Read idege ALA IHIBURU 7 Bible Online

ALA IHIBURU 7 - idege bible

ALA IHIBURU 7

¹ỊMẹlikisẹdẹkị ọwẹ ayịdang ri Adịrahụ nya ala ịSalẹm. Ọwa myịmyị ri olegbeju ọkịla iya nya Ohe Oluhye Agụgụ Ọtụka ịnyịnyị lẹ. Ọwa tọ Ebiraham ụ-ụgbẹyị lụka ọlẹ ká Ebiraham juwa jẹ nya bwu ẹwụ ọlẹ kọ nwụ iru nya ịdịrịhụ ịhyẹ lẹ. ỊMẹlikisẹdẹkị ọọwa wahị kụrụ Ebiraham ụka ọọwa.

²Ọwa-à ri ọngọlẹ ká Ebiraham hu ebwo ọhẹ ẹ-ẹpwụ nya ebwo iwo chiriri nya ang myị́ ang nyamwụ ọlẹ kọ la ha lụka ọọwa ịnyịnyị lẹ. Etu nya iMelikisẹdẹkị ọwẹ ri Adịrahụ nya abwẹla ọnyịịla, ene kị myịmyị-ị̀ wụrwọọ Adịrahụ nya ịSalẹm ọlẹ ká etu nyamwụ ri, Adịrahụ nya okpunyi.

³ỊMẹlikisẹdẹkị ọọwa lẹ, ọ́ la adịda lee ịnịna ka lee ọ-la ego ogbegbe nya adịda igogo ị-mọọ ma, lala angịnyị ehe ịkịla kpong-kpong ka. Ọhịhị nya iMelikisẹdẹkị ọọwa á la ọmwụ ọdada ka. Ọ tị la ọbaba datị, lala angịnyị ehe angịkịla ka, ịnyịnyị. Jaabwọ ká iMelikisẹdẹkị ọọwa lala Ọnyẹwẹ nya Ohe Oluhye lẹ, iwe-ahụrụ nya olegbeju ọkịla iya oriri nyamwụ ọọwa juwa pyịyọọ gbe oyi myị́ oyi.

⁴Anụ tị́ yẹ jaabwọ ká iMelikisẹdẹkị ọọwa ri ọngọ ọtụka lụmẹ kaka ba wẹ lẹ. Ịnyị a du ká Ebiraham ọlẹ kọ ri adịda ogogo nyahị ahị ala iJuu wuu nwụ ebwo ọhẹ ẹ-ẹpwụ nya ang iwo chiriri ha iMelikisẹdẹkị ọọwa bwu ẹpwụ nya ang ịlẹ kọ go kpa rụ bwu ẹwụ ugbeene lẹ.

⁵Angịlẹ kị ri alimwawụ nya iLivayị ịlẹ ká Ohe Oluhye hu iwe-ahụrụ nya olegbeju ọkịla iya nyamwụ oriri ju ụ-ụbwọ lẹ, ị byaa ẹ-ẹpwụ nya ehile nya iMosisi yẹkẹẹ, ịwa nyaa ka ri angịlẹ ká anjwo nya ala Isirẹlụ ịkịla wuu ịlẹ kị ri anyị nya Ebiraham lala ịwa-ịwa nyị ka juwa nwụ ebwo ọhẹ ẹ-ẹpwụ nya ang iwo chiriri nyaa wuu ha lẹlẹ.

⁶Ma, iMelikisẹdẹkị ọlẹ kọọwa ayịdang á tị bwu imwawụ nya ala iLivayị ịịwa wẹwẹ kpong-kpong ka lẹ, ọ tị ye ebwo ọhẹ bwu ẹpwụ nya ang iwo chiriri bwu ẹga nya Ebiraham ọlẹ kọọwa ayịdang a ri ọngọlẹ ká Ohe Oluhye myị ọnụ nya ahị ọwawa nyamwụ wuu ha tị!

⁷Ọ la gbadaa hahị wuu yẹkẹẹ, ọngọlẹ ká iwe-ahụrụ nyamwụ á la uhye gidogbo gụ ịnya ọngọkịla, pyii, a kaa kpa ọnụ nya ịlọmwụ wahị kụrụ ọngọlẹ kọ ji ekpeleji nyamwụ i-iwe ahụrụ lẹ.

⁸Ala iLivayị ịlẹ kị kaa ye ebwo ọhẹ ẹ-ẹpwụ nya ang ebwo iwo bwu ẹpwụtụbwọ nya ala Isirẹlụ ịkịla lẹ, ịwa ayịdang ri angị kaa gbugbu myị́. Ma, iMelikisẹdẹkị ọngọlẹ kọ tị ye ebwo ọhẹ ẹ-ẹpwụ nya ebwo iwo chiriri nya Ebiraham lẹ, ọ juwa hịhị pyịyọọ, jaabwọ ká ibeenu oriri nya Ụpwụ Ịgọgọ ya chajị nyamwụ.

⁹Ahị dọmwụ ka la ọngịrị ya dodehe yẹkẹẹ, iLivayị ọọwa ayịdang ọlẹ ká anyị nyamwụ a ri angị kaa ye ebwo ọhẹ ẹ-ẹpwụ nya ebwo iwo chiriri bwu ẹpwụtụbwọ nya ala Isirẹlụ ịkịla wuu lẹ, ọwa ayịdang nwụ ebwo ọhẹ ẹ-ẹpwụ nya ebwo iwo chiriri ha iMelikisẹdẹkị ịnyịnyị, bwula ọlẹ ká Ebiraham adamwụ ogogo nwụ ene-ene kị mọọ lẹ.

¹⁰Chajị, iLivayị ọọwa ayịdang juwa ẹ-ẹpwụ nya Ebiraham adamwụ ogogo lụka ọlẹ ká iMelikisẹdẹkị bala Ebiraham yẹ awụlẹ ugbeene.

¹¹Ó ri ká ụkụrwọ ọlẹ ká angịkiliya nya Ohe Oluhye ịlimwawụ nya iLivayị họ lụka nyaa ọlẹ kọ ri ụka nya ehile nya Ohe Oluhye ọlẹ kọ hu ha ala Isirẹlụ, á nwa ụga lẹ, ịnọ, anụ ya ká Ohe Oluhye tụtụm myịmyị ka chụ ọngọkiliya ọkịla ọlẹ kọ ka ji okoji ahụrụ ọ-lala ịnya iMelikisẹdẹkị myịmyị, ọkọkọ nya ọngọkiliya ọlẹ kọ ka ji okoji ahụrụ nya Erọn adịda ogogo nya angịkiliya ọlimwawụ nya iLivayị tụtụm wẹẹ?

¹²Jaabwọ ká Ohe Oluhye ayịdang jẹ́ yẹkẹẹ, nyi ri ang ọbaba kọọwa nyị ka nyẹ iwe-ahụrụ onyogo nya alegbeju ikịla iya nya ọọwa ugọyị wẹ pyii lẹlẹ, ịnyịnyị, ọ tịtị baba kị ka nyẹ ehile onyogo ọlaanyị ugọyị pyii tịtị lẹlẹ.

¹³Chajị, Ọngọlahị iJisọsị ọlẹ kị ya ala ịwẹ wuu me ụchụ ka ẹga nyamwụ lẹ, ọwa ayịdang bwu imwawụ ọkịla ọlẹ ká ọngọngọhẹ lẹpwụ nya alimwawụ nyamwụ ọwa á myị ẹrụ nya iya ọkịlaakịla ọlịnyị ha Ohe Oluhye ẹnẹnẹhẹ ene lẹka.

¹⁴Chajị, ọ la gbadaa yẹkẹẹ, imwawụ nya iJuda ọlẹ ká Ọngọlahị iJisọsị bwu kpehe lẹ, iMosisi á ya ẹlẹlẹhẹ rụ́ alimwawụ ọọwa yẹkẹẹ, nyị ka ri angị juwa myị ẹrụ lala angịkiliya nya Ohe Oluhye kpịlọ kpong-kpong ka.

¹⁵Ẹla ọlẹ myịmyị dọmwụ juwa la gbadaa gụ olene-ene, lụka ọlẹ kahị yẹ jaabwọ ká olegbeju ọkịla iya nya Ohe Oluhye, ọ la okoji ahụrụ nya iMelikisẹdẹkị myịmyị ji lẹẹlẹẹ lẹ.

¹⁶Chajị, ị hu ọngọọwa ọlẹ kọ ri iJisọsị olegbeju ọkịla iya onyeewe nya Ohe Oluhye ọọwa bwula ọngịrị nya ehile ọlẹ ká angịnyị ehe kaa bajẹ ene kị kaa kpa ọngịnyị ehe kele ka iwe-ahụrụ olegbeju ọkịla iya ọlịnyị oriri kpong-kpong ka. Ma, ọngịrị nya ehile nya ọhịhị nya Ohe Oluhye ọlẹ kọ kaa juwa pyịyọọ a ri ang ọlẹ kị kpa chwọọ kele ka iwe-ahụrụ ọọwa lẹ.

¹⁷Chajị, ịKịrayịsị ọọwa ayịdang a ri ọngọlẹ ká Ohe Oluhye ri ibeenu dodehe lẹẹ ẹ-ẹgẹlẹ lẹ. Ọ yẹkẹẹ, “Ahụ kpakpakpa a ri olegbeju ọkịla iya o-gbe oyi myị́ oyi nyam Am Ohe Oluhye ká ka hụhụ o-okoji ahụrụ nya iMelikisẹdẹkị lẹlẹ.”

¹⁸Ang ọhọhẹ ọlẹ kọ du kọ baba nyọka nyẹ ehile nya iMosisi ọọwa ugọyị deeji, ri chajị nyọlẹ ká ehile ọọwa ayịdang la dẹwụ-dẹwụ bala o-ju apyobwuna ọhẹ-lọhẹ ha ọngịnyị ehe kpong-kpong ka.

¹⁹Ang odudu nya ọọwa ri yẹkẹẹ, ehile ọọwa ayịdang kpangga á la ọngịrị kaa kpa ọngịnyị ehe kaka la kpẹẹkpẹẹ ẹ-ẹpwụ nya abwẹla ọnyịịla nya Ohe Oluhye myị́ ka. Ang ọkịla ọlịnyị, ọlẹ kọ du ká Ohe Oluhye nyẹ ehile ọọwa deeji ri chajị kọ ka jẹ́-ẹ kpa ụgbẹyị onyeewe nyamwụ ọlẹ ká ẹhị ọrịrịị-rịrị ohiigu gụ ji ẹpwụ nyamwụ warị kaka chị ehe hahị ahị angịnyị nyamwụ, chajị kahị ka jẹ́-ẹ bwula ụgbẹyị onyeewe nyamwụ ọọwa tụ ju Ohe Oluhye chwẹẹ myị́ lẹlẹ.

²⁰Ang ọgụgụ wuu ri yẹkẹẹ, ọnụ ọmyịmyị o-bwula iro ọnwanwa, Ohe Oluhye a myị u-uhye nya ụgbẹyị nya ẹhị ọrịrịị-rịrị onyeewe ọọwa lẹ.

²¹Ịnọ, angịkịla ịlẹ kị kaa ri alegbeju ikịla iya inyogo nya Ohe Oluhye wuu lẹ, Ohe Oluhye á kaa nwa iro haa ene kọ kaa chwaa ka. Ma, Ohe Oluhye tị nwa iro ene kọọ chụ iJisọsị nya olegbeju ọkịla iya ọọwa yẹkẹẹ, “Ọngọlahị Ohe Oluhye nwa iro ene lẹlẹ, ọ́ ka jẹ́-ẹ chị ụrụ tịrẹkpẹ la ọ-họ ọnụ ọmyịmyị nyamwụ ọọwa jịra kaka. Chajị, ọ yẹkẹẹ, ‘Ahụ kpakpakpa a ri olegbeju ọkịla iya o-gbe oyi myị́ oyi nyam Am Ohe Oluhye lẹlẹ.’ ”

²²Bwula ọọwa lẹ, iJisọsị ayịdang ọọwa a ri ọngọlẹ ká Ohe Oluhye kpa yụbwọ ju ụpwụ ẹ-ẹpwụ nya ang ọmẹjẹ yẹkẹẹ, iro ọnwanwa onyeewe nya Ohe Oluhye ọwẹ nyị hiigu bala o-ju apyobwuna hahị gụ ịnyịlẹhị lẹlẹ.

²³Ang o-ju ẹjẹẹ ọkịla ri yẹkẹẹ, alegbeju ikịla iya nya Ohe Oluhye inyogo lẹ, ị ju iru lụmẹ chajị nyọlẹ ká igu ogbugbu la ọngịrị kaa chị olegbeju oriri nyaa ịwa apatọyị myị́.

²⁴Ma, jaabwọ ká iJisọsị ayịdang tị juwa la ọhịhị pyịyọọ lẹlẹ, ị́ ka jẹ́-ẹ nyẹ okoji ahụrụ nya olegbeju ọkịla iya nya Ohe Oluhye oriri nyamwụ ọwa ugọyị deeji kpá ẹnẹnẹhẹ kaka.

²⁵Ịnyị a du ká iJisọsị ọọwa la ọngịrị ụka wuu nyọka hu ọchịda ha angịlẹ wuu kị ka myị-ị kele ka ẹga nya Ohe Oluhye bwu lọọ myị́ jaabwọ myị́ abwọ kị ju iru kaka ba lẹlẹ. Chajị, jaabwọ ká iJisọsị ọọwa juwa hịhị pyịyọọ lẹlẹ, ọ juwa i-ijata nya Ohe Oluhye, juwa bịlọọ wọnụ nyahị ahị angị myịmyị wuu ju ụka myị́ ụka lẹ.

²⁶Chajị, ọ ri ang ọlẹ kọ chịla-chịla hahị ahị angịnyị nya Ohe Oluhye pyii, kahị ka la ụma nya olegbeju ọgbahị nya angịkiliya nya Ohe Oluhye ọlẹ kọ ri ọngọ la ịgọgọ bala o-ri ọngọ la abyị ọhẹ-lọhẹ ka bala o-ri ọngọhọbịrị kpong-kpong kaka. Bala o-ri ọngọlẹ ká abwẹla ọnyịịla ọhọhọ kem nyamwụ chọọ ebwo hi alọhọbịrị. Bala o-ri ọngọlẹ ká Ohe Oluhye kpa ka iwe-ahụrụ oluhye gidogbo gụ uhye-ọgba nya epwoohe wuu ịnyịnyị. IJisọsị a tị ri olegbeju ọgbahị nya angịkiliya ọlịnyị hahị lẹlẹ.

²⁷Chajị jaabwọ ká angịkiliya nya Ohe Oluhye inyogo kaa kele kaka kịla iya wọnụ nya ịhọbịrị nya ịlaa ịwa ayịdang ju bala ịhọbịrị nya angịnyị ehe ịkịla aanaa ju ị-ịlahị nya Ohe Oluhye ẹnẹnẹẹnụ lẹ, ịnya iJisọsị ọọwa á ri ọlịnyị kpong-kpong ka. Chajị, iya ọkịlaakịla nya iJisọsị ọlụka ookpokpo bwula igu ọlẹ kọ gbu wọnụ nya ịhọbịrị nya alodehe wuu ju lẹ, iri ọlala nya iya ọkịlaakịla nyamwụ ọọwa la ọngịrị kụrụ ọlọ owuwu nya ọhọbịrị nya angịnyị ehe wuu gbe oyi myị́ oyi myị́ pyịyọọ lẹ.

²⁸Nya ịlẹhị ịnyị, ehile nya iMosisi a ri ang ọlẹ kọ hu ọngịrị ha angịnyị ehe ịlẹ kị la dẹwụ-dẹwụ bwula ịhọbịrị ịhọhọ nyaa, du kị kaa kele ka iwe-ahụrụ nya olegbeju ọgbahị nya angịkiliya nya Ohe Oluhye oriri myị́ lụka onyogo lẹ. Ma, ọnụ ọmyịmyị bwula iro ọnwanwa nya Ohe Oluhye ọlẹ ká Ohe Oluhye ya nyẹ ehile ọọwa ugọyị kpangga, a ri ang ọlẹ ká Ohe Oluhye kpa chụ Ọnyẹwẹ nyamwụ nya olegbeju ọgbahị nya angịkiliya onyeewe nya Ohe Oluhye lẹlẹ. Ọnyẹwẹ ọọwa a ri ọngọlẹ kọ la kpẹẹkpẹẹ ẹ-ẹpwụ nya abwẹla ọhọhọ pyịyọọ gbe oyi myị́ oyi lẹlẹ.