Read idege 1 IPITA 2 Bible Online

1 IPITA 2 - idege bible

1 IPITA 2

¹Chajị nya ọọwa lẹ, anụ́-ụ juwa tụ ibyi nya ọkwọ ọlala wuu bala ọngịnyị ọ-ho ri la ijẹẹhị wuu bala ẹla nya ịlẹhị ọhọhọ-ka wuu bala ijiiji onyobyi ọyẹyẹ wuu bala ẹla onyobyi o-juwa yaya bịrị angịkịla wuu, kịnyaa hi ịlọnụ hwẹẹẹ mẹ.

²Kanụ juwa charịnya nya ẹla nya ịlẹhị ọ-da ụpwụ ka nya Olegu Ịgọgọ ọlẹ kọ ku ọmwakpa nya enyi-ẹmẹ hanụ jaabwọ ká anyị ịlabwọ kaa wu iwoo nya ẹmẹ ọnyẹnyẹ nya ịnaa mẹ. Chajị ká ẹla nya ịlẹhị ọọwa ka jẹ́-ẹ họ kanụ ka ri angị nwanwa ẹ-ẹpwụ nya ẹla nya ọchịda nya Ohe Oluhye ọọwa myị́ mẹ.

³Chajị, anụ ayịdang kpa ọnahị nya Ọngọlahị la kọnụ nyanụ lẹ!

⁴Chajị nya ọọwa lẹ, anụ kẹwẹ wẹ ẹga nya iJisọsị ịKịrayịsị ọngọlẹ kọọwa a ri ẹjwọ ọlẹ kọ juwa chị ehe mẹ. Ọ ri nya ịlẹhị, ọ ri ẹjwọ ọlẹ ká angịnyị ehe pwa, kị gbọọ ugu deeji. Ma, ị-ịlahị nya Ohe Oluhye tị lẹ, ọwa a ri ẹjwọ ọlịnya ọtụka ọlẹ ká Ohe Oluhye chụchụ ha ịlọmwụ lẹlẹ.

⁵Chajị nya ọọwa lẹ, jaabwọ kaanụ ayịdang tịtị ri ajwọ ichiche ịlẹ kị juwa hịhị ẹ-ẹpwụ nya ịKịrayịsị lẹlẹ, anụ tịtị kpa ịlọnụ kele ka ẹga nyamwụ kọ kpanụ nwụ́ ẹpwang ha ịlọmwụ ẹ-ẹpwụ nya olegu mẹ. Chajị kanụ ka jẹ́-ẹ ri angị ịlịgọgọ ikịla iya ha Ohe Oluhye, kanụ juwa kịla iya ọlẹ ká Ohe Oluhye ka jẹ́-ẹ yeye myị́ bwula iJisọsị ịKịrayịsị ẹ-ẹpwụ nya ang nya olegu ọhọhọ nyanụ wuu mẹ.

⁶Chajị, ị da kpehe ẹ-ẹpwụ nya Ụpwụ Ịgọgọ yẹkẹẹ, “Anụ yẹ mẹ, Am Ohe Oluhye juwa hu ẹjwọ ọhẹ da itiwe nya ẹpwang ụ-ụwa ị-ịSayọn lẹ. Ẹjwọ ọọwa kpakpakpa a ri ẹjwọ o-wu itiwe nya ẹpwang ọọwa kpa, ọlẹ kaam Ohe Oluhye chụchụ bala o-ri ẹjwọ ọlịnya lụmẹ lẹ. Ọng myị́ ọng ọlẹ kọ tị myị la ẹjwọ ọọwa lẹ, aalẹ, oyoyi á ka ju ọngọọwa kpá ẹnẹnẹhẹ kaka.”

⁷Chajị nya ọọwa lẹ, ẹ-ẹga nyanụ anụ angịlẹ kanụ myị la ịKịrayịsị ọọwa lẹ, ọ ri ẹjwọ ọlịnya lụmẹ hanụ. Ma, ẹ-ẹga nya angịlẹ kị tị myị la ịKịrayịsị ka lẹ, ị ka yẹ yẹkẹẹ, “ỊKịrayịsị nyaa ri ẹjwọ ọọwa ọlẹ ká angị me ube pwa, kị gbọọ ugu deeji, kọ tị mwọọgịlẹ yẹ kaka ri ẹjwọ olegbeju o-wu itiwe nya ube ọọwa kpa lẹlẹ.”

⁸Ị ka myịmyị-ị̀ yẹ yẹkẹẹ, ịKịrayịsị nyaa ri ẹjwọ ọọwa ọlẹ ká angị myịmyị-ka, ka chị ụchụụ u-uhye nyamwụ lẹ bala ọ-ka jẹ́ yẹkẹẹ, ịKịrayịsị nyaa ri ẹjwọ ọọwa ọlẹ ká angịịwa nyị ka kịlata mileji u-uhye nyamwụ ọọ-la ọmyịmyị ọlala-kaka nyaa lẹlẹ. Ang odudu, kị mileji ịnyị ri chajị nyọlẹ kị myị ju ihi nya ẹla nya Ohe Oluhye kaka. Chajị, Ohe Oluhye hunọ ịnyị ene-ene yẹkẹẹ, uri nya ihi ojuju-ka, nyị ka ri eji ọmịla-mịla lẹ.

⁹Ma, anụ ayịdang tị lẹ, anụ ri alebwo nya ụma nya angịlẹ ká Ohe Oluhye chụchụ ha ịlọmwụ lẹ. Anụ ri alebwo ikịla iya ha adịrahụ lẹ. Anụ tị ri alụma ịlẹ kị la ịgọgọ ịnyịnyị lẹ. Anụ a ri angịnyị nya Ohe Oluhye ayịdang ịnyịnyị lẹ. Ohe Oluhye chụnụ ịnyị, chajị kanụ ka juwa ya iru nya ụkụrwọ ẹbyẹbyị ịlẹ wuu kọọwa Ohe Oluhye Ọngọlẹ kọ gbanụ kpehe bwu ẹpwụ nya ukpowu nya ọhọbịrị ọhọhọ kaka ju ka ẹpwụ nya ahịgboo ọlẹbyẹbyị nyamwụ dodehe je angịnyị.

¹⁰Ene-ene lẹ, ịnọ, anụ ayịdang á ri angịnyị nya Ohe Oluhye kpong-kpong ka. Ma, ọlẹẹlẹẹ lẹ, anụ tị ri angịnyị nyamwụ lẹ. Ene-ene lẹ, ịnọ, anụ ayịdang á wu ahyẹẹrwẹrwa nya Ohe Oluhye ọyị kpong-kpong ka. Ma, ọlẹẹlẹẹ tị lẹ, anụ tị ri angị ye ahyẹẹrwẹrwa nya Ohe Oluhye lẹ.

¹¹Anụ angị hám há, lala angị ri angga bala angịlẹ kị kuku rụ hi ẹpwa ẹ-ẹpwụ nya odehe ọlẹ, m jam bịlẹnụ yẹkẹẹ, anụ chuchuu, kanụ cheji ba o-juwa ba imyi nya ugbinyịrọ ọlẹ kọ kaa juwa ma uya tụ ugbodu okpukpuru nyanụ pyịpyị ụka wuu jẹ mẹ.

¹²Kanụ juwa họ abwẹla ọnyịịla kem ịnyịnyịịnyị i-ijata nya angịlẹ kị jẹ́ Ohe Oluhye kaka mẹ. Chajị, ó riri ká angịịwa á juwa ya ẹla onyobyi yaya rụ́ụnụ lala anụ nyaa ri angị họ abwẹla onyobyi tụbwọ aalẹ, ká ụka kị ka yẹ abwẹla ọnyịịla ọhọhọ nyanụ wuu lẹ, kị ka gwogbo ha Ohe Oluhye la ẹnụtụrụ ọlẹ ká Ohe Oluhye ka chị ahị ọwawa nyamwụ ehe hanụ mẹ.

¹³Anụ́-ụ juwa chajị nya Ọngọlahị la, kanụ kpa ịlọnụ keji ha angịnyị ehe ịlẹ kị ri alegbeju igbeji nyanụ ilodehe ọlẹ mẹ. Ó riri kanụ juwa ị-ịlahị nya adịrahụ ọgbahị ọgụgụ wuu nya ọpyị nyanụ wẹwẹ,

¹⁴lee, ị-ịlahị nya adịrahụ ọkịla nya ọpyị ọ-la ịnyanụ ọlẹ kị du ẹrụ warị chajị nyọka juwa yẹ angị họ ang onyobyi akama bala ọ-ka juwa gwogbo ha angị họ ang ọnyịịla e-ekpeleji nyamwụ ịnyịnyị.

¹⁵Chajị, irya nya Ohe Oluhye chajị nyanụ ri yẹkẹẹ, ụka kanụ juwa họ ang ọnyịịla ịnyịnyịịnyị lẹ, kanụ ka bwula ọọwa tụ ọnụ nya angị jẹ́ ịngịngịhyẹ-ka bala aluchi ịlẹ kị juwa hu ọnụ danụ ku gbanggbang mẹ.

¹⁶Anụ́-ụ juwa la ọhịhị lala angịlẹ kanụ la ịlọnụ la lẹ mẹ. Ma, anụ tị myị ká ịlọnụ ọlala ọọwa a ri ịnya o-juwa họ ang onyobyi kpong-kpong koo. Ma, ọkọkọ nya ọọwa lẹ, anụ́-ụ juwa la ọhịhị ọlẹ kọ mẹjẹ yẹkẹẹ, anụ ri anchẹ ịnyịịla nya Ohe Oluhye mẹ.

¹⁷Anụ́-ụ juwa ju ihi nya angịnyị ehe wuu mẹ. Kanụ juwa la ọháha ọgẹnẹ-gẹnẹ nya anyadịda ẹ-ẹpwụ nya ịKịrayịsị ịnyịnyị mẹ. Anụ juhi nya Ohe Oluhye yẹẹyẹẹ ụka wuu. Kanụ ju ihi nya adịrahụ ọgbahị ọgụgụ wuu nya ọpyị nyanụ mẹ.

¹⁸Anụ anchẹ, anụ́-ụ juwa kpa ịlọnụ keji ha ayịbaba nyanụ anyị, kanụ juwa jwaa ihi yẹẹyẹẹ ẹ-ẹpwụ nya ang myị́ ang wuu mẹ. Anụ myị ká ihi ojujwọọwa á ba ẹ-ẹga nya angịlẹ kị juwa kpanụ la ụbwọ ọnahị bala ụbwọ ọmịlẹ-mịlẹ kem ka. Ma, anụ myị kọ juwa ẹ-ẹga nya ayịbaba ịlẹ kị juwa kpanụ la ụbwọ ọnyọọngịrị ịnyịnyị.

¹⁹Chajị, ọ ka ri ang o-ya dodehe ọnyịịla ha ọngịnyị, kọ ri ká ọngọọwa á juwa kpa uhi ojuju nya Ohe Oluhye la ugbodu ojuju ẹ-ẹpwụ nya akama ọyẹyẹ ododu bwu ẹpwụtụbwọ nya alọkwọ.

²⁰Chajị apyobwuna oyina, ọ tị́ ka ju hanụ, kọ ri ká ugbodu ojuju nyanụ anụ, á ri u-uhye nya enyiri o-nyiinu chajị nya ang onyobyi ọhọhọ nyanụ? Ma, ọ́ tị ri kọ ri ang ọnyịịla kanụ juwa họ kem, kị tị juwa yẹnụ akama ododu, kanụ wẹẹ la ugbodu ojuju ẹ-ẹpwụ nyamwụ aalẹ, Ohe Oluhye ayịdang tịtị ka wahị ọnyịịla hanụ o-oluhye nya ọọwa.

²¹Chajị, ajị nya anụ ọ-ka juwa ba ọgụ-ẹpẹtẹ nya ịKịrayịsị jẹ, ẹ-ẹpwụ nya akama ọyẹyẹ tọọ nyanụ, a du ká Ohe Oluhye be ẹkọ wụrụụnụ lẹ. Chajị, ịKịrayịsị ayịdang yẹ akama chajị nyanụ nyọka ri ang o-ju ẹjẹẹ hanụ ịnyị!

²²Anụ ayịdang tị́ jẹ́ yẹkẹẹ, ịKịrayịsị lẹ, ọ́ họ ang onyobyi ọhẹ-lọhẹ kpong-kpong ka. Lee, ọ kpa ọnụ nyamwụ pịrị ọngọngọhẹ ju ẹnẹnẹhẹ lẹka ịnyịnyị.

²³Ụka ká angịnyị ehe juwa chị oyoyi ju iJisọsị bwula ido o-doo do lẹ, iJisọsị á daa ido tịtị kwiwa kpong-kpong ka. Ụka ọlẹ ká angịnyị ehe juwa yọọ akama ododu tị lẹ, ịKịrayịsị ayịdang á kpa ang onyobyi ọ-ka họ angịịwa họ kwiwa, jwaa uhi-uhi kpong-kpong ka. Ma, ọkọkọ nya ọọwa lẹ, ọ tụụbwọ hi ịlọmwụ ju Ohe Oluhye Ọngọlẹ kọ kaa la eje ọkpẹẹkpẹẹ ụ-ụbwọ.

²⁴ỊKịrayịsị ayịdang a ri ọngọlẹ kọ ye akama nya ịhọbịrị nyahị ahị angịnyị ehe kpa u-uhye nya ugbinyịrọ nyamwụ bwula igu ọlẹ kọ gbu u-uhye nya okoji lẹ. Ọ họ ịnyị chajị kaahị angịnyị nya Ohe Oluhye ka jẹ́-ẹ gbugbu ẹ-ẹga ká ọhọbịrị ọhọhọ ji, kahị ka juwa hịhị ẹ-ẹpwụ nya abwẹla ọnyịịla ọhọhọ nya Ohe Oluhye kem. Abẹ nya enyiri ịlẹ kị nyi iJisọsị a ri ang ọlẹ kọ kaa kpa họnụ anụ angị myịmyị uda nya ẹdụrụ lẹlẹ.

²⁵Chajị, ene-ene lẹ, anụ ri angị hwahị bwula ọhọbịrị ọhọhọ lala ọkpịlọ obyibyi. Ma, lẹẹlẹẹ lẹ, anụ tị nya tịrẹkpẹ ka ẹga nya ịKịrayịsị ugbẹnyị lẹ. ỊKịrayịsị a ri olegbeju o-gbe ọkpịlọ nyanụ bala o-ri ọngọ kpẹhị rịrị ugbodu okpukpuru nyanụ lẹ.