Read idege ALA IHIBURU 3 Bible Online

ALA IHIBURU 3 - idege bible

ALA IHIBURU 3

¹Chajị nya ọọwa lẹ, anụ anyadam ịlịgọgọ ẹ-ẹpwụ nya ịKịrayịsị ịlẹ ká Ohe Oluhye be ẹkọ wụrụụnụ ka ẹpwụ nya ogu nya angịlẹ kọ chụchụ ha ịlọmwụ, anụ me irya ju iJisọsị ayịdang ọngọlẹ kọọwa a ri olegbeju ọgbahị ọgụgụ nya alẹrụ ọnyịịla bala o-ri olegbeju ọgbahị ọtụka nya angịkiliya nya Ohe Oluhye ẹ-ẹpwụ nya ẹrụ ọnyịịla nya ọmyịmyị ọlala nyahị ọlẹ kahị lẹẹ ya dodehe wẹẹ!

²IJisọsị ọọwa ri ọngọ chịla o-hu ọkịlẹtụ ha ị-ịlahị nya Ohe Oluhye Ọngọlẹ kọ chwọọ olegbejwọọwa, jaabwọ ká iMosisi tịtị ri ọngọ chịla o-hu ọkịlẹtụ ha ị-ịlahị nya Ohe Oluhye lụka ká Ohe Oluhye hwoo olegbeju nya ọdọdẹpwa nya ẹpwa nya Ohe Oluhye lụka nyamwụ ịnyịnyị lẹ.

³Ma, iJisọsị tị gụ iMosisi ọọwa ẹ-ẹpwụ nya ọchịla-chịla nya ihi nya ogbo ọlala mwụ aba ba, jaabwọ ká ọngọ me ube a tịtị kaa la ihi-ihi gụ ube ọọwa ayịdang.

⁴Chajị, ẹpwang myị́ ẹpwang ọlẹ kahị kaa yẹ wuu lẹ, ọngịnyị ehe a kaa kpa ụbwọ moo pyii lẹ. Ịnyịnyị, Ohe Oluhye a tịtị ri Ọngọ họ ang myị́ ang wuu bala o-ri Ọngọ jam waa kpa lẹlẹ.

⁵IMosisi ọọwa ri ọngọ chịla o-hu ọkịlẹtụ ha ụ-ụwa ọdọdẹpwa nya Ohe Oluhye lala ọnchẹ, chajị ká iMosisi ọọwa ka ri ibeenu dodehe chajị nya ụma nya ala ịlẹ ká Ohe Oluhye juwa tịtọ kọ ka ya dodehe je angịnyị nyamwụ lụka ọlịlahị.

⁶Ma, ịKịrayịsị tị ri ọngọ chịla o-hu ọkịlẹtụ ha ọlẹ kọọwa ayịdang a ri olegbeju nya ọdọdẹpwa nya Ohe Oluhye lala Ọnyẹwẹ nyamwụ. Ó ri kaahị angịnyị nya Ohe Oluhye ịlẹ á ka myị-ị juwa godayị ẹ-ẹpwụ nya ẹla oyaya myị́ nyahị bwula ọmyịmyị ọlala bala ọ-ka juwa kpẹhị ọrịrịị-rịrị ọnyịịla nyahị ọlẹ pwụ ọbaba myị́ lẹ aalẹ, ahị kpangga a ri ube nya Ohe Oluhye ọọwa ọlẹ ká ịKịrayịsị ri olegbeju nyamwụ tị tị lẹlẹ.

⁷Chajị nya ọọwa lẹ, anụ ke ụrụ la ẹla ọlẹ ká Olegu Ịgọgọ ya lẹẹ mẹ. Ọ yẹkẹẹ, “Alẹ, oleeri ọlẹ kanụ wẹẹ wo omyi ẹla nya Ohe Oluhye lẹlẹ,

⁸anụ tụtụm myịmyị juwa ngịrị ọkịlẹtụ nyanụ ọngịrị ẹ-ẹpwụ nya egbeju ọnyọọngịrị ọlala ẹ-ẹga nya ẹla nya Ohe Oluhye, jaabwọ ká adanụ igogo anyị, du agbama ju Ohe Oluhye lụka kị juwa ma Ohe Oluhye yẹ nyọka yoo ye ẹla kem u-ugbileji kaka.

⁹Ụ-ụwa u-ugbileji ọọwa, adanụ igogo anyị a dam Am Ohe Oluhye uya bala o-juwa mam yẹ la ụgbẹyị la datị-datị lẹ. Ọ ri nya ịlẹhị, ịnọ, ị tị́ yẹ ụkụrwọ ẹbyẹbyị bala ijata ojiji nyam Am Ohe Oluhye ọlẹ kam juwa ya chị ehe la ụgbẹyị datị-datị mẹjaa ịnyịnyịịnyị ẹ-ẹpwụ nya ẹka ohu-iye gbẹgbịlẹ lẹ.

¹⁰Ịnyị, bwula ọ-jẹ́-họhọ-ka nyaa ọọwa lẹ, ị du agbama jum lẹ, m wụ ẹjẹ ta aloyi nyaa ọọwa gbee kam byaa yẹkẹẹ, ‘Angịlẹ ayịdang juwa kaa kpa irya onyobyi omeme hụ ọkịlẹtụ nya ịlaa ahị ụka wuu. Ịwa ayịdang á tị nwụlanọ kị ka ba ụgbẹyị nyam jẹ bwula ihi o-jum ju kpong-kpong kaka ịnyịnyị lẹ.’

¹¹Ịnyị a du kaam ayịdang tịtị nwa iro ẹ-ẹpwụ nya agbama ojuju nyam, byaa yẹkẹẹ, ‘Anụ angịwẹ wuu lẹ, anụ́ ka jụ ka ẹpwụ nya ọmwịịnyọ ọlẹ kam nwụla nọ gbenu kpá ẹnẹnẹhẹ kaka lẹlẹ.’ ”

¹²Chajị nya ọọwa lẹ, anụ anyadam ẹ-ẹpwụ nya ịKịrayịsị, anụ cheri kanụ juwa kpahị ju ịlọnụ ọgwọgụ mẹ. Chajị ká ọngọngọhẹ lẹpwụ nyanụ ka ri ọngọ la ọkịlẹtụ onyobyi bwula ọmyịmyị ọlala ka nyamwụ kpong-kpong kaka mẹ. Chajị ọlịnyị ka kpanụ kaka hwahị hi ụgbẹyị nya Ohe Oluhye nyahị ọlẹ kọ juwa hịhị myị́.

¹³Ma, ọkọkọ nya ọọwa lẹ, anụ́-ụ tụtụ juwa ju awụlẹ ọhụ ụka myị́ ụka wuu ẹ-ẹpwụ nya ahị ọpyẹpyẹ ọnyị myị ọnyị ọlẹ kị ka wụrụ ẹnyị nyamwụ yẹkẹẹ, “Alẹ oleeri ọlẹ” ịnyịnyịịnyị mẹ. Chajị ká ọngọngọhẹ lẹpwụ nyanụ ka mwọọgịlẹ ri ọngọ ngịrị ọkịlẹtụ nyamwụ ọngịrị bwula ahị ọhụhụ bala ijẹẹhị nya ọhọbịrị ọhọhọ ọhẹ-lọhẹ kaka mẹ.

¹⁴Chajị, Ohe Oluhye be ẹkọ wụrụụhị kahị ka bá ahị ọwawa nya ịKịrayịsị bá la tọọ, kọ ri kaahị ayịdang á juwa yụbwọ chị eje ọchịchị ọlẹ kahị la lụka nya ọgbanyẹ-ọgbanyẹ ẹ-ẹpwụ nya ọmyịmyị ọlala nyahị ọlẹ kpa ụ-ụwa gogo gbee pwụ ọbaba myị́.

¹⁵Chajị, ị da kpehe ụ-Ụpwụ Ịgọgọ ẹ-ẹgẹlẹ yẹkẹẹ, “Alẹ, oleeri ọlẹ kanụ wẹẹ wo omyi ẹla nya Ohe Oluhye lẹlẹ, anụ ngịrị ọkịlẹtụ nyanụ ọngịrị bwula o-juwa la egbeju-ọngịrị tụ ẹla nya Ohe Oluhye pyịpyị, jaabwọ ká angị inyogo họ lụka nyaa tụtụm kaka.”

¹⁶Oowo anyị a tị́ dọmwụ ri angịlẹ kị wo omyi nya Ohe Oluhye ọọwa, kị la egbeju-ọngịrị ịnyị ene? Ánụ́ jẹ́ ká ala Isirẹlụ ịlẹ kị gba kpehe bwu ọpyị nya Ijipiti lụka ọlẹ ká iMosisi ri olegbeju nyaa ugbeene a ri angị la egbeju-ọngịrị ọọwa ka?

¹⁷Oowo anyị, agbama nya Ohe Oluhye a tị́ wuru jahị da ẹ-ẹpwụ nya ẹka ohu-iye gbẹgbịlẹgbẹ lụka ọọwa ịnyịnyị? Ánụ́ jẹ́ ká angịlẹ kị họ ang onyobyi ba Ohe Oluhye bwu ẹpwarịrị nya ala Isirẹlụ ugbeene a ri angịịwa ka? Ịnyị a du ká egu nya angịịwa wuu juwa chị pata-pata ụ-ụwa u-ugbileji tịtị kwiwa nya ọọwa ka?

¹⁸Oowo anyị, Ohe Oluhye a tị́ nwa iro bwula agbama ojuju nyamwụ lụka ọọwa byaa yẹkẹẹ, nyị́ ka jụ ka ẹpwụ nya ọmwịịnyọ nya ọọwa Ohe Oluhye ọlẹ kọọwa nyị nwụlanọ gbaa kpá ẹnẹnẹhẹ kaka ịnyịnyị? Ánụ́ jẹ́ ká angịlẹ kị myị ju Ohe Oluhye ihi-ka, wuu lụka ọọwa, Ohe Oluhye a nwa iro ọọwa tụ pyịpyị ịnyị ka?

¹⁹Bwula ọọwa, ahị jẹ́ yẹkẹẹ, angịịwa wuu á jụ ka ẹpwụ nya ịnyọ ọmwụmwụ nya Ohe Oluhye ọọwa myị́ kaka. Chajị nya ọmyịmyị ọlala ka nyaa a tị du lẹ.