Read idege ALA IHIBURU 5 Bible Online

ALA IHIBURU 5 - idege bible

ALA IHIBURU 5

¹Ọng myị́ ọng ọlẹ kọ kaa ri olegbeju ọgbahị nya angịkiliya nya Ohe Oluhye wuu lẹ, ị kaa chụ ọngọọwa chụ bwu ẹpwarịrị nya angịnyị ehe aanamwụ. Chajị ká ọngọ ọlịnyị ka ri ọngọ godayị rịrị apewa nya Ohe Oluhye bala angịnyị ehe, juwa kpa ọhaha bala iya ọkịlaakịla kele kịlahị nya Ohe Oluhye wọnụ nya ịhọbịrị nya angịnyị nya angịkịla ju.

²Olegbeju ọgbahị nya angịkiliya nya Ohe Oluhye ọlịnyị kaa ri ọngọ kpa olegu ọdụmwọ la ugbodu ojuju ẹ-ẹga nya angịlẹ kị kaa họ ang onyobyi bwula ẹla ọ-jẹ́ họhọ-ka nyaa lee o-bwula ahị ọhụhụ nyaa wuu. Chajị, ọwa ayịdang tịtị jẹ́ yẹkẹẹ, ugbinyịrọ ọdẹwụ-dẹwụ nya ọhọbịrị ọhọhọ, ọwa ayịdang nyaa kpa ụ-ụwa ịnyịnyị lẹ.

³Chajị nya ọlịnyị kpangga, a du kọọwa ayịdang tịtị kaa kịla iya wọnụ nya ịhọbịrị nya ịlọmwụ ju pyii ịnyịnyị, jaabwọ kọ kaa kịla iya wọnụ nya ịhọbịrị nya angịkịla wuu ju ị-ịlahị nya Ohe Oluhye lẹ.

⁴Ọngọngọhẹ á tị juwa ọlẹ kọ kaa me ịlọmwụ ụchụ, juwa hu ihi nyọka ri olegbeju ọgbahị nya angịkiliya nya Ohe Oluhye chụ ịlọmwụ kpong-kpong ka. Ma, Ohe Oluhye ayịdang kpangga a kaa chụ ọngọ ọlịnyị chụ la ịlọmwụ jaabwọ kọ chụ Erọn lụka nya ọgbanyẹ lẹ.

⁵Ịnyịnyị, ọ tịtị la ẹ-ẹga nya ịKịrayịsị lẹ. Ọ-ọwa ayịdang a kpa ịlọmwụ ka iwe-ahụrụ oluhye kaka ri olegbeju ọgbahị nya angịkiliya nya Ohe Oluhye wuu ka! Ma, Ohe Oluhye ayịdang a chụ ịKịrayịsị kpa kele ka iwe-ahụrụ oluhye ọọwa lẹ. Chajị, Ohe Oluhye ya ẹla rụ́ ịKịrayịsị ẹ-ẹgẹlẹ yẹkẹẹ, “Ahụ kpakpakpa a ri Ọnyẹwẹ nyam lẹ. Alẹ, oleeri ọlẹ, Am Ohe Oluhye a mang lẹ.”

⁶Ohe Oluhye myịmyị ya ẹ-ẹga ọkịla yẹkẹẹ, “Ahụ ayịdang a ri olegbeju ọgbahị o-gbe oyi myị́ oyi nya angịkiliya nya Ohe Oluhye, jaabwọ ká iwe-ahụrụ nya olegbeju ọkịla iya nya iMelikisẹdẹkị la lẹlẹ.”

⁷Lụka ọlẹ ká iJisọsị ri ọngịnyị ehe jam odehe ọlẹ wẹẹ lẹ, ọ kaa kpa abwọ ọrịrị bala ọbịlẹ-bịlẹ nyamwụ la egbejida ẹ-ẹhị lomyi o-gboo ka ẹga nya Ohe Oluhye Ọngọlẹ kọ ri Ọngọ ka la ọngịrị chọọ da bwu ẹpwụ nya igu ogbugbu myị́. Ohe Oluhye ayịdang wo omyi nya iJisọsị ọọwa chajị nyọlẹ kọ kpa uhi nya Ohe Oluhye ojuju họ ang myị́ ang nyamwụ wuu.

⁸Ọ ri nya ịlẹhị, iJisọsị lẹ, ịnọ, Ọnyẹwẹ nya Ohe Oluhye, ọ ri lẹ. Ma, bwula akama ọlẹ ká iJisọsị yẹ pyii, a tị du kọ jẹ́ ang ọlẹ ká ihi nya Ohe Oluhye ojuju ri kpangga lẹ.

⁹Ịnyị, ụka ká akama ọyẹyẹ nya iJisọsị ọọwa chị ọkpẹẹkpẹẹ ọlala jịra nyamwụ ehe gede-gede kpá lẹ, ọwa ayịdang a ri olegbeju nya ọchịda o-gbe oyi myị́ oyi nya Ohe Oluhye ha angịnyị ehe ịlẹ wuu kị ka myị juwa ju ihi nyamwụ lẹlẹ.

¹⁰Chajị, Ohe Oluhye ayịdang hu ẹnyị nya olegbeju ọgbahị ọgụgụ nya angịkiliya o-gbe oyi myị́ oyi nya Ohe Oluhye ha iJisọsị ọọwa, jaabwọ ká iwe-ahụrụ ọlịnyị ji ha iMelikisẹdẹkị onyogo lẹ.

¹¹Ịnọ, ahị la iru nya ala lụmẹ-lụmẹ ka ya jenu u-uhye nya ẹlẹwẹ myị́ wẹẹ. Ma, ẹla ọọwa tị ka la ujwo la ọdawụlẹ ya jenu lụmẹ, chajị, ụrụ nyanụ ri ụrụ akpọlọ lẹ, ánụ ka wo ka.

¹²Chajị, ịnọ, amachanyị ọlẹ lẹ, ọ chịla kaanụ ayịdang a ka ri ịtịcha ị-ka juwa mẹ ẹla nya Ohe Oluhye jẹ angịkịla myị́ lẹ. Ma, ọkọkọ nya ọọwa lẹ, anụ tị mwọọgịlẹ juwa ẹ-ẹpwụ nya i-iwe ahụrụ ọlẹ ká angịkịla a ka ri angị juwa mẹ ala ịdọmwụ nya ọgbanyẹ-ọgbanyẹ ẹ-ẹpwụ nya ẹla nya Ohe Oluhye jẹẹnụ myịmyị daalẹ wẹẹ. Ọkọkọ nyọlẹ kị ka kpanụ la ang oriri ọlam-ọlam nya ẹla nya Ohe Oluhye lẹ, anụ myịmyị juwa iwe-ahụrụ nya ẹmẹ ọnyẹnyẹ ẹ-ẹpwụ nya ẹla nya Ohe Oluhye daalẹ wẹẹ.

¹³Chajị, ọng myị́ ọng ọlẹ kọ juwa kpa ẹmẹ nya ẹla nya Ohe Oluhye nyẹ kem wẹẹ aalẹ, ọngọọwa ri ọngọ jẹ́ ịngịngịhyẹ chajị nya abwẹla ọnyịịla nya Ohe Oluhye lẹka. Chajị, ọngọ ọlịnyị ri ọnyị onjwo ochiche ẹ-ẹpwụ nya ẹla nya Ohe Oluhye wẹẹ.

¹⁴Ma, ang oriri ọnyọọngịrị ẹ-ẹpwụ nya ẹla nya Ohe Oluhye ri ang nya angịlẹ kị ri angịgbahị ẹ-ẹpwụ nya ẹla nya Ohe Oluhye lẹ. Chajị, ịwa ayịdang juwa kpa ihi nya ẹla nya Ohe Oluhye ojuju nwụ abwẹla nya ịlaa rịrị bwula o-juwa kpa ẹla ọọwa họ ụkụrwọ ịnyịnyịịnyị, gbee kịịwa ayịdang ri angị jẹ́ juwa gu ang ọnyịịla bala ang ọtịpyọ ene hi awụlẹ datị myị́ lẹ.