Read idege 1 IPITA 3 Bible Online

1 IPITA 3 - idege bible

1 IPITA 3

¹Anụ anyang ịhụ, anụ́-ụ juwa kpa ịlọnụ keji ha ọrụ nyanụ anyị yẹẹyẹẹ mẹ. Chajị ká, ó riri ká ọrụ nya angịhyẹ nyanụ á ri angị myịmyị la ẹla nya Ohe Oluhye ene-ene wẹwẹ ka aalẹ, ká ọhịhị ọnyịịla ọlala nya ịhụ nya angịịwa ka yáa irya da ha Ohe Oluhye mẹ.

²Ịrụ-ịhụ ịịwa ka yẹ irya da myị́ lụka ọlẹ kịịwa ayịdang ka juwa yẹ uhi ojuju nya Ohe Oluhye ọlẹga nya ịhụ nyaa bala jaabwọ ká ịhụ ịịwa juwa la ọhịhị ọcharị-charị bwula ụya ọhọhọ kpong-kpong ka ịnyịnyị.

³Anụ ịhụ, a myị ká ụhị ọháha nyanụ anụ a ri ịnya ịyang ọhọhọ ọ-la ugbinyịrọ olodehe ọwẹ bwula inyi i-juwa gugu nwurwo-nwurwo kem bala o-juwa kpa ịjang nya ikpoko ịgọm bala ịwụrụ ịlịnya lụmẹ họ ịyang nyanụ kpong-kpong koo!

⁴Ma, ọkọkọ nya ọọwa lẹ, anụ́-ụ myị ká ịyang ọhọhọ nyanụ anụ a ri ịnya olegu ọdụmwọ ọlala bala ọwụlẹlẹ ọlala ọlẹ kọ ri ang oku ọmwakpa nya ịjang ọlẹ kọ kaa ta ayịreji kaka nya ọngịnyị ọlẹpwụ ọkịlẹtụ nyanụ ọ-pyịị ọlaanyị mẹ. Chajị, olegu ọlịnyị kpangga a ri ang ọlịnya lụmẹ ị-ịlahị nya Ohe Oluhye lẹ!

⁵Chajị, ụma nya ọhịhị ọlịịwẹ ọhọhọ kpangga, anyang ịlịgọgọ ịlẹ kị la ẹhị ọrịrịị-rịrị ọnyịịla ẹ-ẹga nya Ohe Oluhye lụka onyogo, a kaa chị ịyang ọhọhọ nyaa ehe bwula, o-juwa kpa ịlaa keji ha ọrụ nyaa ịwa tịtị lẹ.

⁶Olegu ọlịnyị kpangga, iSera a la du kọ juwa kaa ju Ebiraham ọrụmwụ ihi ịnyịnyịịnyị, kaa juwa wụrwọọ yẹkẹẹ, Ayịbam lẹ. Ó ri kaanụ ayịdang á myị juwa họ abwẹla ọnyịịla ọlẹ kọ ka du kanụ ka la ọnụ o-ya ẹla myị́ lẹ aalẹ, anụ anyị a tị tị ri anyị nya iSera ẹ-ẹpwụ nya ọmyịmyị ọlala lẹẹlẹẹ lẹlẹ.

⁷Anụ ịrụ-ịhụ anyị, anụ́-ụ juwa kpahị ju ịhụ nyanụ anyị yẹẹyẹẹ, kanụ juwa jwaa ihi jaabwọ kịịwa anyang ri angị mịlẹ-mịlẹ gụụnụ anụ alẹng mẹ. Chajị, anụ bala ịwa anyị a bába ri angị la ugu nya ọgahị ọnahị nya ọhịhị nya Ohe Oluhye ọlẹ lẹ. Chajị ká ọ-jẹ́ họhọ-ka nyanụ tụtụm ka kunu iwe la o-ye ọwẹwẹ nya abwọ ọrịrị ha Ohe Oluhye nyanụ kpong-kpong kaka mẹ.

⁸Ẹla otuku nyam ri yẹkẹẹ, anụ cheri kanụ juwa la ọtụchawụlẹ ẹ-ẹpwụ nya olegu nyanụ bala o-juwa la olegu nya ahyẹẹrwẹrwa ẹ-ẹga nya awụlẹ, kanụ juwa la ọháha ẹ-ẹga nya anyadanụ ịkịla ẹ-ẹpwụ nya ịKịrayịsị ịnyịnyị bala o-juwa la ọkịlẹtụ ọ-jẹ́ ahyẹẹrwẹrwa ẹ-ẹga nya awụlẹ, kanụ juwa la dụmwọ ẹ-ẹpwụ nya irya omeme ọlala nyanụ wuu mẹ.

⁹Kanụ ri angị juwa kpa ang onyobyi nwụ angị họnụ ang onyobyi uri kpong-kpong ka. Lee, o-juwa kpa ido ododo nwụ angịlẹ kị juwa doonu ido uri kwiwa ka ịnyịnyị. Ma, ọkọkọ nya ọọwa lẹ, anụ́-ụ juwa ri angị wahị kụrụ angịkịla kem mẹ. Chajị, ajị nya ahị ọwawa ọ-ka yeye bwu ẹga nya Ohe Oluhye kpangga, a du kọ be ẹkọ wụrụụnụ kaka ri angịnyị nya ịlọmwụ lẹ.

¹⁰Chajị, ị da ụ-Ụpwụ Ịgọgọ yẹkẹẹ, “Ọng myị́ ọng ọlẹ ká ọhịhị nyamwụ á họ́ọ bala o-juwa tịtọ kọ ka jẹ́ ịpyọ ọkpụkpụ ẹ-ẹpwụ nya ahị ọpyẹpyẹ ọnyị myị ọnyị nya ọhịhị nyamwụ odehe ọlẹ lẹ, aalẹ, ọngọọwa a tị tị juwa wu ẹlẹlẹ nyamwụ kpa hi ẹla ọtịpyọ oyaya, kọ juwa wu ugbọnụ nyamwụ kpa bwu ẹpwụ nya ẹla ọpịrị ju oyaya dodehe ịnyịnyị mẹ.

¹¹Ká ọngọọwa a ji ẹkpẹ nyamwụ da ang onyobyi ọhọhọ kọ juwa họ ang ọnyịịla kem mẹ. Ká ọngọọwa a juwa tịtọ nya okpunyi bala o-juwa rụnyẹ nya okpunyi kem ịnyịnyị mẹ.

¹²Chajị, egbahị nya Ọngọlahị la juwa kaa gbe alabwẹla ọnyịịla ụka wuu. Ụrụ nya Ọngọlahị la tị kaa wụrụ da dodo gbe abwọ ọrịrị nyaa ịnyịnyị. Ma, Ọngọlahị tị kaa la ẹhị onyobyi tụ angịlẹ kị ri angị họ abwẹla onyobyi pyịpyị.”

¹³Oowo a tị́ juwa ka họnụ abwaabwọhẹ tụtụm wẹẹ, kọ ri kanụ juwa la ila ọchịchị nyọka họ ang ọnyịịla kem?

¹⁴Ma, ọ́ tị dọmwụ riri kanụ yẹ akama yẹyẹ chajị nya abwẹla ọnyịịla ọhọhọ nyanụ tụbwọ aalẹ, ọ ka yẹ ri ahị ọwawa hanụ lụka ohyẹẹkpẹ ị-ịlahị nya Ohe Oluhye. Chajị nya ọọwa lẹ, anụ juwa juhi nya angịnyị ehe kpong-kpong ka lee o-juwa la ugbodu o-gu ene kaka ịnyịnyị.

¹⁵Ma, ọkọkọ nya ọọwa, anụ́-ụ tụtụ juwa la uhi ojuju ẹ-ẹga nya ịKịrayịsị lala Ọngọlahị la ẹ-ẹpwụ ọkịlẹtụ nyanụ mẹ. Anụ́-ụ juwa nwụlanọ yẹẹyẹẹ ụka wuu, chajị ó ri ká ọngọngọhẹ á ka tọnụ ịtọ u-uhye nya ang odudu kanụ juwa la ẹhị ọrịrịị-rịrị ẹ-ẹga nya ịKịrayịsị lẹ, kanụ ka jẹ́-ẹ kpa olegu ọdụmwọ bala olegu nya uhi ojuju ẹ-ẹga nya ịKịrayịsị, dẹwụ ju ẹhị ọrịrịị-rịrị nyanụ ọọwa ya jaa yẹẹyẹẹ mẹ.

¹⁶Anụ họ ang onyobyi ọhẹ-lọhẹ ọlẹ ká irya ọ-la ọngịnyị eje ọlẹpwụ nyanụ ka ya eje wunu u-uhye nya ịngịngịhyẹ kaka mẹ. Chajị kọ riri ká angịnyị á juwa doonu ido wẹwẹ tụbwọ aalẹ, ká oyoyi ka jẹ́-ẹ ri nya angịịwa ịlẹ kị wẹẹ doonu ido o-oluhye nya abwẹla ọnyịịla ọhọhọ nyanụ ẹ-ẹpwụ nya ịKịrayịsị mẹ.

¹⁷Chajị, ọ ka ri ang ohiigu nyọka juwa yẹ akama u-uhye nya abwẹla ọnyịịla ọhọhọ kọ ri ká akama ọyẹyẹ ọlịnyị á ri irya nya Ohe Oluhye chajị nyanụ, gụ ọ-ka juwa yẹ akama chajị nya ang onyobyi ọhọhọ.

¹⁸Chajị, ịKịrayịsị ọlabwẹla ọnyịịla gbu igu ọlụka ookpokpo ọlẹ kọ nwa ụga ọ-pyịyọọ chajị nya ịhọbịrị nyahị ahị angịnyị ehe wuu. ỊKịrayịsị gbu igu ọọwa wọnụ nyahị ahị alabwẹla onyobyi ju, chajị kọ ka jẹ́-ẹ bwula ọọwa kpahị kịla Ohe Oluhye. Chajị, ọ ri nya ịlẹhị, ịKịrayịsị gbu igu nya ugbinyịrọ. Ma, ọ tị juwa hịhị bwu ọngịrị nya Olegu Ịgọgọ lẹ.

¹⁹Ịnyị a du kọ rụ kele kaka ya ẹla nya Ohe Oluhye ju ugbodu okpukpuru nya angịlẹ kị juwa ẹ-ẹpwụ nya agba ojuju lẹ.

²⁰Ugbodu okpukpuru nya angịịwa a ri angịlẹ kị myị ju ihi nya ẹla nya Ohe Oluhye ka, lụka ọlẹ ká Ohe Oluhye juwa kpa ugbodu ojuju onyudiyo nyamwụ godayị lụka ọtata la oyi nya iNuwa, lụka ọlẹ ká iNuwa juwa kpa ụgbọ nya enyi nyamwụ kọ lẹ. Ịnyị lẹ, angịnyị ịmanyị-ịmanyị lala angịnyị angị ineku kem a juwa ẹ-ẹpwụ nya ụgbọ nya iNuwa ọọwa, du kị chịda bwu ẹpwụ nya ukpenyi ọtụka-ọtụka ọọwa ugbeene lẹ.

²¹Ịnyị, enyi Ohe ọhụhụ nya ang o-ju ẹjẹẹ nya ọchịda nya ugbodu okpukpuru nyanụ ọ-la lẹẹlẹẹ a ri ang oku ọmwakpa nya ụgbọ nya enyi nya iNuwa ọọwa alẹ lẹlẹ. Chajị, enyi Ohe ọhụhụ nyanụ ọọwa á ri ịnya ịrị nya ugbinyịrọ ọlẹ ọhụ́hụ kpong-kpong ka. Ma, enyi Ohe ọhụhụ ọọwa ri ang o-ju ẹjẹẹ yẹkẹẹ, ahị bịlẹ Ohe Oluhye chajị kọ ka hụ́ụhị cheri-cheri ká irya ọlọngịnyị eje ọlẹpwụ nyahị ka ya eje wuhi kaka, bwula owuleji bwula igu nya iJisọsị ịKịrayịsị lẹ.

²²Chajị ịKịrayịsị ọọwa a ri ọngọlẹ kọ rụ kele ka epwoohe kaka hụhụ u-upwuriri nya Ohe Oluhye Adịda du ká alegu-ẹrụ wuu bala alegbeju nya ọngịrị nya eji ogbegbe wuu bala ọngịrị myị́ ọngịrị wuu ji ekpeleji nya ịKịrayịsị lalẹ lẹlẹ.