Read idege ALA IHIBURU 6 Bible Online

ALA IHIBURU 6 - idege bible

ALA IHIBURU 6

¹Chajị nya ọọwa lẹ, ang ịmẹjẹ nya ọgbanyẹ-ọgbanyẹ ịlẹ ká ịKịrayịsị mẹjẹẹhị chajị nya ọngịnyị nya Ohe Oluhye oriri wuu lẹ, anụ myị kahị ya ẹta báa beji, kahị juwa rụnyẹ nya iwe-ahụrụ nya ọngọgbahị oriri ẹ-ẹpwụ nya ẹla nya Ohe Oluhye ọlẹ ugbẹnyị mẹ. Lẹ, ahị myịmyị tụtụm juwa tịrẹkpẹ kele kaka da itiwe nya irya ọyẹda bwu ẹpwụ nya ụkụrwọ i-ju apyobwuna-ka nya ịhọbịrị ịhọhọ nyahị, myịmyị lẹẹlẹẹ kaka. Lee, ọ-ka juwa da itiwe nya ọmyịmyị ọlala ẹ-ẹga nya Ohe Oluhye onyeewe alẹ kaka.

²Lee, ọ-ka juwa da itiwe nya ang ọmẹjẹ onyeewe chajị nya ụma nya enyi Ohe ọhụhụ la datị-datị alẹ kaka. Lee, ọ-da itiwe nya ang ọmẹjẹ u-uhye nya ụbwọ ọnịrọ angịnyị ehe la abwọ ọrịrị onyeewe myịmyị alẹ kaka. Lee, ọ-da itiwe nya ọmẹjẹ onyeewe chajị nya owuleji bwula igu nya angị gbugbu alẹ kaka. Lee, ọ-da itiwe nya ọmẹjẹ u-uhye nya eje o-gbe oyi myị́ oyi nya Ohe Oluhye ọlala onyeewe alẹ kaka ịnyịnyị.

³Lẹ, anụ cheri kahị juwa nwa kịlahị-ịlahị mẹ. Ọọwa kpangga, a ri ang ọlẹ kahị ka họ bwula ụbwọ ọdada nya Ohe Oluhye lẹlẹ.

⁴Chajị, angịlẹ kị la ahịgboo nya ẹla nya Ohe Oluhye wuu ene kịị ji ẹkpẹ da Ohe Oluhye lẹ aalẹ, ọ́ ka jẹ́-ẹ chịkpẹẹ haa nyọka myịmyị jẹ́-ẹ tịrẹkpẹ wẹ ẹpwụ nya irya ọyẹda myị́ kaka. Chajị, angị ịlịnyị ri angịlẹ kị kpa ọgahị ọnahị nya Ohe Oluhye ọlẹ kọ ya du bwu epwoohe waa, ka ọnụ nyaa yẹ, jaabwọ kọ la bala ọ-la ebwo nya ahị ọwawa nya Olegu Ịgọgọ nya Ohe Oluhye ẹnẹhẹ lẹ.

⁵Bala angịịwa tị kpa ọhaha nya ẹla nya Ohe Oluhye bala ọngịrị nyamwụ ọlẹ ká Ohe Oluhye juwa ka ya chị ehe ị-ịlahị ka ọnụ nyaa yẹ jaabwọ kọ la ịnyịnyị lẹ.

⁶Lẹ, ó ri ká ụma nya angịnyị ịlịnyị á ji ẹkpẹ nyaa da Ohe Oluhye rụ kaka họ ang onyobyi bọọ ene lẹ aalẹ, jaabwọ kịịwa ayịdang bwula ọhọbịrị ọhọhọ nyaa ịịwa, juwa ma Ọnyẹwẹ nya Ohe Oluhye gu iloo ba okoji ụka oheeye bala ọ-chị oyoyi ju ẹnyị nya ịKịrayịsị ị-ịlahị nya angịnyị ehe lẹlẹ, ọ ka la ujwo ha angị ịlịnyị nyọka jẹ́-ẹ tịrẹkpẹ nya ka ẹpwụ nya iwe-ahụrụ nya irya ọyẹda lẹ.

⁷Chajị, jaabwọ ká ọpyị ọlẹ kọ juwa kaa ye enyi ododo mile ịnyịnyịịnyị, kọ myị-ị bwu apwụ iriri ịlẹ kị ju apyobwuna ha angị wu ẹrụ u-uhye nyamwụ kpehe kaa la ahị ọwawa o-bwu ẹga nya Ohe Oluhye bwula ọọwa wẹẹ, ịnyịnyị, ahị ọwawa nya ẹla nya Ohe Oluhye a tịtị la lẹlẹ.

⁸Ma, ọ́ tị ri ká ọpyị ọlịnyị á tị mwọọgịlẹ bwu ejwo bala ịkpẹẹ kpehe bwu ụwa lẹ aalẹ, ọpyị ọọwa á tị tị ju apyobwuna nya ịngịngịhyẹ kpong-kpong kaka. Aalẹ, ọpyị ọlịnyị juwa ẹ-ẹpwụ ọnụ nya ọlọ owuwu nya Ohe Oluhye lẹ. Aalẹ, ụka ohyẹẹkpẹ nyamwụ ka ri ila ọ-ka jwọọ jụ hụrụ pyịyọọ kem. Ịnyịnyị, ọ ka la ha angịlẹ wuu kị juwa wo ẹla nya Ohe Oluhye hụrụ lẹlẹ.

⁹Ma, anụ angịlẹ kanụ háahị lụmẹ lẹ, ọ ri nya ịlẹhị, ahị ya ala ịwẹ kpá odu ịnyị, ahị jẹ́ nya ịlẹhị-ịlẹhị yẹkẹẹ, ẹ-ẹga nyanụ anụ lẹ, ụma nya ang ịlẹ kị ri ang ịnyịịla ihiigu há ịlẹ kị kaa ba ọchịda nya Ohe Oluhye jẹ lẹ, anụ laa wuu juwa lẹ.

¹⁰Chajị, Ohe Oluhye ayịdang á ri ọlabwẹla onyobyi kpong-kpong ka. Lẹ, ụkụrwọ ọlẹ kanụ wẹẹ họ wuu bala ọháha nya ịlẹhị-ịlẹhị ọlẹ kanụ wẹẹ la ẹ-ẹga nya Ohe Oluhye bwula ẹrụ ọmyịmyị ha angị ịgọgọ nya Ohe Oluhye wuu ịnyịnyịịnyị pyịyọọ daalẹ lẹ, Ohe Oluhye á ka jẹ́-ẹ deeri nyaa kpong-kpong kaka.

¹¹Ang ọlẹ kọ háahị u-uhye nya ọng myị́ ọng lẹpwarịrị nyanụ kanụ ka họ ri kanụ ka juwa kpa ila ọchịchị họ ụkụrwọ ọọwa nya ịlẹhị-ịlẹhị kịlahị-ịlahị ẹ-ẹpwụ nya ọ-jẹ́ myịmyị nya ịlẹhị-ịlẹhị ọlẹ kanụ la u-uhye nya ẹhị ọrịrịị-rịrị ọnyịịla nyanụ ọwẹ.

¹²Chajị kanụ ka ri angịnyị ịtụbwọ kpong-kpong ka. Ma, kanụ ka ri angị juwa ba ọgụ-ẹpẹtẹ ọnyịịla nya angịlẹ wuu kị juwa kpa ọmyịmyị ọlala bala ugbodu ojuju nyaa ye ugu nya ọ-họ jịra nya ọnụ ọmyịmyị ịlẹ wuu ká Ohe Oluhye myị ha angịnyị nyamwụ jẹ yẹẹyẹẹ mẹ.

¹³Chajị, ụka ọlẹ ká Ohe Oluhye myị ọnụ ha Ebiraham ugbeene lẹ, jaabwọ ká ọngọngọhẹ ọkịla á juwa, ọlẹ kọ gụ Ohe Oluhye, kpụ, Ohe Oluhye ka kpa ẹnyị nya ọngọọwa nwa iro kaka lẹlẹ, ẹnyị nya ịlọmwụ ọ-kpa nwa iro ha Ebiraham lẹ.

¹⁴Ọ nwa iro ọọwa yẹkẹẹ, “Nya ịlẹhị-ịlẹhị ịnyị, ẹ-ẹpwụ nya ahị ọwawa wuu, m ka wahị kụrụng ahụ Ebiraham. Ẹ-ẹpwụ nya ọpyẹpyẹ wuu, m tị ka họ ká ka pyẹ ịnyịnyị.”

¹⁵Ịnyị, lụka ọlẹ ká Ebiraham ọọwa kpa ugbodu ojuju onyudiyo ju ihi nya Ohe Oluhye lẹ, ọ ye ọ-họ jịra nya ọnụ ọmyịmyị ọọwa ịnyịlẹhị lẹlẹ.

¹⁶Ẹ-ẹga nyahị ahị angịnyị ehe lẹ, nya ịlẹhị ịnyị, ẹnyị nya ọngọlẹ kọ lụmẹ gụụhị ahị ayịdang, ahị kaa kpa nwa iro lẹ. Ụka ọlẹ ká angịnyị ehe á tị chị awụlẹ ẹla lẹ aalẹ, iro ọnwanwa a kaa ri ang ọ-kpa yụbwọ ju ụpwụ ẹ-ẹpwụ nya ẹla nya ịlẹhị oyaya lụka ọlịnyị lẹlẹ.

¹⁷Ịnyị a du, lụka ọlẹ ká Ohe Oluhye tịtị tịtọ kọ ka họ ká angịlẹ wuu kọ myị ọnụ haa nyọka ri ugu nya ọnụ ọmyịmyị nyamwụ ọlẹ kọ kaa yẹda kpong-kpong ka bala obyi omeme nya ịlẹhị-ịlẹhị nyamwụ lẹ, kọ tịtị kpa iro ọnwanwa chị, ọnụ ọmyịmyị ọọwa ọmwụ weeji ịnyịnyị lẹlẹ. Ọ họ ịnyị, chajị kị ka jẹ́ yẹkẹẹ, nyị ri ẹla nya ịlẹhị ọpyịyọọ lẹlẹ.

¹⁸Bwula ang imimiiye ịlẹ kị ri ọnụ ọmyịmyị ọyẹda-ka bala iro ọnwanwa ọyẹda-ka nya Ohe Oluhye, ịlẹ kị bwu ẹga nyamwụ Ọwa Ọngọ kaa me ọnọọkịla kaka wẹẹ, ị họ kaahị angịlẹ wuu kahị rụnyẹ kaka kpịbaa ẹ-ẹga nya Ohe Oluhye lẹ, ka jẹ́-ẹ la ẹjẹ ọkpụ́kpụ ọtụka, chajị kahị ka jẹ́-ẹ yụbwọ chẹhị ọrịrịị-rịrị ọnyịịla ọlẹ kị wụrụụhị kaka ye lẹẹ gogo.

¹⁹Ẹhị ọrịrịị-rịrị ọnyịịla ọọwa kpangga, a ri ang o-wu ugbodu okpukpuru nyahị kpa giri-giri ẹ-ẹpwụ nya ọ-jẹ́ myịmyị ọlala nyahị lẹ. Ẹhị ọrịrịị-rịrị ọọwa a tị kaa kpahị be pyịị kele kpoye nya apwụ okeke olube ịgọgọ ọtụka nya Ohe Oluhye olepwoohe kele ka ijata ịgọgọ nya Ohe Oluhye ayịdang kpangga myị́ ịnyịnyị lẹlẹ.

²⁰Ụ-ụwa kpangga, iJisọsị ayịdang ọngọ ri ịmatata nyahị, a rụ ji ịlahị nyahị kele kaka godayị rịrị ku ọmwakpa nyahị ị-ịlahị nya Ohe Oluhye lụka ọlẹ kọ ye ẹnyị oriri nya olegbeju ọgbahị nya angịkiliya ọpyịyọọ nya Ohe Oluhye lala okoji ahụrụ nya iMelikisẹdẹkị kpá lẹlẹ.