Read idege ALA IHIBURU 8 Bible Online

ALA IHIBURU 8 - idege bible

ALA IHIBURU 8

¹Egbeju nya ẹla ọlẹ kahị lẹẹ kpa ya jenu ri yẹkẹẹ, ahị angịnyị nya Ohe Oluhye la olegbeju ọgbahị nya angịkiliya nya Ohe Oluhye hahị ọlẹ kọ ri iJisọsị ịKịrayịsị ọngọ hụhụ u-upwuriri nya ẹchị Adịrahụ nya Ohe Oluhye Adịrahụ Ọgụgụ ụ-ụwa e-epwoohe.

²ỊKịrayịsị ọọwa, a ri olegbeju ọgbahị nya angịkiliya ọlẹ kọ juwa myị ẹrụ ha Ohe Oluhye ẹ-ẹpwụ nya ube ịgọgọ ọtụka nya Ohe Oluhye lẹ. Ube ịgọgọ ọọwa a ri ịnyịlẹhị lẹ. Chajị, ọọngịnyị ehe ọhẹ-lọhẹ a kpa ụbwọ nwụ́ ube ịgọgọ ọọwa dala Ohe Oluhye Ọngọlahị ayịdang kaka.

³Jaabwọ ká alegbeju ịgbahị nya angịkiliya nya Ohe Oluhye ịkịla ịlẹ kị kaa chụ lụka onyogo kaa juwa kpa ọhaha kele kịlahị nya Ohe Oluhye bala iya ọkịlaakịla wọnụ nya angịnyị ehe ịkịla ju ị-ịlahị nya Ohe Oluhye wẹẹ, ịnyịnyị, ọ baba ha iJisọsị olegbeju ọgbahị onyeewe nya angịkiliya nya Ohe Oluhye hahị kọ tịtị ka la ang ọlẹ kọ ka kpa kele kịlahị nya Ohe Oluhye lẹlẹ.

⁴Ó ri kọ ri ube ịgọgọ nya Ohe Oluhye olodehe ọlẹ, ká iJisọsị á juwa myị ẹrụ nya olegbeju ọgbahị nya angịkiliya nya Ohe Oluhye oriri nyamwụ ọọwa lẹ, ịnọ, iwe-ahụrụ ọọwa á ka jẹ́-ẹ hi pwọọ kpong-kpong kaka. Chajị, ịnọ, angịkiliya ịkịla ka juwa kpa ọhaha nyaa kele kịlahị nya Ohe Oluhye jaabwọ ká ehile nya iMosisi ya, nyị họ mẹ lẹ.

⁵Ụkụrwọ nya ẹrụ ọmyịmyị nya alegbeju ịgbahị nya angịkiliya inyogo ịịwa kpangga lẹ, ụrụrụ bala ang oku ọmwakpa nya ẹrụ ọmyịmyị nya ịKịrayịsị olube ịgọgọ olepwoohe kpangga, ọ ri lẹ. Chajị, ụka ọlẹ ká Ohe Oluhye juwa chabwọ ya je iMosisi jaabwọ kọ ka bwu nwụ́ ube ịgọgọ nya ọdụ ọlụka ọọwa lẹ, ọ byi iMosisi yẹkẹẹ, “Aa cheri ká họ ang myị́ ang ọlẹpwụ nya ube ịgọgọ ọọwa wuu, chọnụ jaabwọ kam mẹ ụrụrụ nyamwụ jẹng wuu kaka ba u-uhye nya ọgbọdọ ọọwa mẹ.”

⁶Ma, ẹ-ẹga nya ịKịrayịsị tị lẹ, ọ juwa iwe-ahụrụ nya ẹrụ ọmyịmyị ọlẹ kọ la ihi-ihi gụ iwe-ahụrụ ọlẹ ká alegbeju ikịla iya nya Ohe Oluhye inyogo la lụka nyaa. Chajị, iro ọnwanwa onyeewe ọlẹ ká ịKịrayịsị ri, ọngọ godayị rịrị apewa nya Ohe Oluhye bala angịnyị ehe, juwa myị ẹrụ o-oluhye nyamwụ lẹ, iro ọnwanwa ọọwa a hiigu gụ iro ọnwanwa ọlụka onyogo lẹ, chajị, ọnụ ọmyịmyị nya Ohe Oluhye ọlẹ kọ myị u-uhye nya iro ọnwanwa onyeewe ọọwa do pịlẹ u-uhye nya ang ịnyịịla ịlẹ kị hagụ ịnyịnyị.

⁷Chajị, ó ri ká iri ọlala nya iro ọnwanwa onyogo ọlaanyị á ri ang ọlabyị ọhẹ-lọhẹ kaka lẹ, ịnọ, ọ́ tụtụm ka baba ká Ohe Oluhye ka myị ọnụ nya iro ọnwanwa oheeye onyeewe myịmyị kaka.

⁸Ma, chajị nyọlẹ ká iro ọnwanwa onyogo ọọwa á tụ abyị ọlala nya alụka ọọwa kịnyaa ị-ịlahị nya Ohe Oluhye myị́ kaka, a du ká Ohe Oluhye byaa yẹkẹẹ, “Ẹnụtụrụ juwa warị ị-ịlahị, kaam Ohe Oluhye ka nwa iro ha ala Isirẹlụ wuu bala alimwawụ nya iJuda ịnyịnyị. Ịnyị, Am Ọngọlahị Ohe Oluhye a ya lẹ.

⁹Iro ọnwanwa onyeewe nyam ọọwa, á ka lala iro ọlụka ọlẹ kam nwa ha adaa igogo anyị la ẹnụtụrụ ọọwa ọlẹ kam gbaa, kpa ụbwọ nya ịlọm chaa kpehe bwu ọpyị nya ala Ijipiti rụ ugbeene kaka. Chajị, adaa igogo anyị ịịwa, á myị kpa ọnụ ọmyịmyị nya iro ọnwanwa nyam ọọwa họ ụkụrwọ kịlahị pyịyọọ ka. Ịnyị a du kaam ayịdang tịtị ji ẹkpẹ nyam daa lẹlẹ. Ịnyị, Ohe Oluhye Ọngọlahị a ya lẹ.

¹⁰Ọlẹ kpangga a ri iro ọọwa ọlẹ kaam Ohe Oluhye ka nwa ha ala Isirẹlụ lụka ọlịlahị lẹlẹ. Ịnyị, Ọngọlahị Ohe Oluhye a ya lẹ. Am Ohe Oluhye ka hu egbe nya ehile nyam kpa kaka nube ẹ-ẹpwụ nya akpa nya irya omeme nya angịnyị ehe ịlụka ọọwa. Am Ohe Oluhye tị ka da ịnaaba nya ehile nyam ịịwa ba ẹ-ẹpwụ nya ọkịlẹtụ nya angịịwa lụka ọọwa ịnyịnyị. Lẹ, Am ayịdang ka ri Ohe Oluhye nyaa. Ịwa ayịdang tịtị ka ri angịnyị nyam Am Ohe Oluhye ịnyịnyị lẹ.

¹¹Ụka ọọwa lẹ, ọ́ ka baba ha ọngọngọhẹ lẹpwarịrị nyaa ọ-ka juwa mẹjẹ awụlẹ lee ọ-ka juwa mẹjẹ anyadịda nya awụlẹ ẹ-ẹpwụ nya ịKịrayịsị yẹkẹẹ, ‘Kẹwẹ kaka jẹ́ Ọngọlahị mẹ’, ene tụtụm kaka. Chajị, ịwa wuu ka ri angị jẹ́m jẹ́ lala Ohe Oluhye nyaa, bwu anyị anjwo ichiche ịlabwọ lalala kaka ju ká angịgbahị wuu gbanggbang lẹ.

¹²Chajị, Am Ohe Oluhye ka kpa ahyẹẹrwẹrwa nyam, yaa ahyẹẹrwẹrwa u-uhye nya ang inyibyi ịhọhọ nyaa ụka ọọwa wuu. Lẹ, ḿ ka kpịtịya nya ịhọbịrị nyaa ịlẹ wuu kị họ kpong-kpong lụka ọọwa kaka.”

¹³Bwula ọlẹ ká Ohe Oluhye ya ẹla rụ́ iro ọnwanwa onyeewe ọọwa lẹlẹ, ọ mẹjẹ yẹkẹẹ, iro ọnwanwa onyogo ri ang ọchịpwụrụ kam lẹ. Chajị, ang myị́ ang ọlẹ kọ hogo, kọ juwa pyị rịta-rịta lẹ aalẹ, ang ọọwa lala ụgbịla nya iju ọlẹ kị tụbwọọ juwa ka chụ daarụ lẹ.