Read idege IJEMSI 5 Bible Online

IJEMSI 5 - idege bible

IJEMSI 5

¹Anụ ke ụrụ, anụ angị ri alụdụ! Anụ́-ụ juwa jida bala o-juwa chị eko, chajị nya akama ịtụka ịlẹ kị juwa ka wẹ chịnụ ọgụ mẹ!

²Ụdụ ọkpụkpụ nyanụ wuu họ iyabwọ lanụ kpá ene-ene lẹ. Apile tị rinu ịwụrụ ịkụrụ-kụrụ nyanụ kpá wuu ịnyịnyị lẹ.

³Okpoko onyoowuru bala okpoko ịgọm nyanụ chị ẹga kpá wuu ịnyịnyị lẹ. Ẹga ọchịchị nya okpoko onyoowuru bala okpoko ịgọm nyanụ ịwẹ ri ibeenu tụ ang onyobyi ọhọhọ nyanụ pyịpyị bala o-ri ibeenu yẹkẹẹ, ịnyịnyị-ịnyịnyị, akama nya ang onyobyi ọhọhọ ọọwa a ka ta ugbinyịrọ nyanụ ayịreji gbanggbang lala ila a rụ ang lẹlẹ. Chajị, ụkụrwọ nya ụdụ ọ-tụguru kem, anụ jam họ loyi nya ẹnụtụrụ ohyẹẹkpẹ ọlẹ lẹlẹ.

⁴Anụ yẹ mẹ! Okpoko ọlẹ ịnọ, kanụ ka ya nwụ angị họ ụkụrwọ hanụ ẹ-ẹrụ nya okpoko uri, kanụ ya ri la ijẹẹhị, du kị wẹẹ chị eru lẹ, eru ọchịchị nyaa ọọwa wu Ọngọlahị Ohe Oluhye nya Ụbwẹwụ ọyị lẹ!

⁵Ọ ri nya ịlẹhị, ẹ-ẹpwụ nya ọhịhị nyanụ olodehe ọlẹ lẹ, anụ la iru nya ang-abwọ ịlịnya bala o-juwa ri odehe ọlẹ, jaabwọ kọ kpụnụ ịpyọ kaka ba ịnyịnyị lẹ! Anụ juwa ri ang oriri, juwa ju eyo nọ gbe ẹnụtụrụ nya eje nya Ohe Oluhye lala ẹna o-ju eyo ọlẹ kị kaa kpa kaka nwụ.

⁶Anụ juwa ya eje wu alabwẹla ọnyịịla, juwa myịmyị-ị̀ nwaa nwụ ịnyịnyị. Ma, ịwa ayịdang á tị da ọnụ wẹẹnụ kpong-kpong kaka.

⁷Chajị nya ọọwa lẹ, anụ anyadam ẹ-ẹpwụ nya ịKịrayịsị, anụ cheri kanụ juwa la ugbodu ojuju ịnyịnyịịnyị gbee pwụ ụka ọlẹ ká Ọngọlahị iJisọsị ịKịrayịsị ka mwọọgịlẹ warị mẹ. Anụ yẹ jaabwọ ká ọngọ wu ẹrụ kaa ju ugbodu tata, bwu ụka nya enyi ododo nya ọgbanyẹ, gbee da ka enyi ododo ohyẹẹkpẹ-ẹkpẹ ene ká ang nya ẹrụ nyamwụ kaa há mwọọrịị-mwọọrịị wẹẹ!

⁸Lẹ, anụ́-ụ tịtị juwa ju ugbodu tata, kanụ myị ká ọmyịmyị ọlọkịlẹtụ nyanụ a la kpakpa ịnyịnyị mẹ, chajị ụka nya ọwẹwẹ nya Ọngọlahị la ju chwẹẹ lụmẹ lẹ.

⁹Anụ anyadam ẹ-ẹpwụ nya ịKịrayịsị, anụ ri angị juwa mwọ ala ya bawụlẹ ka, chajị ká Ohe Oluhye ka ya eje wunu kaka mẹ. Anụ yẹ mẹ! Ọngọlẹ kọ ri Agaba oleje Agụgụ wuu godayị rịrị ọ-ọnụ ogirigba nyọka jụ warị lẹ!

¹⁰Anụ anyadam ẹ-ẹpwụ nya ịKịrayịsị, anụ́-ụ kpịtịya nya akama ọyẹyẹ bala ugbodu ojuju nya alọmwụ ịgọgọ inyogo ịlẹ kị kpa ẹnyị nya Ọngọlahị Ohe Oluhye ya ẹla dodehe nya ang o-ju ẹjẹẹ ha ịlọnụ mẹ.

¹¹Anụ wo mẹ! Angị inyogo ịịwa ịlẹ kị kpa ogodayị kpakpakpa ha Ohe Oluhye nyaa pwụ ọbaba myị́, a ri angị la ahị ọwawa nya Ohe Oluhye lẹ. Anụ tị́ wo oja chajị nya ugbodu ojuju nya iJobu onyogo bala ọ-yẹ jaabwọ ká Ọngọlahị Ohe Oluhye tịtị bwu chị obyi omeme ọnyịịla nyamwụ ehe ẹ-ẹga nya iJobu, ọlẹ kọ mẹjẹ jaabwọ ká Ọngọlahị Ohe Oluhye ri Ọlọnahị bala Ọngọ la ahyẹẹrwẹrwa lụmẹ kaka ba?

¹²Anụ anyadam ẹ-ẹpwụ nya ịKịrayịsị, ọgụgụ wuu ri yẹkẹẹ, anụ nwa iro kpong-kpong ka gbanggbang. Anụ nwa iro la ẹnyị nya Ohe Oluhye kpong-kpong ka lee ọ-nwa la ẹnyị nya odehe ọlẹ ka lee la ẹnyị nya ịngịngịhyẹ ọkịla kpong-kpong kaka ịnyịnyị. Anụ myị ká o-ya nyị “ee” nyanụ ā ri “ee” ịnyịlẹhị, ká o-ya nyị “ehe” nyanụ ā ri “ehe” ịnyịnyị ịnyịlẹhị ụka myị́ ụka, chajị kanụ ka ju ka ẹpwụ nya eje owuwu nya Ohe Oluhye kaka mẹ.

¹³Ọngọhẹ juwa yẹ akama ẹ-ẹpwarịrị nyanụ? Aalẹ, ọngọọwa a raabwọ ha Ohe Oluhye mẹ. Ọngọhẹ juwa chị ọkẹkẹnị ẹ-ẹpwarịrị nyanụ? Aalẹ, ọngọọwa a juwa mwu eje gwogbo ha Ohe Oluhye ịnyịnyị mẹ.

¹⁴Ọngọhẹ juwa ẹ-ẹpwarịrị nyanụ kọ juwa la ẹdụrụ ọjụjụ? Aalẹ, ọngọọwa a be ẹkọ wụrụ alegbeju nya ịchọọchị, kị kele kaka kpa ẹnyị nya Ohe Oluhye gu ida tudọọ, kị raabwọ ju ọngọọwa ká Ohe Oluhye a họọ uda mẹ.

¹⁵Chajị, abwọ ọrịrị ha Ohe Oluhye bwula ọmyịmyị ọlala ju ọlẹdụrụ ọọwa ka la ọngịrị chọọ da myị́. Ọọwa lẹ, Ọngọlahị Ohe Oluhye a ka wuloo eji bwu ẹpwụ nya ẹdụrụ nyamwụ lẹlẹ. Ọ́ riri ká ọngọọwa á họhọ bịrị ba Ohe Oluhye juwa aalẹ, Ohe Oluhye ka hịnyọhi ịhọbịrị nyamwụ ịịwa họọ ịnyịnyị lẹ.

¹⁶Chajị nya ọọwa lẹ, anụ́-ụ juwa ya ịhọbịrị nyanụ dodehe je awụlẹ, kanụ juwa raabwọ ju awụlẹ, chajị ká Ohe Oluhye ka họnụ uda nya ẹdụrụ ọlẹ kọ juwa jụụnụ ịnyịlẹhị mẹ. Chajị, abwọ ọrịrị nya ọlabwẹla ọnyịịla kaa kpa ọngịrị nya Ohe Oluhye hireji warị kaka họ ụkụrwọ ẹbyẹbyị ọtụka myị́.

¹⁷Anụ tị wo oja nya Ịlayịja ọlẹ kọ ri ọngịnyị ehe ọlam-ọlam lala ahị angịkịla. Chajị, Ịlayịja ọọwa kpa ọkịlẹtụ ookpokpo bịlẹ Ohe Oluhye ẹ-ẹpwụ nya abwọ ọrịrị nya ịlẹhị-ịlẹhị la ụka nyamwụ yẹkẹẹ, Ohe Oluhye, Ahụ nyị do enyi kpong-kpong kokoo! Ịnyị, Ohe Oluhye a wo abwọ ọrịrị nyamwụ ọọwa, lẹ, Ọ do enyi ọ-ọpyị ọọwa kpong-kpong kaka ịnyịlẹhị, gbee jịra ẹ-ẹka ịta da ọya ịrwọnyẹ gbẹgbịlẹgbẹ lẹlẹ.

¹⁸Ịnyị, ụka ká Ịlayịja myịmyị raabwọ byi Ohe Oluhye ẹ-ẹkpẹ nya ọọwa yẹkẹẹ, Ohe Oluhye, Ahụ nyị do enyi ugbẹnyị mẹ lẹ, Ohe Oluhye a do enyi ọtụka-ọtụka ọ-ọpyị ọọwa lẹ, ang nya ẹrụ nyaa a há lẹlẹ.

¹⁹Anụ anyadam ẹ-ẹpwụ nya ịKịrayịsị, ó ri ká ọngọngọhẹ lẹpwarịrị nyanụ á juwa hwahị hi ụgbẹyị nya Ohe Oluhye, ká ọnyadamwụ ọkịla, á kele kaka kpọọ nya tịrẹkpẹ chị Ohe Oluhye ọgụ myị́ lẹ,

²⁰aalẹ, ọngọọwa a jẹ́ mẹ, ọng myị́ ọng ọlẹ kọ kpa ọlọhọbịrị tịrẹkpẹ bwu ụgbẹyị nya ahị ọhụhụ nyamwụ nya chị Ohe Oluhye ọgụ myị́ ịlẹhị lẹ aalẹ, ọngọọwa chị ugbodu okpukpuru nya ọlọhọbịrị ọọwa da bwu ẹpwụ nya ayịreji ọtata lẹ. Aalẹ, ụbwọ ọdada nyamwụ ọọwa myịmyị la ọngịrị ka yịlẹ iru nya ịhọbịrị ịhọhọ lụmẹ-lụmẹ hi ọlọhọbịrị ọọwa myị́ ịnyịnyị lẹ.