Read idege ALA IHIBURU 4 Bible Online

ALA IHIBURU 4 - idege bible

ALA IHIBURU 4

¹Chajị nya ọọwa lẹ, ọlẹẹlẹẹ ká iwe-ahụrụ nya ọnụ ọmyịmyị nya Ohe Oluhye ọlẹ kọ myị hahị nyọka jụ ka ẹpwụ nya ọmwịịnyọ nyamwụ ọlẹ kọ nwụlanọ gbehi, hi da hahị wẹẹ lẹ, anụ cheri kahị juwa juhi nya Ohe Oluhye kele kịlahị-ịlahị mẹ. Chajị ká ọngọngọhẹ nyanụ tụtụm ka ri ọngọ ka hi ịbẹ ẹ-ẹpwụ nya iwe-ahụrụ nyọka jụ ka ẹpwụ nya ọmwịịnyọ nya Ohe Oluhye ọọwa kpong-kpong kaka mẹ.

²Chajị, jaabwọ kị kpa ẹrụ ọnyịịla ọlẹ kaka ya jehi lẹẹ lẹ, ịnyịnyị, ị kpa ẹrụ ọnyịịla ọọwa kele kaka ya je angị inyogo ịịwa lẹ. Ma, apyobwuna nya ẹrụ ọnyịịla ọọwa á tị hi pwụ angịịịwa kpong-kpong ka. Chajị, ụka kị wo ẹla ọọwa lẹ, ị́ myị kpa ọmyịmyị ọlala ye ẹrụ ọnyịịla ọọwa ka, a du lẹ.

³Chajị, ahị angị myị la Ohe Oluhye wuu, a ri angị kaa jụ ka ẹpwụ nya ọmwịịnyọ ọọwa ọlẹ ká Ohe Oluhye myị ọnụ nyamwụ hahị lẹ. Chajị, Ohe Oluhye ayịdang ya ene-ene yẹkẹẹ, “Am Ohe Oluhye nwa iro la agbama nyam yẹkẹẹ, ‘Angị ịlaanyị wuu lẹ, ị́ ka jụ ka ẹpwụ nya ọmwịịnyọ nyam ọlẹ kam nwụlanọ gbaa kpá ẹnẹnẹhẹ kaka.’ ” Ọ ri nya ịlẹhị, Ohe Oluhye ya ịnyị! Ma, Ohe Oluhye tị họ ụkụrwọ nyamwụ kpá wuu jịra gbanggbang bwu ọmwụ ọdada nya odehe ọlẹ lẹ.

⁴Chajị, Ohe Oluhye la ịlọmwụ ya ẹla rụ́ ẹnụtụrụ ọharwiye ẹ-ẹpwụ nya Ụpwụ Ịgọgọ ẹ-ẹgẹhẹ yẹkẹẹ, “Ịnyị, Ohe Oluhye a mwụ ịnyọ la ẹnụtụrụ ọharwiye bwu ẹpwụ nya ụkụrwọ ọnyị myị ọnyị ọlẹ kọ họ wuu lẹlẹ.”

⁵Ọ myịmyị ya ẹ-ẹga ọkịla yẹkẹẹ, “Angị ịlaanyị wuu lẹ, ị́ ka jụ ka ẹpwụ nya ọmwịịnyọ nyam ọlẹ kam nwụlanọ gbaa kpá ẹnẹnẹhẹ kaka.”

⁶Chajị nya ọọwa lẹ, ụgbẹyị wụrụ da dodo dụwa gbe angịhyẹ pyịyọọ daalẹ nyọka jẹ́-ẹ jụ ka ẹpwụ nya ọmwịịnyọ nya Ohe Oluhye ọọwa wẹẹ! Angịlẹ kị wo ẹrụ ọnyịịla ọọwa nya ọgbanyẹ-ọgbanyẹ lẹ, ịwa ayịdang á jụ kele ka ẹpwụ nya ọmwịịnyọ ọọwa myị́ kaka. Chajị nya ihi ojuju-ka nyaa a tị du lẹ.

⁷Ma, Ohe Oluhye tị myịmyị hu ụka ọhẹ nọ myịmyị pyịyọọ dụwa gbe angịnyị ehe, ọlẹ kọ wụrụ ẹnyị nyamwụ yẹkẹẹ, “Alẹ oleeri ọlẹ,” du kọ ya ẹla ọọwa bwu ọnụ nya iDevidi lụka onyogo nọ gbe ụka ọlịlahị ọlẹ kahị ya ẹla ọọwa dọmwụ dodehe ụgwọhẹ lẹ. Ẹla ọọwa yẹkẹẹ, “Alẹ oleeri ọlẹ, ká wẹẹ wo omyi ẹla nya Ohe Oluhye wẹẹ lẹ, a ngịrị ọkịlẹtụ nyang ọngịrị juwa tụ ẹla ọọwa pyịpyị kpong-kpong kaka.”

⁸Chajị, ó ri ká ọlẹ ká iJochuwa kpa ala Isirẹlụ pwụ ọpyị nya ọnụ ọmyịmyị nya Ohe Oluhye ugbeene kpangga, kọ ri ịnyọ ọmwụmwụ nya Ohe Oluhye ọọwa lẹ, ịnọ, Ohe Oluhye á tụtụm myịmyị ka ya ẹla rụ́ ẹnụtụrụ ọkịla ọlịlahị ọhẹ chajị nya ọmwịịnyọ kaka.

⁹Chajị nya ọọwa lẹ, iwe-ahụrụ nya ọmwịịnyọ nya Ohe Oluhye hi da hahị ahị angịnyị nya Ohe Oluhye, kahị ka jụ ka ẹpwụ nyamwụ alẹ ịnyịnyị wẹẹ!

¹⁰Chajị, ọng myị́ ọng ọlẹ kọ jụ ka ẹpwụ nya iwe-ahụrụ nya ọmwịịnyọ nya Ohe Oluhye ọọwa lẹ aalẹ, ọngọọwa tịtị kaa mwụ ịnyọ bwu ẹpwụ nya ịlọmwụ ọnwụnwụ la ụkụrwọ ọhọhọ, jaabwọ ká Ohe Oluhye ayịdang mwụ ịnyọ bwu ẹpwụ nya ụkụrwọ nya ịlọmwụ ọhọhọ ịnyịnyị lẹ.

¹¹Chajị nya ọọwa lẹ, anụ cheri kahị juwa maga nya ịlẹhị-ịlẹhị, chajị kahị ka jụ ka ẹpwụ nya iwe-ahụrụ nya ọmwịịnyọ ọlala nya Ohe Oluhye ọọwa mẹ. Chajị, ká ọngọngọhẹ lẹpwụ nyahị wuu a tụtụm ka ri ọngọ ka hi ịbẹ nyọka jụ ka ẹpwụ nya iwe-ahụrụ nya ọmwịịnyọ ọọwa bwula ihi ojuju-kaka lẹ ka mẹ.

¹²Chajị, ẹla nya Ohe Oluhye ayịdang ri ẹla ọlẹ kọ la ọhịhị bala ọ-la ọngịrị lụmẹ bala oliri manya-manya, dọmwụ gụ oge ọlahị imiiye wẹẹ. Chajị, ẹla nya Ohe Oluhye ọọwa kaa be pyịị kele ka ẹpwụ nya odu lajẹ nya ugbodu okpukpuru bala olegu ọlẹpwụ nya ọngịnyị ehe bala ọ-kaa pwụ ẹpwụ nya ẹdịrẹ nya ọngịnyị ehe ọnyị myị ọnyị wuu kele ka ẹpwụ nya ịmachị ọlẹpwụ nya ukpunogu nyamwụ bala ẹla ọọwa ọ-kaa jẹ́ irya bala imahị ịbaa-ịbaa ịlẹpwụ ọkịlẹtụ nya ọngịnyị ehe wuu gbanggbang myị́ ịnyịnyị.

¹³Chajị, ị-ịlahị nya Ohe Oluhye ayịdang lẹ, ịngịngịhyẹ ọlẹ wuu kọọwa ayịdang kpa ụbwọ nya ịlọmwụ họhọ wuu, á jẹ́-ẹ kpịbaa hyoo myị́ kaka. Ma, ang myị́ ang wuu chajị nyahị, ahị angịnyị ehe ri ang ọ-da dodo gbooloo ha egbahị nya Ohe Oluhye, Ọngọlẹ ká ọng myị́ ọng lẹpwarịrị nyahị wuu ka kele kaka ya ang ọlẹ kahị họ wuu dodehe ị-ịlahị nyamwụ pyii.

¹⁴Jaabwọ kaahị angịnyị nya Ohe Oluhye la olegbeju ọgbahị ọgụgụ wuu nya alegbeju nya angịkiliya nya Ohe Oluhye, ọlẹ kọ ri iJisọsị Ọnyẹwẹ nya Ohe Oluhye ụ-ụwa ẹ-ẹga ịgọgọ ọtụka olepwoohe lẹlẹ, anụ cheri kahị juwa yụbwọ chị ọmyịmyị ọlala nyahị ọlẹ kahị lẹẹ ya dodehe kpa ụ-ụwa gogo pyịyọọ mẹ.

¹⁵Chajị, olegbeju ọgbahị ọkịla iya nyahị ọọwa ayịdang á ri ụma nya ọngịnyị ọlẹ kọ kaa yẹ ahyẹẹrwẹrwa u-uhye nya ọdẹwụ ọdẹwụ nyahị ahị angịnyị nyamwụ myị́ kpong-kpong ka lẹ ka. Ma, ọkọkọ nya ọọwa lẹ, ọwa ayịdang ri ụma nya ọngọlẹ kọ ju ka ẹpwụ nya ịmayẹ myị́ ịmayẹ ịnyị myị́ ịnyị wuu lala ahị ayịdang. Ma, ọwa ayịdang á tị họ ang onyobyi ọhẹ-lọhẹ kpong-kpong ka.

¹⁶Chajị nya ọọwa lẹ, anụ cheri kaahị angịnyị nya Ohe Oluhye a kpa ẹjẹ ọbyịbyị, juwa be pyịị tụ kele kịlahị nya ẹchị Adịrahụ nya ọnahị nya Ohe Oluhye chajị kahị ka bwula ahyẹẹrwẹrwa bala ọnahị nya Ohe Oluhye ye ụbwọ ọdada bwu ẹga nyamwụ lụka ọbaba ha ịlọhị ẹ-ẹpwụ nya ị-tụ pyịpyị nya ọhịhị nyahị ọlẹ mẹ.