Read idege 1 IPITA 1 Bible Online

1 IPITA 1 - idege bible

1 IPITA 1

¹Ụpwụ ọlẹ bwu ẹga nyam am iPita ọlẹ kam ri ọlẹrụ nya iJisọsị ịKịrayịsị. M jam dọọ warị wanụ anụ angịnyị nya Ohe Oluhye ịlẹ kanụ nyi epepe rụ kele ka ịpyị nya ịPọntọsị bala ịpyị nya ịGaletiya bala ịpyị nya Kapadosiya bala ịpyị nya Echiya bala ịpyị nya iBitiniya wuu kaka kụ ụwa lala angga.

²Anụ ri angịlẹ ká Ohe Oluhye Adịda chụchụ ha ịlọmwụ jaabwọ kọọwa ayịdang me obyi ene-ene ya, ọwa nyị ka họ. Anụ myịmyị ri angịlẹ ká Ohe Oluhye kpa Olegu Ịgọgọ nyamwụ chịnụ ebwo ha ịlọmwụ, chajị kanụ ka jẹ́ ihi ojuju nya ịlẹhị-ịlẹhị. Chajị, ká iJisọsị ịKịrayịsị ka jẹ́-ẹ bwula ọọwa kpa ịwọ nyamwụ nyi ịlọ hụnụ ịnyịnyịịnyị. Ká ọnahị nya Ohe Oluhye bala okpunyi nyamwụ a juwa tanụ ọgwọgụ mwụ aba ba mẹ.

³Ká ahị ọwawa wuu a ri ịnya Ohe Oluhye Adịda nya Ọngọlahị iJisọsị ịKịrayịsị. Bwula ahyẹẹrwẹrwa ọtụka nya Ohe Oluhye a du kọ kpa nwụhị ma onyeewe ẹ-ẹpwụ nya ẹhị ọrịrịị-rịrị gbe ọhịhị ọmyịmyị-ka, bwula ọlẹ ká Ohe Oluhye wule iJisọsị ịKịrayịsị eji bwula igu lẹ.

⁴Ịnyị lẹ, ahị ri angị la ang ugu ọlẹ kọ kaa ta ayịreji myị́ kaka lee ọhọbịrị ọ-kaa chọọ ịrị myị́ kaka lee ọ-kaa gbu-enyi kpong-kpong kaka, ịlẹ ká Ohe Oluhye ya gu ụ-ụwa e-epwoohe gbehi lẹlẹ.

⁵Chajị, Ohe Oluhye ayịdang a juwa kpahị la ụbwọ ọnyọọngịrị nyamwụ bwula ọmyịmyị ọlala nyahị u-uhye nya ọchịda nyamwụ ọlẹ kọ juwa nwụlanọ kọ ka ya chị ehe hahị lụka ohyẹẹkpẹ lẹlẹ.

⁶Chajị nya ọọwa lẹ, anụ́-ụ juwa chị ọkẹkẹnị nya ịlẹhị-ịlẹhị mẹ. Ọ ri ịnyịlẹhị, lụka ọlẹẹlẹẹ lẹ, iru nya ịmayẹ la datị-datị juwa ka warị chịnụ ọgụ myị́ lụka o-kpii.

⁷Ịmayẹ ịịwa ka warị nyọka da ọmyịmyị ọlala nyanụ uya chajị ká ọngịrị nya ọmyịmyị ọlala nyanụ ọọwa ka jẹ́-ẹ chị ehe a-ahịgboo myị́. Chajị ká o-ya dodehe nya ọọwa ka jẹ́-ẹ kpa ahị ọwawa wuu bala ogbo ogwogwo wuu bala ihi ọlala wuu warị lụka ọlẹ ká iJisọsị ịKịrayịsị ka chị ịlọmwụ ehe la ẹnụtụrụ ohyẹẹkpẹ mẹ. Chajị, okpoko ịgọm a la ịnya lụmẹ lala ọmyịmyị ọlala nyanụ myị́ ka. Okpoko ịgọm kọ tị kaa ta ayịreji tata myị́ lẹ, ila nya utiyo ị-kaa kpa kpọ́ọ kpụ́ ene kọ kaa hiigu myị́ lẹ.

⁸Ọ ri nya ịlẹhị, ánụ yẹ iJisọsị ịKịrayịsị yẹyẹ ẹ-ẹhị lẹka. Ma, anụ tị la ọháha nya ịlẹhị-ịlẹhị ẹ-ẹga nyamwụ lẹ. Ịnọ, ánụ yọọ yẹ ẹ-ẹhị lẹka, ma, anụ tị la ọmyịmyị u-uhye nyamwụ bala o-juwa chị ọkẹkẹnị ọtụka-ọtụka ọlẹbyẹbyị ọlẹ ká ẹlẹlẹ nya ọngịnyị ehe á ka jẹ́-ẹ da wụlẹ myị́ kaka ịnyịnyị lẹ.

⁹Bwula ọmyịmyị ọlala nyanụ ọọwa a du kanụ tịtị ye ọchịda nya ugbodu okpukpuru nyanụ wẹ lẹlẹ.

¹⁰Alọmwụ inyogo nya Ohe Oluhye ịlẹ kị yẹ ọmwụ dodehe rụ́ ọgahị ọnahị nya Ohe Oluhye ọlẹ kanụ la wẹẹ lẹ, ịwa ayịdang juwa kaa teleko bala o-juwa tịtọ nya ang chajị nya ọchịda nya Ohe Oluhye ọlẹ lụka nyaa.

¹¹Alọmwụ nya Ohe Oluhye ịịwa juwa kaa charịnya nyọka jẹ́ ụma nya ọngọlẹ kịịwa ayịdang juwa yẹ ọmwụ rụ́ bala ụka ọlẹ ká ang ịịwa ka họ jịra lụka ọlẹ ká Olegu Ịgọgọ nya ịKịrayịsị ọlẹpwụ ọkịlẹtụ nyaa juwa kpaa yẹ ọmwụ dodehe rụ́ ụma nya akama ịlẹ wuu ká ịKịrayịsị ọọwa juwa ka yẹ bala ụma nya ogbo ọlẹbyẹbyị nyamwụ ọlẹ kọ juwa ka chị ehe ị-ịlahị ịnyịnyị.

¹²Ịnyị lẹ, Ohe Oluhye a chọọ ehe mẹjaa yẹkẹẹ, ịịwa ayịdang la ịlaa kpangga, alọmwụ ịịwa nyaa juwa myị ẹrụ ha lụka kịị nyị juwa yẹ ọmwụ ọọwa dodehe ka. Ma, anụ aloyi nyahị ọlẹ nyaa juwa myị ẹrụ ịịwa ha lẹ. Lẹ, ọ-họ jịra nya ẹla oyaya nyaa ọọwa a wẹ ri ẹrụ ọnyịịla nya ọchịda ọlẹ kị kpa kaka ya jenu wẹ, bwu ọnụ nya angịlẹ kị wẹẹ ya ẹrụ ọnyịịla nya ọchịda jenu bwula ọngịrị nya Olegu Ịgọgọ ọlẹ kị ya du bwu epwoohe warị lẹlẹ. Ẹrụ ọnyịịla ọọwa ri ang ọlẹ kọ juwa ma alegu-ẹrụ nya Ohe Oluhye ma lụmẹ la ịlaa, kị ka jẹ́ ang chajị nyamwụ ịnyịnyị dọmwụ.

¹³Chajị nya ọọwa lẹ, anụ́-ụ juwa kụ giri-giri ẹ-ẹpwụ nya irya omeme ọlọkịlẹtụ nyanụ mẹ. Ánụ́ juwa la ọhịhị nya ang ọ-họ ba oyi ịnyịnyị mẹ. Kanụ hu ẹhị ọrịrịị-rịrị nyanụ wuu nọ ẹ-ẹga nya ọnahị nya Ohe Oluhye ọlẹ kọ juwa warị hanụ ị-ịlahị ụka ọlẹ ká iJisọsị ịKịrayịsị juwa ka chị ịlọmwụ ehe lụka ohyẹẹkpẹ mẹ.

¹⁴Jaabwọ kanụ ri anyị nya Ohe Oluhye ịlẹ kanụ kaa ju ihi yẹẹyẹẹ lẹlẹ, anụ myị kanụ myịmyị juwa nwụ́ ọhịhị nyanụ hụrụ imyi nya ang nya ugbinyịrọ ịlẹ kanụ kaa họ ene-ene lụka nya ájẹ́jẹ-ka nyanụ tụtụm kokoo!

¹⁵Ma, ọkọkọ nya ọọwa lẹ, jaabwọ ká Ohe Oluhye Ọngọlẹ kọ be ẹkọ wụrụụnụ kaka ri angịnyị nyamwụ ri Ọngọ ọlịgọgọ lẹ, anụ́-ụ tịtị juwa la ịgọgọ ẹ-ẹpwụ nya abwẹla ọhọhọ nyanụ wuu ụka wuu mẹ.

¹⁶Chajị, Ohe Oluhye ayịdang ya ẹla ta angịnyị nyamwụ ụ-Ụpwụ Ịgọgọ yẹkẹẹ, anụ́-ụ la ịgọgọ mẹ. Chajị, Am Ohe Oluhye ayịdang la ịgọgọ.

¹⁷Lẹ, jaabwọ ká Ohe Oluhye Ọngọlẹ kọ kaa la eje chị oku ha ọngọhẹ hiigu datị hi ọngọkịla ka, ma, kọ kaa la angịnyị wuu eje jaabwọ ká abwẹla ọhọhọ nyaa la kaka ba, a ri Ohe Oluhye Ọngọlẹ kanụ wẹẹ wụrụ Adịda nyanụ lẹ, anụ́-ụ tịtị juwa họ abwẹla nyanụ ọnyị myị ọnyị wuu ẹpwụ nya uhi nya Ohe Oluhye ojuju lụka ọlẹ kanụ jam odehe ọlẹ lala angga ịlẹ kị kuku hi ẹpwa nyaa mẹ.

¹⁸Anụ la ịlọnụ jẹ́ yẹkẹẹ, Ohe Oluhye ranụ rara ha ịlọmwụ, bwula ọlẹ kọ gbanụ kpehe bwu ẹpwụ nya agbayị nya ang inyibyi ịhọhọ ịlẹ kanụ ye bwu ẹpwụtụbwọ nya adanụ anyị lẹ. Ụ-ụma nya ang ịlẹ kị kaa bịrị-bịrị myị́ ilodehe ọlẹ lala okpoko onyoowuru lee okpoko ịgọm, Ohe Oluhye a tị kpa ranụ ha ịlọmwụ ka.

¹⁹Ma, ịwọ ọlịnya ọtụka nya ịKịrayịsị ọlẹ kọ lala Ọnyị ọkpịlọ ọlẹ kọ la abyị ọkpụkpụ nya ang onyobyi ọhẹ-lọhẹ ka lee ọ-da ukpuru kpong-kpong ka ịnyị!

²⁰Ohe Oluhye ayịdang kpa ẹla ọjẹ́jẹ ọnalọ nyamwụ me obyi ene-ene nya ọmwụ ọdada nya odehe ọlẹ yẹkẹẹ, ịKịrayịsị ọọwa, ọwa nyaa ka du ẹrụ warị wẹ odehe ọlẹ lẹ. Ịnyị lẹ, Ohe Oluhye a chị ịKịrayịsị ọọwa ehe lẹẹ lụka nya oyi ohyẹẹkpẹ ọlẹ chajị nyanụ ịnyịlẹhị lẹlẹ.

²¹Bwula ịKịrayịsị ọọwa, a du kanụ ri angị la ẹhị ọ-da hile wẹ ẹ-ẹga nya Ohe Oluhye Ọngọlẹ kọ wule ịKịrayịsị ọọwa eji bwula igu bala ọ-ya ogbo nya ịlọmwụ ha ịKịrayịsị ọọwa wẹ lẹlẹ. Ọlịnyị a tị du ká ọmyịmyị ọlala nyanụ wuu bala ẹhị ọrịrịị-rịrị nyanụ juwa ẹ-ẹga nya Ohe Oluhye ayịdang lẹlẹ.

²²Jaabwọ kanụ hụ́ ugbodu okpukpuru nyanụ wẹ wuu cheri-cheri bwula ihi nya ẹla nya ịlẹhị nya Ohe Oluhye ojuju wuu chajị nyọka jẹ́-ẹ la ọháha ọgbagbịlagba ẹ-ẹga nya anyadanụ ịkịla ẹ-ẹpwụ nya ịKịrayịsị lẹlẹ, anụ́-ụ juwa la ọháha ẹ-ẹga nya awụlẹ yẹẹyẹẹ bwu ẹpwụ ọkịlẹtụ nyanụ wuu mẹ.

²³Chajị lẹẹlẹẹ lẹ, ị nwụnụ ma onyeewe lẹ. Ma, ọmama onyeewe nyanụ ọọwa á tị bwula ụma nya ẹjẹ nya ang ọlẹ kọ kaa mama ju eji myị́ kpong-kpong tị ka. Ma, ọ bwula ụma nya ẹjẹ nya ang ọlẹ kọ kaa mama myị́ kpong-kpong kaka. Chajị, ọ bwula ẹla ọlọhịhị bala ẹla o-gbe oyi myị́ oyi nya Ohe Oluhye ayịdang kpangga.

²⁴Chajị Ụpwụ Ịgọgọ yẹkẹẹ, “Angịnyị ehe wuu kaa gbu abịla lala apwụ nya amẹ, ụhị ọháha nya ugbinyịrọ ọlẹ tị kaa gbu wombooo jaabwọ ká ikoko nya ekeji kaa gbu wombooo ịnyịnyị. Chajị, amẹ kaa gbu wombooo, apwụ nya ekeji tị kaa wo hụrụ ịnyịnyị.

²⁵Ma, ẹla ọlọnụ nya Ọngọlahị la lẹ, ọ tị kaa juwa pyịyọọ gbe oyi myị́ oyi.” Ụma nya ẹla ọọwa kpangga a ri ẹrụ ọnyịịla ọlẹ kị kpa warị kaka ya jenu lẹ.