Read idege IJEMSI 3 Bible Online

IJEMSI 3 - idege bible

IJEMSI 3

¹Anụ anyadam ẹ-ẹpwụ nya ịKịrayịsị, anụ myị ká iru nya angịnyị lẹpwarịrị nyanụ a hu ịlaa lala angịmẹjẹ koo. Chajị ahị angịlẹ kahị ri angịmẹjẹ lẹ, ahị, ị ka la eje ọnyọọngịrị gụ angị ihihi ịkịla wuu lẹ.

²Chajị, ahị angịnyị ehe wuu lawụlẹ ri angị kaa họ pyị. Ọng myị́ ọng ọlẹ ká ẹlẹlẹhẹ a gwọọ gụ ya pyị ẹnẹnẹhẹ lẹka lẹ aalẹ, ọngọọwa ri ọngọ la kpẹẹkpẹẹ lụmẹ. Aalẹ, ọngọọwa ayịdang ka jụ ịlọmwụ wu kpa myị́ ẹ-ẹpwụ nya ang myị́ ang nyamwụ ọlẹ wuu kọ ka họ lẹ.

³Ụka kaahị angịnyị á hu oje ochiche-ochiche ju ụnyịrẹ ọ-ọnụ bala ori, ụnyịrẹ ọọwa kaa juhi ihi du kahị jẹ́ kaa kpa ụnyịrẹ ọọwa jẹ ka ẹga myị́ ẹga ọlẹ kọ háahị myị́.

⁴Anụ yẹ ụgbọ nya enyi wẹẹ. Ọ ri nya ịlẹhị, ọ ri ọtụka lụmẹ. Igbachịwụ ọtụka-ọtụka a tị kaa kpọọ jẹdịyẹ u-uhye nya enyi lẹ. Ma, ang ochiche-ochiche, ọngọ ju ụgbọ nya enyi a tị kaa kpa pọọ ka ẹga myị́ ẹga ọlẹ kọ họ́ọ ịnyịnyị lẹ.

⁵Ịnyịnyị, ẹlẹlẹ nya ọngịnyị ehe ọlẹ kọ ri ẹga nya ịnyịrọ ochiche-ochiche nyamwụ a tịtị kaa ya ẹla ọtụka-ọtụka ẹ-ẹpwụ nya ogu ọchịchị lụmẹ lẹ. Anụ yẹ jaabwọ ká ila ochiche-ochiche kaa rụ ipyinu ọtụka-ọtụka wuu myị́ wẹẹ?

⁶Ẹlẹlẹ nya ọngịnyị ehe lẹ, ila ịnyị! Ẹlẹlẹ a ri ẹga nya ịnyịrọ nya ọngịnyị ehe ọlẹ ká ang onyobyi lụmẹ ẹ-ẹpwụ nyamwụ kọ kaa chị wu ẹga nya ịnyịrọ ịkịla wuu lẹ. Ẹlẹlẹ ọwẹ a kaa wuru ila gu ang myị́ ang ọlẹ wuu ká ọngịnyị ehe kaa họ ẹ-ẹpwụ nya ọhịhị nyamwụ odehe ọlẹ lẹ. Ila ọọwa kaa bwu ẹpwụ nya obwila ayịdang kpehe.

⁷Iyo ịlẹpwamẹ bala ịchịnụ bala ilo bala iyo ịkịla ịlẹ wuu kị juwa ẹ-ẹpwụ nya enyi lẹ, ị kaa chị angịnyị ehe kpẹẹ la ọmwụmwụ myị́. Ị dọmwụ kaa mwụ iyo ịwẹ myị ene-ene ịnyịnyịịnyị bwu oyoyi nya alene.

⁸Ma, ọngịnyị ehe ọhẹ-lọhẹ á tị ka jẹ́-ẹ jụ ẹlẹlẹ ọlẹ wu kpa myị́ ẹnẹnẹhẹ kaka. Chajị, ẹlẹlẹ lẹ, ang onyobyi ọlẹ kị ka jẹ́-ẹ wu kụrụ myị́ kaka, ọ ri lẹ. Ẹlẹlẹ ọwẹ a kpa ẹhwa nya igu ụ-ụbwọ nyamwụ lẹlẹ.

⁹Ẹlẹlẹ nyahị ọlẹ, ahị kaa kpa gwogbo ha Ọngọlahị Ohe Oluhye Adahị lẹ. Ẹlẹlẹ ọọwa pyii, ahị tị myịmyị kaa kpa do angịnyị ehe ịkịla ịlẹ ká Ohe Oluhye họhọ la abwụma nya ịlọmwụ ido lẹ.

¹⁰Ọnụ-ọnụ ookpokpo nyahị ọọwa, ahị ọwawa bala ido ododo a kaa bwu kpehe lẹ. Anụ anyadam ẹ-ẹpwụ nya ịKịrayịsị, ọ́ chịla kọ ka lịnyị kpong-kpong ka.

¹¹Anụ ya ká ẹmwụ-enyi ookpokpo ọhẹ-lọhẹ ka jẹ́-ẹ rụ enyi ọlịpyọ bala enyi olujujwo kpehe lụka ookpokpo myị́ ẹnẹnẹhẹ wẹẹ?

¹²Anụ anyadam ẹ-ẹpwụ nya ịKịrayịsị, anụ ya ká ọmwụ nya okoji ọlẹ kị wụrụ “ifigi” ka jẹ́-ẹ nwụ́ ugbe nya okoji ọkịla ọlẹ kị wụrụ “olivu” myị́ wẹẹ? Lee, anụ tị́ ya ká okoji nya alakọnụ ka jẹ́-ẹ nwụ́ ugbe nya okoji ifigi myị́ ẹnẹnẹhẹ wẹẹ? Lẹ, ịnyịnyị, enyi ọlịpyọ a ka jẹ́-ẹ rụ kpehe bwu ẹpwụ nya ẹmwụ nya enyi olujujwo myị́ kpá ẹnẹnẹhẹ kaka lẹlẹ.

¹³Oowo a tị́ ri ọngọ jẹ́ ẹla bala ọ-la ọ-jẹ́ myịmyị lẹpwarịrị nyanụ? Aalẹ, ọngọọwa a tị tị juwa kpa ọhịhị ọnyịịla ọlala bala ụkụrwọ ọhọhọ ẹ-ẹpwụ nya olegu ọdụmwọ bwula ẹla ọjẹ́jẹ ọọwa mẹ.

¹⁴Ma, ọ́ tị ri kanụ juwa la ijiiji onyobyi bwula ujujwo nya ọkịlẹtụ ọlala lee o-juwa la irya nya ịlahị ọkaka nya ịlọnụ-ịlọnụ kem ẹ-ẹpwụ ọkịlẹtụ nyanụ aalẹ, anụ tị tị juwa chị ogu ọhẹ-lọhẹ kpong-kpong ka lee o-juwa me ọnọọkịla tụ ẹla nya ịlẹhị pyịpyị kokoo.

¹⁵Ụma nya abwẹla ịhọhọ ịlịịwẹ á ri nya ẹla ọjẹ́jẹ ọlẹ kọ bwu ẹga nya Ohe Oluhye kpong-kpong ka. Ẹla ọjẹ́jẹ nya odehe ọlẹ a wẹ lẹ. Ọ bwu ẹpwụtụbwọ nya Olegu nya Ohe Oluhye ka. Ẹpwụtụbwọ nya Ohe Onyobyi, ọ bwu lẹ.

¹⁶Chajị, ẹga myị́ ẹga ọlẹ ká olegu nya ijiiji onyobyi ọlala bala irya nya ịlahị ọkaka nya ịlọng-ịlọng kem á ji lẹ, ojigi-jigi bala ụma nya ang inyibyi ịhọhọ datị-datị kem a kaa juwa ẹ-ẹga ọlịnyị lẹlẹ.

¹⁷Ma, ẹla ọjẹ́jẹ ọnyị myị ọnyị ọlẹ kọ bwu ẹga nya Ohe Oluhye lẹ aalẹ, ọhọhẹ-ọhọhẹ ri, ọ-ka la charị-charị. Ọ ka ri ang o-hu okpunyi ha angịnyị. Ọ kaa hu ọwụlẹlẹ ọlala ha angịnyị bala irya o-me ju angịnyị angịkịla ịnyịnyị. Ọ kaa hu ahyẹẹrwẹrwa ọlala ẹ-ẹga nya angị ịkịla ha angịnyị bala ọ-kaa kpa ọhịhị ọlẹ kọ myị la ugbe nya abwẹla ọnyịịla ọhọhọ kịla angịnyị. Ẹla ọjẹ́jẹ ọọwa á kaa chị oku oye-oye ka lee o-hu ahị imiiye ọlala ha ọngịnyị kpong-kpong ka ịnyịnyị.

¹⁸Angị ri angịnyị nya okpunyi ịlẹ kị juwa kpa okpunyi ọlala nyaa ọọwa ju angịkịla ịtọ bwula abwẹla ọnyịịla ọhọhọ haa aalẹ, ugbe nya abwẹla ọnyịịla nya Ohe Oluhye, angịịwa a kaa hya pyii lụka ohyẹẹkpẹ lẹlẹ.