Read idege IJEMSI 4 Bible Online

IJEMSI 4 - idege bible

IJEMSI 4

¹Ịyẹ a tị́ ju ọmwụ nya uya ọmama bala arụ ọrụrụ ẹ-ẹpwarịrị nyanụ? Ang odudu nya ẹla ọmwọmwọ ọlịnyị ri yẹkẹẹ, ụma nya ang ị-chẹhị gbọgbọ datị-datị ilodehe ọlẹ kị juwa dẹwụ tụ awụlẹ pyịpyị ẹ-ẹpwụ ọkịlẹtụ nyanụ lụmẹ a du lẹ.

²Ụka ká ang ọlala á juwa maanụ ma kanụ ka la, kanụ tị la ang ọọwa myị́ kaka lẹ, anụ mwọọgịlẹ juwa jahị da angịnyị angịkịla ọnwụnwụ lẹlẹ. Ụka kanụ la imajẹ nya ang nya angịnyị angịkịla, kanụ tị laa myị́ kaka lẹ, anụ mwọọgịlẹ juwa ma uya, juwa dẹwụ ta awụlẹ ịnyịnyị lẹlẹ. Ang odudu kanụ kaa la ang ọlẹ kanụ juwa tịtọ ka ri yẹkẹẹ, ánụ myị kaa bịlẹ ang ka ẹpwụtụbwọ nya Ohe Oluhye ka, a du lẹ.

³Ụka kanụ tị bịlẹ-bịlẹ ka ẹpwụtụbwọ nya Ohe Oluhye, ánụ tụtụm kaa la ka ịnyịnyị, chajị ánụ myị kaa bịlẹ bwula irya ọnyịịla ka. Chajị, ụma nya ang ịlẹ kị kaa kpụ ugbinyịrọ nyanụ ịpyọ kem, anụ kaa bịlẹ, a du lẹ.

⁴Anụ alẹng bala anyang ịlẹ kanụ lala angị họ ụya ị-ịlahị nya Ohe Oluhye bwula ọchịla o-hu ọkịlẹtụ ha ka nyanụ, ó ri ánụ jẹ́ yẹkẹẹ, angị ri aligu ta odehe ọlẹ nyị ri aluji nya Ohe Oluhye ka? Chajị nya ọọwa lẹ, ọng myị́ ọng ọlẹ kọ ri oligu ta odehe ọlẹ lẹ aalẹ, ọngọọwa hu ịlọmwụ nya oluji nya Ohe Oluhye lẹ.

⁵Lee, anụ tị́ me ká ẹla ọlẹ ká Ụpwụ Ịgọgọ ya ri ọnọọkịla? Ẹla ọọwa yẹkẹẹ, “Ohe Oluhye ayịdang kaa kpa ijiiji ọlala nyamwụ kpẹhị rịrị olegu ọlẹ kọ ya kụ ẹpwụ nyahị ahị angịnyị ehe.”

⁶Ma, Ohe Oluhye kaa hu ọngịrị ọnahị ọtụka nyamwụ hahị. Ịnyị a du kị ya ẹ-ẹgẹhẹ yẹkẹẹ, “Ohe Oluhye kaa tụ alọbọọchẹ pyịpyị, ọ tị kaa hu ọngịrị ọnahị nyamwụ ha angị la dụmwọ.”

⁷Chajị nya ọọwa lẹ, anụ kpa ịlọnụ weji ha Ohe Oluhye mẹ. Kanụ godayị kpakpakpa, juwa tụ Ohe Onyobyi pyịpyị mẹ aalẹ, Ohe Onyobyi ka rụnyẹ rụ hiinu lẹ.

⁸Ó ri kanụ tụ ịlọnụ ju Ohe Oluhye chwẹẹ aalẹ, Ohe Oluhye tịtị ka tụ junu chwẹẹ ịnyịnyị. Anụ alọhọbịrị, anụ tọ abwọ nyanụ cheri-cheri bwu ẹpwụ nya ọhọbịrị ọhọhọ wuu mẹ. Anụ angị la irya imiiye, anụ tụụbwọ hi irya imiiye ọlala nyanụ deeji, kanụ la ọkịlẹtụ ookpokpo mẹ.

⁹Anụ́-ụ juwa bwọ ayiiji, kanụ juwa bida bala o-juwa jida ịnyịnyị, chajị nya ịhọbịrị nyanụ wuu mẹ. Anụ myị ká ẹhụ ọhụlọọ-hụlọ nyanụ a yẹ ri ida ọbaba, ká ọkẹkẹnị ọchịchị nyanụ a yẹ ka ri ayiiji ọbwọbwọ hanụ mẹ.

¹⁰Kanụ juwa kpa ịlọnụ ka eji ha Ọngọlahị Ohe Oluhye mẹ aalẹ, Ohe Oluhye tịtị ka kpanụ ka uhye.

¹¹Anụ anyadam ẹ-ẹpwụ nya ịKịrayịsị, anụ juwa ya ẹla onyobyi rụ́ awụlẹ ka! Chajị, ọng myị́ ọng ọlẹ kọ juwa ya ẹla onyobyi rụ́ ọnyadamwụ ọkịla ịnyị lee o-juwa kpa irya nya ẹhị ọrịrị ọngịnyị rịrị u-uhye nya ang onyobyi ọhọhọ kem la ọnyadamwụ ọkịla eje aalẹ, ehile nya Ohe Oluhye ayịdang, ọngọọwa a wẹẹ ya ẹla onyobyi rụ́ lẹlẹ. Aalẹ, ọngọọwa juwa hu ịlọmwụ nya agaba ọ-la ehile nya Ohe Oluhye eje ịnyịnyị lẹ. Ma, ọng myị́ ọng ọlẹ kọ tị hu ịlọmwụ agaba ọ-la eje nya ehile nya Ohe Oluhye lẹ aalẹ, ọngọọwa á tị tị juwa e-ekpeleji nya ehile nya Ohe Oluhye ọkpakpa kaka. Ọkọkọ nya ọọwa lẹ, agaba oleje nya ehile nya Ohe Oluhye kem, ọ hu ịlọmwụ lẹlẹ.

¹²Ma, Ọngọ ookpokpo ụbwọọmwụ kẹnẹ-kẹnẹ a tị ri Ọngọ kaa hu ehile ha bala Ọngọ ri Agaba ọ-kaa kpa ehile ọọwa la angịnyị ehe eje myị́ lẹlẹ. Ọngọọwa a ri Ohe Oluhye Ọngọlẹ kọ kaa la ọngịrị chị ọngịnyị ehe da myị́ bala ọ-kaa ta ọngịnyị ayịreji myị́ ịnyịnyị lẹ. Lẹ, ụma nya ọngịnyị ọlanyị, a tị́ me irya ká ri, du ká juwa hu ịlọng agaba oleje nya ehile nya Ohe Oluhye?

¹³Anụ wo mẹ! Anụ angịlẹ wuu kanụ wẹẹ yẹkẹẹ, “Alẹ oleeri ọlẹ, ahị ka rụ kele ka ẹgẹlẹ lee ijuju, ahị ka rụ kele ka ẹga ọlaanyị kaka hụ ụ-ụwa, juwa da ọhị lala ẹka lẹpwụ-lẹpwụ, ẹ-ẹga ọlẹ kahị ka ye apyobwuna ọtụka-ọtụka wẹẹ,”

¹⁴lẹ, anụ jẹ́ ang ọlẹ ká ijuju ka kpa warị wẹẹ ene lẹ? Anụ dọmwụ jẹ́ ang ọlẹ ká etu nya ọhịhị ayịdang ri wẹẹ ene? Ọhịhị nya angịnyị ehe lala ịmwụ-ila ọlẹchụ ọ-kpụ́ ang ọlẹ kọ kaa chị pwurem kpehe, kọ kaa myị́ yịra-yịra ahyaahị.

¹⁵Ang ọlẹ kọ chịla, ịnọ, kanụ ka ya ri yẹkẹẹ, “Ó ri ká Ohe Oluhye á myị ká ịhụ ọdada nyahị á ji, kọ ri kọ myịmyị ya ụgbẹyị da hahị aalẹ, ahị ka họ ụma nya ang ọlẹ lee ọlaanyị lụka ọlẹ ịịlẹ.”

¹⁶Ma, ang ọlẹ kanụ wẹẹ họ lẹẹlẹẹ ri, ogu ọchịchị ẹ-ẹpwụ nya ọbọọchẹ ohihi nyanụ. Anụ wo mẹ, ogu ọchịchị ọnyị myị ọnyị ọlịnyị wuu ri ọhọbịrị ọhọhọ.

¹⁷Ọng myị́ ọng ọlẹ kọ jẹ́ ang ọnyịịla ọlẹ kọ chịla ọhọhọ, kọ tị myị họọ ka aalẹ, eje nya ọhọbịrị ọhọhọ wu ọngọọwa lẹ.