlẹ kọ la bẹdẹẹ, gụ iwe-ahụrụ nya alegu-ẹrụ nya Ohe Oluhye. Ohe Oluhye kpa iJisọsị ọọwa kele ka iwe-ahụrụ ọbẹdẹẹ, chajị ká iJisọsị ka jẹ́-ẹ bwula ọnahị nya Ohe Oluhye warị kaka gbu igu wọnụ nya ọhọbịrị nya ọng myị́ ọng nyahị ahị angịnyị ehe wuu ju. Ịnyị, Ohe Oluhye a kpa iJisọsị ọọwa kele ka iwe-ahụrụ nya ẹbyẹbyị ọlala bala ihi ọlala ọtụka nya Ohe Oluhye, chajị nya akama nya igu ogbugbu ọọwa ọlẹ kọ gbu wọnụ nyahị ju lẹlẹ.

¹⁰Chajị, Ohe Oluhye ayịdang Ọngọlẹ kọ họ ang myị́ ang wuu bala o-ri Ọngọlẹ kọ juwa wu ang ịịwa wuu kpa, jẹ́ yẹkẹẹ, jaabwọ ká iJisọsị ọọwa nyaa ri Olegbeju Ayịdọchịda Ọtụka nyahị lẹ, nyị chịla ká akama ọyẹyẹ pyii nyaa ka ri ang ọ-ka jẹ́-ẹ chị ọkpẹẹkpẹẹ ọlala jịra nya iJisọsị ọọwa ehe myị́, ene kịị nyị ka jẹ́-ẹ kpa iru nya anyị nya Ohe Oluhye lụmẹ-lụmẹ kaka bá ẹbyẹbyị nya ogbo nya Ohe Oluhye bá la tọọ lẹlẹ.

¹¹Chajị, iJisọsị ayịdang ọngọlẹ kọ hụ́ụhị ahị angịnyị nya Ohe Oluhye cheri-cheri bwu ẹpwụ nya ịhọbịrị ịhọhọ nyahị wuu lẹ, ahị bala ọwa ayịdang lawụlẹ la itiwe nya ọhịhị nyahị bwu ẹga nya Ohe Oluhye Adịda lẹ. Chajị nya ọọwa a du kọ tụtụm ri ang ọ-la iJisọsị ọọwa oyoyi nya ọ-wụrụụhị ahị angịnyị nya Ohe Oluhye ịịwa anyadamwụ kaka lẹlẹ.

¹²Chajị, ị da ẹla oyaya nya iJisọsị ọọwa kpehe ẹ-ẹgẹlẹ yẹkẹẹ, “Am la ịlọm ka ya ẹnyị nyang Ahụ Ohe Oluhye dodehe je anyadam ịkịla ẹ-ẹpwarịrị nya ọjịra-jịra nya angịnyị nyang. M ka gwogbo ha ẹnyị nyang ịnyịnyị.”

¹³Ọ myịmyị ya ẹ-ẹga ọkịla yẹkẹẹ, “Am ayịdang ka hu ọkịlẹtụ nyam dahịhile Ohe Oluhye lẹ.” Ọ myịmyị ya ẹla ọkịla yẹkẹẹ, “Am jam ẹgẹlẹ bala anyị nya Ohe Oluhye ịlẹ kọ tụụbwọ hi jum ụ-ụbwọ lẹ.”

¹⁴Chajị nya ọọwa a du, jaabwọ ká anyị nya Ohe Oluhye ịịwa ri angị la ugbinyịrọ bala ịwọ lẹ, ká iJisọsị ọọwa ayịdang tịtị warị kaka ju abwụma nya ugbinyịrọ ọ-lala ịnya angịnyị ehe ịịwa ịnyịnyị, chajị kọ ka jẹ́-ẹ gbu igu nyọka ta Ohe Onyobyi ọngọlẹ kọ la ọngịrị nya igu ọ-nwụ angịnyị nwụ myị́ ayịreji gbanggbang pyịyọọ lẹlẹ.

¹⁵Ịnyị, iJisọsị ọọwa a gba angịlẹ wuu kị juwa e-ekpeleji nya uhi nya igu ogbugbu ojuju ẹ-ẹpwụ nya ahị ọpyẹpyẹ ọnyị myị ọnyị wuu nya ọhịhị nyaa kpehe hi ori ọchịchị nya Ohe Onyobyi ọọwa lẹlẹ.

¹⁶Chajị, olo nya ụkụrwọ nya ụbwọ ọdada ọlẹ ká ịKịrayịsị kpa warị wẹ odehe ọlẹ lẹ, ó ri chajị nya alegu-ẹrụ nya Ohe Oluhye kpong-kpong ka. Ma, ọkọkọ nya ọọwa lẹ, ọ warị chajị nyọka da anyị nya Ebiraham ụbwọ kem ịnyị.

¹⁷Chajị nya ọọwa a du kọ baba pyii yẹkẹẹ, iJisọsị tịtị ka la abwụma nyahị ahị angịnyị ehe anyadamwụ e-ebwo ọnyị myị ọnyị wuu, chajị kọ ka jẹ́-ẹ ri ọngọ la ahyẹẹrwẹrwa bala ọngọ chịla o-hu ọkịlẹtụ ha, ọlẹ kọ ka ri olegbeju ọgbahị nya angịkiliya nya Ohe Oluhye ẹ-ẹpwụ nya ẹrụ ọmyịmyị nyamwụ lẹlẹ. Ịnyị lẹ, ịKịrayịsị a hu ọhịhị nya ịlọmwụ kpa kaka kịla iya ọ-tụ ibyi nya ịhọbịrị nya angịnyị ehe wuu ha Ohe Oluhye lẹlẹ.

¹⁸Chajị, o-bwula ọlẹ ká ịKịrayịsị ọọwa ayịdang warị kaka yẹ akama odehe ọlẹ bala ọ-la ịmayẹ la datị-datị lala ahị angịnyị ehe ịkịla wuu a du kọọwa ayịdang jẹ́ la ọngịrị, juwa da angịlẹ wuu kị ji ẹpwụ nya ọmayẹ ọlịnyịnyị ụbwọ myị́ lẹlẹ.