Read idege IJEMSI 2 Bible Online

IJEMSI 2 - idege bible

IJEMSI 2

¹Anụ anyadam ẹ-ẹpwụ nya ịKịrayịsị, jaabwọ kanụ yụbwọ chị ọmyịmyị ọlala nyanụ ọlẹga nya Ọngọlahị iJisọsị ịKịrayịsị ọngịnyị nya ogbo wẹ gogo lẹlẹ, anụ tụtụm la ọháha oye-oye kokoo!

²Ang o-ju ẹjẹẹ nya ọọwa a lẹẹ lẹ. Ó ri ká angịnyị angị imiiye á warị wẹ ẹpwụ nya ọjịra-jịra nyanụ, ká ọngọhẹ nyaa á ri ọlụdụ, kọ kụrụ ịwụrụ ịlịnya hiigu-hiigu bala o-ju ọmapẹ nya okpoko ịgọm a-akachụ nyamwụ, ká ọngọkịla nyamwụ á ri okpehika, kọ kụrụ achịpwụ jagụ-jagụ warị wẹpwụ nyanụ ịnyịnyị,

³kọ ri kanụ ju ọlụdụ ọọwa ihi lụmẹ, juwa hu ẹga ọhụhụ ọnyịịla họọ, juwa byoo yẹkẹẹ, “Ayịbahị, kẹwẹ kaka hụhụ lẹẹ ẹ-ẹgẹlẹ mẹ.” Kanụ tị juwa kpa okpehika ọwẹ weji, juwa byoo yẹkẹẹ, “Ọlẹng kele kaka godayị lalẹ ẹ-ẹgẹlaanyị mẹ.” Lee, o-byoo yẹkẹẹ, “Kẹwẹ kaka hụhụ lẹẹ ị-ịpyị ọlẹga kam ya ẹta rịrị mẹ.”

⁴Anụ ya kọ ri kanụ juwa họ ịnyị ịnyịlẹhị, ịnọ, ánụ ka ri angị la ọháha oye-oye ẹ-ẹpwarịrị nya ịlọnụ, juwa kpa irya onyobyi chị oku nya ẹla ha angịnyị ka?

⁵Anụ anyadam ẹ-ẹpwụ nya ịKịrayịsị ịlẹ kanụ hám lụmẹ, ánụ jẹ́ ká Ohe Oluhye a chụ ikpehika ilodehe ọlẹ wẹ, chajị kị ka ri angị kpụdụ ẹ-ẹpwụ nya ọmyịmyị ọlala ọlọkịlẹtụ nyaa, kị ka ri ugu nya ịpyị adịrahụ ọlẹ ká Ohe Oluhye ayịdang myị ọnụ ene-ene nọ gbe angịlẹ wuu ká Ohe Oluhye ka há nya ịlẹhị ịlahị ám odehe ọlẹ ka?

⁶Ma, anụ tị mwọọgịlẹ juwa yẹhị da ikpehika ịịwa bwee dachichi. Anụ yẹhị me ụma nya ang ọlẹ ká alụdụ kaa họnụ ene wẹẹ! Aalụdụ ịwẹ a ri angị kaa tụụnụ ba, juwa dapwụ wunu bala o-juwa gbileenu kpịla-kpịla kele ka ube nya eje ka?

⁷Aalụdụ ịịwa a ri angị kaa ya ala inyibyi rụ́ ẹnyị ọnyịịla nya Ohe Oluhye nyanụ ọlẹ kanụ la ịnyịnyị ka?

⁸Ó ri kanụ juwa ba ehile ọlẹ kọ ri Adịrahụ nya ehile ịkịla wuu, jaabwọ kị da kpehe ụ-Ụpwụ Ịgọgọ lẹ aalẹ, anụ juwa họ ehile nya Ohe Oluhye jịra hiigu lẹ. Ehile ọọwa ri yẹkẹẹ, “Ọngịnyị ọọnang ka háng nya ịlẹhị-ịlẹhị lala ịlọng.”

⁹Ma, ọ́ tị ri kanụ mwọọgịlẹ juwa la ọháha oye-oye lẹ aalẹ, ọhọbịrị a wẹ kanụ họ lẹlẹ. Aalẹ, eje nya ehile nya Ohe Oluhye ọbịrịị-bịrị tị wunu ịnyịnyị lẹ.

¹⁰Chajị, ọng myị́ ọng ọlẹ kọ bịrị ehile nya Ohe Oluhye ookpokpo ene lẹ aalẹ, ó riri ká ọngọọwa á juwa kpa ehile ihihi ịkịla wuu kpakpa myị́ aalẹ, ookpokpo ọlẹ kọ bịrị wẹẹ, ọ kpịla ịkịla ihihi wuu ahị lẹ.

¹¹Chajị, Ohe Oluhye Ọngọlẹ kọ da ehile yẹkẹẹ, “A họ ụya lee ọ-da ẹla-ahụ ka,” a ri Ohe Oluhye ọọwa-ọọwa ọlẹ kọ da ehile yẹkẹẹ, “A nwụ ọngịnyị ka,” ịnyịnyị lẹ. Bwula ọọwa lẹ, ó ri ká họ ụya ka lee ọ-da ẹla-ahụ ka, ká tị nwụ ọngịnyị ehe lẹ aalẹ, ọngọ bịrị ehile nya Ohe Oluhye a ri lẹ.

¹²Lẹ, anụ́-ụ juwa ya ẹla bala o-juwa họ abwẹla jaabwọ ká Ohe Oluhye juwa ka kpa ehile nyamwụ ọlẹ kọ kaa họ ká angịnyị ehe kaa la ịlaa myị́, lanụ anụ angịnyị nya Ohe Oluhye wuu eje ị-ịlahị mẹ.

¹³Chajị, ọng myị́ ọng ọlẹ kọ kaa la ahyẹẹrwẹrwa ẹ-ẹga nya ọngịnyị ọọnamwụ ka aalẹ, Ohe Oluhye á tịtị ka yẹ ọngọọwa ahyẹẹrwẹrwa la ẹnụtụrụ nya eje ka ịnyịnyị. Chajị, ẹga ọlẹ ká ahyẹẹrwẹrwa á ji lẹ, ụ-ụwa, ọkụrụ-kụrụ u-uhye nya eje ọlala a kaa ji myị́ ịnyịnyị lẹlẹ.

¹⁴Anụ anyadam ẹ-ẹpwụ nya ịKịrayịsị, ịịyẹ a tị́ ka ri apyobwuna ha ọngịnyị, kọ ri ká ọngọọwa á juwa ya dodehe la ọnụ-ọnụ yẹkẹẹ, ọwa nyị myị la Ohe Oluhye lẹ, kọ tị ri ká ọhịhị nyamwụ á mẹ ibeenu nya ọọwa jẹ kpong-kpong ka? Anụ ya ká ọmyịmyị ọlala ọlịnyị ka chị ọngọọwa da myị́-ị̄ị́?

¹⁵Ang o-ju ẹjẹẹ nya ọọwa ri yẹkẹẹ, ó ri kanụ la ọnyadịda ọlẹng lee ọnyang ọhẹ ẹ-ẹpwarịrị nyanụ ọlẹ kọ la ịwụrụ ịkụrụ-kụrụ ka lee o-ye ang oriri ọhẹ-lọhẹ ka ri kpong-kpong ka ịnyịnyị.

¹⁶Ko ri kanụ juwa byi ọngọọwa la ọnụ-ọnụ yẹkẹẹ, “Ẹnwa, rụ la okpunyi ká Ohe Oluhye a wahị kụrụng la ịwụrụ ịkụrụ-kụrụ bala ang oriri ọgwọgụ mẹ,” kanụ tị hu awụrụ lee ang oriri ọhẹ-lọhẹ họọ kpong-kpong ka aalẹ, ịịyẹ a tị́ ri apyobwuna nya ohyahya jwaa la ọnụ nyanụ kem?

¹⁷Ọmyịmyị ọlala ọlẹ kọ kaa kpa ụkụrwọ ọnyịịla ọhọhọ chị ịlọmwụ ehe ka aalẹ, uguru nya ọmyịmyị ọlala, ọ ri lẹ.

¹⁸Ọhẹka, ọngọhẹ ka juwa byi ọngọkịla yẹkẹẹ, “Ahụ lẹ, a la ọmyịmyị lẹ. Am lẹ, m tị ri ọngọ kaa họ ụkụrwọ myị́.” A ya ká ka jẹ́-ẹ chị ọmyịmyị ọlala nyang ehe myị́ dala ụkụrwọ ọnyịịla ọhọhọ wẹẹ? Am lẹ, ụkụrwọ ọnyịịla ọhọhọ nyam, m ka kpa chị ọmyịmyị ọlala nyam ehe hang myị́ lẹ.

¹⁹A la ọmyịmyị yẹkẹẹ, ọngọhẹ nyị ri Ohe Oluhye olookpokpo juwa ịnyịlẹhị? Ó ri ịnyị aalẹ, a họ hiigu. Ma, alegu inyibyi myị ịnyịnyị yẹkẹẹ, Ohe Oluhye nyị juwa ịnyịlẹhị, du kị dọmwụ kaa juhi nya Ohe Oluhye, juwa hụ́ kpákpakpa.

²⁰Ahụ oluchi, a juwa tịtọ nya ang o-ju ẹjẹẹ ọkịla ọhẹ myịmyị ene ká ka jẹ́ yẹkẹẹ, ọmyịmyị ọlala ọlẹ kịị nyị́ kpa ụkụrwọ ọnyịịla ọhọhọ chị ịlọmwụ ehe ka, nyị ri uguru nya ọmyịmyị ọlala?

²¹Ebiraham adahị ogogo bẹ? Aabwẹla ọnyịịla ọhọhọ nyamwụ bwula ọlẹ kọ hu Ayịsiki ọnyị nyamwụ kpa kaka nụwa ẹ-ẹga ọkịla iya ha Ohe Oluhye a du ká Ohe Oluhye kpa wa Ebiraham nya ọlabwẹla ọnyịịla ị-ịlahị nya ịlọmwụ ka?

²²Anụ tị́ yẹ jaabwọ ká ọmyịmyị ọlala nya Ebiraham bala abwẹla ọnyịịla ọhọhọ nyamwụ bajẹ wẹ lẹ. Ịịwẹ, Ebiraham a bwu kpa ụkụrwọ ọnyịịla ọhọhọ nyamwụ chị ọ-họ jịra nya ọmyịmyị ọlala nya ịlọmwụ ehe gede gede lẹ.

²³Ịnyị lẹ, ẹla ọlẹ ká Ụpwụ Ịgọgọ ya rụ́ Ebiraham a họ jịra lẹlẹ. Chajị, Ụpwụ Ịgọgọ yẹkẹẹ, “Ebiraham kpa ọkịlẹtụ ookpokpo la ọmyịmyị ẹ-ẹga nya Ohe Oluhye lẹ, Ohe Oluhye a tịtị wọọ lala ọlabwẹla ọnyịịla ị-ịlahị nya ịlọmwụ lẹlẹ.” Ịnyị, ị wụrụ Ebiraham oligu nya Ohe Oluhye ayịdang lẹlẹ.

²⁴Anụ tị́ yẹ wẹ lẹ, abwẹla ọnyịịla ọhọhọ nya ọngịnyị ehe a kaa du ká Ohe Oluhye kaa kpa wa ọngọọwa nya ọlabwẹla ọnyịịla ị-ịlahị nya ịlọmwụ lẹ. Ọ-ọmyịmyị ọlala ọpapịla kem ka.

²⁵Ịnyịnyị-ịnyịnyị, Ohe Oluhye a bwu wa iRehabụ ọnyang ọlakpara ọhẹ nya ọlabwẹla ọnyịịla ị-ịlahị nya ịlọmwụ ka? Chajị, iRehabụ ọọwa họ ịsọja nya ala iJuu ịlẹ kị ka ẹpwa nyamwụ ụga hiigu-hiigu bala ọmẹjaa ụgbẹyị ọlẹ kị ka bwu be hi aluji nyaa myị́ ịnyịnyị.

²⁶Chajị, jaabwọ ká ugbinyịrọ nya ọngịnyị ehe ọlẹ ká ugbodu okpukpuru á gba kpehe rụ hi lẹ, kaa ri uguru nya ang wẹẹ, ịnyịnyị, ọmyịmyị ọlala ọlẹ kọ kaa kpa ụkụrwọ ọnyịịla ọhọhọ chị ịlọmwụ ehe ka, a tịtị ri uguru nya ang lala ogu lẹlẹ.