Read idege ALA IHIBURU 9 Bible Online

ALA IHIBURU 9 - idege bible

ALA IHIBURU 9

¹Iro ọnwanwa onyogo lẹ, ọ la ehile ọlẹ ká alegbeju ikịla iya nya Ohe Oluhye ịlụka ọọwa kaa ba jẹ pyii ẹ-ẹpwụ nya ịgba ọgbagba ha Ohe Oluhye nyaa. U-ube ịgọgọ ọraabwọ ha Ohe Oluhye olodehe ọlẹ, ịwa a tị kaa gbịgba ha Ohe Oluhye lẹ.

²Ụka kị da ọdụ kụrụ eji nya ube ịgọgọ ọraabwọ ha Ohe Oluhye ha ala iJuu lẹ, ị chọọ apwụ imiiye. Ẹpwụ ọhọhẹ ọlẹ kọ ri ẹpwụ olodehe lẹ, ụ-ụwa, ang o-hu otinika rịrị a ji lẹ. I hu itebwuru ọhẹ rịrị ụ-ụwa ịnyịnyị bala ịkaa ịhyẹ ịlẹ kị kaa kpa kpịtịya nya ijata ojiji nya Ohe Oluhye. Ị wụrụ ẹnyị nya ẹpwụ nya ube ọọwa yẹkẹẹ, Ẹga Ọlịgọgọ.

³Ị ya apwụ ọhẹ chị ẹpwụ nya ọgbanyẹ-ọgbanyẹ ọọwa oyi bala ẹpwụ oheeye ọlẹ kị wụrụ ẹnyị nyamwụ yẹkẹẹ, Ẹga Ọlịgọgọ Ọtụka Ọgụgụ wuu.

⁴Ang ịlẹpwụ nya Ẹga Ọlịgọgọ Ọtụka Ọgụgụ ọọwa lẹ, ẹga ọkịla iya ochoru kwọkwọ ha Ohe Oluhye ọlẹ kị kpa okpoko ịgọm kem họhọ a ji lẹ. Akpa nya Iro nya Ohe Oluhye ọlẹ kị kpa okpoko ịgọm kpụ́ kụrụ wuu juwa ụ-ụwa ịnyịnyị. Ang ịlẹpwụ nya Akpa nya Iro ọnwanwa ọọwa a lẹẹ lẹ: Ọta ọhẹ ọlẹ kị kpa okpoko ịgọm họhọ, kị hu ịmána ọlẹ ká Ohe Oluhye ya haa ri ju bala ọgọdọ nya Erọn ọlẹ kọ bwu kpehe, ju apwụ bala uginikpo nya ẹjwọ imiiye ịlẹ kị da ehile nya Ohe Oluhye ịlẹ kọ ya ha iMosisi ju, juwa ịnyịnyị.

⁵U-uhye nya Akpa nya Iro ọọwa, ị kpa okpoko ịgọm kem me ụma nya alegu-ẹrụ ẹbyẹbyị nya Ohe Oluhye ịhyẹ ịlẹ kị wụrụ icherubim imiiye godayị rịrị u-uhye nya ọnụ nya akpa ọọwa. Ị pyẹ achwọ nya icherubim ịịwa maa, kaka kụrụ uhye nya akpa ọlẹ kọ ri ẹjẹẹ nya ẹchị nya ahyẹẹrwẹrwa nya Ohe Oluhye ụ-ụwa ịnyịnyị. Ma, áhị́ tị nwụlanọ nyọka ya etu nya ọnyọnyọọnyị nya ang ịwẹ wuu jenu lẹẹlẹẹ ka.

⁶Ụka kị nwụla ang ịwẹ wuu guru ẹ-ẹga nyaa kpẹẹkpẹẹ ịnyị wuu lẹ, angịkiliya nya Ohe Oluhye ịlụka onyogo a kaa kele ka ẹpwụ olodehe nya ube nya ọdụ ọọwa, juwa họ ụkụrwọ nya iya ọkịlaakịla nyaa jaabwọ ká ehile nya ịgba ọgbagba myị ọnụ haa nyọka họhọ ịnyịnyịịnyị lẹlẹ.

⁷Ma, ẹ-ẹpwụ nya ẹpwụ oheeye ọlẹ kọ ri Ẹga Ọlịgọgọ Ọtụka Ọgụgụ wuu lẹ, ọngọlẹ kọ ri olegbeju ọgbahị nya angịkiliya nya Ohe Oluhye wuu ụbwọọmwụ kem a kaa kele lẹ. Ụka ookpokpo ẹ-ẹpwụ nya ẹka kem, ọ tị kaa kele ka ụwa ịnyịnyị lẹ. Ọ kaa kele ka ụwa kaka kịla iya wọnụ nya ịhọbịrị myị́ ịhọbịrị ịlẹ ká aluche nya angịnyị wuu họ ju, tụ ịnya ịlọmwụ.

⁸Bwula ọhọhọ nya ịgba ọgbagba ọọwa, Olegu Ịgọgọ họ kahị jẹ́ yẹkẹẹ, ụka ọlẹ ká ẹga ọkịla iya ọlẹpwụ nya ẹpwụ olodehe nya ube ọọwa juwa wẹẹ lẹ, ụgbẹyị á wụrụ ha aluche nya angịnyị nyọka jẹ́-ẹ pwụ ijata ọlịgọgọ ọtụka nya Ohe Oluhye ayịdang la ịlaa myị́ kpong-kpong lụka ọọwa lẹka.

⁹Chajị, ụrụrụ nya ang ọlẹ kọ juwa ka họ, lụka nyahị ahị alụka ọlẹẹlẹẹ kem, ọhọhọ nyaa ịịwa wuu, a ri lẹ. Bwula ọhọhọ nya ịgba ọgbagba ọọwa, ọlẹ kị kaa kpa ọhaha bala iya ọkịlaakịla kele kịlahị nya Ohe Oluhye chajị nya ọhọbịrị ọhọhọ nyaa wuu lẹ, ang ịịwa á kaa họ ká eje owuwu nya ọkịlẹtụ oluhye nya ọhọbịrị nya alụka ọọwa kaa yịlẹ hyaa myị́ kpong-kpong ka.

¹⁰Ma, iri ọlala nya iya ọkịlaakịla ha Ohe Oluhye nyaa ịwa alụka ọọwa, kaa họ ụkụrwọ u-uhye nya ehile nya ịgọ ọchịchị u-uhye nya ang oriri bala ang ọnwanwa nyaa kem bala ang ịkịla la datị-datị ịlẹ kị kaa kpa enyi nyi ịlọ hụ pyii. Ang ịwẹ wuu tị ri ehile ọlẹ kị ya haa u-uhye nya ugbinyịrọ olodehe ọlẹ kem nya ang o-ke abwọ gbe ụka ọlẹ ká Ohe Oluhye ka nwụ ang myị́ ang wuu họ onyeewe.

¹¹Ma, lụka ọlẹ ká ịKịrayịsị ọọwa hi ehe warị wẹ odehe ọlẹ lala olegbeju ọgbahị nya angịkiliya nya ahị ọwawa ịnyịịla ịhagụ ịlẹ kị jam hahị ahị angịnyị nya Ohe Oluhye ịlẹẹlẹẹ lẹ. ỊKịrayịsị kele kaka myị ẹrụ nya iya ọkịlaakịla nyamwụ ọwa u-ube ịgọgọ ọlẹ kọ lụmẹ gụ bala ọ-la kpẹẹkpẹẹ gụ ịnya angịkiliya inyogo ịịwa. Chajị, iJisọsị á kaa kịla iya ẹ-ẹpwụ nya ube ọlẹ ká angịnyị ehe kpa ụbwọ nyaa nwụ́ odehe ọlẹ ka. Ọọwa ri yẹkẹẹ, ube ịgọgọ ọọwa á juwa ẹ-ẹpwụ nya ang ịlẹ kị họhọ odehe ọlẹ ka.

¹²Ụka ọlẹ ká ịKịrayịsị jụ kele ka Ẹga Ọlịgọgọ Ọgụgụ wuu lụka ookpokpo kem, ọlẹ kọ nwa ụga o-gbe oyi myị́ oyi, kọ kele kaka kịla iya nyamwụ ọwa lẹ, ị-ịwọ nya ịmwụ bala ịna, ọ kpa kele ka. Ma, ịwọ nya ịlọmwụ, ọwa ayịdang kpangga, iJisọsị a kpa kele kaka yẹ hụrụ wọnụ nya ịhọbịrị nyahị ahị angịnyị ehe wuu ju lẹ. Ọọwa lẹ, ọ ra ihi nya ọchịda o-gbe oyi myị́ oyi nya Ohe Oluhye hahị ahị angị myịmyị wuu bwula ọọwa lẹlẹ.

¹³Chajị, ó ri ká ịlọ onyinyi ọlẹ kị kaa kpa ịwọ nya ịmwụ lee ịwọ nya ịna alẹng lee agba nya ịna anyang ịlẹ kị ya kịla iya ọ-rụ ila wuu nyi kụrụ angịnyị ịlẹ kị chịrị ị-ịlahị nya ehile nya iMosisi, á kaa họ ká ugbinyịrọ nya alụka ọọwa kaa la cheri-cheri myị́ jaabwọ ká ehile nya iMosisi ya aalẹ,

¹⁴anyanyị, anụ tị́ me irya ká iri ọlala nya ịwọ nya ịKịrayịsị ọọwa ayịdang tị tị ka la ọngịrị kaka ba ẹ-ẹpwụ nyọka hụ́ irya ọ-la ọngịnyị eje ọlẹpwụ nyahị kpeng-kpeng bwu ẹpwụ nya ụkụrwọ inyibyi nya ịhọbịrị i-ju apyobwuna-ka ịhọhọ nyahị wuu, chajị kahị ka jẹ́-ẹ juwa hịhị ẹ-ẹpwụ nya ẹrụ ọmyịmyị ha Ohe Oluhye myị́ kaka ba? Ang odudu ká ịwọ nya ịKịrayịsị ri ang oliri lụmẹ ọlịnyị ri yẹkẹẹ, ọwa ayịdang hu ịlọmwụ kaka kịla iya ọkpẹẹkpẹẹ ha Ohe Oluhye bwula ọngịrị nya Olegu Ịgọgọ ọngọ juwa hịhị gbe oyi myị́ oyi, ịnyị a du lẹ!

¹⁵Chajị nya ọọwa, a du ká ịKịrayịsị ọọwa tịtị ri ọngọ godayị rịrị apewa nya Ohe Oluhye bala angịnyị ẹ-ẹpwụ nya iro ọnwanwa onyeewe ọlẹ lẹlẹ. Chajị ká angịlẹ wuu ká Ohe Oluhye be ẹkọ wụrụ kị ka ri angịnyị nyamwụ ka jẹ́-ẹ ye ọ-họ jịra nya ọnụ ọmyịmyị nya Ohe Oluhye u-uhye nya ugu nya ahị ọwawa o-gbe oyi myị́ oyi nyamwụ ọlala myị́, chajị nyọlẹ ká ịKịrayịsị ọọwa ayịdang gbu igu ọ-tụ ibyi nya ịhọbịrị nya angịịwa wuu ịlẹ kị họ e-ekpeleji nya iro ọnwanwa onyogo lẹlẹ.

¹⁶Chajị, ụka myị́ ụka ká angịnyị ehe á ga ang ugu ha angị ịkịla bwula ọnụ ọmyịmyị lẹ, ụka ká ọngọ la ang ugu ọọwa á gbu kpá ene ka, ọ-họ jịra nya ọnụ ọmyịmyị ọọwa á ka jẹ́-ẹ ji myị́ kaka.

¹⁷Chajị, ụka ká igu á nwụ ọngọlẹ kọ ga ang ugu bwula ọnụ ọmyịmyị ọlịnyị kpá ene lẹ, ọọwa, ang ugu ọlịnyị a kaa jẹ́-ẹ ri nya ịlẹhị myị́ wẹẹ lẹ. Chajị, ị́ jẹ́-ẹ kpa ọnụ ọmyịmyị nya ang ugu ọgaga nuuhye họ ụkụrwọ tọ ọngọ la ang ọọwa la a-ahị kpong-kpong kaka.

¹⁸Chajị nya ọlịnyị kpangga, a du ká Ohe Oluhye hunọ yẹkẹẹ, ịwọ pyii nyaa ka kpa chị iro ọnwanwa nya ọgbanyẹ nya ọọwa, ọmwụ weeji lẹlẹ.

¹⁹Chajị, ụka ká iMosisi juwa bwuru ẹnyị nya ehile nya Ohe Oluhye ọnyị myị ọnyị wuu dodehe ya je ala Isirẹlụ wuu lẹ, ọ hu ịwọ nya ịna bala ịnya ịmwụ kpịla la enyi lẹ, ọ hu owu-are ọnyọmịla chị ori ba uke nya okoji ihisọpụ lẹ, ọ kpa ju enyi bala ịwọ ọọwa kpa nyi ịlọ hụ ụpwụ nya ehile ọọwa ayịdang bala ala Isirẹlụ wuu ịnyịnyị lẹlẹ.

²⁰Ọọwa lẹ, iMosisi a byi ala Isirẹlụ wuu yẹkẹẹ, “Ọlẹ a ri ịwọ nya iro ọnwanwa u-uhye nya ehile ọlẹ ká Ohe Oluhye ya danụ lẹlẹ.”

²¹Ụgbẹyị ọọwa ọọwa, iMosisi a kpa ịwọ ọọwa nyi ịlọ hụ ube ịgọgọ nya ọdụ ọọwa bala ang-abwọ ịlẹ kị kaa kpa gbịgba ha Ohe Oluhye ịlụwa wuu ịnyịnyị lụka ọọwa lẹ.

²²Bwula ọọwa, ahị jẹ́ ịnyịlẹhị yẹkẹẹ, lụka nya ehile lẹ, ịnọ, ọ hi pyịnyẹng ká ịwọ a ri ang ọlẹ kị ka kpa họ ang myị́ ang wuu kọ ka la cheri-cheri lẹ. Ị-ịlahị nya Ohe Oluhye tị lẹ, ẹ-ẹga ọlẹ ká ịwọ ọchịchị wọnụ nya ọhọbịrị ju á ji kaka lẹ aalẹ, ọhịnyọhi ọhọbịrị ọhẹ-lọhẹ á ka jẹ́-ẹ juwa ẹ-ẹga ọọwa kaka ịnyịnyị.

²³Ụma nya ang ịlụka onyogo ịịwa wuu ịlẹ kị ri ụrụrụ nya ang ilepwoohe ayịdang lẹ, ọ baba ká ịwọ nya iyo ịịwa, ị ka kpa haa kị ka la cheri-cheri bwula ehile nya ịgba ọgbagba ọlẹ kị da haa pyii. Ma, ẹ-ẹga ká ang ịlam-ịlam ilepwoohe ịịwa ayịdang ji kpangga lẹ, iya ọkịlaakịla nya ịwọ ọkpẹẹkpẹẹ ọ-gụ ịnya alụka onyogo ịịwa pyii a baba lẹ.

²⁴Chajị ịKịrayịsị lẹ, ọ́ jụ ka ube ịgọgọ ọlẹ kị họhọ la ụbwọ nya angịnyị ehe ka. Lee, ube ọọwa o-ri ụrụrụ nya ang ịlam-ịlam ilepwoohe ọọwa ịnyịnyị ka. Ma, ube ịgọgọ olepwoohe ayịdang kpangga, ịKịrayịsị a kele kaka họ ụkụrwọ nya iya ọkịlaakịla nyamwụ ọwa lẹ. Ọọwa lẹ, ịKịrayịsị a kele kaka godayị rịrị lalẹ lẹẹlẹẹ, i-ijata nya Ohe Oluhye wọnụ nyahị ju lẹlẹ.

²⁵Iya ọkịlaakịla nya ịKịrayịsị ọọwa á tị ri iya ọkịlaakịla ọ-họ ma họ ịnyịnyịịnyị jaabwọ ká olegbeju ọgbahị nya angịkiliya ọlụka onyogo kaa kpa ịwọ nya iyo kele kaka họ ẹ-ẹpwụ nya ẹpwụ nya Ube Ọlịgọgọ Ọgụgụ wuu ẹka myị́ ẹka, ọlẹ kọ tị ri ịwọ nya ịlọmwụ ọwa ayịdang kpong-kpong ka lẹ ka.

²⁶Chajị, ó ri ụma nya iya ọkịlaakịla ọ-họ ma họ ịnyịnyịịnyị, ká ịKịrayịsị á ka họ ụkụrwọ nyamwụ lẹ, ịnọ, ọ ka juwa gbu la akama ọyẹyẹ nya ịwọ nyamwụ ọ-ka juwa ya yẹ hụrụ ịnyịnyịịnyị bwu ọmwụ ọdada nya odehe ọlẹ pyịyọọ tị tị lẹ. Ma, ọkọkọ nya ọọwa lẹ, ịKịrayịsị warị lụka ookpokpo kem, ọlẹ kọ nwa ụga o-gbe oyi myị́ oyi kaka hu ịwọ nyamwụ yẹ hụrụ wọnụ nya ọhọbịrị nyahị ahị angịnyị ehe wuu ju nyọka yịlẹ ibyi nya ọhọbịrị nya ọng myị́ ọng wuu jịra myị́ gbanggbang lẹ.

²⁷Chajị, Ohe Oluhye hu ụka ookpokpo kem nọ ha ọngịnyị ehe ọnyị myị ọnyị kọ ka gbu. Ụka kọ gbu kpá, ọ ka kele kaka godayị rịrị ị-ịlahị nya eje nya Ohe Oluhye pyii.

²⁸Ịnyịnyị, ịKịrayịsị ọlẹ kọ tịtị warị kaka gbu lụka ookpokpo wọnụ nya ịhọbịrị nya iru nya angịnyị ehe wuu ju, a tịtị ka myịmyị-ị̀ mwọọgịlẹ warị lụka oheeye lẹlẹ. Ọwarị wẹ myịmyị nya ịKịrayịsị ọọwa, á tị ka ri chajị nyọka gbu wọnụ nya ịhọbịrị ju myịmyị kaka. Ma, ọ ka ri ọwarị wẹ kaka chị angịlẹ wuu kị juwa kụ ọlọyị giri-giri gbe ọwẹwẹ nya ịKịrayịsị ọọwa da kem.